گرگاؤں میں کھلے مقام پر نماز جمعہ کی ادائیگی سے قبل پھرحالات خراب کرنے کی کوشش

گرگاؤں میں کھلے مقام پر نماز جمعہ کی ادائیگی سے قبل پھرحالات خراب کرنے کی کوشش

گرگاؤں: دہلی کے قریب ہریانہ کے گرگاؤں کھلے مقام پر نماز جمعہ کی ادائیگی سے عین قبل ہندو تنظیم سے وابستہ افراد نے پھر تنازعہ کھڑا کرنے کی کوشش کی ۔ پولیس اگرچہ جمعہ کے روز مجموعی طور پر 37 مقامات پر نماز ادا کرنے کی اجازت فراہم کی ہے تاہم یہ تنظیم گزشتہ 5 ہفتوں سے لگاتار ماحول خراب کرنے کی کوشش کررہی ہے۔ آج جمعہ کے روز جیسے ہی نماز کا وقت ہوا تنظیم کے ارکان نماز کے مقام پر پہنچ کر ہنگامہ کرنے لگے۔ پولیس نے ان میں سے 13 افراد کو حراست میں لیا ہے۔

"قرآن پاک کی اردو تفاسیر" :ایک مطالعہانوار الحسن وسطوی

"قرآن پاک کی اردو تفاسیر" :ایک مطالعہ

انوار الحسن وسطوی 

_______________________________________

 زیر مطالعہ کتاب کے مصنف ڈاکٹر سید شاہ حیدر رضوی ہیں جن کا تعلق سرزمین بہار کے ایک مشہور و معروف علمی خانوادے سے ہے- محترم ڈاکٹر طلحہ رضوی برق قبلہ مد ظلّہ العالی کو کون نہیں جانتا- ڈاکٹر حیدر رضوی صاحب حضرت موصوف کے برادر عزیز ہیں- ڈاکٹر حیدر رضوی کی مذکورہ تصنیف دراصل ان کا وہ تحقیقی مقالہ ہے جس پر انھیں 2008 میں  پٹنہ یونیورسٹی سے پی ایچ - ڈی کی ڈگری تفویض ہوئی تھی- اس تحقیقی مقالے کے نگراں ڈاکٹر ذکی الحق مرحوم و مغفور شعبہ اردو بی این کالج پٹنہ مقرر ہوئے تھے لیکن ان کے انتقال فرما جانے کے سبب ڈاکٹر خواجہ افضل امام شعبہ فارسی پٹنہ کالج کے زیر نگرانی یہ مقالہ پایہ تکمیل کو پہنچا- کتابی شکل میں یہ مقالہ 2018 میں زیور طباعت سے آراستہ ہوا ہے جو 392 صفحات پر مشتمل ہے- ڈاکٹر حیدر رضوی نے اپنی اس تصنیف کا انتساب اپنے والدین سید شاہ سراج الدین رضوی مرحوم و بی بی وسیع النساء مرحومہ کے نام کیا ہے-

 زیر تذکرہ کتاب "قرآن پاک کی اردو تفاسیر" پانچ ابواب پر مشتمل ہے-" باب اول" میں تمہیدی کلمات کے طور پر تفسیر کی تعریف، اس کی ضرورت اور اس کے تاریخی پس منظر پر روشنی ڈالی گئی ہے - "باب دوم" فارسی تفاسیر سے متعلق ہے، گرچہ یہ مقالہ کا موضوع نہیں ہے مگر پس منظر کے طور پر اس کا ذکر ناگزیر اس لیے تھا کہ قرآن پاک کے ترجمے اور تفسیر کی پہلی کوشش جس زبان میں کی گئی وہ فارسی ہے-" باب سوم" میں اردو زبان کی پیدائش اور اردو ادب کے ارتقائی سفر کے سلسلے میں گفتگو کرتے ہوئے ان اردو تفاسیر کا ذکر کیا گیا ہے جو یا تو جزوی طور پر ہیں یا پھر مکمل صورت میں ہیں - جزوی تفاسیر وہ ہیں جن میں مختلف سورتوں اور آیات کریمہ کی تفسیر یں ہیں جن کی تعداد 44 بتائی گئی ہے اور تفصیلی تفسیریں وہ ہیں جو مکمل تیس پاروں پر مشتمل ہیں - ان مکمل تفاسیر کی تعداد37 شمار کرائی گئی ہے - اس باب کی خصوصیت یہ ہے کہ تمام تفاسیر کا مختصر تعارف بھی بطور نمونہ پیش کیا گیا ہے- اس باب کے مطالعے سے مصنف کے دقت نظر، وسعت مطالعہ اور  ذوق تحقیق کی داد دینی پڑتی ہے-" باب چہارم" میں ہندوستان کے جن سات ممتاز معروف مفسرین کرام کے احوال و آثار کا مفصل ذکر کیا گیا ہے ان کے اسمائے گرامی ہیں مولانا ابوالکلام آزاد، مولانا ثناء اللہ امرتسری، سرسیداحمدخان، مولانا عبد الماجد دریابادی، مولانا اشرف علی تھانوی، مولانا ابوالاعلی مودودی اور مولانا محمد شفیع- ڈاکٹر سید شاہ حیدر رضوی نے مذکورہ شخصیات کی تفسیری خدمات کے مفصل بیان کے ساتھ دوسرے میدان عمل میں بھی ان کی نمایاں خدمات کا نہ صرف ذکر کیا ہے بلکہ ان کے سوانحی حالات کے ساتھ ساتھ ان کے امتیاز، ان کی انفرادیت اور ان کی علمی، ادبی،تحریری اور تقریری صلاحیت کو بیان کرتے ہوئے ان کے تعلق سے سیر حاصل گفتگو کی ہے - کتاب کے اس باب کا مطالعہ مذکورہ تمام شخصیتوں کو سمجھنے اور جاننے کا بہترین وسیلہ ہے - یہ تحریریں قاری کے علم میں اضافے کی حیثیت رکھتی ہیں - اس باب کی دوسری اور ایک بڑی خصوصیت یہ ہے کہ مصنف نے مذکورہ شخصیات کے تعارف اور ان کی خدمات کے ذکر میں مسلکی عینک کا استعمال نہیں کیا ہے اور اظہار بیان میں مکمل دیانت داری اور وسیع النظری کا مظاہرہ کیا ہے - مصنف موصوف کا یہ عمل قابل تعریف بھی ہے اور قابل تقلید بھی- " باب پنجم" اس مقالے کا آخری باب ہے جسے "ماحصل" بھی کہا جا سکتا ہے- اس باب میں تفسیر کی مذہبی ادبی اور لسانی اہمیت پر روشنی ڈالی گئی ہے- کتاب کے آخر میں ان کتابوں، اخبارات و رسائل کی فہرست درج ہے جن سے مقالے کی ترتیب میں مدد لی گئی ہے-

   کتاب کے آغاز میں بعنوان" پیش آہنگ" (از :پروفیسر طلحہ رضوی برق)" تقریظ" (از: ڈاکٹر پروفیسر حبیب المرسلین شیدا، پٹنہ یونیورسٹی) اور" افتتاحیہ" (از :ڈاکٹر لیاقت علی خان، یو پی) تین پر مغزاور بصیرت افروز تحریریں شامل کتاب ہیں جن کے مطالعے سے جہاں ڈاکٹر سید شاہ حیدر رضوی کی زیر تذکرہ کتاب کو بنظر غائر پڑھنے کی ترغیب ملتی ہے وہیں ان تحریروں کے مطالعے سے علم و بصیرت کے کئ دریچے بھی وا ہوتے ہیں- قارئین کی دل چسپی کے لیے مذکورہ تحریروں سے اقتباسات پیش کیے جاتے ہیں:-

* "اس گراں قدر مقالے کے مصنف میرے برادر عزیز ڈاکٹر سید شاہ حیدر رضوی مدعمرہ ہیں - الحمد اللہ کی یہ مقالہ اپنی گوناگوں تحقیق کی خصوصیات اور لسانی خوبیوں کی وجہ سے بے نظیر ہے- ہر چند تحقیقی دروازہ کبھی بھی بند نہیں ہوتا اور مزید تحقیق کے امکانات و مواقع باقی رہتے ہیں - مصنف موصوف نے بڑی محنت، تلاش و جستجو اور عمیق مطالعے کے بعد اپنی تحقیقات کو خوبصورتی سے مرتب کیا ہے - "

(پروفیسر طلحہ رضوی برق-ص:16)

* " یہ مقالہ چونکہ بلاامتیاز مسلک و مذہب اور عقائد ہر مکتب فکر کے مفسرین کی لکھی ہوئی تفاسیر کا جامع ہے، اسی کا نتیجہ ہے کہ پیش نظر "قرآن پاک کی اردو تفاسیر" کا مطالعہ مختلف مذہبی اور فرقوں کے افکار و آراء کو سمجھنے کا اچھا اور موثر ذریعہ ہے اور اسے دین کے مختلف مذہبی گروہوں کے افکارو آراء اور معتقدات کے مطالعے کا اچھا وسیلہ قرار دیا جا سکتا ہے-"

