آپریشن لوٹس___مفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ

آپریشن لوٹس___

مفتی محمد ثناء الہدیٰ قاسمی

 نائب ناظم امارت شرعیہ پھلواری شریف پٹنہ

اردو دنیا نیوز٧٢

 بھاجپا جب کسی ریاست میں ووٹ حاصل کرنے میں ناکام ہوجاتی تو وہ آپریشن لوٹس شروع کر دیتی ہے ، لوٹس یعنی کنول اس کا انتخابی نشان ہے، اس مناسبت سے اسے آپریشن لوٹس کہتے ہیں، اس آپریشن میں سب سے پہلے دیگر سیاسی پارٹیوں کے ارکان اسمبلی کو خریدا جاتا ہے، ایک ایک ممبر کی قیمت لاکھوں میں نہیں کروڑوں میں ہوتی ہے ، کئی تو روپے لینے کے بعد وزارت کی شرط بھی لگاتے ہیں، چنانچہ انہیں اقتدار کی تبدیلی میں روپے کے ساتھ وزارت کی کرسی بھی مل جاتی ہے ، دوسری پارٹیاں بھی موقع کی تاک میں رہتی ہیں، لیکن جس بے شرمی اور ڈھٹائی سے روپے دے کر بھاجپا والے ارکان کو خریدتے ہیں اور حکومتیں گرائی جاتی ہیں، اس کی مثال دوسری پارٹیوں میں کم دیکھا جاتا ہے۔ گو دوسری پارٹیوں میں بھی اس کے وجود سے انکار نہیں کیا جا سکتا ۔

 مہاراشٹر میں ’’مہااگاری‘‘ کی سرکار کو گرانے کے لیے جو داؤ بھاجپا نے چلا وہ کامیاب ہو گیا او روہاں شیو سینا کے ایک گُٹ نے بھاجپا کی مدد سے شنڈے حکومت قائم کرادی ، سابق وزیر اعلیٰ کو نائب وزیر اعلیٰ بنا دیا گیا، جو یقینا ذلت آمیز تھا، لیکن اب عزت وذلت کی بات قصۂ پارینہ ہے، اب صرف کرسی چاہیے، اس کرسی کے چکر میں سابق مرکزی وزیر کو ریاستی وزیر بننے، راجیہ سبھا کے ممبر کو ودھان پریشد کے ممبر بننے اور سابق وزیر اعلیٰ کو نائب وزیر اعلیٰ بننے میں کوئی عار اور شرم محسوس نہیں ہوتی، اب اس ملک کو صرف یہ دن دیکھنا باقی ہے جب صدر جمہوریہ بھی سبکدوشی کے بعد پارلیمانی یا ریاستی سیاست میں سر گرم حصہ داری ادا کرنے لگیں گے ۔

بھاجپا چاہتی ہے کہ ساری سیکولر حکومتوں کو آپریشن لوٹس کے ذریعہ اقتدار سے بے دخل کردے اور اپنی حکومت قائم کرے، دہلی کے وزیر اعلیٰ اروند کیجریوال نے دعویٰ کیا ہے کہ بھاجپا ان کی حکومت گرانے کے لیے آٹھ سو کروڑ روپے خرچ کرنے کو تیار ہے اور اس نے عاپ کے چالیس اراکین اسمبلی کو خریدنے کے لیے بیس (۲۰)، بیس (۲۰) کروڑ روپے کی بولی لگا دی ہے۔

 آپریشن لوٹس ان دنوں جھارکھنڈ میں چل رہا ہے ، پہلے کانگریس کے تین ارکان اسمبلی کو موٹی رقم دے کر آسام بھیجا جا رہا تھا تاکہ آپریشن کا تمام خاکہ آسام کے وزیر اعلیٰ ان دونوں کو سمجھائیں اور وہ واپس آکر ہیمنت سورین کی پیٹھ میں چُھرا گھونپ دیں، آسام جانے کے لیے انہیں کولکاتہ سے گذرنا تھا اور وہاں ترنمول کانگریس کی حکومت ہے، اقتدار خاتون آہن ممتا بنرجی کے ہاتھ ہے، چنانچہ یہ دونوں ہوڑہ میں گرفتار ہو کرمنی لانڈرنگ کیس میں ماخوذ ہو گیے، یہ اسکیم ناکام ہوتی تو بھاجپا نے ہیمنت سورین کو ہٹانے کے لیے انہیں نا اہل قرار دلوادیا، ساری تیاری مکمل ہے، لیکن ہیمنت سورین بھی اس باپ کے بیٹا ہیں، جس نے جھارکھنڈ کو وجود میں لانے کے لیے لمبی لڑائی لڑی تھی، انہوں نے کانگریس اور جھارکھنڈ مکتی مورچہ کے ارکان کو کھونٹی گیسٹ ہاؤس میں لے جا کر رکھا اور اقتدار کی بقا کے طریقوں پر تبادلہ خیال ہوا، اور پھر سارے ارکان رانچی لوٹ آئے ،اب دوبارہ انہیں رائے پور منتقل کیا گیا ہے تاکہ وہ بکری منڈی سے دور رہیں، اسمبلی میں دونوں پارٹیوں کے جوارکان ہیں، اگر وہ متحد رہتے ہیں، تو ہیمنت سورین کی جگہ کسی اور کو وزیر اعلیٰ بنا کر اتھاڈ کی حکومت کو بچایا جا سکتا ہے ، لیکن سیاست اور کھیل میں کچھ بھی ہو سکتا ہے، اس لیے ابھی سے کچھ کہنا قبل از وقت ہو گا۔

