مسلم پرسنل لا بورڈ آف انڈیا کا دو روزه تاریخی اجلاس ، مسلمانوں کو درپیش مختلف مسائل پر ہوگا تبادلہ خیال

مسلم پرسنل لا بورڈ آف انڈیا کا دو روزه تاریخی اجلاس ، مسلمانوں کو درپیش مختلف مسائل پر ہوگا تبادلہ خیال

لکھنئو(اردو اخبار دنیا) : مسلم پرسنل لا بورڈ آف انڈیا کا دو روزہ تاریخی اجلاس 23 اور 24اگست کو لکھنئو میں منعقد کیا جائے گا جس میں پورے ملک سے اہم علماء کرام ، پیرانِ طریقت،مفتیان ، سجاد گان اور اہم دانشوروں کی شرکت متوقع ہے۔ مسلم پرسنل لا بورڈ آف انڈیا کے قومی صدر مولانا قاری محمد یوسف عزیزی نے مجوزہ اجلاس کی ضرورت اور اہمیت کو واضح کرتے ہوئے کہا کہ ہمارے ملک میں ملت اسلامیہ برے دور سے گزر رہی ہے۔ ایک ایسے دور سے جس میں صرف ان کے مذہبی سماجی تعلیمی اور اقتصادی حقوق ہی نہیں بلکہ آئینی ، دستوری اور جمہوری حقوق بھی صلب کئے جارہے ہیں۔ افسوس ناک پہلو یہ ہے کہ ان حقوق کی بازیابی کے کئے بشمول آل انڈیا مسلم پرسنل لا بورڈ ، کسی بھی مذہبی سیاسی اور سماجی جماعت نے سنجیدہ اقدامات نہیں کئے۔بلکہ آل انڈیا مسلم پرسنل لا بورڈ تو بابری مجد اور تین طلاق جیسے مسائل پر بھی اپنا کردار ادا نہ کر سکا اسے مسلمانوں کے دیگر مسائل سے تو سروکار ہی نہیں۔

اس مجموعی صورت حال اور ملت کی زبوں حالی اور بے چارگی کو دیکھتے ہوئے سترہ مارچ دوہزار سترہ کو مسلم پرسنل لا بورڈ آف امڈیا کا قیام عمل میں آیا تھا اور بورڈ کے تمام عہدیداروں اور اراکین نے یہ فیصلہ کیا تھا کہ مسلم پرسنل لا بورڈ آف انڈیا خود کو صرف شرعئی مسائل تک محدود نہیں رکھے گا بلکہ مسلمانوں کی ہمہ جہت ترقی کو یقینی بنانے کے لئے مستحکم کام کرے گا۔ ۲۳ اور ۲۴ اگست کے مجوزہ اجلاس میں مسلمانوں کو درپیش اہم مسائل پر تبادلہءِ خیال کرکے ٹھوس اور جامع حکمت عملی وضع کی جائے گی اس میں آئین کی دفعہ ۳۴۱ سے مذہبی پابندی ہٹانے،سچر کمیٹی کی سفارشات کو لاگو کرانے ، پار لیمنٹ میں تحفظِ ناموسِ رسالت بل پاس کرانے اور مسلمانوں کی ہمہ جہت ترقی کو یقینی بنانے جیسے موضوعات وفاقی طور پر زیر غور رہیں گے۔

مولانا قاری محمد یوسف یہ بھی کہتے ہیں کہ ہم مسلکی تضاد ونفاق کے خلاف مشترکہ اتحاد میں یقین رکھتے ہیں جو موجودہ عہد کی اہم ضرورت ہے لیکن اہل سنت کا ایک بڑا اور ذمہدار طبقہ یہ محسوس کرتا ہے کہ ملک کی مختلف سرکردہ اور اہم جماعتوں میں ہمارے خیالات و نظریات کی پاسداری و ترجمانی کرنے والے لوگوں کی مناسب نمائندگی نہیں لہٰذا اس حوالے سے بھی ہم شرکاء سے تبادلہء خیال کریں گے۔

یوپی : آبادی کنٹرول قانون کا 260 صفحات پر مشتمل مسودہ وزیراعلی یوگی کے سپرد

یوپی : آبادی کنٹرول قانون کا 260 صفحات پر مشتمل مسودہ وزیراعلی یوگی کے سپرد

لکھنؤ۔(اردو اخبار دنیا)16؍اگست: یوپی صوبائی لاء کمیشن نے پیر کو 260 صفحات پر مشتمل آبادی کنٹرول قانون کا مسودہ یوگی حکومت کو سونپ دیا۔ اس مسودہ کو کمیشن کے چیئرمین جسٹس آدتیہ ناتھ متل نے تیار کیا ہے۔ حکومت اس مسودہ کو مانسون سیشن میں متوقع طو رپر پیش کر سکتی ہے۔ اگریہ مسودہ قانون میں بدل گیا ، تویوپی میں مستقبل میں جن لوگوں کے 2 سے زائد بچے ہیں انہیں سرکاری ملازمت سے محروم رہنا پڑے گا۔علاوہ ازیں 77 سرکاری اسکیموں کی سہولت سے بھی ہاتھ دھونا پڑے گا۔ غور طلب ہے کہ اس سے قبل مبینہ لو َجہاد کا مسودہ بھی آدتیہ ناتھ متل نے ہی تیار کیا تھا۔یہ مسودہ کسی حکومتی حکم پر نہیں بلکہ کمیشن نے از خود تیار کی ہے۔ تجویزیہ ہے کہ دو سے زائد بچوں کے والدین پر سرکاری ملازمتوں کے لیے درخواست دینے سے لے کر بلدیاتی انتخابات لڑنے تک پابندی لگ سکتی ہے۔ اس تجویز میں ایک شق بھی شامل کی گئی ہے ، شق یہ ہے کہ قانون کی خلاف ورزی کرنے والے شہریوں کو 77 سرکاری سکیموں اور گرانٹس سے محروم کردیا جائے گا۔لاء کمیشن کی تیار کردہ 260 صفحات پر مشتمل اس رپورٹ میں مختلف طبقات کی طرف موصول تجاویزبھی شامل کی گئی ہیں۔ انہیں 57 زمروں میں رکھے گئے ہیں۔ رپورٹ میں درست اور غیر درست تجاویز کو مدنظر رکھتے ہوئے ان کی قانونی پوزیشن کو بھی واضح کیا گیا ہے۔ مستقبل میں یہ بل اتر پردیش آبادی (کنٹرول ، استحکام اور بہبود) ایکٹ 2021 کے نام سے جانا جائے گا، یہ 21 سال سے زائد عمر کے نوجوانوں اور 18 سال سے زائد عمر کی لڑکیوں پر لاگو ہوگا۔ مسودے کو حتمی شکل دینے سے قبل کمیشن نے اپنی ویب سائٹ پر تجاویز اور اعتراضات وصول کئے تھے۔ 19 جولائی تک کمیشن کو 8500 سے زائد تجاویز اور اعتراضات موصول ہوئے تھے۔ ان تجاویز اور اعتراضات پر غور کرنے کے بعد کمیشن نے بل کے مسودے کو حتمی شکل دے دی ہے۔اس مسودہ میںدو سے زائد بچوں کے والدین کو سرکاری ملازمت نہیں ملے گی۔یہاں تک کہ انہیں بلدیاتی اور پنچایتوں کے انتخابات لڑنے پر بھی پابندی ہوگی۔راشن کارڈ میں چار سے زائد ممبران کے نام نہیں لکھے جائیں گے۔یہ قانون 21 سال سے زیادہ عمر کے نوجوانوں اور 18 سال سے زیادہ عمر کی لڑکیوں پر لاگو ہوگا۔اسکولوں میں آبادی کنٹرول سے متعلق کورس پڑھانے کی تجویز بھی دی گئی ہے۔قانون کے نفاذ کے بعد اگر کسی عورت کے دوسرے حمل میں جڑواں بچے ہوں، تو وہ قانون کے دائرے میں نہیں آئے گی۔تیسرے بچے کو گود لینے پر کوئی پابندی نہیں ہوگی۔ اگر کسی کے 2 بچے معذور ہیں تو وہ تیسرے بچہ کی پیدائش پر سہولیات سے محروم نہیں ہو گا۔علاوہ ازیں سرکاری ملازمین کو یہ یقین دہانی کرانی ہوگی کہ وہ اس قانون کی خلاف ورزی نہیں کریں گے۔

پٹرو اور ڈیزل في الحال نہیں ہوں گے سستے وزیرخزانہ نے بتائی قیمتوں میں تخفیف نہیں کرنے کی وجہ

پٹرو اور ڈیزل في الحال نہیں ہوں گے سستے وزیرخزانہ نے بتائی قیمتوں میں تخفیف نہیں کرنے کی وجہ

نئی دہلی (اردو اخبار دنیا): ترقی پسند اتحاد (یو پی اے) کی سابقہ حکومت کی طرف سے 2013-14 میں تیل کی قیمتوں کو کم کرنے کے مقصد سے جاری کردہ تیل کے بانڈز کی ادائیگی مودی حکومت کر رہی ہے اور اب تک 60205.67 کروڑ روپے صرف سود میں ادا کیے گئے ہیں ۔ اس کے پیش نظر تیل کی قیمتوں میں فوری تخفیف کی توقع نہیں کی جا سکتی ۔ وزیر خزانہ نرملا سیتارمن نے نامہ نگاروں کو بتایا کہ مارچ 2021 تک تیل بانڈ کے 130923.17 کروڑ روپے کے بقایا اور 2025-26 تک اس کی سود کے ساتھ ادا کیے جانے ہیں ۔ ابھی تقریبا دس ہزار کروڑ روپے ہر سال صرف بطور سود ادا کیے جا رہے ہیں ۔ اب تک مودی حکومت نے 60205.67 کروڑ روپے بطور سود ادا کئے ہیں ۔