( ڈاکٹر پروفیسر حبیب المرسلین شیدا - ص:23-24)

* " جناب ڈاکٹر سید شاہ حیدر رضوی صاحب کا "قرآن پاک کی اردو تفاسیر" پر تجزیاتی مضمون(Thesis) اردو داں طبقے کے لیے بڑا ہی نادر اور قابل ستائش قدم ہے - محترم مصنف کو یا کسی اور کو اس بات کی کوشش کرنی چاہیے کہ اسی طرح کی مزید کوشش دوسری ہندوستانی (ملکی) زبانوں میں بھی ہو تا کہ قرآن پاک جو کہ بلاغ للناس ہے، اس کا حق ادا ہوسکے-"

( ڈاکٹر لیاقت علی خاں- ص، 31)

  ڈاکٹر سید شاہ حیدر رضوی نے اپنی گراں قدر قابل تعریف اور قابل رشک تحقیقی کاوش کو اپنی کم علمی اور بے بضاعتی پر محمول کرتے ہوئے نہایت عاجزی اور خاکساری کے ساتھ تحریر فرمایا ہے:

" 'الانسان مرکب من الخطا والنسیان' کے مصداق میں بھی ایک انسان ہوں- اپنی کم علمی و بے بضاعتی کا احساس و اعتراف کرتے ہوئے 

حتی الامکان میں نے کوشش کی ہے کہ اس تحقیق میں کوئی تشنگی باقی نہ رہے - پھر بھی اہل علم وہ ارباب نظر سے چشم عطا و عفوخطا  کا امیدوار ہوں-"

(" عرض مؤلف" ص:43")

 ڈاکٹر سید شاہ حیدر رضوی کی پیش نظر تصنیف "قرآن پاک کی اردو تفاسیر" اردو زبان میں تفسیری خدمات کا بہترین جائزہ ہے - یہ کتاب نہ صرف دینی نقطہ نظر سے استفادے کی چیز ہے بلکہ اس کی ادبی و لسانی حیثیت بھی مسلم ہے- اس کتاب کے ذریعے شروع سے ابھی تک اردو میں لکھی گئی تفسیروں سے جہاں قاری کی واقفیت ہوتی ہے وہیں اردو زبان کی پیدائش اور اس کے ارتقاء کے تعلق سے بھی قاری کے علم میں اضافہ ہوتا ہے- اس کی یہ کاوش دینی و دنیاوی دونوں اعتبار سے قابل قدر اور قابل ستائش ہے - میں دل کی عمیق گہرائیوں سے مصنف موصوف کو مبارکباد دیتا ہوں اور ان کی صحت و تندرستی کے ساتھ ان کی درازئ عمر کی بھی دعا کرتا ہوں- اس گراں قدر اور قابل استفادہ کتاب کی قیمت 450 روپے ہے جسے سید فرحان رضوی، نواب کوٹھی، نزد گرلس آئی ٹی آئی (گیٹ نمبر 97) دیگھا، پٹنہ - 11 اور "بک امپوریم" اردو بازار، سبزی باغ، پٹنہ- 4 سے حاصل کیا جا سکتا ہے -کتاب کے تعلق سے مزید معلومات کے لئے مصنف کے موبائل نمبر 9708978329 سے رابطہ کیا جا سکتا ہے -

تری پورہ میں مسلمانوں اورمسجدوں پرحملہ قابل مذمت : انیس الرحمن قاسمی

تری پورہ میں مسلمانوں اورمسجدوں پرحملہ قابل مذمت : انیس الرحمن قاسمی

پھلواری شریف (پریس ریلیز)
تری پورہ میں مسلمانوں کے گھروں اورمسجدوں پرہونے والے حملوں کی شدیدمذمت کرتے ہوئے آل انڈیاملی کونسل کے قومی نائب صدرمولاناانیس الرحمن قاسمی نے اسے سرکارکی ناکامی بتایااورکہاہے کہ اقلیتوں کوتحفظ دینا،ان کے عبادت خانوں اورگھروں کی حفاظت کرناتری پورہ سرکارکی بنیادی ذمہ داری ہے،مولاناقاسمی نے کہا کہ پچھلے کئی دنوں سے لگاتارتری پورہ میں مسلمانوں پرحملہ کیاجارہاہے،ان کے گھروں کاتوڑاجارہاہے،قرآن کریم کی بے حرمتی کی گئی ہے،ان کونقصان پہنچایاگیا ہے جوبے حدشرمناک ہے،مرکزی سرکارکوچاہیے کہ وہ اقلیتوں کی حفاظت کویقینی بنائے اورجس طرح بھارت میں لگاتارمسلمانوں پرحملہ ہورہاہے،ماب لنچنگ کی جارہی ہے،مسلمانوں کافرضی انکاؤنٹرکیاجارہاہے،مسلمانوں کوجیلوں میں بندکیاجارہاہے،جوسرکار کی ناکامی ہے، مولاناقاسمی نے اپیل کی ہے کہ سرکاراپنی ذمہ داری اداکرے، ملک کے ماحول کوپرامن بنائے،اقلیتوں کومحفوظ کرے اوران پرہونے والے لگاتارحملوں کوروکے اورجولوگ اس طرح کے حملوں میں ملوث ہیں،انہیں عبرتناک اورسخت سزادی جائے اورمساجدکی ازسرنوتعمیرکرائی جائے اورتباہ گھروں کامکمل معاوضہ دیاجائے۔مولانانے کہاکہ آل انڈیاملی کونسل کے جنرل سکریٹری ڈاکٹرمحمدمنظورعالم نے ان واقعات پرمذمت کرے ہوئے ان کی اعلیٰ سطحی جانچ کرانے کا مظلومین کی دادرسی کے لیے حکومت سے معاوضہ کامطالبہ کیا،نیزمرکزی حکومت سے ریاستی حکومت پرگرفت کرنے کامطالبہ کیا،انہوں نے حامی پولیس والوں کے خلاف بھی کاروائی کامطالبہ کیا۔

انتخاب کے بعد امراء شریعت کے احساسات وخیالاتمفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ

انتخاب کے بعد امراء شریعت کے احساسات وخیالات

مفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ 

عبد الرحیم دربھنگہ وی

اسلام میں عہدے اور منصب کا تعلق نہ تو روایتی جاہ وحشم سے ہے اور نہ ہی حکمرانی اور ملوکیت سے ، یہاں عہدہ کا مطلب ذمہ داری اور فرائض کی ادائیگی کا وہ احساس ہے جو انسان کو قوم کا خادم بنا دیتا ہے ، اسی وجہ سے سید القوم خادمہم کہا گیا ہے۔  امارت شرعیہ کے سارے امراء کے احساسات انتخاب کے بعد یہی تھے اور سب نے اس بات کا اظہار کیا کہ یہ ایک ذمہ داری ہے ، جس کی ادائیگی کے لیے اللہ رب العزت سے دعا بھی کرنی چاہیے اور مسلمانوں کو سمع وطاعت کے جذبہ سے تعاون بھی کرنا چاہیے، اس کے بغیر اس اہم منصب کی ذمہ داری کا ادا کرنا عملا ممکن نہیں ہے، یہ احساس ذمہ داری اس قدر حاوی ہوتا تھا کہ عوام بھی یہ مان کر چلتی تھی کہ یہ عہدہ ایک آزمائش ہے، اب تو عہدہ ملنے پر مبارکبادی دی جاتی ہے اور ہر چھوٹا بڑا اس میں سبقت لے جانا چاہتا ہے۔ ماضی میں متعلقین تعزیت اور پُر سہ کے لیے جاتے تھے کہ اب آزمائشیں اس شخص پر بارش کی طرح نازل ہوں گی وہ دعا کرتے تھے کہ اللہ عزم وحوصلہ اور استقامت سے نوازے۔

 امارت شرعیہ کے امراء شریعت بھی انتخاب کے بعد ان ہی احساسات کے حامل تھے، انہوں نے اپنے پہلے خطاب یا احکام میں واضح کر دیا کہ امارت شرعیہ کی کشتی کو کس طرح آگے بڑھانا ہے، اس کے حدود وقیود کیا ہوں گے اور کن اصول وضوابط کے ساتھ کام کرنا ہے ، چنانچہ پہلے امیر شریعت حضرت مولانا سید شاہ بدر الدین قادری ؒ پہلے تو اس ذمہ داری کو قبول کرنا ہی نہیں چاہتے تھے، لیکن لوگوں کے اصرار خاص کر قطب عالم حضرت مولانا محمد علی مونگیری ؒ کے کہنے سے اس عہدہ کو قبول کیا۔ ۱۹؍ شوال ۱۳۳۹ھ کو امارت شرعیہ کا قیام اور امیر کا انتخاب ہوا تھا، دوسرے دن حضرت امیر شریعت اول نے اپنے پہلے فرمان میں لکھا کہ 