اندازِ سخن ___مفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ

اندازِ سخن ___

مفتی محمد ثناء الہدیٰ قاسمی 

نائب ناظم امارت شرعیہ پھلواری شریف پٹنہ

اردو دنیا نیوز٧٢

سلطان احمد شمسی بن محمد یوسف مرحوم (ولادت ۳؍ مئی ۱۹۴۵) برداہا کمتول، موجودہ ضلع مدھوبنی کے رہنے والے ہیں، امارت شرعیہ کے پرانے نقیب ہیں، محکمہ ڈاک دربھنگہ سے سبکدوش ، پبلک ریلیشن انسپکٹر ہیں، شاعری ، مضمون نگاری اور سماجی خدمات سے شغف پہلے بھی تھا،سبکدوشی کے بعد اب یہ کُل وقتی مشغلہ ہے، کئی توصیفی اسناد وایوارڈ حاصل کر چکے ہیں، ہندوستان کے مختلف رسائل میں آپ کا کلام شائع ہوتا رہا ہے، ٹی وی پر برسوں آکاش وانی دربھنگہ سے ہفتہ وار جائزہ پیش کرتے رہے ہیں، اس کی وجہ سے تجزیاتی صلاحیت مضبوط ہے، مدحت رسول، ریت کا سفر کے بعد اب کے’’ انداز سخن‘‘ لے کر قارئین کی خدمت میں آئے ہیں، تیسرا ، چوتھا شعری مجموعہ آنا ہی چاہتا ہے۔

 انداز سخن دو سو صفحات پر مشتمل ہے، جن میں اکیس صفحات نثری تحریروں کے ہیں، انہیں صفحات میں انتساب مخلص کرم فرماؤں کے نام، مختصر تعارف اور پیش لفظ بقلم خود (شکیل شمسی) اور تقریظ ڈاکٹر ایم صلاح الدین کے قلم سے ہے ، اس میں ایک مضمون پروفیسر آفتاب اشرف کے قلم سے ’’مصمم عزم سے منزل کو پانے کی‘‘ -عنوان سے ہے، عنوان ناقص اور کچھ اٹ پٹا سا ہے، البتہ  مضمون کے مندرجات اچھے ہیں۔ اس کے بعد حمد ، نعت اور ایک منقبت کو شامل کتاب کیا گیا ہے ، اس کے بعد کتاب تین حصہ ، غزل، نظم او رقطعات پر منقسم ہے، غزلوں کی تعداد چھیاسٹھ، نظموں کی تعداد پانچ، قطعات چھ اور ایک سہرا کو بھی جگہ دی گئی ہے ، جسے ڈاکٹر امام اعظم ریجنل ڈائرکٹر مانو کولکاتہ کے صاحب زادہ ڈاکٹر نوا امام کی شادی میں پڑھا گیا تھا۔

 مجموعہ کے مشتملات کو دیکھنے سے اندازہ ہوتا ہے کہ سلطان شمسی نے شاعری کے مختلف اصناف میں طبع آزمائی کے ساتھ ان اصناف کے تقاضوں کو اپنی شاعری میں برتنے کی کامیاب کوشش کی ہے، ان اشعار کو دیکھنے سے معلوم ہوتا ہے کہ ادب میں رائج گروپ بندی سے وہ الگ ہیں، ان کی فکر، ان کی سوچ، ان کا تخیل اور ان کا انداز سخن’’ مانگے کا اجالا‘‘ نہیں ہے ۔ ان کی شاعری خالص بندگی کے گرد تو نہیں گھومتی ، لیکن بندگی کا عنصراس میں ضرور پایا جاتا ہے، شاعری میں دور جحان تو پہلے سے رائج ہے ، ایک ادب برائے ادب اور ایک ادب برائے زندگی کا، ادب برائے ادب کا تصور اب ختم سا ہو گیا ہے اور ادب برائے زندگی کا مطلب مادیت پر مشتمل تخیلات ہیں، جو جدیدیت کے فیشن سے ٹکرا کر شاعری میں معمہ اور چیستاں اور افسانے میں بنیے کا روزنامچہ بن کر رہ گیا ہے اور الحاد ودین بیزاری کے جراثیم نئی نسلوں میں تیزی سے منتقل کر رہا ہے، ایسے میں ’’ ادب برائے بندگی‘‘ کو رواج دینا چاہیے اور اس میں بڑی گنجائش اس لیے ہے کہ عشق مجازی سے متعلق لفظیات وتعبیرات سے عشق حقیقی تک پہونچنے اور پہونچانے کا کام ماضی میں بھی کثرت سے لیا جاتا رہا ہے اور اب بھی اس کی مثالیں ناپید نہیں ہیں، شاعر اپنے عہد کی پیداوار ہوتا ہے، وہ ان واقعات وحالات ، حوادث ، ومصائب سے متاثر ہوتا ہے، جو اس پر گذری یا اس کے ارد گرد سے گذر گئی ، تخیلات ایسے ہی واقعات اور تاثرات کے سایے میں پیدا ہوتے، بڑھتے اور جواں ہوتے ہیں، شاعر کے کہنے کا انداز اس میں ندرت پیدا کرتا ہے اور سیدھے سادھے واقعات جب اشعار کے پیکر میں ڈھلتے ہیں تو وہ دلوں کو گرماتے اور عقل وشعور کو مہمیز کرتے ہیں، گرد وپیش کے حالات جب اشعار کے سانچے میں ڈھلتے ہیں تو شعراء وادباء اسے عصری حسیت سے تعبیر کرتے ہیں، سلطان شمسی کی شاعری میں عصری حسیت سے بھر پور اشعار کی تعداد بھی کم نہیں ہے ، چند اشعار دیکھے۔

 خون جگر سے سینچا تھا جس نے چمن کو بھی 

نسبت کہاں کسی کو ہے اس باغباں کے ساتھ 

 آئے ہیں ملنے ہاتھ میں خنجر لیے ہوئے

ان کو ہے مجھ سے کتنی عداوت سمجھ گیے 

 بڑھاہے ظلم وستم اب تمہاری بستی میں

 بہت ہی جلد خدا کا عذاب آئے گا

 سلطان شمسی کے بعض اشعار سے گمان ہوتا ہے کہ انہوں نے دوسرے شعراء سے خیال مستعار لیا ہے، ادب کی دنیا میں اسے توارد بھی کہتے ہیں، جیسے شاعر کا یہ شعر دیکھیے:

 جانے کیسی بادلوں کے درمیاں سازش ہوئی

میرا گھر مٹی کا تھا میرے ہی گھر بارش ہوئی

 سلطان شمسی اسی بات کو چند الفاظ کے الٹ پھیر کے ساتھ کہتے ہیں:

 دشمنوں کی جانے کیسی بادل سے کچھ بات ہوئی

 بے چھپر کا گھر تھا میرا میرے گھر برسات ہوئی

دونوں کو آپ نے پڑھ لیا، تجزیہ کریں تو جو شاعری پہلے شعر میں ہے وہ سلطان شمسی کے یہاں نہیں ہے، زیادہ سے زیادہ یہ کہہ سکتے ہیں کہ مٹی کے گھر میں سر چھپانے کی گنجائش برسات میں بھی رہتی ہے، سلطان شمسی کے گھر پر تو چھپر ہی نہیں ہے ، اس لیے بارش کا سارا قہر ان کے تن وبدن سے ہو کر گذر رہا ہے۔

سلطان شمسی کے یہاں چھوٹی بحر میں سہل ممتنع کی بھی مثالیں ملتی ہیں،ان میں ایسی روانی ہے جو سُبک بھی ہے اور زبان پر آسان بھی، آپ بھی دیکھیے:

رات اکیلی بھاری تھی

عشق نے بازی ہاری تھی

 اس نے مکاں کو جلتے دیکھا 

آندھی کی بھی باری تھی

میں نے اندھیروں میں ہی رہ کر

ہجر کی رات گذاری تھی

کتاب خوبصورت دیدہ زیب چھپی ہے ، ٹائٹل دلکش ہے، البتہ دو سو صفحات کی قیمت تین سو روپے اردو کے قاری کی قوت خرید کے اعتبار سے زائد ہے، کہیں کہیں پروف کی غلطی رہ جانے کی وجہ سے بھی پریشانی ہوتی ہے، کتاب پڑھنے کے بعد آپ پروفیسر محمد آفتاب اشرف صدر شعبہ اردو متھلا یونیورسٹی سے کس قدر متفق ہوں گے یہ آپ پر چھوڑتا ہوں، البتہ ان کے ایک اقتباس پر اپنی بات ختم کرتا ہوں، لکھتے ہیں: ’’سلطان شمسی نے اپنی فکر فنی جوہر سے اردو کی غزلیہ شاعری کو اعتبار اور وقار بخشا ہے۔‘‘ پروفیسر مشتاق احمد رجسٹرار متھلا یونیورسٹی سے بھی صرفِ نظر کرنے کو جی نہیں چاہتا، لکھتے ہیں۔

’’سلطان شمسی نے اپنی شاعری کو صرف قافیہ پیمائی تک محدود نہیں رکھا ہے، بلکہ انہوں نے معنیاتی (کذا) اعتبار سے بھی اپنی ایک منفرد شعری دنیا تخلیق کی، جو انہیں ہم عصروں سے ممتاز کرتی ہے۔‘‘

زمیں بوس ٹوئن ٹاور ___مفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ

زمیں بوس ٹوئن ٹاور ___

مفتی محمد ثناء الہدیٰ قاسمی

 نائب ناظم امارت شرعیہ پھلواری شریف پٹنہ

اردو دنیا نیوز٧٢

 ۲۸؍ اگست ۲۰۲۲ء کو سارے ٹی وی چینل کی بریکنگ نیوز ٹوئن ٹاور کا انہدام تھا، مختلف خبر رساں ادارے جن میں بی بی سی کے نمائندے بھی شامل تھے، ڈھائی بجے سے قبل پل پل تیاریوں کی رپورٹنگ کر رہے تھے اور ڈھائی بجے دن کے بعد تاش کے پتوں کی طرح بکھرے ان دو عمارتوں کی ، جس کے بارے میں کہا جا تا ہے کہ یہ قطب مینارسے بھی سومیٹر بلند عمارتیں تھیں، اسے ٹوئن ٹاور کا نام اس لیے دیا گیا تھا کہ یہ دو فلک بوس عمارتوں پر مشتمل تھا، ایک میں بتیس اور دوسرے میں انتیس منزلیں تھیں، ان کی تعمیر جدید طرز کے مطابق دہلی سے منسلک نوئیڈا کے سیکٹر ۹۳اے میں سوپر ٹیک نامی کمپنی نے کروایا تھا، اس کو منہدم کرانے کے لیے لمبی قانونی لڑائی چلی، سپریم کورٹ تک بات پہونچی، فیصلہ ہوا، نظر ثانی ہوئی اور قانون وقواعد کی ان دیکھی کرکے تعمیراس عمارت کو منہدم کرنے کا فیصلہ اپنی جگہ بر قرار رہا۔

 منہدم کرنا بھی اتنا آسان نہیں تھا، قریب میں بہت ساری عمارتیں تھیں، جن کو نقصان پہونچنے کا خطرہ تھا، چنانچہ محفوظ انہدام کی کاروائی کے لیے ایک کمپنی کی خدمات حاصل کی گئیں، اس نے اس عمارت کو گرانے کے لیے سینتیس سو کلو گرام دھماکہ خیز مادہ استعمال کیا،نوہزار آٹھ سو سوراخ دونوں عمارت سیان اور اپیکس ٹاور میں کئے گئے تھے، یہ سوراخ انگریزی کے حروف وی(V) کی طرح تھے، ہر سوراخ میں ایک سو سیتیس سے تین سو پینسٹھ گرام تک آتشی مادہ ڈالا گیا اور صرف نو سکنڈ میں دو نوں عمارتیں زمیں بوس ہو گئیں۔ ٹوئن ٹاور کو بنانے میں تقریبا آٹھ سو کڑوڑ روپے خرچ ہوئے تھے اور اس کے گرانے میں پچپن کروڑ اٹھارہ لاکھ روپے خرچ ہوئے، یہ خرچ بھی سوپر ٹیک کو ہی دینا ہوگا، آس پاس کی عمارتوں کو نقصان اور ٹوئن ٹاور کے مکینوں کے نقصان کی تلافی کی ذمہ داری مع سود بھی اسی کمپنی پر ہے۔ عمارت کو منہدم کرنے کی جو تصویر سوشل میڈیا پر وائرل ہوئی ہے، اس میں یہ عمارت سیدھے بیٹھتی جا رہی ہے، انجینئر نگ کی اصطلاح میں اسے واٹر فال امیجنگ تکنیک کہتے ہیں۔اس تکنیک میں عمارت گرتے وقت پانی کی طرح نیچے کو آجاتی ہے، اس کا ملبہ ارد گرد میں نہیں پھیلتا ہے۔