انہوں نے کہا کہ اس وقت کی یو پی اے حکومت نے تیل کی قیمتوں کو کم کرنے کے لیے یہ آئل بانڈ جاری کیا تھا اور تیل کی مارکیٹنگ کمپنیوں پر اس کا بوجھ ڈال دیا ۔ انہوں نے کہا کہ سال 2024-25 تک ایک سال میں 25 ہزار کروڑ روپے سے زیادہ کی ادائیگی کرنی ہوگی ۔تیل پر چنگیوں میں کمی سے متعلق ایک سوال کے جواب میں انہوں نے کہا کہ یہ ایک پیچیدہ مسئلہ ہے اور اس کو وزارت پٹرولیم دیکھ رہی ہے۔ یو پی اے حکومت کی طرح مودی حکومت بھی آنے والی حکومت پر بوجھ ڈال کر تعریف حاصل نہیں کرنا چاہتی ہے ۔ مودی حکومت یو پی اے حکومت کا بوجھ اٹھا رہی ہے اور ادائیگی کر رہی ہے۔ اس وقت حکومت نے آئل بانڈز سے پیسے ادھار لے کر تیل کی قیمتوں میں کمی کی تھی ۔ انہوں نے کہا کہ سال 2014 میں اس حوالے سے وائٹ پیپر بھی جاری کیا گیا تھا۔

جب کچھ ریاستوں کی جانب سے پیٹرول اور ڈیزل پر ویٹ وغیرہ میں کمی کے بارے میں پوچھا گیا تو انہوں نے کہا کہ تمل ناڈو نے یہ کام ریاست میں انتخابات سے پہلے کیا تھا ۔ پہلے اس میں 7 روپے فی لیٹر اضافہ کیا گیا اور بعد میں اسے 3 روپے کم کردیا گیا۔

مہاراشٹر: دوبارہ لاک ڈاؤن کی وارننگ، ممبئی میں عوامی مقامات کے لیے رعایت کا فیصلہ

 اگست 16, 2021

• 
  

ممبئی(اردو اخبار دنیا): ممبئی میں کووڈ-19 کے معاملات میں کمی کے پیش نظر ممبئی میونسپل کارپوریشن نے چند رعایتیں دینے کا فیصلہ کیا ہے،لیکن گزشتہ روز احتیاطی تدابیر نہیں کرنے سے ناراض وزیراعلی ادھو ٹھاکرے نے وارننگ دی تھی کہ اگر احتیاط نہیں کیاگیا تو دوبارہ سخت لاک ڈاؤن لگایا جاسکتا ہے۔

بی ایم سی نے میدان،گارڈن اور ساحل پر رات 10بجے جانے کی اجازت دے دی ہے۔ بی ایم سی نے اپنی ہدایات میں کہاہے کہ اس دوران عوام۔کو کوویڈ19 کے پروٹوکول کاخیال رکھناہوگا۔ گزشتہ روز سے حکومت نے چند شرائط پر لوکل ٹرینوں میں سفر کی اجازت دے دی ہے۔پہلے سرکاری،نیم سرکاری ملازمین کو اس کی اجازت تھی۔جن لوگوں نے دونوں خوراک لگالی ہیں انہیں لوکل میں سفر کی اجازت ہوگی ،یوم آزادی سے اس کی اجازت دی گئی ہے۔

بہار سیلاب : وزیر اعلی نتیش کمار نے کہا کہ پٹنہ کے لوگوں کو فی الحال کوئی خطرہ نہیں ہے

بہار سیلاب : وزیر اعلی نتیش کمار نے کہا کہ پٹنہ کے لوگوں کو فی الحال کوئی خطرہ نہیں ہے

(اردو اخبار دنیا)بہار میں سیلاب کی صورتحال تشویشناک ہے دریائے گنگا کے پانی کی سطح گزشتہ چند دنوں سے بڑھ رہی ہے 23 اضلاع کے لاکھوں لوگ سیلاب سے متاثر ہیں سیلاب کی صورت حال پر چیف منسٹر نتیش کمار نے اتوار کو کہا کہ دارالحکومت پٹنہ کے لوگوں کو فی الحال کوئی خطرہ نہیں ہے اس سے قبل بدھ کو نتیش کمار نے سڑک کے ذریعے پٹنہ کے ارد گرد سیلاب سے متاثرہ علاقوں کا جائزہ لیا تھا بدھ کے روز نتیش کمار نے کہا تھا کہ دریائے گنگا کے پانی کی سطح بڑھ رہی ہے آنے والے دنوں میں دریا کے پانی کی سطح میں مزید اضافہ ہوسکتا ہے انہوں نے کہا تھا کہ سال 2016 میں بھی سیلاب کی صورتحال تقریباایک جیسی تھی عہدیداروں سے کہا گیا ہے کہ وہ 2016 کے سیلاب کو مدنظر رکھتے ہوئے تیاری کریں اور ضروری اقدامات کریں سیلاب کے حوالے سے عہدیداروں کو ہدایت کی گئی ہے کہ وہ گنگا کے کنارے گنجان آباد علاقوں میں پانی کا رساو روکیں بدھ کے روز پٹنہ کے ہتھیدہ میں دریائے گنگا کی پانی کی سطح خطرے کے نشان سے 144 سینٹی میٹر اوپر تھی۔

سال 2022 میں پرگتی شیل سماج وادی پارٹی لوہیا اتحاد کی بنے گی حکومت : شیوپال

سال 2022 میں پرگتی شیل سماج وادی پارٹی لوہیا اتحاد کی بنے گی حکومت : شیوپال

(اردو اخبار دنیا)اٹاوہ: پرگتی شیل سماج وادی پارٹی لوہیا ( پی ایس پی ایل) کے سربراہ شیوپال سنگھ یادو نے دعوی کرتے ہوئے کہا ہے کہ جس بھی پارٹی سے ان کا اتحاد ہوگا سال 2022 کے اسمبلی انتخابات کے بعد اسی پارٹی کی حکومت بنے گی۔ پی ایس پی سربراہ آج یہاں اپنے انتخابی حلقے جسونت نگر میں لوہیا پیغام یاترا کا آغاز کرنے کے موقع پر بول رہے تھے۔ انہوں نے کہا کہ جس پارٹی سے ان کی پارٹی کا اتحاد ہوگا اسی پارٹی کی سال 2022 کے اسمبلی انتخاب میں حکومت بنے گی۔ آج ریاست کی ایسی حالت ہے جس میں ہماری پارٹی کافی مضبوط ہے۔

انہوں نے کہا کہ اگر 2022 میں ہماری حکومت بنتی ہے تو کسانوں اور مسلمانوں کو پورا احترام ملے گا۔ کسی کے ساتھ مذہب و ذات کے نام پر کوئی تفریق نہیں کی جائے گی۔ کسان حکومت کے ذریعہ پاس کئے گئے کالے قانون کی مخالفت کر رہا ہے لیکن حکومت کسانوں کے مسائل کو نہیں سن رہی ہے۔ جسے لے کر کسان مہینوں سے احتجا ج پر بیٹھے ہیں۔ حکومت کو کسانوں کی بات سننا چاہئے کیونکہ کسان ملک کو اناج دینے والے ہیں۔

شیوپال یادو نے بی جے پی پر نشانہ سادھتے ہوئے کہا کہ جب سے یہ پارٹی اقتدار میں آئی ہے تب سے عوام پریشان ہیں۔ لگاتار مہنگائی بڑھ رہی ہے اور پٹرول ڈیزل اور بجلی کی قیمتیں آسمانی چھورہی ہیں حکومت اس جانب دھیان نہیں دے رہی ہے۔ پی ایس پی سربراہ نے کہا کہ ان پانچ سالوں میں کس کو فائدہ ہوا۔ صرف دو ہی سرمایہ کاروں کو فائدہ ہوا ہے اب بہت سے لوگوں کو بکھاری بنایا گیا ہے جبکہ روزگار دینا چاہئے تھے۔ انہوں نے الزام لگایا کہ گذشتہ 5 سالوں میں بی جے پی نے ریاست کو سب سے نیچے 25 ویں پائیدان پر لا کھڑا کر دیا ہے اور بہار کا اس کے بعد نمبر آتا ہے۔

جانیے دہلی میں کون- کون سے کام ہورہے ہیں اب آن لائن

جانیے دہلی میں کون- کون سے کام ہورہے ہیں اب آن لائن

 

(اردو اخبار دنیا)

اب قومی دارالحکومت میں رہنے والے شہریوں کے بہت سے کام اب آن لائن ہونے جا رہے ہیں، یہ ایک اچھی پیش رفت ہے، جس سے شہریوں کو سہولت ہوگی۔

یوم آزادی(15 اگست 2021) کے موقع پر دہلی حکومت کے کئی محکموں میں کام آن لائن شروع کیا گیا ہے۔

نئی سروس شروع ہوتے ہی 3086 افراد کو دفتر جانے کے بغیر لائسنس دیا گیا ہے۔

 دہلی حکومت نے تمام اتھارٹیز میں سویدھا سیوا کیندر قائم کرنے کا فیصلہ کیا ہے۔

یہاں تعینات اسسٹنٹ بہت کم پیسوں میں لوگوں کی آن لائن درخواستیں قبول کریں گے۔

محکمہ ٹرانسپورٹ نے اس حوالے سے پبلک نوٹس بھی جاری کیا ہے۔

اس اقدام سے سائبر کیفے مالکان کی فیس وصول کرنے کی صوابدید کو بھی چیک کیا جائے گا۔ حکومت نے موبائل اسسٹنٹ کی ایک اور سہولت دی ہے۔ ان کے تعاون سے درخواست بھرنے کے لیے 50 روپے فیس ادا کرنی ہوگی۔ اس کے لیے آپ کو 1076 پر کال کرنا ہوگی۔