’’تمام مسلمانوں کو سمجھ لینا چاہیے کہ امارت کا مقصد کیا ہے ؟ خدمت وحفاظت اسلام ، بقاء عزت وناموس دین، اجراء احکام شرعیہ جو بجز اجتماعی قوت کے ممکن نہیں ہے ، ان مقاصد ومصالح شرعیہ کو پیش نظر رکھ کر میں اسی نوع کے احکام جا ری کروں گا، جس سے حیات اجتماعی کو تعلق ہو اور وہ ایسے احکام ہوں گے جو مسلمانوں کی کسی جماعت کے خلاف نہ ہوں۔‘‘

 آگے لکھتے ہیں:  آج میں محسوس کرتا ہوں کہ میری ذمہ داریاں کسی قدر بڑھ گئی ہیں ، ہمارا فرض ہوگا کہ کسی مسلمان کو کسی قسم کی تکلیف نہ پہونچے‘‘ (دینی جد وجہد کا روشن باب)

امیر شریعت اول کے وصال کے بعد ۹؍ ربیع الاول ۱۴۴۳ھ کو حضرت مولانا سید محی الدین قادری ؒ امیر شریعت ثانی منتخب ہوئے، انتخابی اجلاس میں ہی بحیثیت امیر شریعت آپ نے اپنے قیمتی اور کلیدی خطاب میں فرمایا:

’’حضرات! آج آپ نے جو بار اور بوجھ میرے سر ڈالا ہے، میں ہرگز اس کو اٹھانے اور بر داشت کرنے کی صلاحیت نہیں رکھتا ہوں، لیکن جب آپ حضرات اتفاق رائے سے مجھ پر یہ بار ڈال رہے ہیں تو میں صرف اس لیے کہ میرے انکار سے تفرقہ کا خوف ہے، مجبور ہو کر قبول کرتا ہوں، آپ کو سمجھ لینا چاہیے کہ جس طرح آپ نے میرے سراتنا بڑا بوجھ ڈالا ہے، اپنے سر بھی ڈال لیا ہے، یعنی آپ نے مجھ کو اپنا سردار تسلیم کر لیا ہے تو میری تمام خدمات کا دارو مدار آپ کے سمع وطاعت پر ہے ، آپ حضرات سمع وطاعت سے میری مدد کریں تو یقین کیجئے کہ آپ کے لیے دین ودنیا کی بھلائی حاصل ہوگی۔(محی الملۃ والدین ۴۹)

تیسرے امیر شریعت کا انتخاب ڈھاکہ میں ۲۶؍ جون ۱۹۴۷ء کو ہوا ، امیر شریعت کی حیثیت سے مولانا سید شاہ قمر الدین ؒ کا انتخاب عمل میں آیا، دوسرے روز رات کے اجلاس میں ۲۷؍ جون کو آپ پٹنہ سے ڈھاکہ تشریف لے گیے، اجلاس عام سے خطاب بھی فرمایا ؛ لیکن بد قسمتی سے جس طرح قیام امارت کے موقع سے مولانا ابو الکلام آزاد کی تقریر ضبط تحریر میں نہیں لائی جا سکی ، ویسے ہی امیر شریعت ثالث کے خطاب کا کوئی حصہ یا تو محفوظ نہیں رہا یا میرے مطالعہ میں نہیں آیا، چوتھے امیر شریعت حضرت مولانا منت اللہ رحمانی ؒ کا انتخاب ۲۴؍ مارچ ۱۹۵۷ء کو مدرسہ رحمانیہ سوپول دربھنگہ میں عمل میں آیا، انتخاب کے چوتھے روز ۲۷؍ مارچ ۱۹۵۷ء کو دفتر تشریف لائے اور مختصر معائنہ کے بعد کتاب الاحکام میں لکھا: 

’’امارت شرعیہ ہر طبقہ اور ہر خیال کے مسلمانوں کا مشترک ادارہ ہے ، جس کا مقصد بنیادی عقیدہ کی وحدت پر مسلمانوں کی شرعی تنظیم ہے تاکہ اللہ کا کلمہ بلند ہو، مسلمانوں میں ممکن حد تک اسلامی احکام جاری ہوں، اور مسلمان اس ملک میں اسلامی زندگی گذار سکیں، ظاہر ہے کہ یہ مقصد عظیم تعصب ، تنگ نظری ، پارٹی بندی اور اپنے مسلک سے ہٹے ہوئے لوگوں پر طعن وتشنیع کرنے سے حاصل نہیں ہو سکتا۔‘‘آگے لکھتے ہیں۔

’’ ایسا طریقۂ کار اختیار کریں کہ مختلف مسلک اور خیال کے ادارے اور اشخاص ، مقصد عظیم کے لیے امارت شرعیہ کے گرد یہ حسن ظن رکھتے ہوئے جمع ہو سکیں کہ یہاں ان کی انفرادیت پر حملے نہ ہوں گے اور نہ ان کو مشتبہ نگاہوں سے دیکھا جا ئے گا۔ (دینی جد وجہد کا روشن باب) 

حضرت امیر شریعت رابع کے ۱۹۹۱ء میں انتقال کے بعد مولانا عبد الرحمن صاحب پانچویں امیر شریعت منتخب ہوئے، امیرمنتخب ہونے کے بعد جو آپ نے پہلا خطبہ دیا ، اس میں فرمایا: 

’’آج کے نازک حالات میں مسلمانان بہار واڈیشہ کی امارت کے منصب کی جو بھاری ذمہ داری اس حقیر پر عائد کی گئی ہے، میں اس کی نزاکت کومحسوس کرتا ہوں، اور اللہ کی طرف متوجہ ہو کر اس سے درخواست کرتا ہوں کہ وہ اپنے کمزور بندے کو قوت اور ہمت عطا فرمائے، اسلام اور مسلمانوں کی خدمت کی توفیق عطا فرمائے، میں اپنی طاقت بھر اس کے لیے کوشاں رہوں گا کہ اللہ کے احکام کی تنفیذ اور حضور اکرام صلی اللہ علیہ وسلم کی شریعت کو جاری کرنے کی راہ میں سلف اور خاص کر پچھلے چاروں امراء شریعت اور بانی امارت شرعیہ حضرت مولانا ابو المحاسن محمد سجاد رحمۃ اللہ علیہ کی روش پر چلتا رہوں گا، مجھے یقین ہے کہ جملہ برادران اسلام بلا لحاظ اختلاف ومسلک وخیال ایک سیسہ پلائی دیوار بن کر اللہ کے دین کی حفاظت کی راہ میں اس حقیر کے ساتھ تعاون کریں گے ۔ ‘‘ (نقیب ۸؍ اپیل ۱۹۹۱ئ) 

امیر شریعت خامس کے انتقال کے بعد چھٹے امیر شریعت کی حیثیت سے مولانا سید نظام الدین صاحب کا انتخاب ہوا، حضرت نے امت مسلمہ کے نام اپنے پہلے پیغام میں لکھا: 

’’یکم نومبر ۱۹۹۸ء کو مجلس ارباب حل وعقد کا اجلاس ہوا اور اس نے اتفاق رائے سے امیر شریعت سادس کی حیثیت سے میرا انتخاب کیا اور ایک بڑی ذمہ داری میرے کمزور کاندھوں پر ڈال دی ہے ، میں اس کو اللہ تعالیٰ کی طرف سے ایک فیصلہ سمجھتا ہوں اور اس کی بار گاہ میں دعا کرتا ہوں کہ وہ مجھے اس عظیم منصب کی ذمہ داریوں کو پورا کرنے کی توفیق واستطاعت فرمائے۔‘‘

 حضرت نے لکھا : ’’بحیثیت امیر شریعت اس موقع پر یہ اعلان کرنا ضروری سمجھتا ہوں کہ امارت شرعیہ جس طرح اب تک اسلاف کے طریقہ پر چلتی رہی ہے آئندہ بھی اس روش پر گامزن رہے گی ۔ ‘‘ (نقیب ۲۳؍ نومبر ۱۹۹۸ئ)

چھٹے امیر شریعت کے وصال کے بعد ساتویں امیر شریعت کی حیثیت سے مفکر اسلام حضرت مولانا محمد ولی رحمانی صاحب کا انتخاب ۲۹؍ نومبر ۲۰۱۵ء کو دار العلوم رحمانی زیرو مائل ارریہ میں عمل میں آیا، اس موقع سے آپ نے مجلس ارباب حل وعقد کے ارکان سے اپنے پہلے خطاب میں فرمایا : 

’’آپ حضرت نے جو ذمہ داری میرے سپرد کی ہے وہ بہت ہی نازک اور اہم ہے، اس ذمہ داری کو پورا کرنے کے لیے اللہ کے فضل کے علاوہ آپ حضرات کی مضبوط ، مستحکم اور مربوط معاونت کی ضرورت ہے اور مجھے امید ہے کہ امارت شرعیہ کے کاموں کو آگے بڑھانے کے لیے یہاں موجود آپ تمام حضرات اور بہار اڈیشہ جھارکھنڈ کی عوام کا مجھے اور امارت شرعیہ کو مکمل تعاون ملے گا۔‘‘

