ڈاکٹر نورالسلام ندوی کی تازہ تالیف ”علم وفن کے نیرتاباں“کا ملی کونسل کے دفترمیں اجرا

ڈاکٹر نورالسلام ندوی کی تازہ تالیف ”علم وفن کے نیرتاباں“کا ملی کونسل کے دفترمیں اجرا

اردو دنیا نیوز ٧٢

اسلاف کے کارناموں کو آنے والی نسلوں تک پہنچانااہل قلم کی ذمہ داری:انیس الرحمن قاسمی /امتیاز احمدکریمی

23/اکتوبرپھلواری شریف (پریس ریلیز)

ملک کے ممتاز عالم دین، مدرسہ رحمانیہ سوپول دربھنگہ کے سابق صدر مدرس اورجامع اسلامیہ انکلیشور گجرات کے سابق شیخ الحدیث حضرت مولانا ہارون الرشید ؒ کی حیات وخدمات پر مشتمل معروف اہل قلم ڈاکٹر نورالسلام ندوی کی تازہ تالیف ”علم وفن کے نیرتاباں“کا اجراء آج آل انڈیا ملی کونسل بہار کے ریاستی دفتر پھلواری شریف،پٹنہ میں ہوا۔ اس پر وقارعلمی تقریب کی صدارت آل انڈیاملی کونسل کے قومی نائب صدرحضرت مولاناانیس الرحمن قاسمی نے کی۔تقریب کے مہمان خصوصی بہار پبلک سروس کمیشن کے رکن اورصف اول کے افسر جناب امتیاز احمد کریمی صاحب اورمہمان اعزازی کے طورپرڈاکٹر پروفیسر سرورعالم ندوی صدر شعبہ عربی پٹنہ یونیور سٹی،ڈاکٹر مولانا ابوالکلام قاسمی شمسی نائب صدر آل انڈیا ملی کونسل بہار اورمولاناڈاکٹر شکیل احمد قاسمی اورینٹل کالج،پٹنہ نے شرکت کی۔اس پر وقارعلمی،ادبی تقریب کا آغاز مولانا جمال الدین قاسمی کی تلاوت قرآن پاک سے ہوا۔اپنے صدارتی کلمات میں مولانا انیس الرحمن قاسمی نے کتاب کے مؤلف ڈاکٹرنورالسلام ندوی کو مبارک باد دیتے ہوئے کہا کہ مولاناہارون الرشید قاسمی ؒ ریاست کے گنے چنے علمامیں تھے،جنہوں نے گوشہ گمنامی رہ کر علم وادب اوررجال سازی کی قابل قدر خدمت انجام دی، میرا مولاناسے پیتیس چالیس سالوں کا گہرا ربط وتعلق رہا،وہ علم وعمل اورعمرمیں مجھ سے بڑے تھے، لیکن جب ملاقات ہوتی تو انتہائی محبت وشفقت اورحترام کا سلوک فرمایاکرتے،وہ اچھا لکھتے تھے اورخوبصورت ودل کش اندازمیں تقریربھی کیاکرتے تھے۔انہوں نے تعلیم نسواں پر خاص توجہ دی اورلڑکیوں کی تعلیم وتربیت کے لیے مدرسہ رحمانیہ نسواں جمال پور میں قائم کیا۔ یہ ادارہ آج بھی خد مت انجام دے رہا ہے۔مولاناقاسمی نے مؤلف کتاب کو خراج تحسین پیش کرتے ہوئے کہا کہ یہ پورے علاقہ اورحضرت مولاناکے شاگردوں پر ایک قرض تھا،جو مولانانورالسلام ندوی کی کوششوں سے اداہوگیا۔ مولانا ندوی صالح فکرکے حامل نوجوان عالم دین اورمصنف ہیں۔میں امید کرتاہوں کہ ان کا قلم ہمیشہ تازہ دم رہے گااوراسی طرح کی چیزیں ان کے قلم سے آتی رہیں گے۔