اسسٹنٹ گھر آئے گا اور آن لائن درخواست دے گا۔

اس کے ساتھ ہی محکمہ ٹرانسپورٹ نے تین ڈپٹی کمشنرز کو مقرر کیا ہے تاکہ چہرے سے متعلق مسائل کو حل کیا جا سکے۔ 3086 لوگوں کے لیے بنایا گیا لرننگ لائسنس۔ فیس لیس سہولت کے متعارف ہونے کے بعد 11 سے 13 اگست شام 4 بجے تک 8370 درخواستیں موصول ہوئی ہیں۔

اس میں گھر بیٹھے لرننگ لائسنس حاصل کرنے والوں کی تعداد 3086 تک پہنچ گئی ہے ، جبکہ گاڑی کی ملکیت کی منتقلی کے 1433، ڈرائیونگ لائسنس تجدید کے 1248۔ اس کے علاوہ  458 وہ افراد ہیں، جنھوں نے ڈرائیونگ لائسنس میں موجود ایڈریس کو تبدیل کیا ہے۔

اس کے علاوہ دوبارہ درخواست دینے والوں کی تعداد 247 ہوچکی ہے۔

افغان فوج کی ناکامی ہماری توقع سے کہیں زیادہ تیزی سے ہوئی: امریکہ کا اعتراف

 اگست 16, 2021

• (اردو اخبار دنیا)

  

واشنگٹن:امریکی سیکریٹری آف سٹیٹ انٹونی بلنکن نے تسلیم کیا ہے کہ جس افغان فوج کو انھوں نے گذشتہ بیس برس سے تربیت دی ے اور انھیں اسلحے سے لیس کیا، امریکہ ان کی طاقت اور صلاحیتوں کا درست اندازہ نہیں لگا سکا۔

ادھر افغان صدر اشرف غنی کا کہنا ہے کہ طالبان نے مجھے یہ شہر چھوڑنے پر مجبور کیا ہے کیونکہ وہ کابل اور اس کے باسیوں پر حملہ کرنے آئے تھے۔ کابل میں ایک طرف طالبان صدارتی محل پر قبضے کا دعویٰ کر رہے ہیں تو دوسری جانب کابل ایئرپورٹ سے تمام کمرشل پروازیں معطل کر دی گئی ہیں۔

امریکی صدر جو بائیڈن صرف گذشتہ ہفتے بھی تین لاکھ فوجیوں پر مبنی افغان فوج پر اعتماد کا اظہار کر چکے ہیں۔دوسری جانب طالبان جنگجوؤں کی تعداد کا اندازہ ہے کہ وہ پچاس ہزار سے ایک لاکھ کے درمیان ہیں۔

تاہم امریکی افواج کی جانب سے زمینی حمایت نہ ملنے پر حکومتی افواج نے فوراً ہتھیار ڈال دیے اور فوجی اہلاکاروں نے اپنی اپنی چوکیاں چھوڑ دیں اور کچھ واقعات میں تو فوجی بالکل بھاگ گئے۔

طالبان نے پہلا صوبائی دارالحکومت صوبہ نمروز کے شہر زرنج قابو کیا اور اگلے دس دن میں وہ پورے ملک پر حاوی ہو گئے اور اتوار کو کابل داخل ہونے میں کامیاب ہو گئے۔

آزادہندوستان میں سائنس وٹیکنالوجی کے شعبے میں مسلمانوں کی خدمات

سائنس وٹیکنالوجی کے شعبے میں مسلمانوں کی خدمات

• (اردو اخبار دنیا)
  

 

آزادہندوستان کے مسلم سائنسداں

غوث سیوانی،نئی دہلی

مسلمانوں کا سائنس و ٹیکنالوجی سے بہت پرانا تعلق ہے۔قرآن کی آیات بار بار سائنس کی جانب توجہ مبذول کراتی ہیں۔ تاہم بیچ کی کچھ صدیوں میں مسلمان سائنس میں پیچھے ہوگئے تھے مگر اب تیزی سے اس جانب ان کا رجحان ہورہا ہے۔آزاد ہندوستان میں مسلمانوں کی آبادی کے تناسب سے سائنٹسٹ تو نہیں پید اہوئے مگرجوہوئے،انھوں نے اپنے شعبے میں کمال کردکھایا۔ آزادی کے بعد جن مسلمانوں نے سائنس کے میدان میں اعلیٰ کارنامہ انجام دیا،ان تمام کے نام بھی لئے جائیں تو ایک دفتر کی ضرورت ہو۔ہم یہاں صرف چند مشہورافرادکا اجمالی تذکرہ ک رہے ہیں۔

ڈاکٹر سالم علی

ڈاکٹرسالم علی کو ہندوستان کا برڈ مین کہاجاتاہے۔انھوں نے پرندوں کی زندگی پر ریسرچ کیا اور کئی کتابیں تحریر کیں۔اس سے نئے نئے انکشافات ہوئے اور عالمی سطح پران کی تحقیقات کوسراہاگیانیز اعزازات اور ڈگریوں سے نوازاگیا۔ حکومت ہندنے انھیں پدم بھوشن اورپدم وبھوشن سے بھی نوازا۔ 1985میں وہ راجیہ سبھا کے لئے بھی نامزد کئے گئے۔

ڈاکٹر سید ظہور قاسم

ڈاکٹر ظہور قاسم ، ہندوستان کے معروف سائنسداں گزرے ہیں۔ وہ انٹارٹیکا مشن کے لئے مشہور ہیں۔انھوں نے کئی سائنسی پروگراموں کی قیادت کی۔وہ پلاننگ کمیشن آف انڈیاکے ممبر رہے۔جامعہ ملیہ اسلامیہنئی دہلی کی وائس چانسلررہے۔فشریزاورماحولیات کے شعبے میں ان کی کافی خدمات ہیں۔ ان کی سائنسی خدمات کے لئے حکومت ہند نے پدم بھوشن اور پدم شری سے نوازا۔ انڈین سائنس کانگریس نےلائف ٹائم اچیومینٹ ایوارڈ سے بھی نوازے گئے۔

اے پی جے عبدالکلام 

آزاد ہندوستان میں جب بھی سائنس اور ٹیکنالوجی کی بات ہوگی تو ڈاکٹراے پی جے عبدالکلام کانام ضرورلیاجائے گا۔انھوں نے دفاعی میدان میں ملک کو خودکفیل بنانے کا کام کیا۔انھوں نے میزائل کی ٹکنالوجی میں جواختراعات کیں،اس کے سبب انھیں ’میزائل مین‘ کہاجانے لگا۔انھیں ڈھیر سارے ایوارڈس ملے،یہاں تک کہ ملک کا سب سے اعلیٰ اعزازبھارت رتن بھی دیاگیا۔ جولائی 2015میں سابق صدرجمہوریہ کلام صاحب نے انتقال کیا۔

ڈاکٹر عبید صدیقی

علی گڑھ مسلم یونیورسٹی کے تعلیم یافتہ نیورو بیالوجی اور جینیٹکس کے ماہر ڈاکٹر عبید صدیقی کا نام ملک کے مایہ ناز سائنسدانوں میں شمار ہوتاہے۔ ٹاٹا انسٹی ٹیوٹ آف فنڈامینٹل ریسرچ، نیشنل سینٹر فار بایولوجیکل سائنس کے قیام میں اہم کردار ادا کیا۔اے ایم یوسے فراغت کے بعدانھوں نے دنیا کی کئی بڑی یونیورسٹیوں میں تحقیقی کام کئے۔ڈاکٹر صدیقی نے ذائقہ کے موضوع پر تحقیقی کام کیا۔اس سے جدید سائنس کوسونگھنے اورچکھنے کی قوت کو سمجھنے میں مددملی۔اعلیٰ اعزازات سے سرفراز اس سائنٹسٹ کی موت جولائی 2013میں ایک سڑک حادثے میں ہوئی۔

پروفیسر ای اے صدیق 

ابراہیم علی ابوبکر صدیق کو ایک زرعی سائنسداں کے طور پر جانا جاتا ہے۔انھوں نے اعلیٰ معیار کے چاول کی کئی قسمیں بنائیں۔پوساکی چندپیداوار بھی ان کے نام منسوب کی گئی ہیں۔ انھوں نے ہندوستان کے علاوہ دنیا کے کئی ملکوں کے سائنسی اداروں کے ساتھ کام کیا جن میں مصر، ویتنام ، بنگلہ دیش شامل ہیں۔

خاتون سائنسداں

آزاد ہندوستان میں خاصی تعداد میں مسلمان سائنسداں ہوئے جن میں سے چند کا ذکر ہم نے اوپرکیا۔ ان کے علاوہ ڈاکٹرشاہد جمیل،ڈاکٹرشمیم جیراجپوری، ڈاکٹراحتشام حسنین، ڈاکٹرمحمود نقوی، ڈاکٹرانیس الرحمان شامل ہیں۔ آزادی کے بعدہندوستان کی مسلم خواتین بھی مردوں کے شانہ بشانہ چلیں اور کئی خواتین نے بھی سائنس کےمیدان میں اچھی کارکردگی کا مظاہرہ کیا۔

ایسی خواتین میں ایک آفرین علام ہیں جنھوں نے امریکہ سے تعلیم پائی ہے مگرباقاعدہ پی ایچ ڈی نہ ہونے کے باجود انتہائی چھوٹے زرات پر انھوں نے تحقیقی کام انجام دیئے۔اسی طرح ڈاکٹر قدسیہ تحسین،علی گڑھ مسلم یونیورسٹی میں زولوجی کی پروفیسر ہیں اور سائنسی تحقیقات کا سلسلہ جاری رکھے ہوئے ہیں۔پورے ملک میں ایسے ہزاروں مسلمان مردوخواتین مل جائیں گے جو یونیورسٹیوں میں پروفیسر،دوائوں کی کمپنیوں میں تحقیقی کام کر رہے ہیں یا کسی سائنسی شعبے سے وابستہ ہوکراپنی ذمہ داری نبھا رہے ہیں۔

رہانے اور پجارےنے انڈیا ٹیم کو سنبھالا

رہانے اور پجارےنے انڈیا ٹیم کو سنبھالا

(اردو اخبار دنیا)