حضرت نے فرمایا : لوگوں پر تبصرہ کرنے سے پہلے ہم خود اپنا محاسبہ کریں، اس لیے کہ شخصیتیں بہت مشکل سے بنتی ہیں اور آسانی سے پگھل جاتی ہیں، اگر شخصیتوں اور اداروں کی حفاظت کریں گے تو ہم مضبوط ہوں گے ۔ (نقیب۷؍ دسمبر ۲۰۱۵ئ)

ان تمام امراء شریعت کے پہلے احساسات وخیالات کو طویل اقتباس کے ساتھ نقل کر کے یہ بتانا مقصودہے کہ امیر شریعت کا منصب عہدہ نہیں ایک ذمہ داری ہے ، سارے امراء شریعت نے اس کا اظہار کیا ہے، سمع وطاعت پر بھی زور دیا ہے، یہ دو طرفہ معاملہ ہے اور اسی میں امارت شرعیہ کی ترقی کا راز مضمر ہے۔

پیغمبرِ اسلام ﷺ کا پیغام امت کے نام

پیغمبراسلام ﷺ کا پیغام امت کے نام

• 
  
  

 ڈاکٹر عبید الرحمن ندوی

استاد دار العلوم ندوۃ العلماء، لکھنؤ

چھٹی صدی تاریخ کا سیاہ ترین دور تھا۔ لوگ پورے طور پر اخلاقی پستی میں ڈوب چکے تھے۔لوگ بغیر کسی واضح سبب کے ایک دوسرے کو قتل کیاکرتے تھے۔ عورتیں حیوانات سے بہتر نہیں تھیں۔ پہلے صحیفوں میں بدعات افراتفری کا باعث بنیں۔ اگرچہ اس وقت رومی اور فارسی سلطنتوں کو دنیا میں سپر پاور کہا جاتا تھا لیکن عجیب بات ہے کہ دونوں سلطنتوں کے تحت لوگ بہت سے طریقوں سے ذلیل اور اذیت میں مبتلا تھے۔

بنی نوع انسان کو اصلاح کی ضرورت تھی اور حضرت محمد صلی اللہ علیہ وسلم کو خدا نے لوگوں کو اندھیروں سے روشنی کی طرف لانے اور نجات کی راہ پر گامزن کرنے کے لیے منتخب کیا تھا۔ قرآن پاک کہتا ہے:-’’یہ ایک کتاب ہے جس کو ہم نے تمہاری طرف نازل کیاہے تاکہ تم لوگوں کو تاریکیون سے نکال کر روشنی میں لاؤ، ان کے رب کی توفیق سے، اس خدا کے راستے پر جو زبردست اوراپنی ذات میں آپ محمود ہے‘‘۔ (ابراہیم: 1)

پیغمبر حضرت محمد ﷺ نے لوگوں کو بھائی چارے اور اخوت کا سبق دیا اور ان سے کہا کہ وہ صحیح اور غلط میں فرق کریں۔ اس موقع پر یہ عرض کرنا بیجا نہ ہوگاکہ’’پوری کائنات 92عناصر کے ایٹموں اور ان کے مرکبات سے بنی ہے۔ ممکن ہے یہ بھی اتفاق نہ ہو کہ رسول کریم ﷺ کے نام مبارک محمد ﷺ کے حروف کے اعداد کا مجموعہ بھی 92ہے۔ جس سے یہ اشارہ ہوسکتاہے کہ آپ کی ذات مبارک روحانی کائنات کے لئے اتنی ہی بنیادی اور ضروری ہے جتنی مادی کائنات کے لئے92عناصر کی۔ بلکہ خود اس کائنات کی تخلیق آپﷺ کے لائے ہوئے پیغام کے لئے ہوتی ہے۔

علم طبیعیات میں عناصر کی جو فہرست آج کل دی جاتی ہےاس میں عناصر کی تعداد ایک سو نو(109) ہے ۔92کے علاوہ جو زائد عناصر ہیں وہ اصلی اور فطری نہیں بلکہ انسان کے بنائے ہوئے ہیں‘‘۔

’’غرض ایک ایسی شخصی زندگی ، جو ہر طائفہ انسانی اور ہر حالتِ انسانی کے مختلف مظاہر اور ہرقسم کے صحیح جذبات اور کامل اخلاق کا مجموعہ ہو، صرف محمد رسول اللہ ﷺ کی سیرت ہے۔

اگر دولتمند ہوتو مکّہ کے تاجر اور بحرینؔ کے خزینہ دار کی تقلید کرو۔ اگر غریب ہوتو شعب ابو طالب کا حال پڑھو، اگر رعایا ہوتو قریش کے محکوم کو ایک نظردیکھو، اگر فاتح ہو تو بدر وحنینؔ کے سپہ سالار پر نگاہ دوڑاؤ۔ اگر تم نے شکست کھائی ہے تو معرکۂ احدؔسے عبرت حاصل کرو، اگر تم استاد اور معلم ہو تو صُفّہؔ کی درسگاہ کے معلِّم قدس کو دیکھو۔

اگر شاگرد ہوتو روحُ الامین کے سامنےبیٹھنے والے پر نظرجماؤ،اگر واعظ اورناصح ہو تو مسجدِمدینہ کے منبر پر کھڑے ہونے والے کی باتیں سُنو، اگر تنہائی وبیکسی کے عالم میں حق کی مُنادی کا فرض انجام دینا چاہتےہوتو مکّہ کے بے یارومددگار نبی کااسوۂ حسنہ تمہارے سامنے ہے۔

اگر تم حق کی نصرت کے بعد اپنے دشمنوں کو زیر اور مخالفوں کوکمزور بناچکے ہوتو، فاتحِ مکّہ کا نظارہ کرو، اگراپنے کاروبار اوردنیاوی جدّوجہدکا نظم ونسق درست کرنا چاہتے ہو تو بنی نضیرؔ، خیبرؔ اور فدکؔ کے زمینوں کے مالک کے کاروبار اور نظم ونسق کو دیکھو، اگر یتیم ہوتو عبد اللہ وآمنہ کے جگر گوشہ کو نہ بھولو، اگر بچّہ ہو تو حلیمہ سعدیہ کے لاڈلے بچّے کو دیکھو۔

اگر تم جوان ہو تو مکّہ کے چرواہے کی سیرت پڑھو،اگر سفری کاروبار میں ہوتو بصریٰ کے کارواں سالار کی مثالیں ڈھونڈھو، اگر عدالت کے قاضی اور پنچایتوں کے ثالث ہو تو کعبہؔمیں نورِ آفتاب سے پہلے داخل ہونے والے ثالث کو دیکھو جو حجرِ اسود کو کعبہؔ کے ایک گوشے میں کھڑاکررہاہے۔

مدینہؔ میں کچی مسجد کے صحن میں بیٹھنے والے منصف کو دیکھو جس کی نظرانصاف میں شاہ وگدااور امیر وغریب برابر تھے۔ اگر تم بیویوں کے شوہر ہو تو خدیجہؓاور عائشہؓ کے مقدس شوہر کی حیاتِ پاک کا مطالعہ کرو، اگر اولاد والے ہو تو فاطمہؓ کے باپ اور حسنؓ وحسینؓ کے نانا کا حال پوچھو، غرض تم جو کوئی بھی ہو اور کسی حال میں بھی ہو۔

تمہاری زندگی کے لئے نمونہ تمہاری سیرت کی درستی واصلاح کے لئے سامان ، تمہارے ظلمت خانہ کے لئے ہدایت کا چراغ اور رہنمائی کا نور محمد رسول اللہ ﷺ کی جامعیت کبریٰ کے خزانہ میں ہروقت اور ہمہ دم مل سکتاہے، اس لئے طبقۂ انسانی کے ہر طالب اور نور ایمانی کے ہر متلاشی کے لئے صرف محمد رسول اللہ ﷺ کی سیرتِ ہدایت کا نمونہ اور نجات کا ذریعہ ہے، جس کی نگاہ کے سامنےمحمد رسول اللہﷺ کی سیرت ہے اس کے سامنے نوحؔوابراہیمؔ، ایّوبؔویونسؔ، موسیٰؔاور عیسیٰ ؔعلیہ السلام سب کی سیرتیں موجود ہیں۔

گویا تمام دوسرے انبیائے کرام کی سیرتیں صرف ایک ہی جنس کی اشیاء کی دوکانیں اورمحمد رسول اللہ ﷺ کی سیرت، اخلاق واعمال کی دنیا کا سب سے بڑا بازار (مارکیٹ) ہے، جہاں ہر جنس کے خریدار اور ہرشے کے طلب گار کے لئے بہترین سامان موجود ہے‘‘۔ (خطبات مدراس صفحہ102-103 )