اللہ سے دعاہے کہ یہ کتاب ہر خواص وعام تک پہنچے اورنئی نسل کے لیے مشعل راہ بنے۔تقریب کے مہمان خصوصی امتیازاحمد کریمی نے کتاب کی تالیف اوراشاعت پر ڈاکٹر نورالسلام ندوی کو مبارک باد دیتے ہوئے کہا کہ ڈاکٹر نورالسلام ندوی کا قلم زندہ اورتابندہ ہے، ان کی یہ تیسری باضابطہ تصنیف ہے،ویسے تو ان کے سینکڑوں مضامین ومقالات اخبارات میں شائع ہو چکے ہیں، لیکن مضمون لکھنا اورمستقل کتاب لکھنا دونوں میں بڑا فرق ہے۔ایک مصنف میں جو خوبیاں اصولی طورپر ہونی چاہئے وہ تمام اوصاف وکمالات مولانا نورالسلا م ندوی نے کم عمری میں حاصل کر لیے ہیں۔میں ان سے اکثر کہتا ہوں کہ اپنے قلم کو کبھی آرام نہ دیں۔ ضرورت ہے کہ ایسے مصنفین پیدا ہوں جو اسلاف کے کارناموں کو اگلی نسل کے لیے محفوظ کر دیں۔ مولاناڈاکٹرابوالکلام قاسمی شمسی نے کہا کہ اسلاف کے کارناموں کو جمع کر کے اگلی نسلوں تک پہونچاناہماری ملی ذمہ دار ی ہے۔قابل مبارک باد ہیں ہمارے عزیر مولاناڈاکٹرنورالسلام ندوی جہنوں نے حضرت مولاناہارون الرشدی قاسمی ؒ کی سوانح مرتب کر کے علمی دنیا کو بیش قیمت تحفہ دیا ہے۔ کتابوں کی تالیف کتنی دشوار ہے،اس کا احساس ہر اس شخص کو ہے جس نے اس راہ کی آبلا پائی کی ہے۔ مولانا نورالسلام ندوی ابھی نوجوان ہیں،سنجیدہ فکر کے حامل ہیں، ان کی اس کاوش میں ان کی فکر جھلکتی ہے۔پروفیسر ڈاکٹر شکیل احمد قاسمی نے کہا کہ کتاب پر صحیح تبصرہ توکتاب کے مطالعہ کے بعد ہی کیا جاسکتا ہے، ابھی جب کہ یہ کتاب ریلیز ہوئی ہے،اس کی فہرست کو دیکھنے سے اندازہ ہوتا ہے کہ مؤلف نے صاحب سوانح کی شخصیت کا پورے طورپر ان کی زندگی کے ہر گوشہ پر کتاب روشنی ڈالتی ہے، میں دل کی گہرائیوں سے مؤلف کتاب ڈاکٹر نورالسلام ندوی کو ان کی اس گراں قدر علمی خدمت پر مبارک باد پیش کرتا ہوں۔رسم اجراء کے اس تقریب سے اظہار خیال کرتے ہوئے پٹنہ یونیورسٹی کے شعبہ عربی کے صدر ڈاکٹر سرور عالم ندوی نے کہا کہ مولانا ہارون الرشید جیسی شخصیت اگر یوروپ میں پیدا ہوتی تو ان کا نام علم وفن کے آسمان پر چاند وسورج کی طرح چمکتا نظرآتا،بزرگوں اوراسلاف کی خدمات کو یادکرنے اوران کو سراہنے کا حکم خود اللہ کے رسول ؐ نے دیا۔ یہ کتاب بھی اسی سلسلہ کی ایک کڑی ہے،ہمارے برادر عزیزڈاکٹر نورالسلام ندوی نے بڑی عرق ریزی اورجانفشانی کے ساتھ اس کتاب کو مرتب کیا ہے۔ اس کتاب کی تالیف پر میں انہیں اورآل انڈیا ملی کونسل کو جس نے یہ تقریب منعقد کی دل کی گہرائیوں سے مبارک باد دیتا ہوں۔آل انڈیا ملی کونسل اس لیے بھی مبارک باد کے لائق ہے کہ وہ ہر علمی،ادبی کاموں کونہ صرف یہ کہ سراہتی ہے، بلکہ علم کی اشاعت میں اہم رول اداکررہی ہے۔ مصنف کی حوصلہ افزائی کے لیے اس طرح کی تقریبات منعقد کرتی رہتی ہے۔ آل انڈیا ملی کونسل بہارکے کارگزارجنرل سکریٹری مفتی محمدنافع عارفی نے نظامت کرتے ہوئے اپنی ابتدائی گفتگومیں کہا کہ صاحب سوانح حضرت مولاناہارون الرشید قاسمیؒ میرے بچپن کے استاذ تھے،وہ میرے والد کے گہرے دوست تھے،اس وجہ سے وہ مجھے بہت عزیزرکھتے  رتھے اورہمیشہ محبت وشفقت فرمایاکرتے تھے اللہ تعالیٰ ان کے درجات کو بلندکرے۔انہوں نے مزید کہا کہ ہمارے عزیزدوست ڈاکٹر نورالسلام ندوی ذاتی طورپرمیرے شکریہ کے مستحق اورقابل مبارک باد ہیں کہ انہوں نے استاذمحترم کی سوانح مرتب فرمائی۔ان کا قلم بڑا سیال اوررواں ہے،اللہ ان کے قلم کی طاقت کمال فن عطا کرے۔ تقریب میں شریک دیگر مہمانوں نے بھی کتاب کی تالیف اوراشاعت پر ڈاکٹر نورالسلام ندوی کو اپنے اپنے الفاظ میں دل کی گہرائیوں سے مبارک باد دی۔ اس موقع پر مولانا صدرعالم ندوی نے کہا کہ مجھے امید ہے کہ کتاب کے مؤلف ڈاکٹر نورالسلام ندوی کی علمی خدمات پر مستقبل قریب میں کوئی باذوق قلم اٹھائے گا۔مولانا ہارون الرشید کے صاحبزادے جناب مولاناسفیان احمدنے اس موقع پر والد گرامی کو یاد کرتے ہوئے کہاکہ ابا نے ہمارے بڑے بھائی ڈاکٹر نورالسلام ندوی کی تربیت کی تھی اورانہوں نے اپنے استاذ کا حق اداکیا،وہ ہمارے شکریہ کے مستحق ہیں۔مولانا مرحوم کے نواسے جناب مولاناامیر معاویہ قاسمی نے اپنے ناناجان کی خدمات کو خراج تحسین پیش کرتے ہوئے کتاب کے مؤلف مولاناڈاکٹر نورالسلام کا شکریہ اداکیا اورانہیں مبارک باد پیش کی۔جناب نجم الحسن نجمی ڈائرکٹرنجم فاؤنڈیشن پھلواری شریف نے ڈاکٹر نورالسلام ندوی کوکتاب کی تالیف پر مبارک باد دی۔اس موقع پرجناب عقیل احمد ہاشمی،جناب خالدعبادی، جناب جاوید احمد جمال پوری،جناب مسرور عالم دربھنگہ،جناب ریحان احمد،جناب محمد توفیق ندوی،جناب اثرفریدی،جناب محمد نورعالم رحمانی ارریہ،جناب جاویداختر،جناب حافظ محمد عارف،جناب نعمت اللہ ندوی،مولاناجاویدجمالی،جناب رضاء اللہ قاسمی،جناب نسیم احمد قاسمی،جناب محمد جمال الدین قاسمی اورابونصرہاشم وغیرہ کے علاوہ کثیر تعداد میں لوگ موجود تھے۔