آؤٹ آف فارم چل رہے نائب کپتان اجنکیا رہانے (61) اور چتیشور پجارا (45) رن بنا کر اپنے فارم میں واپسی کی ہے اور ٹیم کا سنبھالا ہے۔ انہوں نے چوتھے وکٹ کے لئے 100 رن کی شاندار شراکت داری کی جس کی بدولت ہندوستان نے تین وکٹ پر 55 رن کی خراب صورتحال سے ابھرکر روشنی کے سبب اتوار کو چوتھے دن کا کھیل ختم ہونے تک اپنی دوسری اننگز میں چھ وکٹ گنواکر 181 رن بنالئے تھے۔ انگلینڈ کو پہلی اننگز میں 27 رن کی معمولی برتری حاصل تھی۔ ہندوستان ابھی 154 رن سے آگے ہے اور اس کے چار وکٹ باقی ہیں۔

ہندوستان نے انگلینڈ کو دن کی آخری گیند پر پہلی اننگز میں 391 رنز پر ڈھیر کر دیا۔ ہندوستان نے اپنی پہلی اننگز میں 364 رنز بنائے تھے۔ انگلینڈ نے 27 رنز کی اہم برتری حاصل کر لی تھی۔ ہندوستان نے آج چوتھے دن اپنی دوسری اننگز کا آغاز کیا۔

ہندوستان کو پہلا دھچکا 18 کے اسکور پر لگا جب فارم میں چل رہے اور پہلی اننگز میں سنچری بنانے والے لوکیش راہل صرف پانچ رنز بنا کر وکٹ کیپر جوس بٹلر کے ہاتھوں فاسٹ گیند باز مارک ووڈ کے ہاتھوں کیچ آؤٹ ہو گئے۔ اوپنر روہت شرما نے 36 گیندوں پر 21 رنز بنائے اور مارک ووڈ کی گیندپر باؤنڈری کے قریب معین علی کے ہاتھوں کیچ ہو گئے۔ روہت نے 36 گیندوں کی اپنی اننگز میں دو چوکے اور ایک چھکا لگایا۔ روہت کاوکٹ 27 کے اسکور پر گرا۔اب دیکھنا یہ ہے کہ میچ کس کروٹ جاتا ہے۔

*آج کی اہم خبریں

*آج کی اہم خبریں* 

 *ABD News* 

 *6 محرم الحرام 1443ھ* 

 *16/ 08/ 2021*(اردو اخبار دنیا)

*ملک بھر میں جوش وخروش سے منایا گیا جشن یوم آزادی*

واضح ہوکہ ملک بھر پندرہ اگست یوم آزادی جوش وخروش سے منایا گیا ،سرکاری دفاتر ،اسکول ،کالج مختلف مقامات پر پرچم کشائی کی گئی اور وطن عزیز کو انگریزوں کی غلامی سے آزاد کرانے والے جیالوں کا تزکرہ کرکے انہیں خراج عقیدت پیش کیا گیا ،ملک کی امن و سلامتی اور ترقی اتحاد و اتفاق کے لئے دعائیں کی گئیں۔

○○○○○○○○○○○○○○○○○○○○○○○○

*75 ویں یوم آزادی کے موقع پر دہلی میں لہرایا گیا 115 فٹ ترنگا*

واضح ہوکہ دہلی حکومت کی جانب سے آزادی کی 75 ویں سالگرہ کے موقع پر پٹپر گنج اسمبلی میں 115 فٹ اونچا ترنگا نصب کیا گیا تھا۔  اس موقع پر ، ڈاکٹروں نے جنہوں نے کورونا کی دوسری لہر کے دوران اپنی جانوں کو خطرے میں ڈال کر لوگوں کی زندگیاں بچائیں  ترنگا لہرایا۔  اس موقع پر پٹپر گنج کے ایم ایل اے اور دہلی کے نائب وزیر اعلی منیش سسودیا موجود تھے جنہوں نے ڈاکٹروں ، طبی عملے ، این جی او کے کارکنوں ، اساتذہ سمیت تقریبا 350 لوگوں کو انعام سے نوازا۔اس موقع پر نائب وزیر اعلیٰ منیش سسودیانے آزادی کی 75 ویں سالگرہ پر سب کو مبارکباد دیتے ہوئے کہا کہ آج ہم ایک آزاد ماحول میں رہ رہے ہیں کیونکہ ہمارے بہادر شہداء نے اس آزادی کے لیے اپنی جانیں دی تھیں۔  انہوں نے کہا کہ ہمارے آزادی پسندوں نے ہمیں آزادی دی ، لیکن آزادی کے 75 ویں سالی پر ، یہ ہم سب کی ذمہ داری ہے کہ ہم آزادی کے 100 سال بعد ایک ترقی یافتہ ہندوستان کے خواب کو مضبوط کرنے کے لیے مل کر کام کریں۔

○○○○○○○○○○○○○○○○○○○○○○○○

*میگھالیہ:وزیر داخلہ کا استعفی، یوم آزادی پر تشدد کے بعد شیلانگ میں کرفیو،انٹرنیٹ پر پابندی*

واضح ہوکہ نیوز ادارہ این ڈی ٹی وی کی رپورٹ کے مطابق یوم آزادی  تقریب میں ہوئے پرتشدد واقعات کے بعد میگھالیہ کے وزیر داخلہ لکھن رمبئی نے اتوار کی شام استعفیٰ دے دیا ہے۔  پرتشدد واقعات کے بعد شیلانگ میں مکمل کرفیو نافذ کردیا گیا ہے۔  دارالحکومت میگھالیہ اور ریاست کے کئی دیگر حصوں میں انٹرنیٹ خدمات معطل کردی گئی ہیں۔  ریاستی حکومت کے ایک حکم میں کہا گیا ہے کہ کرفیو 17 اگست تک نافذ رہے گا۔ نامعلوم افراد نے اتوار دوپہر شیلونگ کے جاؤ علاقے میں موکین روہ پولیس چوکی کی پولیس گاڑی کو نذر آتش کردیا۔  گاڑی میں موجود پولیس اہلکار ، بشمول چوکی کے انچارج ، اس واقعہ سے بال بال بچ گئے۔  سابق باغی لیڈر چیرش اسٹار فیلڈ تھانگ کھو کی ان کے گھر پر پولیس کے چھاپے کے دوران ہلاکت کے بعد شیلونگ کے کچھ حصوں میں پرتشدد حالات ہیں ۔کل یوم آزادی ہونے کے باوجود ، بہت سے لوگ شیلونگ کی سڑکوں پر کالے جھنڈوں کے ساتھ قطار میں کھڑے دکھائی دے رہے تھے ، جو تھنگو کی موت پر پولیس اور ریاستی حکومت کی مذمت کررہے تھے۔ انکے علاوہ بہت سے لوگ اپنے گھروں کی چھتوں پر پلے کارڈز کے ساتھ کھڑے دیکھے گئے۔

○○○○○○○○○○○○○○○○○○○○○○○○

*لال قلعہ سے بولے مودی،ایسے بھارت کی تعمیر ہوجہاں شہریوں کی زندگی میں حکومت بے وجہ دخل نہ دے*

واضح ہوکہ نیوز رپورٹ سے ملی جانکاری کے مطابق یوم آزادی کے موقعہ پر وزیراعظم نے لال قلعہ کی فصیل سے خطاب کیا۔اس موقعہ پرانھوں نے تمام مجاہدین آزادی، ملک کے دفاع میں اپنے آپ کو دن رات کھپانے والے ، قربانی دینے والے، بہادر مرد و خواتین کوخراج تحسین پیش کیا۔انھوں نے اپنے خطاب میں کہاہے کہ آزادی کو عوامی تحریک بنانے والے ، لائق صد احترام باپو ہوں ،یا آزادی کے لیے اپنا سب کچھ نچھاور کرنے والے نیتاجی سبھاش چندر بوس، بھگت سنگھ، چندر شیکھر آزاد، بسمل اور اشفاق اللہ خان جیسے عظیم انقلابی ہوں، جھانسی کی رانی لکشمی بائی ہوں، کتور کی رانی چینما ہوں یا رانی گائی دنلیو ہوں، یا آسام میں ماتنگینی ہاجراکا کی بہادری ہو، ملک کے پہلے وزیر اعظم پنڈت نہرو جی ہوں، قوم کو ایک متحد ملک کی شکل دینے والے سردار ولبھ بھائی پٹیل ہوں، بھارت کے مستقبل کی سمت کا تعین کرنے والے، راستہ طے کرانے والے بابا صاحب امبیڈکر سمیت ہر شخص کو ہر شخصیت کو آج ملک یاد کر رہا ہے۔

○○○○○○○○○○○○○○○○○○○○○○○○

*اندور میں پرچم کشائی کے دوران متنازعہ نعرے بازی پر دو فریقوں کے درمیان پتھراؤ۔*

واضح ہوکہ نیوز رپورٹ سے ملی جانکاری کے مطابق اندور میں پرچم کی تقریب کے دوران بلند کیے گئے متنازع نعروں کی وجہ سے دو فریقوں کے درمیان شدید جھگڑا ہوا۔ جھگڑا اتنا بڑھ گیا کہ دونوں طرف سے ایک دوسرے پر پتھر برسائے گئے۔ پولیس فورس نے موقع پر پہنچ کر حالات کو قابو میں کیا ، جبکہ پتھراؤ سے دو نوجوان زخمی ہوئے ، جنہیں علاج کے لیے اسپتال میں داخل کرایا گیا ہے۔ پولیس نے دونوں فریقوں کے خلاف مقدمہ درج کیا ہے اور ویڈیو فوٹیج کی بنیاد پر ملزمان کو گرفتار کرنے کو کہا ہے۔

○○○○○○○○○○○○○○○○○○○○○○○○

*چیف جسٹس سپریم کورٹ نے کیا افسوس کا اظہار ،کہا یہ انتہائی مایوس کن ہے کہ پارلیمنٹ میں نہیں ہو رہی مناسب بحث*