قابل ذکربات یہ ہے کہ ’’نبوّت کے حصّہ میں کل 23 سال کی مدت آئی اور اس میں سے بھی 12سال کا زمانہ دعوت وموعظت اور ایک بڑی ہی ضدی اور سرکش قوم کی طرف سے مخالفت کی نذر ہوگیا۔ مسلمان تو خیر اس ذات کو وسیلۂ نجات سمجھتے ہی ہیں اوراس کی شان میں بعد از خدا بزرگ توئی قصّہ مختصر کا کلمہ پڑھتے ہی رہتے ہیں۔ باقی اس کی امانت ، دیانت، عفت، ہمت، شرافت، حسنِ اخلاق، فہم وفراست، تدبیر وتدبر، جُود وسخا، دلیری ومردانگی کی گواہی جس طرح پچھلے منکروں نے دی، اس طرح آج تک یورپ اور امریکہ کے بڑے بڑے فاضل وعاقل دیتے چلے آرہے ہیں۔

اور اس کے نعت گویوں کی فہرست میں دس بیس نہیں پچاسوں بلکہ سیکڑوں ہندوؤں کے نام نظرآتے ہیں۔ اسی کے نام کی پکار آج ساڑھے تیرہ سوسال سے ہرروز پانچ پانچ بار دنیا کے گوشے سے ہوتی چلی آرہی ہے۔ وہ کل دس سال کی ننھی سی مدت میں دنیا میں عظیم ترین انقلاب برپاکرگیا۔

اپنے پیچھے ایک منظم حکومت 12لاکھ مربع میل پر چھوڑ گیا۔ اور وہ بھی لاکھوں انسانوں کے قتل کے بعد نہیں ہزارہا جانیں لینے کے بعد نہیں، بلکہ حیرت کے کانوں سے سنئے کہ اس کی ساری لڑائیوں میں دوست دشمن سب ملا کر کُل جمع ایک ہزار اٹھارہ انسان کام آئے۔259، اپنے اور 759دشمن کے۔ جبھی تو انسائیکلوپیڈیا برٹانیکا کے گیارہویں ایڈیشن کا بیان ہے کہ دنیا کی مذہبی شخصیتوں میں سب سے بڑھ کر کامیاب وہی گزری ہے:

.The most succesful of all religious personaliteis

اور اس کی لائی ہوئی کتاب قرآن مجید کی بابت اسی انسائیکلوپیڈیا برٹانیکا کی گواہی ہے کہ روئے زمین پر سب سے زیادہ پڑھی جانے والی کتاب یہی ہے:

۔The most widely read Book in the world

اور جو امت اس کے نام کا کلمہ پڑھتی ہے، اس کی تعداد دنیا کے مختلف ملکوں میں ملاکر ۶۰کروڑ کی ہے۔ اس ساری زندگی کو اگر ایک مستقل اور مسلسل معجزہ نہ کہئے تو آخر اور کیا کہئے‘‘! (ذکرِ رسول از مولاناعبد الماجد دریابادی، صفحہ 129)

مفکر اسلام مولانا سید بوالحسن علی ندوی ؒنے اپنی شاہکار کتاب ’’انسانی دنیا پر مسلمانوں کے عروج وزوال کا اثر‘‘ میں فرماتے ہیں: ’’پیغمبروں کی آمد نے انسانیت کو ایک نئی زندگی ، ایک نئی روشنی ، ایک نیا ایمان ، ایک نئی گرمجوشی ، ایک نیا معاشرہ اور ایک نئی ثقافت دی۔ اس نے انسانی تاریخ میں ایک نئے سال کا آغاز کیا جو زمین پر انسان کے حقیقی مشن کے آغاز کی علامت ہے‘‘۔

یہ کہنے کی ضرورت نہیں کہ حضرت محمد’ﷺ کا بنیادی مشن یہ تھا کہ "سچ کو ہر قیمت پر غالب آنے دو‘‘۔ان کا مشن ایک ایسے معاشرے کی تشکیل تھا جس میں لوگ خواہ ان کا عقیدہ کچھ بھی ہو، امن اور ہم آہنگی سے رہیں۔ جہاں تک مذہب کا تعلق ہے ، قرآن پاک کہتا ہے: ’’دین میں کوئی زور زبردستی نہیں ہے‘‘۔

مطلب یہ ہے کہ لوگوں کو اپنا عقیدہ تبدیل کرنے پر مجبور نہیں کیا جانا چاہیے ، بلکہ یہ کہتا ہے کہ’’تمہارا مذہب تمہارے لئے اورمیرامذہب میرے لئے‘‘۔ اسی لیے پیغمبرمحمد ﷺ نے مسلمانوں اور غیر مسلموں کے ساتھ یکساں سلوک کیا۔

ان کا اثر و رسوخ محض سماجی ماحول میں محدود نہیں تھا بلکہ سیاسی میدان میں بھی اس کی حوصلہ افزائی کی گئی۔ نبی صلی اللہ علیہ وسلم نے ایک غیر مسلم عمرو بن امیہ الدارمی کو منتخب کیا اور انہیں اپنا سفیر مقرر کیا۔

نبی کا ایک مشہور قول ہے کہ’’جو بھی غیر مسلم رعایا پر ظلم کرے گا میں قیامت کے دن ان کا وکیل ہوں گا۔ نبی صلی اللہ علیہ وسلم نے فرمایا کہ’’ جب تم جنازہ دیکھو تو تمہیں اس وقت تک کھڑے رہنا چاہیے جب تک کہ وہ تمہارے پاس سے نہ گزر جائے‘‘۔

ایک دن ایک جنازے کا جلوس وہاں سے گزرا اور نبی ﷺکھڑے ہوگئے۔ لوگوں نے اعتراض کیا ، لیکن یہ ایک یہودی کا جنازہ ہے اور نبی نے جواب دیا’’ کیا یہ انسان نہیں ہے؟‘‘۔

ایک ممتاز مسلمان عالم علامہ سید سلیمان ندوی نے اپنی کتاب "محمد اور مثالی نبی" میں صحیح کہا ہے ،’’وہ اچھی طرح باخبر نبی ہے ، خدا کے حکم کا گواہ ہے ، خوشخبری لانے والا ہے ، گمراہ کو خدا کے راستے کی طرف لانےوالا ہے ، چمکتی ہوئی روشنی جو اندھیرے کو دور کرتی ہے اور سیدھا راستہ دکھاتی ہے‘‘۔

وہ مزید کہتے ہیں: ’’ہندوؤں،سکھوں،برہما سماجیوں اور دیگر کی ایک اچھی تعداد نے نبی کے بارے میں لکھا ہے۔ یورپ میں بھی اسلام کے بارے میں معروف نفرت کے باوجود ، اس موضوع پر کیے جانے والے مطالعے کی ایک روایت ہے اگرچہ وہ اکثر انجیل بشارت یا تاریخی اور ادبی مقاصد کے لیے استعمال کیے جاتے تھے۔

دمشق کی ایک ادبی مجلے ’’المقتبس‘‘ نے تقریبا 15 سال قبل پیغمبر کی زندگی پر یورپی کاموں کی ایک فہرست شائع کی تھی جس میں13000 کتابیں درج تھیں۔ اس تناظر میں ، ہمیں جارج برنارڈ شا کے الفاظ یاد آتے ہیں ، جو کہتے ہیں: ’’میں نے ہمیشہ محمد کے دین کو ان کی عمدہ زندگی کی وجہ سے بہت عزت دی ہے۔ میں نے ان کا(محمد ﷺکا)ایک حیرت انگیزانسان کا مطالعہ کیا ہے اور میری رائے میں مسیح مخالف ہونے کی وجہ سے انہیں اسلام کا نجات دہندہ کہا جانا چاہیے۔

(G.B. Shaw, The Genuine Islam, Singapore, Vol. 1, No. 8, 1936)

مائیکل ایچ ہارٹ کہتے ہیں: ’’محمد(ﷺ) کودنیا کی مؤثر ترین شخصیتوں میں سرفہرست رکھنے کے میرے انتخاب سے بہت سے لوگ حیرت میں پڑ سکتے ہیں اور کچھ دیگر سوال بھی کرسکتے ہیں،لیکن تاریخ میں وہ واحد ایسے شخص تھے جو مذہبی اور جمہوری دونوں اعتبار سے سب سے زیادہ کامیاب تھے ۔ محمد (ﷺ)نے دنیا کے سب سے بڑے مذاہب میں سے ایک کی بنیاد رکھی اور اس کی تبلیغ کی ، اور انتہائی موثر سیاسی رہنما بن گئے۔ آج ان کی وفات کے تیرہ صدیوں کے بعد ، ان کا اثر و رسوخ اب بھی طاقتور اور وسیع ہے‘‘۔

(The 100: A Ranking of the Most Influential Persons in Hisotry)

مختصرًا اگر ہم نبی اکر م ﷺ کی زندگی پر نظر ڈالیں تو ہم یقینی طور پر دیکھیں گے کہ وہ تمام انسانوں کے لیے امن پسند ، نجات دہندہ اور مسیحا تھے۔ جیسا کہ قرآن کریم کہتا ہے: ’’اور ہم نے آپ کو تمام جہانوں کے لیے رحمت بنا کر بھیجا ہے‘‘