مجھے یہ منظر دیکھ کر قیامت کا منظر یاد آگیا، جب آسمان روئی کے گالے کی طرح ہوجائے گا اور ساری عمارتیں ڈھہہ جائیں گی اور زمین اندر کی چیزیں باہر پھینک دے گی او سب کچھ سکنڈوںمیں ختم ہوجائے گا، جس کے بنانے میں زمانے لگے ، سب نیست ونابود ہوجائیں گے، دوسرا سبق اس میں مکافات عمل کا بھی ہے ، ضابطہ اور قانون کی پابندی نہ کرنے کا نتیجہ یہی ہوتا ہے، یہ نہیں سمجھنا چاہیے کہ ہم جو کچھ کر رہے ہیں، اسے کوئی نہیں دیکھ رہا ہے ، ہر وقت آپ دنیاوی سی سی کیمرے کے ساتھ اللہ کی نگرانی میں ہیں ، سی سی کیمرے کے حدود مقرر ہیں، اس سے آگے وہ منظر کو محفوظ نہیں کر سکتا، مگر اللہ غیر محدود ہے، اس کی نگرانی ہر جگہ خلوت وجلوت میں ہے۔غلطیوں کی سزا ملنے میں دیر ہو سکتی ہے اندھیر نہیں۔

 اس انہدام سے ایک سوال یہ پیدا ہوتا ہے کہ آخر نوئیڈا ڈولپمنٹ اتھارٹی نے اس پر روک پہلے ہی کیوں نہیں لگائی، اگر قانون کے خلاف ہو رہی تعمیرات کو نوئیڈا اتھارٹی پہلے دن روک دیتی تو اس کی نوبت ہی نہیں آتی، تو کیا اس سے یہ سمجھاجائے کہ اتھارٹی کے لوگ سوپر ٹیک والوں کے ہاتھ بکے ہوئے تھے جس کی وجہ سے وہ خاموش تماشائی بنے رہے ۔

 اتر پردیش کی یوگی حکومت کو بھی اس کا احساس ہے ، اس لیے اس نے چھبیس افسران کی فہرست جاری کی ہے، جن پر کارروائی ہونے کا امکان ہے، سوپر ٹیک  لیمیٹڈ کمپنی کے ڈائرکٹر اور ڈرافٹ مین پر بھی سزا کی تلوار لٹک رہی ہے۔

 وجہ جو بھی ہو ٹوئن ٹاور کا انہدام ایک تاریخی واقعہ ہے ، ہندوستان میں اس قدر اونچی عمارت پہلے نہیں گرائی گئی تھی ، اس سے قبل کیرالہ میں ایک عمارت منہدم کی گئی تھی، جس کی اونچائی ٹوئن ٹاور سے نصف تھی۔

مولانا سید جلال الدین انصر عمریؒ ___مفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ

مولانا سید جلال الدین انصر عمریؒ ___

مفتی محمد ثناء الہدیٰ قاسمی

 نائب ناظم امارت شرعیہ پھلواری شریف پٹنہ

اردو دنیا نیوز٧٢

مرکزی جماعت اسلامی کے سابق امیر، جامعۃ الفلاح بلیریا گنج اعظم گڑھ کے سابق سربراہ، ادارۂ تحقیق و تصنیف اسلامی علی گڑھ کے بانی مہتمم، آل انڈیا مسلم پرسنل لابورڈ کے نائب صدر، الہیئۃ الخیریۃ العالمیۃ کے سابق رکن، سراج العلوم نسواں کالج علی گڑھ کے مینیجنگ ڈائرکٹر، اشاعت اسلام ٹرسٹ دہلی، دعوت ٹرسٹ دہلی کے صدر اور رکن پبلی کیشن درجنوں کتابوں کے مصنف مولانا سید جلال الدین انصر عمری کا انتقال طویل علالت کے بعد جماعت اسلامی کے ہوسپٹل الشفا ابو الفضل انکلیو میں ہوگیا، یہ حادثہ ۲۶؍محرم ۱۴۴۴؁ھ مطابق ۲۶؍اگست ۲۰۲۲؁ء بروز جمعہ بعد نماز مغرب پیش آیا۔ جنازہ کی نماز اگلے دن دس بجے مرکزی جماعت اسلامی کے دفتر واقع مسجد اشاعت الاسلام کے صحن میں امیر جماعت اسلامی  سید سعادت اللہ حسینی نے پڑھائی اور مقامی شاہین باغ قبرستان (ٹھوکرنمبر۶)میں تدفین عمل میں آئی ہزاروں سوگوار اس آخری سفر میں ساتھ رہے، پس ماندگان میں دو لڑکے اور دو لڑکیوں کو چھوڑا، اہلیہ گذشتہ سال کورونا میں وفات گئی تھیں۔

مولانا سید جلال الدین عمری بن سید حسن کی ولادت تامل ناڈو کے ضلع شمالی آرکاٹ کے گاؤں پت گرام میں ہوئی، ۱۹۳۵؁ء کا سال تھا جب اس عظیم اور عبقری شخصیت کے وجود مسعود سے پت گرم گاؤں کی رونق میں اضافہ ہوا۔

ابتدائی تعلیم گاؤں مکتب میں پائی، وہاں سے جامعہ دار السلام عمر آباد منتقل ہوگئے اور یہاں کے اس وقت کے نامور اساتذہ سے کسب فیض کیا۔ اور صرف بیس سال کی عمر تھی جب۱۹۵۴؁ء میں سند فراغ حاصل کیا، انہوں نے مدراس یونیورسٹی کے امتحانات دے کر فارسی زبان و ادب میں منشی فاضل کی ڈگری پائی، مسلم یونیورسٹی علی گڑھ سے انگلش کا امتحان دے کر بی اے میں کامیابی حاصل کی۔