واضح ہوکہ نیوز رپورٹ سے ملی جانکاری کے مطابق 75 ویں یوم آزادی کے موقع پر ملک کے چیف جسٹس (سی جے آئی) جسٹس این وی رمنا نے پارلیمنٹ کے کام کاج پر سخت تنقید کی ہے۔  انہوں نے نہ صرف پارلیمانی رکاوٹوں پر توجہ دی بلکہ ایوان کے اندر قوانین پر بحث کے لیے وقت کم کرنے پر بھی توجہ دی۔  اس کا پہلے وقتوں سے موازنہ کرتے ہوئے ، انہوں نے کہا کہ جب پارلیمنٹ کے دونوں ایوان "وکلاء سے بھرے ہوئے" تھے ، سی جے آئی رمنا نے یوم آزادی کے موقع پر سپریم کورٹ میں منعقدہ ایک تقریب میں کہا ، "اگر ہم اپنے آزادی کے جنگجوؤں کو دیکھیں تو ان میں سے بہت سے لوگ قانونی برادری سے بھی تھے۔ پہلی لوک سبھا اور راجیہ سبھا کے ارکان یہی لوگ تھے۔  انہوں نے کہا ، "بدقسمتی سے جو ہم اب ایوانوں میں دیکھ رہے ہیں ... پھر ایوانوں میں بحث بہت تعمیری تھی۔ میں نے کئی مالیاتی بلوں پر مباحثے بھی دیکھے ہیں جہاں بہت سے تعمیری نکات بنائے گئے تھے۔ پھر قوانین پر تبادلہ خیال کیا گیا اور شدید غور و خوض پھر بحث کے بعد ، ہر ایک کے پاس اس قانون پر واضح تصویر تھی۔ 

○○○○○○○○○○○○○○○○○○○○○○○○

*کسانوں نے سنگھو بارڈر پر جھنڈا لہرا کر منائی یوم آزادی، ریٹائرڈ فوجیوں کے ساتھ دی سلامی*

واضح ہوکہ نیوز رپورٹ سے ملی جانکاری کے مطابق کل ملک میں 75 ویں یوم آزادی منایا گیا۔  دریں اثنا ، پچھلے 9 مہینوں سے کسان دہلی کی تین سرحدوں سنگھو بارڈر ، غازی پور بارڈر اور ٹکری بارڈر پر تینوں زرعی قوانین کی منسوخی کے لیے احتجاج کر رہے ہیں۔  آزادی کی 75 ویں سالگرہ کے موقع پر دہلی سرحد پر ترنگا لہرایا گیا۔  سنگھو بارڈر پر احتجاج کرنے والے کسانوں نے جھنڈا لہرایا۔  ریٹائرڈ فوجیوں کی بڑی تعداد نے بھی سنگھو بارڈر پر پہنچ کر سلامی دی۔

○○○○○○○○○○○○○○○○○○○○○○○○

*دہلی:دوارکا کے سیکٹر 8 میں واقع ہوٹل میں لگی آگ، دو ہلاک اور چار زخمی*

واضح ہوکہ دہلی کے دوارکا علاقے میں ایک ہوٹل میں اچانک آگ لگنے سے دو افراد ہلاک ہوگئے۔  ساتھ ہی اس حادثے میں چار افراد زخمی بھی ہوئے ہیں۔  یہ ہوٹل دوارکا کے سیکٹر 8 میں واقع ہے۔  کل صبح کے اوائل میں دہلی پولیس کو دوارکا سیکٹر-8 کے شری کرشنا اویو ہوٹل میں آگ لگنے کی اطلاع ملی۔  جس کے بعد فائر بریگیڈ ، ایمبولینس اور ضلعی پولیس اہلکاروں کی 8 گاڑیاں موقع پر روانہ کی گئیں۔  حیران کن بات یہ ہے کہ پولیس کو ہوٹل کا کوئی عملہ موقع پر نہیں ملا۔

○○○○○○○○○○○○○○○○○○○○○○○○

*اوڈیشہ کے وزیراعلیٰ نے 3.5 کروڑ لوگوں کے لیے سمارٹ ہیلتھ کارڈ کا کیا اعلان، کروا سکیں گے 5 لاکھ تک کا علاج* 

واضح ہوکہ اڈیشہ کے وزیر اعلیٰ نوین پٹنائک نے یوم آزادی کے موقع پر صحت کے شعبے میں تاریخی قدم اٹھاتے ہوئے بیجو سواستھیا کلیان یوجنا کے تحت ریاست میں 3.5 کروڑ سمارٹ ہیلتھ کارڈ دینے کا اعلان کیا۔  ریاستی حکومت نے اتوار کو یہ معلومات دی۔  یہ ملک میں اپنی نوعیت کی پہلی ہیلتھ کیئر سروس ہے۔  اس کے ذریعے ریاست کے عوام ملک کے 200 سے زائد ہسپتالوں میں صحت کی خدمات حاصل کر سکیں گے۔  اس سکیم کے تحت ہر خاندان کو 5 لاکھ روپے (خواتین کے لیے 10 لاکھ) تک سالانہ صحت کی کوریج دستیاب ہوگی۔

○○○○○○○○○○○○○○○○○○○○○○○○

*راہل گاندھی کے خلاف دہلی کے 2 تھانوں میں شکایت درج، نابالغ ریپ کیس میں شناخت ظاہر کرنے کا معاملہ*

واضح ہوکہ نیوز رپورٹ سے ملی جانکاری کے مطابق کانگریس لیڈر راہل گاندھی کے خلاف قومی دارالحکومت دہلی کے بارکھمبا اور تلک مارگ تھانے میں شکایت درج کی گئی ہے۔  یہ شکایت دہلی کینٹ عصمت دری متاثرہ خاندان کی شناخت ظاہر کرنے پر ایف آئی آر درج کرنے کے لیے دی گئی تھی۔  دونوں تھانوں نے دونوں شکایات نئی دہلی پولیس کرائم برانچ کو منتقل کر دی ہیں۔  نئی دہلی کے ڈی سی پی نے اس کی معلومات دی ہیں۔کرائم برانچ کو پہلے ہی نیشنل کمیشن فار پروٹیکشن آف چائلڈ رائٹس (این سی پی سی آر) سے شکایت ہے۔  این سی پی آر نے راہل گاندھی کے خلاف ایف آئی آر درج کرنے کی شکایت بھی دی تھی۔  این سی پی سی آر نے فیس بک انڈیا اور انسٹاگرام سے راہل گاندھی کے خلاف کی گئی کارروائی کی تفصیلات بھی مانگی ہیں۔

○○○○○○○○○○○○○○○○○○○○○○○○

*اکھلیش یادو کا بڑا بیان:ملک کو بچانے کے لیے ہوں گے 2022 کے یوپی اسمبلی انتخابات*

واضح ہوکہ نیوز رپورٹ سے ملی جانکاری کے مطابق 75 ویں یوم آزادی کے موقع پر ایس پی سرپرست ملائم سنگھ یادو نے اتوار کو دارالحکومت لکھنؤ میں سماج وادی پارٹی کے دفتر پر پرچم لہرا کر لوگوں کو مبارکباد دی۔  اس کے ساتھ ہی سماج وادی پارٹی کے صدر اور یوپی کے سابق وزیر اعلیٰ اکھلیش یادو نے کارکنوں سے خطاب کرتے ہوئے کہا کہ یوپی اسمبلی الیکشن ملک کو بچانے کا الیکشن ہے ، نوجوانوں کو 2022 کے اسمبلی الیکشن کو اپنا الیکشن سمجھنا چاہیے۔  بی جے پی حکومت کو نشانہ بناتے ہوئے اکھلیش یادو نے کہا کہ آج جو اقتدار میں ہیں، انہوں نے کوئی وعدہ پورا نہیں کیا۔ آئین کے ساتھ کھیل رہے ہیں۔  دلتوں اور پسماندہ افراد کو سوچنا ہوگا کہ کیا انہیں وہ حق مل گیا ہے جو انہیں آئین میں ملا تھا۔

○○○○○○○○○○○○○○○○○○○○○○○○

*بہار کا سیلاب:سی ایم نتیش کمار نے کہا کہ پٹنہ کے لوگوں کو فی الحال کوئی خطرہ نہیں ہے*

واضح ہوکہ نیوز رپورٹ سے ملی جانکاری کے مطابق بہار میں سیلاب کی صورتحال تشویشناک ہے دریائے گنگا کے پانی کی سطح گزشتہ چند دنوں سے بڑھ رہی ہے 23 اضلاع کے لاکھوں لوگ سیلاب سے متاثر ہیں سیلاب کی صورت حال پر چیف منسٹر نتیش کمار نے اتوار کو کہا کہ دارالحکومت پٹنہ کے لوگوں کو فی الحال کوئی خطرہ نہیں ہے اس سے قبل بدھ کو نتیش کمار نے سڑک کے ذریعے پٹنہ کے ارد گرد سیلاب سے متاثرہ علاقوں کا جائزہ لیا تھا بدھ کے روز نتیش کمار نے کہا تھا کہ دریائے گنگا کے پانی کی سطح بڑھ رہی ہے آنے والے دنوں میں دریا کے پانی کی سطح میں مزید اضافہ ہوسکتا ہے انہوں نے کہا تھا کہ سال 2016 میں بھی سیلاب کی صورتحال تقریباایک جیسی تھی عہدیداروں سے کہا گیا ہے کہ وہ 2016 کے سیلاب کو مدنظر رکھتے ہوئے تیاری کریں اور ضروری اقدامات کریں سیلاب کے حوالے سے عہدیداروں کو ہدایت کی گئی ہے کہ وہ گنگا کے کنارے گنجان آباد علاقوں میں پانی کا رساو روکیں بدھ کے روز پٹنہ کے ہتھیدہ میں دریائے گنگا کی پانی کی سطح خطرے کے نشان سے 144 سینٹی میٹر اوپر تھی۔