بریکنگ نیوز--------------------رحمۃ للعالمین____✍️مفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ (

بریکنگ نیوز--------------------رحمۃ للعالمین____

✍️مفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ (9431003131)

عبدالرحمان دربھنگہ وی بہار

ربیع الاول کا مہینہ اس عظیم رسول ونبی کی ولادت با سعادت کے حوالہ سے جانا اور پہچانا جاتا ہے جس سے بہتر انسان اس روئے زمین پر نہیں آیا ،ہمارا ایمان تمام انبیاء ورسل پر ہے اور ہم سب کی عظمت وفضیلت کے قائل ہیں ،یہ ہمارے ایمان مفصل اور ایمان مجمل کا حصہ ہے ،لیکن اس کے ساتھ یہ بھی حقیقت ہے کہ اللّٰہ تعالیٰ نے رسولوں میں بعض کو بعض پر فضیلت دی اور ہمارے آقا ومولیٰ فخر موجودات،سرور عالم صلی اللہ علیہ وسلم کو تمام انبیاء کا سرداراورسیدالمرسلین والاولین والآخرین بنایا ،آپ کے اوپر سلسلۂ نبوت کا خاتمہ فرمایا،معراج کی رات مسجد اقصیٰ میں انبیاء کی امامت کرائی؛ تاکہ سب انبیاء پر آپ کی فضیلت پورے طور پر کھل کر سامنے آجائے ،ایسی فضیلت کہ انبیاء بھی اس امت میں آنے کی تمنا کرنے لگیں ،آپ کو یہ فضیلت بھی عطا ہو ئی کہ سارے جہاں کا رسول بنا کر آپ کو بھیجا گیا ،قرآن کریم جیسی رحمت وہدایت والی کتاب آپ کو دی گئی،آپ ﷺ سے پہلے جتنے انبیاء ورسل آئے سب مخصوص علاقے مخصوص زمانے اور بعض مخصوص قبائل کے لئے تھے ، اللّٰہ رب العزت نے اپنے محبوب کو اعلان کرنے کے لئے فرمایا: کہہ دیجئے اے لوگو! میں تمام لوگوں کی طرف رسول بنا کر بھیجا گیا ہوں ،آپ کی شان میں یہ بھی ارشاد ہوا کہ آپ سارے جہاں کیلئے رحمت بنا کر بھیجے گئے ،سارے جہاں میں انسان وجن ہی نہیں شجرو حجر، نباتات وجمادات،حیوانات اور تمام بری وبحری مخلوقات بھی شامل ہیں ،اس کامطلب یہ ہے کہ آقا صلی اللہ علیہ وسلم سب کیلئے رحمت ہیں ،اور آپ کی رحمت سب کو محیط ہے۔

رحمت کی اس عمومیت کااندازہ اس بات سے لگا یا جا سکتا ہے کہ آپ صلی اللہ علیہ وسلم کی بعثت سے پہلے ہر طرف ظلم وجور کا بازار گرم تھا، انسان انسان کے خون کا پیاسا تھا ،قبیلے آپس میں دست وگریباں تھے،عربی عجمی اور کالے گورے کے نام پرخود ساختہ برتری کے پیمانے وضع کر لئے گئے تھے ،اس کی وجہ سے انسانوں میں طبقاتی جنگ نے عروج پکڑ لیا تھا،حق وہ سمجھا جاتا تھا جواس قبیلے کے کسی فرد کے ذریعہ صادرہوا ہو،خواہ وہ ظلم وستم کے زمرے میں کیوں نہ آتا ہو،برائیاں عام تھیں اور اخلاق حسنہ کا وجود کم ترہوگیا تھا،عورتوں کے اوپر ہر طرح کا ظلم کیا جاتا تھا ،بلکہ بہت سارے قبائل میں لڑکیوں کو زندہ درگور کرنے کا رواج تھا،ہنستی کھیلتی زندگی کو زندہ مٹی میں دفن کر دینا انسانی شقاوت وبدبختی کی انتہاء تھی،لڑائیاں ہوتیں توانسانوں کے ساتھ پورے علاقہ کو تاراج کردیا جاتا ،شریف انسان غلامی کی زنجیروں میں جکڑ دئے جاتے،اور بالکل وہ منظر ہوتا جس کا نقشہ قرآن کریم میں  اللّٰہ رب العزت نے کھینچاہے کہ جب شاہان وقت کسی آبادی پر غلبہ حاصل کرتے ہیں تو آبادی میں فسادو بگاڑ پیدا کرتے ہیں اوروہاں کے شرفاء کو ذلیل ورسواکر کے چھوڑتے ہیں ان لڑائیوں میں جانور،درخت ،کھیت کھلیان اور فصلوں کو بھی تباہی کا سامنا کرنا پڑتا تھا۔

ان حالات میں  اللّٰہ  کے رسول صلی اللہ علیہ وسلم اس دنیا میں تشریف لائے،چالیس سال تک اپنی پاکبازی، سیرت ،کردار کی بلندی، امانت ودیانت کی رفعت کانمونہ اس طرح پیش کیا کہ مخالفین بھی آپ کو صادق اور امین کہا کرتے آپ کی بے داغ جوانی اور اعلی اخلاقی کردارکی شہادت دیتے،وہ ایمان اور کلمہ کے مسئلہ پر مذبذب رہے،کیونکہ اس کلمہ کے اقرار سے ان کی ریاست اور چودھراہٹ کو خطرہ محسوس ہوتا تھا؛ لیکن کبھی کسی نے ان کے کردار پر انگلیاں نہیں اٹھائیں،چالیس سال بعد آپ صلی اللہ علیہ وسلم نے اعلان نبوت کیا ،مخالفین کے سب وشتم اور نازیبا حرکات کو سنااور سہا یہ رحمت ہی کی ایک قسم ہے کہ آپ نے قدرت کے باوجود اور بارگاہ الٰہی سے مقبولیت کے یقین کی امید ہوتے ہوئے بھی آپ نے ان کے لئے کبھی بد دعانہیں کی ،حد یہ کہ طائف کی گلیوں میں جب پائے مبارک لہو لہان ہوئے ،موزے خون سے بھر گئے ،اوباشوں نے آپ کو پتھر مارا ،اس وقت بھی آپ نے ان کے لئے دعائیں کیں ،اے اللّٰہ اس قوم کو ہدایت دے وہ مجھے نہیں جانتی اور اس توقع کا اظہار کیا کہ شاید اس قوم سے کوئی دین رحمت میں داخل  ہو جائے ،جنگ کے بعد قیدی مسجد کے ستون سے بندھے ہوئے ہیں،بندش کی سختی کی وجہ سے قیدی کراہ رہا ہے، آپ کی آنکھوں سے نیند غائب ہے،جب تک بندش ڈھیلی نہیں کی گئی آپ کو سکون نہیں ملا،فتح مکہ کے موقع سے سارے دشمن سامنے تھے ،عرب روایات کے مطابق انہیں قتل بھی کیا جاسکتا تھا اور غلام بھی بنایا جا سکتا تھا ،لیکن رحمت للعالمین نے اپنی شان رحمت کا مظاہرہ کیا اوراعلان کردیا کہ آج تم لوگوں سے کوئی داروگیر اور مؤاخذہ نہیں، تم سب لوگ آزادہو، اتناہی نہیں حضرت ابو سفیانؓ جو اسوقت تک ایمان نہیں لائے تھے ان کے گھر میں داخل ہونے والے کو بھی امان دے دیا، ہندہ جس نے حضرت حمزہ کا مثلہ کروایاتھا ان کے کان ناک کٹوائے تھے، کلیجی گردہ کو کچا چبا کر اپنی قسم پوری کی تھی، آپ کی شان رحمت نے اس کو اپنے جلو میں لے لیا، کیا شان رحمت تھی آپ کی،کوئی دوسرا ہوتا تو چن چن کر بدلہ لیتا کہ یہی زمانے کی روش رہی ہے ،آپ نے سب کو معاف کر کے دنیا کو یہ پیغام دیا کہ اسلام دین رحمت ہے ،یہاں امن ہے شانتی ہے،سکھ ہے، چین ہے اور دشمنوں کو بھی معاف کرنے کا وہ جذبہ ہے جو کسی اور مذہب میں نہیں پایا جاتا ۔