مولانا عمری جماعت اسلامی کی تحریک سے دور طالب علمی سے ہی وابستہ رہے، ابتدا میں انہوں نے رسمی طالب علمی کے اختتام کے بعد جماعت اسلامی ہند کے شعبۂ تحقیق کو نہ صرف سنبھالا؛ بلکہ اس کام کے لئے خود کو وقف کردیا، ان کی محنت اور لگن کو دیکھتے ہوئے ۱۹۵۶؁ء میں انہیں جماعت اسلامی کا رکن بنایا گیا، کم و بیش دس سال انہوں نے جماعت کے شعبۂ تحقیق علی گڑھ کو سنبھالا ، جون ۱۹۸۶؁ء میں ماہنامہ زندگی نو کے ایڈیٹر بنے اور ۱۹۹۰؁ء تک ایڈیٹر کی حیثیت سے خدمات انجام دیتے رہے، ۱۹۸۲؁ء سے جماعت اسلامی کے تحقیقی رسالہ تحقیقات اسلامی کو نکالنا شروع کیا۔ ۱۹۹۰ئ؁ سے ۲۰۰۷ئ؁ تک مسلسل چار میقات نائب امیر مرکزی جماعت اسلامی کے طور پر کام کیا، ۲۰۰۷ئ؁ میں پہلی بار وہ امیر جماعت اسلامی ہند مقرر ہوئے اور تین میقات ۲۰۱۷؁ تک امیر کی حیثیت سے خدمت کرتے رہے، وہ آل انڈیا مسلم پرسنل لابورڈ کے نائب صدربھی رہے، ۲۰۱۹ئ؁ سے وہ شرعیہ کونسل کے صدر کی حیثیت سے آخری دم تک کام کرتے رہے۔

اللہ تعالیٰ نے انہیں تصنیف و تالیف اور تحقیق کی مضبوط صلاحیت عطا فرمائی تھی، پچاس سے زیادہ ان کی علمی اور تحقیقی کتابیں ان کی اس صلاحیت کی گواہ ہیں، جن کے ترجمے دنیا کی مختلف زبانوں میں ہوچکے ہیں۔ایک داعی، خطیب اور ماہر تعلیم کی حیثیت سے بھی ملک میں ان کی اپنی ایک شناخت تھی، تحمل، بردباری، سنجیدگی، متانت ہرحال میں خود پر قابو رکھنا ان کا طرۂ امتیاز تھا۔

ان کی طویل علمی دعوتی خدمات کی وجہ سے انسٹی چیوٹ آف ابجیکٹیواسٹڈیز نے انہیں چودہواں شاہ ولی اللہ ایوارڈ دیاتھا، یہ ایوارڈ ایک مومنٹو اور ایک لاکھ روپے پر مشتمل ہوا کرتا ہے۔ مولانا نے اس موقع سے دعوت دین کی اہمیت اور مدعو کی زبان سیکھنے کی ضرورت پر زور دیا۔ مولانا مرحوم سلجھے ذہن کے آدمی تھے، انہوں نے اپنی حکمت عملی سے دوسرے ملی اداروں کو جماعت سے قریب کیا،جماعت کی قدیم پالیسی کو تبدیل کرکے جماعت کی کارکردگی کو حالات حاضرہ سے ہم آہنگ کرنے میں بھی، ان کے مشورے کو بڑا دخل رہا وہ بڑے داعی اچھے خطیب تھے، ان کے اندر جرأت کردار بھی تھی اورجرأت اظہار بھی۔

میری پہلی ملاقات ان سے ادارہ تحقیقات اسلامی پان والی کوٹھی علی گڑھ میں ہوئی تھی، جہاں ان کا قیام ادارہ کے ذمہ دار کی حیثیت سے تھا، تحریک اس وقت کے بھائی سعود عالم اور اب کے ڈاکٹر سعود عالم قاسمی کی تھی کہ میں بھی اس ادارہ میں رہ کر تحقیق و تصنیف کی صلاحیت پیدا کروں، میری ایک تحقیقی کتاب ’’فضلائے دار العلوم اور ان کی قرآنی خدمات‘‘ عربی ششم کے سال ہی آچکی تھی، اور اس وقت تک میری کل پوجی یہی تھی، اسے لے کر انٹرویو دینے ان کے پاس پہونچ گیا۔ ڈاکٹر سعود عالم قاسمی معاون بنے، انتخاب بھی ہوگیا؛ لیکن جماعت اسلامی سے جو دوری اس زمانہ میں علماء دیوبند سے تھی، اس کی وجہ سے میں وہاں داخل تونہیں ہوسکا، البتہ مولانا کی اس موقع سے کی گئی ایک نصیحت آج تک تصنیف و تالیف میں کام آتی ہے فرمایا: اگر اس کام کو کرنا چاہتے ہیں تو آپ کے اندر کتابوں سے مواد اخذ کرنے کی صلاحیت ہونی چاہئے اس کے بعد اگلا مرحلہ اس کو تحریری شکل میں پیش کرنے کا ہے، ان کے کہنے کا خلاصہ یہ تھا کہ تمہارے اندر قوت اخذ بھی ہواور طاقت عطا بھی۔

پھر جب میں آل انڈیا مسلم پرسنل لابورڈ کا ممبر بنا تو بورڈ کے پروگراموں میں ملاقات ہوتی رہی، اسلامک فقہ اکیڈمی کے بعض سمینار میں ان کی شرکت اور اپنی ملاقات بھی یاد آتی ہے۔ امارت شرعیہ کے اکابر سے وہ محبت کرتے تھے، ان کے کاموں کو سراہتے تھے، وہ امارت شرعیہ ۸؍مارچ ۲۰۰۴ئ؁ کو تشریف لائے تھے، انہوں نے اس موقع سے معائنہ رجسٹر پر لکھا:

’’امارت شرعیہ کے مختلف شعبوں، قضا و افتا کے شعبوں ، ٹکنیکل و اسپتال کو تفصیل سے دیکھنے کی سعادت حاصل ہوئی، یہاں کے نظم اور سلیقہ سے طبیعت متاثر ہوئی، اس کے کارکنان خدا کا شکر ہے کہ بڑی یک سوئی اور تن دہی کے ساتھ امت کی ایک بڑی خدمت انجام دے رہے ہیں، اللہ تعالیٰ ان کی کوششوں کو قبول فرمائے‘‘۔

مولانا اس دنیا کو چھوڑ چلے، لیکن ان کی نیکیاں سلامت ، ان کی خوبیاں ہیں باقی۔ اللہ مغفرت کرے اور پس ماندگان کو صبر جمیل دے

صفرالمظفر ___مفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ

صفرالمظفر  ___

مفتی محمد ثناء الہدیٰ قاسمی  نائب ناظم امارت شرعیہ پھلواری شریف پٹنہ

اردو دنیا نیوز٧٢

 ماہ صفر اسلامی توقیت (کلنڈر) کا دوسرا مہینہ ہے ، اس مہینہ کے بارے میں اسلامی علوم سے دور مسلمانوں کے درمیان بہت سی غلط باتیں رائج ہیں، جن میں سے بعض کا تعلق بد گمانی اور بعض کا بد شگونی سے ہے ، اسلام سے قبل اس مہینہ کو منحوس سمجھا جاتا تھا ، کیوں کہ اشہر حرم (رجب، ذیقعدہ، ذی الحجہ اور محرم) کے بعد یہ پہلا مہینہ تھا ، جس میں عرب اپنے کو جنگ وقتال کے لیے آزاد سمجھتے تھے، اس مہینہ سے لوٹ مار، شب خون اور قتل وغارت گری کی گرم بازاری شروع ہوجاتی تھی ، اسلام نے اس مہینہ کے بارے میں بد فالی ، توہمات اور بد شگونی کو ختم کیا اور اس مہینے کے نام میں ہی ’’المظفر‘‘ کا لفظ جوڑ کر اسے صفر المظفر قرار دیا ، اسے صفر الخیر بھی کہتے ہیں یعنی بھلائی اور کامیابی کا مہینہ ، صاحب لسان العرب نے اس مہینہ کی وجہ تسمیہ کے بارے میں یہ بات بھی لکھی ہے کہ چونکہ اشہر حرم کے گذرنے کے بعد عرب کثرت سے اس ماہ میں سفر کرتے تھے اور گھر کا گھر خالی ہوجاتا تھا اس لیے اسے صفر (خالی) کہا کرتے تھے، عربی میں ایک محاورۃ ’’صفر المکان‘‘ یعنی گھر کے خالی ہونے کا بھی ہے ، لیکن ہندوستانی مسلمانوں کا معاملہ بالکل الٹا ہے ، عرب والے سفر کرتے تھے اور یہاں کے لوگ اس مہینہ میں سفر سے گریز کرتے ہیں، اسی طرح دوکان ومکان وغیرہ کا افتتاح نہیں کرتے، ان کے نزدیک یہ مہینہ صِفر ہے یعنی اس میں نفع کا کوئی کام نہیں کیا جا سکتا ، اس مہینہ کا عوامی اور دیہاتی نام ترتیزی بھی ہے ، یہ نام تیرہ تاریخ کی مناسبت سے ہے ، جس دن توہمات اور رسومات کے شکار لوگ اس مہینہ کی فرضی نحوست سے بچنے کے لیے صدقہ وخیرات کی کثرت کرتے ہیں۔

 اسی مہینہ کے آخری چہار شنبہ کو بعض لوگوں نے تہوار کا درجہ دے دیا ہے ، اس دن خوشیاں مناتے ہیں، مٹھائیاں تقسیم کرتے ہیں اور سیر وتفریح کے لیے نکلتے ہیں، اس سلسلے میں ان کے ذہن میں یہ بات ہے کہ حضور صلی اللہ علیہ وسلم نے اس دن بیماری کے بعد غسل صحت کیا تھا۔

ظاہر ہے اسلام میں توہمات بدشگونی اور بد فالی کے لیے کوئی جگہ نہیں ہے ، یقینا بعض ماہ کی فضیلت قرآن واحادیث سے ثابت ہے ، بعض ایام واوقات کی اہمیت بھی قرآن واحادیث میں بیان کی گئی ہے ، لیکن کسی دن، ماہ اور اوقات کے بارے میں منحوس ہونے کا ذکر کہیں نہیں ملتا، اس لیے جو لوگ بھی اس قسم کی رائے رکھتے ہیں وہ غلطی پر ہیں، اور رہی یہ بات کہ حضور صلی اللہ علیہ وسلم نے اس دن غسل صحت کیا تھا ، سراسر غلط ہے ، تاریخ وسیرت کی کتابوں سے معلوم ہوتا ہے کہ حضور صلی اللہ علیہ وسلم اسی دن بیمار پڑے تھے ، اس سال آخری چہار شنبہ ۲۸؍ صفر کو پڑا تھا ، اس دن سے آپ صلی اللہ علیہ وسلم جو بیمار پڑے تو چودہ روز بیمار رہ کر دنیا سے پردہ فر ماگیے، امت نے رحمۃللعالمین کی جدائی کا صدمہ برداشت کیا، اس لیے آخری چہار شنبہ کو مسلمانوں کے لیے خوشی کا کوئی موقع نہیں ہے ، یہ تو کفار ومشرکین ، یہود ونصاریٰ کے لیے خوشی کا باعث تھا ، پتہ نہیں یہ بات مسلمانوں کے درمیان کس طرح رواج پا گئی ۔