○○○○○○○○○○○○○○○○○○○○○○○○

*پرینکا گاندھی کا پوسٹر ہردوئی میں پھاڑ دیا گیا کانگریس برہم*

واضح ہوکہ نیوز رپورٹ سے ملی جانکاری کے مطابق اسمبلی انتخابات کے حوالے سے رہنماؤں کے درمیان لفظوں کی جنگ کے ساتھ ہی پوسٹر جنگ بھی شروع ہو گئی یوم آزادی کے موقع پر ہردوئی میں پولیس لائن کے قریب اتر پردیش کانگریس پارٹی کی جانب سے ایک فلیکس نصب کیا گیا تھا جسے پھاڑ دیا گیا ہے معلومات کے مطابق ریاست کے 75 اضلاع میں اترپردیش کانگریس کمیٹی کی جانب سے ریاستی کانگریس کی طرف سے ایسے فلیکس لگائے گئے تھے فلیکس میں اتر پردیش انچارج پرینکا گاندھی واڈرا کانگریس قانون ساز لیڈر ارادھنا مشرا اوریوپی کی کانگریس کمیٹی کے صدر اجے کمار لالو کی تصاویر تھیں کے صبح یہ پوسٹر کئی جگہوں سے پھٹا ہوا دیکھا گیا اس لیے کانگریس والوں نے اسے ٹیپ اور گلو کے ذریعے چپکانے کی کوشش کی اس کے خلاف کانگریس والوں کی طرف سے کافی غصہ بھی تھا کانگریس قائدین نے کسی طرح یہ فلیکس شامل کیا ہے لیکن ساتھ ہی مطالبہ کیا ہے کہ وہ اس پوسٹر پھاڑنے کی اور ایسا کرنے والے عناصر کے خلاف سخت کارروائی کریں۔

○○○○○○○○○○○○○○○○○○○○○○○○

*یوپی:2022میں کسی بھی دل کی حکومت بنے پی ایس پی حکومت میں شامل ہوگی: شیو پال یادو*

واضح ہوکہ نیوز رپورٹ سے ملی جانکاری کے مطابق پرگتیشیل سماجوادی پارٹی لوہیا (پی ایس پی) کے صدر شیو پال سنگھ یادو نے دعویٰ کیا ہے کہ 2022 میں کوئی بھی پارٹی اتر پردیش قانون ساز اسمبلی میں حکومت بنائے گی ان کی پارٹی پی ایس پی حکومت میں شامل ہو گی  پرسپا کے سربراہ شیو پال سنگھ اپنے حلقہ جسوت نگر میں یوم آزادی کے موقع پر لوہیا سندیش یاترا کے آغاز کے موقع پر خطاب کر رہے تھے انہوں نے کہا کہ جس پارٹی میں وہ یوپی اسمبلی میں ہوں گے وہ 2022 میں حکومت بنائے گی ، آج اترپردیش میں یہی صورتحال ہے ہماری تنظیم بہت مضبوط ہے۔

○○○○○○○○○○○○○○○○○○○○○○○○

*اسکل ڈیولپمنٹ کا مرکز بنے گا جامعہ ملیہ اسلامیہ، دھرمیندر پردھان سے ملاقات کے بعد جامعہ وائس چانسلر نجمہ اختر کا اعلان*

واضح ہوکہ نیوز رپورٹ سے ملی جانکاری کے مطابق  جامعہ ملیہ اسلامیہ کی وائس چانسلر نجمہ اختر نے کل یوم آزادی کے موقع پر اپنے خطاب میں اس بات کا اظہار کیا کہ جلد ہی جامعہ ملیہ اسلامیہ کو اسکل ڈیولپمنٹ ہنرمندی کا مرکز بنایا جائے گا۔ وائس چانسلر نے کہا انہوں نے حال ہی میں وزیر تعلیم و اسکل ڈیولپمنٹ دھرمیندر پردھان سے ملاقات کی تھی اور انہیں وزیر محترم نے اس سمت  متوجہ ہونے کے لیے کہا ہے اور تمام طرح کا تعاون اور حمایت دینے کی یقین دہانی کرائی ہے۔ وائس چانسلر نجمہ نے کہا وزیر موصوف نے ان سے کہا ہے کہ اگر اسکل ڈیولپمنٹ کے میدان میں جامعہ ملیہ اسلامیہ کوئی بڑا کام کرتا ہے تو نوکریاں دلانے کا وہ کام کریں گے۔

○○○○○○○○○○○○○○○○○○○○○○○○

*75 ویں یوم آزادی کے موقع پر سونیا گاندھی نے پارٹی ہیڈ کوارٹر میں ترنگا لہرایا*

واضح ہوکہ نیوز رپورٹ سے ملی جانکاری کے مطابق ملک بھر میں جوش وخروش سے جشن یوم آزادی پروگرام منعقد ہوا اور پرچم کشائی کی گئی ،کانگریس کی عبوری صدر سونیا گاندھی نے 75 ویں یوم آزادی کے موقع پر کانگریس ہیڈ کوارٹر پر ترنگا لہرایا۔ اس موقع پر راہل گاندھی سمیت کانگریس کے کئی سینئر لیڈر موجود رہے۔

○○○○○○○○○○○○○○○○○○○○○○○○

*افغانستان کے راشٹرپتی بھون پر طالبان کا قبضہ، صدر اشرف غنی نے چھوڑا ملک ، کئی افغان لیڈران پاکستان پہنچے*

واضح ہوکہ نیوز رپورٹ سے ملی جانکاری کے مطابق  افغانستان سے امریکی افواج کے انخلا کے ساتھ شدید جنگ شروع ہو گئی تھی اور حالات میں کشیدگی کے درمیان افغانستان کے صدر اشرف غنی نے اپنے عہدے سے استعفیٰ دے دیا ہے ۔ بتایا جا رہا ہے کہ طالبان نے اقتدار میں شراکت داری کی پیشکش ٹھکرا دی تھی ، جس کی وجہ سے صدر غنی کو استعفی دینا پڑا ہے ۔ صدر کے عہدہ سے استعفی دینے کے بعد اشرف غنی کابل کو چھوڑ تاجکستان چلے گئے ہیں ۔ وہیں افغانستان کے نائب صدر امر اللہ صالح نے کہا ہے کہ وہ اپنے ملک کو چھوڑ کر کہیں باہر نہیں جائیں گے ۔ میڈیا رپورٹوں کے مطابق افغانستان کے سابق داخلی وزیر علی احمد جلالی نئی عبوری حکومت کی قیادت کریں گے۔ نئی عبوری حکومت کی حلف برداری ایک دو دن میں ہوسکتی ہے۔خبروں کے مطابق افغانستان کے راشٹرپتی بھون پر طالبان نے قبضہ کرلیا ہے۔

○○○○○○○○○○○○○○○○○○○○○○○○

*ہیٹی میں 7.2 شدت کے زلزلے میں 700 سے زائد افراد ہلاک، ہزاروں زخمی*

واضح ہوکہ بی بی سی میں شائع رپورٹ کے مطابق کیربیئن ملک ہیٹی میں سنیچر کو آنے والے شدید زلزلے میں اب تک کم از کم 724 افراد ہلاک اور 2,800 سے زائد زخمی ہو گئے ہیں۔سنیچر کی صبح آنے والے اس زلزلے کی شدت 7.2 بتائی جا رہی ہے جس نے گرجہ گھروں اور ہوٹلوں سمیت متعدد عمارتوں کو شدید نقصان پہنچایا ہے۔عمارتوں کے ملبے سے زندہ بچنے والے افراد کی تلاش اور متاثرین کو نکال کر ہسپتال پہنچانے کا سلسلہ جاری ہے۔اس صورتحال کے پیش نظر مقامی ہسپتال شدید دباؤ میں ہیں اور طبی سہولیات کی قلت سے دو چار ہیں۔

○○○○○○○○○○○○○○○○○○○○○○○○

*ملک میں یومیہ کورونا کیسز میں کمی زیادتی جاری*

واضح ہوکہ نیوز رپورٹ سے ملی جانکاری کے مطابق ملک میں کرونا وائرس کے نۓ کیسز میں کمی دیکھنے کو مل رہی ہے ، کویڈ ١٩ انڈیا ویب سائٹ کے مطابق 16 اگست  04:07 AM بجے  اپڈٹ  رپورٹ کے مطابق ملک میں ایک دن میں 33,212  نۓ کیسز رپورٹ ہوئے ہیں جس کے بعد کرونا متاثرین کی مجموعی تعداد 3,22,25,175 پہونچ گئ ہے جبکہ ایک دن میں 421 لوگوں کی موت کے بعد اموات کی مجموعی تعداد 4,31,674 پہونچ گئ ہے ، اب تک کل 3,14,03,959  افراد شفایاب ہوچکے ہیں اس وقت 3,76,860 ایکٹیو کیسز ہیں۔

○○○○○○○○○○○○○○○○○○○○○○○○

*کیرالہ میں کوویڈ 19 کے 18،582 نئے کیسز ، 102 مریضوں کی موت*

واضح ہوکہ نیوز رپورٹ سے ملی جانکاری کے مطابق اتوار کے روز کیرالہ میں کوویڈ 19 (کورونا وائرس) کے 18،582 نئے کیس رپورٹ ہونے کے ساتھ ، متاثرہ افراد کی کل تعداد 36.69 لاکھ ہوگئی ، جبکہ 102 مزید مریضوں کی موت کی وجہ سے اموات کی تعداد 18،601 تک پہنچ گئی۔ ریاستی محکمہ صحت نے یہ اطلاع ایک ریلیز میں دی۔ ریلیز کے مطابق ، کیرالا میں گزشتہ 24 گھنٹوں کے دوران کوویڈ 19 کے 20،829 مریض بھی انفیکشن سے پاک تھے ، جس کی وجہ سے ریاست میں اس مہلک وائرس کے انفیکشن کو شکست دینے والے لوگوں کی تعداد بڑھ کر 34،92،367 ہوگئی۔ ریاست میں کووڈ 19 کے زیر علاج مریضوں کی تعداد بڑھ کر 1،78،630 ہو گئی ہے۔