انسانوں میں غلاموں اور باندیوں کی زندگی اجیرن تھی، وہ جسم وجثہ کے اعتبار سے انسان تھے ،لیکن ان کی زندگی جانوروں سے بد تر تھی، ان کی اپنی کو ئی زندگی نہیں تھی وہ آقاہی کے لئے جیتے اور مرتے تھے ،پوری وفا داری اور خدمت کے باوجود انہیں ظلم وستم کاسامنا تھا ،آقا صلی اللہ علیہ وسلم ان کے لئے بھی رحمت ثابت ہوئے،آپ نے مختلف طریقوں سے لوگوں کو غلامی کی زنجیروں سے نکالنے کا کام کیا ،کبھی فدیہ کے طور پر لکھانے پڑھانے کاکام لے کر، کبھی قسم ،ظہار وغیرہ کے کفارہ میں آزاد کرنے کا حکم دے کر ،عمومی حکم یہ دیا کہ غلاموں کا خیال رکھو ،جو خود کھائو اسے کھلائو،اوراسے ایسا ہی پہنائو جیسا تم پہنتے ہو،اس سے طاقت سے زیادہ کام نہ لو ،آپ نے حضرت زیدؓ کے ساتھ حسن سلوک کرکے دکھلایا ،جس کے نتیجہ میں حضرت زید ؓ نے اپنے والدین کے ساتھ جانے کی بنسبت حضور صلی اللہ علیہ وسلم کی غلامی میں رہنا پسند کیا۔

عورتوں پر جب آپ صلی اللہ علیہ وسلم کی رحمت سایہ فگن ہوئی تو حکم دیا کہ عورتوں سے بہتر سلوک کرووہ تمہارے ماتحت اور تمہارے حکم کی پابند ہیں ،تم دونوں پر ایک دوسرے کے حقوق ہیں، کسی کے حق کی ادائیگی میں کوتاہی نہ کی جائے،اور حسن سلوک کے ساتھ ان سے پیش آئو،اگر تم امساک بالمعروف نہ کر سکو تو انہیں اچھے سے چھوڑ دوتاکہ وہ اپنی زندگی اپنے انداز میں جی سکیں یا دوسری شادی کر کے نئے سفر کا آغاز کر سکیں ،زمانۂ جاہلیت میں بیوہ عورت منحوس سمجھی جاتی تھی ،آپ نے حضرت عائشہ ؓ کے علاوہ بیوہ اور مطلقہ عورتوں کو اپنے نکاح میں لے کر امت کو پیغام دیا کہ بیوہ اور مطلقہ عورتیں منحوس نہیں ہیں ،شوہر کے مر جانے اور بعض دفعہ نباہ نہ ہونے سے طلاق پڑ جائے تو ان کی دلجوئی ،خبر گیری کی جتنی شکلیں ممکن ہیں اختیار کی جائیں اور انہیں بے سہارا نہ چھوڑا جائے۔

آپ نے بچوں پر رحم کرنے کا بھی حکم دیا ،ان کی اچھی تعلیم وتربیت پرجنت کی بشارت دی ،ان کا نفقہ باپ کے سر رکھا، تاکہ انہیں بال مزدوری سے بچایا جائے،اور ان کے بچپن کی حفاظت کی جاسکے ،ان کے اچھے نام رکھنے کی تلقین کی اور بچوں کو بے سہارا چھوڑنے کو پسند نہیں فرمایا ۔انہیں جینے کا حق دیا اور ان کو روزی میں تنگی کے خوف سے ہلاک کرنے سے منع فرمایا۔

یتیموں کی کفالت کو کار ثواب قرار دیا اور فرمایا کہ میں اور یتیموں کی کفالت کرنے والا ہاتھ کی دو متصل انگلیوں کی طرح قیامت میں ساتھ ہوں گے،خود آپ نے یتامیٰ کی سر پرستی اور عید کے دن ایک روتے بچے کو گلے لگا کر ہمیں سبق دیا کہ ان کی کفالت کی فکر کرو ،ان کے سر پر شفقت کا ہاتھ رکھو ،یہ ہاتھ رکھنا قیامت میں تمہیں کام آئے گا ۔

آ پ صلی اللہ علیہ وسلم کی رحمت جب جانوروں کی طرف متوجہ ہوئی تو بلا وجہ انہیں ہلاک کرنے سے منع کیا اگرگوشت کھانے کے لئے انہیں ذبح کرنا ہے توایسا طریقہ اپنائو کہ اسے کم از کم تکلیف ہو،اگر جانور نقل وحمل کے لئے رکھے ہو تو اس پر اسکی طاقت سے زیادہ بوجھ نہ لادو،ایک اونٹ کی بلبلاہٹ سن کر آپ سمجھ گئے کہ اس کامالک اس پر زیادتی کرتا ہے ،اونٹ کے مالک انصاری صحابی کو بلا کر فرمایا کہ اللّٰہ رب العزت نے ان جانوروں کو تمہارا محکوم بنایا ہے اس لئے ان جانوروں پر رحم کرو،نہ توا نہیں بھوکا رکھو ،اور نہ ہی ان کی طاقت سے زیادہ کام لو ،ایک بار حضرت عبداللہ بن عباس ؓ نے چڑیا کے دو بچوں کو پکڑ لیا ،چڑیا چِلّانے لگی ،آقا صلی اللہ علیہ وسلم نے ارشاد فرمایا کہ ان بچوں کو ان کی جگہ پر رکھ آؤ،یہ رحم دلی کا اثر تھا کہ ایک فاحشہ نے اپنے موزہ میں بھر کر کتے کو پانی پلایا تواس کی بخشش ہو گئی،اور ایک عورت نے بلی کو باندھ کر رکھا ، کھاناپینا نہیں دیا ،بالآخر وہ مر گئی تواس عورت کو اسکی وجہ سے اسے جہنم کا مستحق قرار دیا گیا ،یہ واقعات بتاتے ہیں کہ جانوروں پرآپ کی شفقت و رحمت کس قدر تھی ،آپ صلی اللہ علیہ وسلم نے ارشادفرمایا جو رحم نہیں کرتا اس پر رحم نہیں کیا جائے گا تم زمین والوں پر رحم کروآسمان والا تم پر رحم کرے گا ۔

درختوں کو بلا ضرورت کاٹنے اور جنگ کے موقع سے انہیں برباد کرنے سے بھی منع کیا گیا ،کیونکہ یہ ہمارے لئے ماحول کے تحفظ کا بڑاذریعہ ہیں ،فرمایا گیا کہ اگر قیامت قائم ہو جائے اور تمہارے پاس اتنی مہلت ہو کہ تم ایک پودا لگا سکتے ہو تو لگا دو ،پھلدار درخت لگانے والوں کی اہمیت بیان کرتے ہوئے ارشاد ہو اکہ اس درخت کے پھل سے انسانوں نے اور پتوں سے جانوروں نے فائدہ اٹھایا تو یہ صدقہ ہے ،اور ایسی تمام کوشش جس سے ماحول خراب ہو فضائی آلودگی پیدا ہو’’ فساد فی الارض ‘‘کے قبیل سے ہے۔

ماحولیات کے تحفظ اور ہر قسم کے جاندار کے لئے پانی کی اہمیت ظاہر ہے،حکم دیا گیا کہ اسے ناپاک نہ کرو ،پینے اور دوسری ضرورتوں کے لئے اسے پاک وصاف رکھو ،پانی میں پیشاب نہ کرو، سو کر اٹھو تو بغیر ہاتھ دھوئے پانی کے برتن میں ہاتھ مت ڈالو ،پانی پیتے وقت برتن میں سانس مت لو ،مشکیزے ،گھڑے اور پانی کے برتن کو ڈھانک کر رکھو،یہ ہدایات ہر اعتبار سے حضور صلی اللہ علیہ وسلم کی شفقت ورحمت کا مظہر ہیں،رحمۃ للعالمین ہونے کا سب سے بڑا مظاہرہ قیامت کے دن ہوگا، جب سارے انبیاء کرام بخشش کے لیے سفارش اور شفاعت سے انکار کردیں گے ، سارے انسان پریشان ہوں گے، ہر آدمی اپنے گناہوں کے بقدر پیسنے میں ڈوبا ہوگا، نفسی نفسی کا عالم ہوگا، نہ بیٹا باپ کا ہوگا، نہ بیوی شوہر کی ہوگی، ہر آدمی سراسیمہ اور حواس باختہ ہوگا، ایسے میں آقا صلی اللہ علیہ وسلم امت کی شفاعت کے لیے بار گاہ الٰہی میں سر بسجود ہوں گے اور وہ سب کچھ مانگیں گے جو اللّٰہ رب العزت ذہن ودل میں ڈالیں گے اور پھر خوش خبری سنائی جائے گی کہ گناہگاروں کو بخش دیا گیا اور جس کے دل میں رائی کے برابر بھی ایمان ہوگا وہ اس شفاعت سے سوئے جنت روانہ ہو سکے گا، اس طرح آپ کی رحمت سے اللّٰہ کی مخلوق دنیا میں بھی مستفیض ہو رہی ہے اور آخرت میں بھی شفاعت کام آئے گی۔شاعر نے کہا ہے:

وہ نبیوں میں رحمت لقب پانے والا

مرادیں غریبوں کی بر لانے والا 

وہ اپنے پرائے کا غم کھانے والا

مصیبت میں غیروں کے کام آنے والا

اتر کر حراء سے سوئے قوم آیا

اور ایک نسخۂ کیمیا ساتھ لایا______

حکومت تری پورہ میں مسلمانوں کے تحفظ کو یقینی ، شر پسندوں کے خلاف سخت کارروائی کی بنائے جائے : مولانا احمد ولی فیصل رحمانی