 اس لیے اس ماہ میں رائج توہمات سے مسلمانوں کو محفوظ رہنا چاہیے اور حضور صلی اللہ علیہ وسلم کی یہ حدیث ذہن میں رکھنی چاہیے کہ کسی چیز کو منحوس خیال کرنا شرک ہے ، بخاری شریف کی روایت ہے کہ اللہ کی مرضی کے بغیر کوئی بیماری متعدی نہیں ہوتی ، اُلو کی نحوست اور روح کی پکار کوئی چیز نہیں ہے ، اور صفر میں نحوست نہیں ہے ، اس قسم کی روایتیں ابو داؤد شریف اور مسند احمدمیں بھی ہیں۔جس سے معلوم ہوتا ہے کہ ہمیں بد فالی سے پر ہیز کرنا چاہیے اور ماہ صفر کو منحوس سمجھنے سے باز آنا چاہیے ، لوگوں کا کیا ہے؟ بعضے تو جمعہ کے دن تک کومنحوس لکھ ڈالتے ہیں، بعض جنتریوں میں ایسا دیکھنے کو ملتا ہے ، ہمیں یاد رکھنا چاہیے کہ سارے کام اللہ کی مرضی کے تابع ہیں، ہم نے ایک کام شروع کیا اس میں فائدہ نہیں ہوا تو اپنی کمی وکوتاہی کے تجزیہ کے بجائے یہ کہہ کر اطمینان کی سانس لیتے ہیں کہ یہ دن یا مہینہ ہمیں راس نہیں آیا اور اگر یہ ناکامی صفر کے مہینے میں ملی تو اس ناکامی کا سہرا صفر کے سر منڈھ دیتے ہیں اور کہتے ہیں یہ مہینہ تو منحوس ہے ہی ، اس کی وجہ سے تقدیر پر بھی ہمارا ایمان کمزور ہوتا ہے، اللہ کی رضا سے ہماری توجہ ہٹ جاتی ہے، ایسا عقیدہ رکھ کر ہم اپنے کو گناہ میں بھی مبتلا کر لیتے ہیں، اس لیے یقین رکھیے کہ سارے مہینے اللہ کے بنائے ہوئے ہیں اور کوئی مہینہ منحوس نہیں ہے۔ اللہ تعالیٰ ہمیں اپنی مرضیات پر چلنے کی توفیق عطا فرمائے اور غیر اسلامی فکر اور رسومات سے بچالے۔ آمین

نسیم شاہ کے چھکے ، پاکستان ایشیا کپ کے فائنل میں

نسیم شاہ کے چھکے ، پاکستان ایشیا کپ کے فائنل میں

اردو دنیا نیوز٧٢

دبئی: ایشیا کپ ٹی20 کے سپر فور مرحلے کے میچ میں پاکستان نے سنسنی خیز مقابلے کے بعد افغانستان کو ایک وکٹ سے شکست دے کر فائنل تک رسائی حاصل کر لی ہے۔ بدھ کو شارجہ کرکٹ سٹیڈیم میں کھیلے گئے میچ میں پاکستان نے 130 رنز کا ہدف نو وکٹوں کے نقصان پر 20 ویں اوور کی دوسری گیند پر حاصل کیا۔

نسیم شاہ 14 اور محمد حسنین صفر پر ناٹ آؤٹ رہے۔ پاکستان کی جیت کے ساتھ نہ صرف افغانستان بلکہ انڈیا بھی ایشیا کپ سے باہر ہوگیا ہے۔ گرین شرٹس کی جانب سے شاداب خان 36 اور افتخار احمد 30 رنز بنا کر نمایاں رہے۔ افغانستان کی جانب سے فضل الحق فاروقی اور فرید احمد نے تین تین وکٹیں حاصل کیں۔ پاکستان نے ٹاس جیت کر پہلے بولنگ کا فیصلہ کیا تھا جو ٹھیک ثابت ہوا اور افغانستان 20 اوورز میں چھ وکٹوں کے نقصان پر 129رنز ہی بنا سکا۔

پاکستان کی اننگز کا احوال

دراصل 130 رنز کے تعاقب میں بابر اعظم اور محمد رضوان نے اننگز کا آغاز کیا لیکن ٹورنامنٹ میں پاکستانی کپتان کی ناکامیوں کا سلسلہ جاری رہا اور وہ پہلے اوور کی دوسری ہی گیند پر ایل بی ڈبلیو ہو گئے۔ فخر زمان بھی کوئی خاص کارکردگی نہ سکھا سکے اور پانچ رنز بنا کر رن آؤٹ ہو گئے۔ ٹورنامنٹ میں مسلسل دو نصف سینچریاں بنانے والے محمد رضوان کو راشد خان کی گوگلی نے گھما کر رکھ دیا اور وہ 20 رنز بنا کر ایل بی ڈبلیو ہو گئے۔

ابتدائی وکٹیں گرنے کے بعد افتخار احمد اور شاداب خان کے درمیان 42 رنز کی شراکت داری بنی جس کے بعد افتخار 33 گیندوں پر 30 رنز بنا کر کیچ آؤٹ ہو گئے۔ بابر اعظم کا شاداب خان کو پہلے بیٹنگ کے لیے بھیجنے کا فیصلہ ٹھیک ثابت ہوا اور انہوں نے تین چھکوں اور ایک چوکے کی مدد سے 36 رنز بنائے۔ انہیں راشد خان نے آؤٹ کیا۔

انڈیا کے خلاف جیت میں اہم کردار ادا کرنے والے محمد نواز آج جلد ہی پویلین لوٹ گئے۔ انہیں فضل الحق فاروقی نے ایل بی ڈبلیو کیا۔ اسی اوور میں فضل الحق فاروقی نے خوشدل شاہ کو بھی ایک رن پر بولڈ کر دیا۔ حارث رؤف 19 ویں اوور کی دوسری گیند پر فرید احمد کے ہاتھوں بولڈ ہو گئے۔

اسی اوور میں فرید احمد نے آصف علی کو بھی پویلین بھیج دیا۔ 20 ویں اوور میں پاکستان کو جیت کے لیے 11 رنز درکار تھے اور صرف ایک وکٹ ہی بچی ہوئی تھی لیکن نسیم شاہ نے ناممکن کو ممکن کر دکھایا اور فضل الحق فاروقی کو لگا تار دو چھکے لگا کر اپنی ٹیم کو فائنل تک پہنچا دیا۔