یوم آزادی کے موقع پر ملک کو دوباره تقسیم کرنے کی کوشش : نانا پٹولے

یوم آزادی کے موقع پر ملک کو دوباره تقسیم کرنے کی کوشش : نانا پٹولے

(اردو اخبار دنیا)

ملک کو جو آزادی ملی ہے وہ بے مثال قربانیوں اورمحنتوں کا نتیجہ ہے۔ اس آزادی کے لئے بہت بڑی قیمت ادا کرنی پڑی ہے، لیکن بدقسمتی ہے کہ آزادی کی ڈائمنڈجوبلی کے موقع پر بی جے پی 14؍اگست کو بٹوارے کی ہولناک یاد کے طور پر منارہی ہے۔ یہ ایک جانب اگرانتہائی افسوسناک ہے تو وہیں یہ ملک کو دوبارہ تقسیم کرنے کی کوشش ہے۔یہ باتیں مہاراشٹرپردیش کانگریس کمیٹی کے صدرناناپٹولے نے کانگریس کے دفتر پر پرچم کشائی کی تقریب میں اپنے خطاب کے دوران کہیں ۔

انہوں نے کہا کہ ہندوستان کے ساتھ جو ملک آزاد ہوئے وہاں آمریت شروع ہوگئی لیکن ہمارے ملک میں جمہوریت کا آغاز ہوا جس کے حوالے سے آج ہمارے ملک کو دنیا میں سب سے بڑا جمہوری ملک ہونے کا فخر حاصل ہے۔بی جے پی ہمارے ملک کایہ فخر ختم کرنا چاہتی ہے۔ 14ا/ اگست جس دن ہمارے ملک کا بٹوارہ ہوا وہ ہمارے لیے ایک سیاہ دن ہے۔اس خونریز دن کو یادگار کے طور پر مناتے ہوئے نریندر مودی اوربی جے پی ملک کو توڑنے کی سمت لے جارہی ہے ۔ ملک کی عوام کے درمیان مذہب وذات برادری کی تفریق کو بڑھاوا دے کر سیاسی فائدہ حاصل کرنے کی کوشش کی جارہی ہے۔ ملک کی یکجہتی کو نقصان پہنچانے کے بی جے پی کے منصوبے کو کانگریس کے کارکنان کبھی کامیاب نہیں ہونے دیں گے۔

انہوں نے کہا کہ کانگریس صدرمحترمہ سونیا گاندھی وممبرپارلیمنٹ راہل گاندھی کی اہل قیادت نے مرکزی حکومت کے لیے چیلنج کھڑا کردیا ہے۔ پٹولے نے کہا کہ ان کی قیادت میں کانگریس پارٹی کے نظریہ کی فتح کے لیے ہمیں قربانی کے جذبے کے ساتھ کام کرنا ہوگا۔مجھے انہوں نے کہا کہ انہیں یقین ہے کہ اگر ہم نے ملک سے حقیقی محبت کے ساتھ کام کرنا شروع کیا تو کانگریس دوبارہ بلندی کے مقام پرپہنچے گی اور ملک وجمہوریت دونوں کو تحفظ حاصل ہوگا۔

پرچم کشائی کی اس تقریب میں ریاستی کانگریس کے کارگزار صدر نسیم خان، چندرکانت ہنڈورے، سابق وزیر سریش شیٹی، نائب صدر حسین دلوائی، خواتین کانگریس کی ریاستی صدر سندھیتائی سوالاکھے، سیوادل کے ریاستی صدر ولاس اوتاڈے، ریاستی جنرل سکریٹری راجن بھوسلے، راجیش شرما، پروفیسر پرکاش سوناؤنے، پرمود مورے، راجارام دیشمکھ،ڈاکٹر سیدذیشان احمد، ڈاکٹر راجو واگھمارے اور دیوانند پوار وغیرہ موجود تھے۔

سی آر پی ایف سے مدھیہ پردیش ہائی کورٹ تک ، اس ہفتے کہاں کہاں داخل کی جاسکتی ہیں درخواستیں ؟

(اردو اخبار دنیا)اس ہفتے مختلف سرکاری شعبوں میں ملازمتوں کے کافی اعلانات ہیں۔ سنٹرل ریزرو پولیس فورس (CRPF) سے کول انڈیا سے لے کر مدھیہ پردیش ہائی کورٹ تک کئی محکموں نے اپنی بھرتی کے نوٹیفکیشن جاری کیے ہیں۔ ان آسامیوں کی اکثریت کے لیJobsے آن لائن درخواست کا عمل رواں ماہ بند کر دیا جائے گا۔ اچھی تنخواہ والے سرکاری شعبے کی نوکری کے خواہشمند افراد کے لیے وہ درج ذیل نوکریوں کے نوٹیفکیشن چیک کر سکتے ہیں:

CRPF بھرتی 2021: جو لوگ فوج یا پولیس فورس میں شامل ہونے کے خواہش مند ہیں وہ سینٹرل ریزروڈ پولیس فورس کے اعلان کردہ پیرا میڈیکل اسٹاف کی 2439 آسامیوں کے لیے درخواست دے سکتے ہیں۔ 13 ستمبر اور 15 ستمبر کو ہونے والے واک ان انٹرویو کے ذریعے ریٹائرڈ سی اے پی ایف اور سابق مسلح فورس کے اہلکاروں کا انتخاب کیا جائے گا۔ ایس ایس بی) ، سینٹرل ریزرو پولیس فورس (سی آر پی ایف) ، اور بارڈر سیکورٹی فورسز (بی ایس ایف)۔ تفصیلات یہاں پڑھیں۔

علامتی تصویر

کول انڈیا بھرتی 2021: کول انڈیا لمیٹڈ نے کان کنی ، الیکٹریکل ، مکینیکل ، سول ، انڈسٹریل انجینئرنگ اور ارضیات کے نظم و ضبط کے لیے مینجمنٹ ٹرینیوں کی 588 آسامیوں کو پُر کرنے کے لیے درخواست مدعو کی ہے۔ آن لائن درخواست اپنی سرکاری ویب سائٹ پر 9 ستمبر تک قبول کی جائے گی۔ مناسب امیدواروں کو GATE 2021 اسکور کی بنیاد پر دستاویزات کی تصدیق اور ابتدائی طبی معائنے کے لیے شارٹ لسٹ کیا جائے گا۔ ایک بار منتخب ہونے کے بعد امیدواروں کو ای -2 گریڈ میں مینجمنٹ ٹرینی کے طور پر مقرر کیا جائے گا اور ابتدائی ایک سال کے لیے 50000 روپے ادا کیے جائیں گے۔

بی ای ایل اپرنٹس شپ بھرتی 2021: بھارت الیکٹرانکس لمیٹڈ (بی ای ایل) نے اپنے غازی آباد یونٹ کے لیے ایک سالہ اپرنٹس شپ ٹریننگ پروگرام کے لیے 50 آسامیوں کا اعلان کیا ہے۔ وہ امیدوار جنہوں نے کمپیوٹر سائنس ، الیکٹرانکس ، مکینیکل اور سول انجینئرنگ کے شعبوں میں بی ٹیک یا بی ای مکمل کیا ہے وہ سرکاری ویب سائٹ کے ذریعے 29 اگست تک درخواست دے سکتے ہیں۔ درخواست دینے کا طریقہ یہاں ہے۔

اتر پردیش کی بھرتی 2021: اتر پردیش حکومت نے ریاست کے 74 اضلاع میں مہاتما گاندھی قومی دیہی روزگار گارنٹی ایکٹ (MGNREGA) کے لیے درخواستیں طلب کی ہیں۔ مجموعی طور پر 1276 آسامیوں کا اعلان سرکاری ویب سائٹ sewayojan.up.nic.in پر کیا گیا ہے۔ درخواست دہندگان کا انتخاب پہلے آئیے پہلے پائیے کی پالیسی کی بنیاد پر کیا جائے گا۔ شارٹ لسٹ امیدواروں کو ماہانہ بنیاد پر 11200 روپے ادا کیے جائیں گے۔ یہاں نوٹیفکیشن چیک کریں۔

مدھیہ پردیش ہائی کورٹ بھرتی 2021: مدھیہ پردیش ہائی کورٹ 83 آسامیوں کے لیے ذاتی معاونین ، باغبانی ، جونیئر جوڈیشل اسسٹنٹ اور سٹینو گرافر بھرتی کر رہی ہے۔ باغبانی ، جونیئر جوڈیشل اسسٹنٹ اور سٹینوگرافرز کے لیے آن لائن درخواست 30 جولائی کو شروع کی گئی جبکہ ذاتی معاونین کے لیے آن لائن درخواست 17 اگست سے شروع ہوگی۔ اس کے لیے درخواست دینے کی آخری تاریخ 30 اگست ہے۔

محمد طالبان : رسول اللہ ﷺ کے نقش قدم پر ۔ ڈاکٹر رضی الاسلام ندوی

(اردو اخبار دنیا)

