ممبئی۔ ۲؍اگست: (خان افسر قاسمی) مہاراشٹر میں لاک ڈائون پابندیوں پر اب نرمی کی گائیڈ لائن جاری کی گئی ہے بریک دی چین کے تحت ریاست کے ۲۲ اضلاع کے تاجروں کےلیے یہ بڑی خبر ہے ان ۲۲ اضلاع میں رات ۸ بجے تک دکانیں کھولنے کی اجازت دی گئی ہے۔

(اردو اخبار دنیا)

ممبئی۔ ۲؍اگست: (خان افسر قاسمی) مہاراشٹر میں لاک ڈائون پابندیوں پر اب نرمی کی گائیڈ لائن جاری کی گئی ہے بریک دی چین کے تحت ریاست کے ۲۲ اضلاع کے تاجروں کےلیے یہ بڑی خبر ہے ان ۲۲ اضلاع میں رات ۸ بجے تک دکانیں کھولنے کی اجازت دی گئی ہے۔ اس کے علاوہ دکانیں اب سنیچر کو بھی دوپہر تین بجے تک کھولنے کی اجازت رہے گی صرف اتوار کو دوکانیں بند رہیں گی؛ لیکن یہ واضح کردیں کہ پہلے ممبئی اور تھانے کے لیے اس نئی گائیڈ لائن میں نرمی کا اعلان نہیں کیاگیا تھا، نرمی کے متعلق فیصلہ ڈیزاسٹرمنیجمنٹ اتھاریٹی پر چھوڑدیاگیا تھا؛ لیکن تازہ ترین اطلاعات کے مطابق ممبئی اور مضافات ممبئی میں بھی پابندیوں میں نرمی دی گئی ہے۔ اور یہاں دکانیں شب کے دس بجے تک کھلی رکھنے کی اجازت کی خبریں موصول ہورہی ہیں۔ ۲۲ اضلاع میں بریک دی چین مہم کے تحت لاک ڈاون سے متعلق پابندیوں میں چھوٹ دی گئی ہے ۔ باقی ۱۱ اضلاع میں جہاں کورونا کے مریض زیادہ ہیں وہاں پابندیوں میں کوئی چھوٹ نہیں دی گئی ہے، یہاں لیول تھری کے تحت پابندی برقرار رکھی گئی ہے۔ یعنی ان ۱۱ اضلاع میں دکانیں شام چار بجے تک ہی کھلی رہیں گی وہیں سنیچر اور اتوار کو مکمل بند رہیں گی۔ ان گیارہ اضلاع میں پونے، ستارا، سانگلی، کولہا پور، احمد نگر، سولا پور، رائے گڑھ، رتنا گیری، سندھو درگ، بیڑ، پال گھر شامل ہیں۔ پرائیوٹ اور سرکاری آفس ۱۰۰ فیصد، ہوٹل ریسٹورنٹ پچاس فیصد شام چار بجے تک، مال بھی سوموار سے جمعہ رات آٹھ بجے تک کھلے رہیں گے، سنیچر کو دوپہر تین بجے تک کھلے رہیں گے۔ جم، یوگا سینٹر، اور سیلون کو بھی آٹھ بجے تک پچاس فیصد کھولنے کی اجازت دی گئی ہے، لیکن اے سی کے استعمال سے منع کیاگیا ہے ۔ یہ سبھی جگہیں اتوار کو مکمل بند رہیں گی۔ فی الحال مذہبی مقامات ، تھیٹر، سنیما ہال بند رہیں گے، سماجی پروگرام کو بھی اجازت نہیں ہے، سیاسی اجلاس پر بھی پابندی قائم رہے گی۔ ممبئی لوکل ٹرین بھی عام مسافروں کے لیے بند رہے گی۔ نئی گائیڈ لائن میں ممبئی لوکل کا کہیں کوئی ذکر نہیں ہے۔ اپوزیشن مسلسل ویکسن کے دونوں ڈوژ لے چکے عوام کےلیے لوکل سروس شروع کرنے کا مطالبہ کررہی ہے ۔ آج ۲ اگست کو بامبے ہائی کورٹ نے بھی حکومت سے سوال کیا ہے کہ دونوں ڈوژ لے چکے عوام کو ممبئی لوکل پر سفر نہ کرنے دینے کی وجہ کیا ہے؟، ہائی کورٹ میں اگلی سماعت جمعرات کو ہوگی ۔