حکومت تری پورہ میں مسلمانوں کے تحفظ کو یقینی ، شر پسندوں کے خلاف سخت کارروائی کی بنائے جائے : مولانا احمد ولی فیصل رحمانی

امیر شریعت بہار، اڈیشہ وجھارکھنڈ نے تری پورہ میں بھگوا شدت پسندوں کے ذریعہ مسلمانوں پر ہورہے ظلم و ستم کی مذمت کی
پٹنہ:شمال مشرقی ہندوستان کی سرحدی ریاست تری پورہ میں پچھلے ایک ہفتے سے بھگوا شدت پسند وں کی جانب سے اناکوٹی، مغربی تریپورہ، سیپاہی جالا اور گومتی تریپورہ اضلاع میں کئی روز سے مسلسل مسلمانوں کے خلاف ظلم و تشدد کا خوفنا ک سلسلہ جاری ہے، جس میں مساجد کی توڑ پھوڑ، مسلمانوں کے گھروں پر پتھراؤ اور مسلم دکانداروں کو اپنے مقام سے نکلنے پر مجبور کرنے کے واقعات سامنے آئے ہیں۔ امیر شریعت بہار ، اڈیشہ وجھارکھنڈ مولانا احمد ولی فیصل رحمانی نے اس تشدد کی سخت الفاظ میں مذمت کرتے ہوئے اس کو شرمناک قرار دیا ہے اور مرکزی و صوبائی حکومت سے مطالبہ کیا ہے کہ جلد از جلد تریپورہ کے حالات پر قابو پانے کی کوشش کی جائے، تری پورہ سمیت پورے ملک میں مسلمانوں کی جان و مال اور عزت و آبر و کے تحفظ کو یقینی بنایا جائے اور شر پسندوں کے خلاف سخت کارروائی کرے ۔
واضح ہو کہ تریپورہ میںچند دنوں پہلے ریاست کے دارالحکومت اگرتلہ اور دیگر قصبوں میں ہندو تشدد پسند جماعت ''وشو ہندو پریشد(وی ایچ پی) اور ہندو جاگرن منچ کے ذریعہ بنگلہ دیش میں درگا پوجا کے موقع پر پنڈال میں ہونے والے فرقہ وارانہ معاملہ کے خلاف احتجاجی مظاہرے شروع ہوئے تھے، جو کہ دیکھتے دیکھتے مقامی مسلمانوں کے خلاف مظاہروں میں بدل گئے ۔ ان مظاہرین نے مساجد اور مسلمانوں کے گھروں کو جم کر نشانہ بنایا اور بڑے پیمانے پر مسلمانوں کی جان و مال کا نقصان کیا ۔ کئی بے قصور مسلمانوں کو بے دردی سے شہید کر کے ان کا ویڈیو بھی سوشل میڈیا پر وائرل کیا۔ میڈیا کی رپورٹ کے مطابق ہندوتوا ہجوم کی جانب سے مسلم علاقوں میں مساجد، گھروں اور افراد پر حملہ کرنے کے کم از کم 27 واقعات ہوئے ہیں۔ ان میں 16 واقعات ایسے ہیں جہاں مساجد میں توڑ پھوڑ کی گئی اور ان پر زبردستی وی ایچ پی کے جھنڈے لہرائے گئے ۔ کم از کم تین مساجد، اناکوٹی ضلع کی پالبازار مسجد، گومتی ضلع کی ڈوگرہ مسجد اور وِشال گڑھ میں نرولا ٹیلا کو نذر آتش کر دیا گیا۔ اتنا سب کچھ ہونے کے بعد بھی حکومت کے کانوں پر جوں نہیں رینگ رہی ہے اور ان شر پسندوں کے خلاف کوئی کارروائی نہیں کی جارہی ہے ۔تری پورہ کے وزیراعلی اور ریاستی انتظامیہ کے ساتھ ساتھ مرکزی حکومت بھی مکمل طور پر خاموش تماشائی بنی ہوئی ہے۔ ایسا محسوس ہو رہا ہے جیسے حکومت چاہتی ہی نہیں ہے کہ تشدد ختم ہو اور امن قائم ہو۔
امیر شریعت نے پولیس کے اس رویہ پر افسوس ظاہر کرتے ہوئے کہا ہے کہ ، پولیس اکثر معاملوں میں شر پسندوں کی حمایت کرتی ہوئی نظر آتی ہے بجائے فسادات پر قابو پانے کی کوشش کرنے کے الٹا ظلم کا شکار ہوئے مظلوم مسلمانوں کو ہی جھوٹے مقدموں میں پھنسا کرانہیں قیدو بند کی صعوبتوں میں مبتلا کر دیتی ہے ۔ یا پھر خاموش تماشائی بنی رہتی ہے۔اس کی کارروائی تب شروع ہوتی ہے جب مسلمانوں کا اچھا خاصا نقصان ہو چکا ہوتا ہے ۔ حضرت امیر شریعت نے مزید کہا کہ ملک میں ووٹ بینک کی سیاست اس قدر بڑھ چکی ہے کہ ہندو ووٹ بینک کھسکنے کے ڈر سے حزب اختلاف کی جماعتیں بھی مسلمانوں پر ہو رہے ظلم و تشدد کے خلاف بولنے کو تیار نہیں ہیں۔ حضرت امیر شریعت نے تشویش کا اظہار کرتے ہوئے کہا ہے کہ اس وقت پورے تریپورہ کا مسلمان ڈرا ہوا ہے ۔ بھگوا شدت پسند جماعتوںنے سبھی ہندو نوجوانوں کو ''ریڈیکلائز'' کر دیا ہے ۔ ہندو قدامت پسند جماعتیں مسلسل پوری ریاست میں ریلیاں نکال رہی ہیں اور مسلم مخالف نعرے لگا رہی ہیں۔ مقامی لوگ تشدد کے خلاف انتطامیہ کے اقدامات سے مطمئن نہیں ہیں۔ مقامی لوگوں کے بیان کے مطابق تشدد کئی دنوں سے جاری تھا لیکن جیسے ہی مسلمانوں نے تشدد کے خلاف احتجاج کا اعلان کیا تو پولیس نے فوراً دفعہ 144 کا اعلان کر دیا۔ لوگوں کا کہنا ہے کہ جب یہ لوگ مساجد جلا کر چلے جاتے ہیں، تب پولیس 144 لگاتی ہے۔
امیر شریعت نے ریاستی اور مرکزی دونوں حکومتوں سے مطالبہ کیا ہے کہ وہ تری پورہ میں امن قائم کرنے اور مسلمانوں کو خوف و دہشت کے ماحول سے نکالنے کے لیے فوری اقدامات کرے ساتھ ہی ساتھ جن مساجد کا نقصان ہوا ہے اس کی بھرپائی کی جائے، مسلمانوں کو خصوصی تحفظ فراہم کیا جائے اور جو دہشت پھیلا رہے ہیں ان کے خلاف سخت سے سخت کاروائی کی جائے تاکہ ریاست میں امن قائم ہو سکے ۔مقتولوں کے ورثا اورزخمیوں کو مناسب معاوضہ دیا جائے اور ان کے بہتر علاج و معالجہ کا انتظام کیا جائے ۔انہوں نے ملک کی تمام اپوزیشن کی جماعتوں سے بھی اپیل کی کہ وہ بھی سیاست سے اوپر اٹھ کر انسانیت کی بنیاد پر مظلوموں کے حق میں کھڑے ہوں اور حکومت پر ظالموں کے خلاف کارروائی کرنے کے لیے دباؤ بنائیں

بریکنگ نیوز فیس بک کا نام ہوگیا تبدیل

بریکنگ نیوز فیس بک کا نام ہوگیا تبدیل

نئی دہلی:فیس بک کے سی ای او مارک زکربرگ نے جمعرات کو ایک بڑا اعلان کیا۔ اس اعلان میں فیس بک کا نام بدل کر میٹا کر دیا گیا ہے۔ اس کا اعلان کمپنی کے کنیکٹ ایونٹ میں کیا گیا۔ اس دوران فیس بک کی جانب سے ٹوئٹر پر لکھا گیا ''فیس بک کا نیا نام میٹا ہوگا۔ میٹا میٹاورس بنانے میں مدد کرے گا۔ ایک ایسی جگہ جہاں ہم کھیلیں گے اور 3D ٹیکنالوجی کے ذریعے ایک دوسرے سے جڑیں گے۔ سماجی مصروفیت کے اگلے باب میں خوش آمدید۔" فیس بک کی جانب سے 15 سیکنڈ کی ویڈیو جاری کی گئی ہے، جس میں دکھایا گیا ہے کہ فیس بک کا نام اب میٹا کر دیا گیا ہے۔ اس ویڈیو میں میٹا کا لوگو بھی جاری کیا گیا ہے۔ META لوگو کو