تسمیہ جونئیر ہائی اسکول میں ہوم سائنس اور کتابی دستکاری نمائش کا انعقاد

تسمیہ جونئیر ہائی اسکول میں ہوم سائنس اور کتابی دستکاری نمائش کا انعقاد

اردو دنیا نیوز ٧٢

 تسمیہ جونئیر ہائی اسکو ل ٢٣اکتوبر(٢٠٢٢)اور اس کی نمائش کا انعقاد کیا گیا ۔ اس موقع پر اس کے رسید احمد پرپل جاوید مظہر اور محتر مہ بنت حسن زیدی ( پرنسل زب نبی گرلس انٹر کالج مظفرنگر مہمان خصوصی موجود ہے ۔ نمائش میں ہوم سائنس اور کتابی دستکاری کے اساتذہ کی مدد سے اسکول کے طلبہ وطالبات نے جوش وخروش سے حصہ لیا ۔ نمائش میں درجہ سے ۸ تک کے تمام طلبہ و طالبات نے اپنی دستکاری کی عمدہ کارکردگی پیش کی ۔ درجہ 7 بی کے طلبہ نے کئی طرح کے کاغذ کے خوبصورت لفافے ، درجہ ے بی کے طلبہ نے الگ الگ طرح کی فائل وغیرہ پیش کی جو بہت عمدہ تھیں ۔ کچھ طلبہ نے گھر میں پڑے بے کار سامان سے گھر کو سجانے کے لئے خوبصورت ائٹم بنا کر پیش کئے ۔ درجہ ے بی کے طلبہ نے کتابی دست کاری میں استعمال ہونے والے آلات کو پیپر پر پیش کیا اور ساتھ ہی گھر پر بہت کم دام میں خوبصورت فائل اور البم بنا کر پیش کی ۔ ہوم سائنس کے طالبات نے بھی اپنی صلاحیتوں سے نمائش میں تعاون کیا ۔ درجہ جی کی طالبات نے بریکا سامان کو بہت خوبصورتی کے ساتھ استعمال کر کے گھر کا سجاوٹی سامان بنا کر پیش کیا جیسے اونی لباس سے بنی گڑ یا گتے کی الماری ، بوتل کا گلدستہ ، جسے پانی کے پھولوں سے سجایا گیا ، پیپر سے بنا گھر ، آئس کریم اسٹک سے بنا  گل دستہ ، انڈے کی ٹرے سے بنا شوٹیں اور سیمنٹ چوک سے ملا کر خوبصورت گملا جسے رنگوں کے ذریعہ سجایا گیا ۔ درجہ ہے جی کی طالبات نے پیپر پر کڑھائی کے مختلف نمونے بناۓ اور ابتدائی طبی امداد کے لئے فرسٹ ایڈ بوکس ، درجہ ۸ جی کی طالبات نے سوتی رومال پر مختلف ایمبر ایڈری سلائیوں کے استعمال سے خوبصورت رومال بنائے اور سلائی مشین کے مختلف حصوں کو پیپر پر پیش کیا ۔ اس نمائش سے طلباء وطالبات نے بیحسوس کرایا کہ وقت کا اچھا استعمال کر کے مہنگائی کے اس دور میں پیسے کی بچت کر کے گھر کی سجاوٹ کا خاص خیال رکھا جا سکتا ہے ۔ جو کہ ہماری کاریگری پر منحصر ہے ۔ نمائش دیکھ کر مہمان خصوصی محتر مہ بنت حسن زیدی بہت خوش ہوئی اور حصہ لینے والے طلبہ و طالبات کی بہت تعریف کی اور ساتھ ہی ان کی حوصلہ افزائی بھی کی ۔ انہوں نے اپنی تقریر میں کہا کہ ہم بھی کو ہر طرح سے خودمختار ہونا چاہئیے ۔ جس میں دستکاری اہم ہے ۔ ہم سبھی کوا پی دست کاری کو بہتر کرنا چاہیئے ۔ دست کاری کے ذریعہ ہم مستقبل میں کا بیج انڈسڑی شروع کر سکتے ہیں جو ہماری محنت سے بعد میں چھوٹی صنعت کی شکل اختیار کر سکتا ہے ۔ اس طرح مہمان خصوصی نے طلبہ و طالبات کی حوصلہ افزائی کی اور ساتھ ہی اسکول کا اور بھی اساتذہ کا شکر بیادا کیا ۔ نمائش میں ہوم سائنس اور کتابی دست کاری کے اساتذہ کے ساتھ ساتھ بھی اساتذہ مند پرویز ، محمد شاہ رخ ، خوش نصیب ، ثانیہ مریم ، ناز بی پروین ، درخشاں پروین ، ریشمہ ، لائقہ عثمانی عصمت آرا ، رقیہ بانو شمن ، عباس سیدہ شائلہ ، امر بین انصاری ، نهم فاطمہ ، مولانا شوکت اور مرسلین خان زبیر احمد کا تعاون رہا ۔