افغانستان کی اننگز کا احوال افغانستان کی جانب سے رحیم اللہ گرباز اور حضرت اللہ زازئی نے اننگز کا جارحانہ آغاز کیا۔ گرباز نے محمد حسنین کو مسلسل دو چھکے لگائے لیکن اس سے اگلے ہی اوور میں حارث رؤف نے انہیں بولڈ کر دیا۔ حضرت اللہ زازئی کا نسیم شاہ نے کیچ ڈراپ کر دیا پر وہ موقع ملنے کے باوجود زیادہ دیر وکٹ پر نہ رک سکیں اور 21 رنز بنا کر محمد حسنین کی گیند پر بولڈ ہو گئے

اوپنرز کے آؤٹ ہونے کے بعد افغان مڈل آرڈر نے محتاط بیٹنگ شروع کر دی لیکن کریم جنت 12 ویں اوور میں محمد نواز کی گیند پر ہٹ لگانے کی کوشش میں کیچ تھما بیٹھے۔ نجیب اللہ زدران، شاداب خان کو چھکا لگانے کی کوشش میں باؤنڈری پر کیچ پکڑا بیٹھے، انہوں نے 10 رنز بنائے۔ اس سے اگلے اوور کی پہلی ہی گیند پر نسیم شاہ نے محمد نبی کو صفر پر بولڈ کر دیا۔ چھٹے آؤٹ ہونے والے کھلاڑی ابراہیم زدران تھے۔ وہ 35 رنز بنا کر حارث رؤف کا شکار بنے۔

ہدف کا تعاقب کرنا بہتر ہے' ٹاس جیت کر بابر اعظم کا کہنا تھا کہ 'ہمارے خیال میں بعد میں نمی ہو جائے گی تو اسی لیے ہدف کا تعاقب کرنا بہتر ہے۔' انہوں نے کہا کہ '(پاکستانی) کیمپ میں موڈ اچھا ہے اور ہم (جیت کا) مونیٹم برقرار رکھنے کی کوشش کریں گے۔' افغانستان کے کپتان محمد نبی نے کہا کہ 'ہم بھی پہلے بولنگ ہی کرتے کیونکہ بعد میں شاید نمی ہو جائے۔ لیکن امید ہے کہ ہم اچھی بولنگ کریں گے اور ٹف ٹائم دیں گے۔'

آج کے میچ کے لیے گرین شرٹس نے ٹیم میں کوئی تبدیلی نہیں کی تھی جبکہ افغانستان نے ٹیم میں دو تبدیلیاں کی گئیں تھیں۔

عدالت کے دروازے بند __مفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ

عدالت کے دروازے بند  __

مفتی محمد ثناء الہدیٰ قاسمی

 نائب ناظم امارت شرعیہ پھلواری شریف پٹنہ

اردو دنیا نیوز ٧٢

 چیف جسٹس یو للت کی سر براہی میں جسٹس رویندر بھٹ اور جسٹس جے پی پار ڈی والا کی ایک بینچ نے بابری مسجد اور گجرات فسادات سے متعلق تمام گیارہ(۱۱) مقدمات کی فائلیں بند کر دینے کا حکم دیا ہے، ان مقدمات پر اب کوئی سماعت نہیں ہوگی، بابری مسجد انہدام کے موقع سے تو ہین عدالت کے مقدمات ہوئے تھے، اسے بھی بند کر دیا گیا ہے ، احسان جعفری قتل کیس میں ذکیہ جعفری حکومت سے مقدمات ہارتی اور اپیل کرتی رہی تھیں، اب اس کی بھی سماعت نہیں ہو سکے گی عدالت کے جج حضرات کی رائے تھی کہ ان مقدمات کی اب کوئی ضرورت نہیں ہے، مرور ایام کے ساتھ یہ مقدمات لائق سماعت نہیں رہے۔ اس فیصلے کا مطلب یہ ہے کہ جو ہو گیا وہ ہو گیا، عربی میں اسے مضی ما مضی کہتے ہیں ، یعنی کل پر خاک ڈالیے اور بھول جائیے جو کچھ آپ کے ساتھ ہوا، ماضی کی پریشان کن یادوں کو بھول جانا آسان نہیں ہوتا، اگر ہو بھی جائے تو انصاف کے تقاضے شاید پورے نہ ہوں۔

 اسی طرح کر ناٹک ہائی کورٹ نے ہبلی کی عیدگاہ میں گنیش چتھرتھی کی پوجا کرنے کی اجازت دیدی ہے، عدالت کی نظر میں یہ معاملہ اس قدر اہم تھا کہ رات کے ساڑھے بارہ بجے خصوصی عدالت بلا کر یہ فیصلہ سنایا گیا، کوشش تو بنگلور عیدگاہ میں بھی پوجا کے لیے کی جا رہی تھی، لیکن سپریم کورٹ نے اس کی منظوری نہیں دی ، عدالت کی نظر میں یہ غیر مناسب عمل ہے، لیکن کرناٹک ہائی کورٹ کو کس طرح یہ مناسب لگا کہ اس نے اس کی اجازت دے دی ۔

 اس قسم کے فیصلے یہ بتاتے ہیں کہ مسلمانوں کو یہاں دوسرے درجے کا شہری مانا جاتا ہے اور دستور میں دیے گیے حقوق تک کی ان دیکھی کرکے فیصلے سامنے آ رہے ہیں، اس سے مسلمانوں میں غم وغصہ پایا جاتا ہے، یہ غم وغصہ جب احتجاج کے طور پر سامنے آتا ہے تو پولیس ایکشن کے لیے تیار ہوتی ہے اور کئی لوگ موت کی نیند سلا دیے جاتے ہیں ، یہ ہے ہمارا آزاد بھارت، جس کی آزادی کا امرت مہوتسو ہم پورے جوش وخروش کے ساتھ منا رہے ہیں۔