تاریخ کا مشہور واقعہ ہےـ ہجرتِ مدینہ کے آٹھویں سال رسول اللہ صلی اللہ علیہ وسلم مکہ مکرمہ میں فاتحانہ داخل ہوئےـ آپ نے پوری کوشش کی کہ قتل و غارت گری بالکل نہ ہو ـ ایک فوجی ٹکڑی کے کمانڈر نے جوش میں کہہ دیا : الیوم یوم الملحمۃ (آج کشت و خون کا دن ہے) آپ کو خبر ملی تو آپ نے انھیں معزول کردیا اور فرمایا : الیوم یوم المرحمۃ ( آج رحم و کرم کا دن ہے)ـ اس موقع پر آپ نے عام معافی کا اعلان کردیا : جو اپنے گھر میں رہے اس کے لیے امن ہےـ جو مسجدِ حرام میں پناہ لے اس کے لیے امن ہےـ جو ہتھیار ڈال دیے اس کے لیے امن ہے ـ جو ابو سفیان ( جو اُس وقت تک مسلمانوں کے دشمنوں کے سردار تھے) کے گھر میں پناہ لے اس کے لیے امن ہےـ مکہ میں داخلہ کے وقت کچھ لوگوں نے مزاحمت کی ، صرف ان سے مقابلہ کیا گیا ، باقی تمام لوگوں کو معافی دے دی گئی ـ ان میں وہ لوگ بھی تھے جنھوں نے مکی عہد کے 13برس اور ہجرتِ مدینہ کے بعد 7 برس مسلمانوں کو تکلیف پہنچانے اور ستانے میں کوئی کسر نہیں اٹھا رکھی تھی، لیکن عام معافی میں ان لوگوں کو بھی شامل کیا گیاـ فتح کے بعد آپ نے اعلانِ عام کردیا : جَآءَ الۡحَـقُّ وَزَهَقَ الۡبَاطِلُ‌ؕ اِنَّ الۡبَاطِلَ كَانَ زَهُوۡقًا.( الإسراء : 81) " حق آگیا اور باطل مٹ گیا، باطل تو مٹنے ہی والا ہے ۔ " یہ اتنا عظیم الشان واقعہ تھا کہ تاریخ میں کوئی نظیر نہیں ملتی ـ تمام مؤرخین ، چاہے وہ غیر جانب دار ہوں یا مخالف ، سب نے اس واقعہ کو سراہا ہے اور اس پر آپ کو خراجِ تحسین پیش کیا ہےـ

رسول اللہ ﷺ کے جانشینوں نے پھر اسی کردار کا مظاہرہ کیا ہےـ طالبان نے کابل میں فاتحانہ داخلہ سے پہلے عام معافی کا اعلان کیا ہےـ ان کے ترجمان نے کہا ہے کہ عوام ، افغان حکومت کے عملہ اور کارندوں ، اتحادی افواج کے لیے کام کرنے والوں، سب کے لیے معافی ہےـ عوام کے مال و جان کی حفاظت ہماری بنیادی ذمے داری ہےـ ان کا یہ پیغام سماجی رابطوں کی ویب سائٹ ٹوئٹر پر نشر کیا گیاـ انھوں نے کہا کہ مجاہدین خزانہ ، عوامی سہولیات ، سرکاری دفاتر اور آلات ، پارکس ، سڑکوں اور پل وغیرہ پر خاص توجہ دیں گے ۔ یہ عوامی املاک ہیں ، ان کا تحفظ کیا جائے گا اور انہیں برباد کرنے کی کسی کو اجازت نہیں دی جائے گی ۔ ان کا کہنا تھا کہ اسلامک اسٹیٹ آف افغانستان ان تمام افراد کے لیے اپنے دروازے کھولتی ہے جنہوں نے ماضی میں حملہ آوروں کے لیے کام کیا اور ان کی مدد کی ، یا جو اب بھی کرپٹ افغان حکومت کے ساتھ کھڑے ہیں ـ ہم ان کے لیے عام معافی کا اعلان کرتے ہیں اور انہیں دعوت دیتے ہیں کہ وہ قوم اور ملک کی خدمت کے لیے آگے آئیں ۔

طالبان کے زوال اور عروج میں ہمارے لیے متعدد اسباق موجود ہیں :

(1) ایمان و یقین کی طاقت سب سے بڑی طاقت ہےـ اس کے سامنے تمام طاقتیں ہیچ ہیں ـ امریکہ نے طالبان کی حکومت اکھاڑ پھینکی ، اس کے بعد 20 برس تک ان پر آگ اور بارود کی بارش کی ، زبردست بم باری کی ، طرح طرح کے بھیانک اسلحہ ان پر آزمائے ، لیکن وہ افغانوں کا بال بیکا نہ کرسکا ، اس لیے کہ وہ اللہ کا سہارا تھامے ہوئے تھے اور اس سے بڑا اور کسی کا سہارا نہیں ـ

(2) کام یابی قربانیوں کے بعد حاصل ہوتی ہےـ طالبان نے بہت زیادہ قربانیاں دی ہیں ـ وہ حکومت سے محروم کیے گئےـ ان کا بڑے پیمانے پر قتلِ عام کیا گیاـ انہیں قید کرکے دردناک سزائیں دی گئیں ـ وہ گھر سے بے گھر اور اپنی املاک سے محروم کیے گئےـ لیکن انھوں نے صبر کیا ، ڈٹے رہے اور قربانیاں پیش کرتے رہے ، بالآخر منزل نے ان کے قدم چومے اور کام یابی کا سہرا انہیں پہنایا گیاـ

(3) اپنا نصب العین درست رکھنا چاہیے اور منزل پر نگاہیں جمانی چاہییں ـ راستے جتنے بھی پُر خطر ہوں ، منزل جتنی بھی دور ہو ، کوئی حرج نہیں ـ طالبان کو دوبارہ اقتدار حاصل کرنے میں 20 برس لگ گئے ، لیکن نہ وہ تھکے ، نہ گھبرائے ، نہ انھوں نے سستی اور تن آسانی کا مظاہرہ کیا ، بلکہ دھیرے دھیرے وہ منزل کی طرف بڑھتے رہے، یہاں تک کہ اسے پالیاـ

(4) مشن کی تکمیل کے لیے طاقت کا حصول ضروری ہےـ جرمِ ضعیفی کی سزا مرگِ مفاجات ہےـ قرآن مجید میں اللہ تعالیٰ نے فرمایا ہے : وَاَعِدُّوۡا لَهُمۡ مَّا اسۡتَطَعۡتُمۡ مِّنۡ قُوَّةٍ وَّمِنۡ رِّبَاطِ الۡخَـيۡلِ تُرۡهِبُوۡنَ بِهٖ عَدُوَّ اللّٰهِ وَعَدُوَّكُمۡ وَاٰخَرِيۡنَ مِنۡ دُوۡنِهِمۡ‌ ۚ لَا تَعۡلَمُوۡنَهُمُ‌ ۚ اَللّٰهُ يَعۡلَمُهُمۡ‌ؕ (الانفال :60) " اور تم لوگ ، جہاں تک تمہارا بس چلے ، زیادہ سے زیادہ طاقت اور تیار بندھے رہنے والے گھوڑے اُن کے مقابلہ کے لیے مہیّا رکھو ، تاکہ اس کے ذریعہ سے اللہ کے اور اپنے دشمنوں کو اور ان دوسرے اعداء کو خوف زدہ کر دو جنہیں تم نہیں جانتے ، مگر اللہ جانتا ہے ۔" طالبان نے اس اصول کو اپنایاـ انھوں نے ایمانی طاقت کے ساتھ مادّی طاقت بھی حاصل کرنے کی کوشش کی ـ اس طرح انھوں نے اپنے دشمنوں پر اپنی دھاک اور ہیبت طاری کردی ـ

(5) طالبان نے ثابت کردیا کہ امّتِ مسلمہ کو عروج اور غلبہ اسی طریقے سے اور اسی راہ پر چل کر حاصل سکتا ہے جس پر چل کر ابتدائی صدیوں میں حاصل ہوا تھاـ امت کی بھلائی نہ دیگر تہذیبوں کو اختیار کرنے میں ہے نہ دیگر مذہبی گروہوں کے نقشِ قدم کی پیروی میں ـ کام یابی، غلبہ اور عروج آج بھی اللہ کی اطاعت اور خاتم النبیین حضرت محمد ﷺ کے نقشِ قدم کی پیروی کرنے میں ہےـ

آندھرا پردیش میں آج سے اسکول اور کالجس کی کشادگی

آندھرا پردیش میں آج سے اسکول اور کالجس کی کشادگی

(اردو اخبار دنیا)کوویڈ قواعد کے تحت ہر کلاس میں 20 طلبا کی اجازت ۔ 6 فیٹ کا فاصلہ رہے گا
حیدرآباد۔/15 اگسٹ، ( سیاست نیوز) کورونا کی امکانی تیسری لہر کے خطرہ کے باوجود آندھرا پردیش حکومت کے فیصلہ کے مطابق کل 16 اگسٹ سے اسکول اور کالجس کی کشادگی عمل میں آئے گی۔ آن لائن کلاسیس کی جگہ آف لائن کلاسیس کا کوویڈ قواعد کے ساتھ آغاز ہوگا۔ حکومت نے کوویڈ پازیٹیویٹی شرح 10 فیصد سے کم علاقوں میں اسکول و کالجس کی کشادگی اور باقاعدہ کلاسیس کے آغاز کے احکام جاری کئے ۔ سکریٹری محکمہ تعلیم راج شیکھر نے رہنمایانہ خطوط جاری کئے جس کے مطابق ہر کلاس میں 20 طلبہ کی اجازت رہے گی اور ہر طالب علم کے درمیان 6 فیٹ کا فاصلہ رہے گا۔ کلاس میں زائد طلبہ کی صورت میں 2 یا 3 بیاچس کا اہتمام کیا جاسکتا ہے۔ ہر ہفتہ ایک بیاچ کے 2 طلبہ اور ایک ٹیچر کا کورونا ٹسٹ لازمی طور پر کرایا جائے گا۔ ان میں سے کسی ایک کے پازیٹیو ہونے پر باقی تمام کا ٹسٹ کرانے ہدایت دی گئی ہے۔ دوپہر کے کھانے کا نظم بیاچس کی شکل میں کرنے کی ہدایت دی گئی ہے۔ طلبہ کو اسکول چھوڑنے آئے والدین و سرپرستوں میں اگر کورونا کی علامات پائی جائیں تو ایسے طلبہ کا ٹسٹ کیا جائے۔ حکومت سے اسکولوں کی کشادگی پر طلبہ اور سرپرستوں نے ملے جلے ردعمل کا اظہار کیا ہے۔ طلبہ اور ان کے سرپرستوں میں خوف کا ماحول ہے اور اندیشہ ہے کہ بڑی تعداد میں طلبہ اسکول اور کالجس کو حاضر نہیں ہوں گے