مولانا محمد عثمان غنیؒ کی اہم تصنیف ؛’’بُشریٰ‘‘ __

مولانا محمد عثمان غنیؒ کی اہم تصنیف ؛’’بُشریٰ‘‘  __

اردو دنیا نیوز ٧٢

✍️مفتی محمد ثناء الہدیٰ قاسمی

 نائب ناظم امارت شرعیہ پھلواری شریف پٹنہ

مولانا محمد عثمان غنی ؒ بڑے مفتی نامور قائد اچھے منتظم اور مشہور مجاہد آزادی تھے،انہوں نے امارت شرعیہ میں فتویٰ نویسی کا بھی کام کیا ،نظامت بھی سنبھالی ،اپنی دھاردار تحریروں کی وجہ سے جیل بھی گئے ،امارت اور جمعیت کے پلیٹ فارم سے جد و جہد آزادی میں حصہ لیا،ان کے اداریئے،مضامین اور مقالات جو جریدۂ امارت ’’نقیب‘‘ المجیب اور دوسرے رسائل میں چھپے وہ ان کے قلم کی جولانی اسلوب کی پختگی، دلائل کی منطقیت اور اثر آفرینی کی واضح دلیل ہے ۔انہوں نے لکھا اور بھرپور لکھا ،خطابت کا ملکہ ان کے اندر نہیں تھا،مجلسی گفتگو کے آدمی تھے لیکن لکھتے تو لکھتے چلے جاتے ،اور قارئین مسحور ہوجاتے ۔  

مولانا نے بہت لکھا ،ان کے مقالات اور اداریئے دیکھنے سے معلوم ہوتا ہے کہ وہ فکری طور پر اسلامی افکار و اقدار کے امین اور سچے وارث تھے ،ان کے تعلقات کامریڈ تقی رحیم وغیرہ سے ضرور تھے،اور سیاسی طور پر آزادی کے بعد وہ کمیونسٹ آڈیالوجی کو پسند کرتے تھے ،لیکن اس کا مطلب دین و ملت سے بے زاری نہیں تھی جیسے بہت سارے علماء سیاسی طور پر کمیونسٹ کو پسند کرتے تھے،ویسے ہی آخری دور میں مولانا کی یہ سوچ تھی کہ جوڑی بیل کے بجائے ہنسوا بالی مسلمانوں کے لئے زیادہ مفید ہے،یہ بات میں اس غلط فہمی کو دور کرنے کے لئے بیان کر رہا ہوں جو خواہ مخواہ ان کے بارے میں وقتاًفوقتاً پھیلائی جاتی رہی ہے ،شاہد رام نگری نے اس کی وجوہات پر روشنی ڈالتے ہوئے لکھا ہے ؛

’’کانگریس نے اپنی اعلان شدہ پالیسیوں سے انحراف کرتے ہوئے پس روی ختیار کی تو آپ نے اس کی بھرپور مخالفت کی اور تحریروں کے ذریعہ حکومت کو اپنی اصلاح کرنے کا مشورہ دیا ،جب پانی سر سے اونچا ہونے لگا تو آپ کھل کے میدان میں آ گئے اور کانگریس حکومت کی غلط بیانیوں کی بھرپور مخالفت کی اور سیاست میں بائیں بازو کے رجحان کی کھل کر حمایت کا اعلان کیا۔مولانا کی مضبوط رائے تھی کی فرقہ واریت سے لوہا لینے کے لئے بائیں بازو کی قوت کا استحکام ضروری ہے ،چنانچہ اس وقت جب مسلمان کمیونسٹ پارٹی سے جھجھک محسوس کرتے تھے آپ نے سیاسی بنیادوں پر کمیونسٹ کی حمایت کی اپیل کی ۔‘‘

مولانا نے جو کچھ لکھا ہے اس میں ایک اہم کتاب ’’بشریٰ ‘‘ہے جس کا موضوع سیرت پاک ہے ،یہ ایک مختصرمگر جامع کتاب ہے،جس کی زبان آسان ہے اورجو طلبہ نیز کم پڑھے لکھے لوگوں تک معنی کی ترسیل کے لئے انتہائی مفید ہے۔

بشریٰ کے اب تک تین ایڈیشن نکل چکے ہیں ،پہلا ایڈیشن ۱۳۵۰؁ھ میں شائع ہوا تھا،اس ایڈیشن تک میری رسائی نہیں ہو سکی،البتہ دوسرا ایڈیشن ڈاکٹر ریحان غنی صاحب کی کرم فرمائی سے میرے مطالعہ میں آیا ،اس ایڈیشن کے سر ورق پر بشریٰ از مولانا سید شاہ محمد عثمان غنی صاحب اور نیچے ناشر میں غنی بک ڈپو درج ہے،اندرونی ٹائٹل دیکھنے سے یہ بات سامنے آتی ہے کہ وہ ان دنوں ناظم امارت شرعیہ صوبہ بہار تھے ،اس پر عرض ناشر یکم صفر ۱۳۷۴؁ھ کا لکھا ہوا ہے، اس میں یہ بھی اطلاع دی گئی ہے کہ پہلا ایڈیشن چند مہینے میں ختم ہو گیاتھا اور لوگوں کے مطالبے جاری تھے۔

دوسرے ایڈیشن کے پریس جانے کے پہلے مصنف ؒ نے اس پر نظر ثانی فرمائی اور طباعت سے پہلے معمولی سی لفظی ترمیم بھی کی،اس کی طباعت آزاد پریس سبزی باغ سے ہوئی تھی۔اس کتاب کا تیسرا ایڈیشن ۱۴۰۴؁ھ مطابق ۱۹۸۳؁ء میں سامنے آیا اسے مسلم اسٹوڈینٹس ایسوسی ایسوشن آف انڈیا دارالغنی شاہ گنج پٹنہ نے چھپوایا تھا،عظیم آباد پبلی کیشنز لمٹید بھکنا پہاڑی پٹنہ ۶ سے طبع شدہ اس ایڈیشن کی قیمت چار روپے تھی ،اس پر سنہ اشاعت نومبر ۱۹۸۳؁ء درج ہے ،لیکن یہ صحیح نہیں ہے ،اس لئے کہ عرض ناشر کے طور پر ڈاکٹر ریحان غنی کی جو تحریر اس کتاب میں شامل ہے اس پر تاریخ یکم دسمبر۱۹۸۳؁ ء مطابق ۲۵ ؍صفر ۱۴۰۴؁ھ دج ہے ،اس کا مطلب یہ ہے کہ نومبر میں یہ کتاب نہیں چھپی تھی دسمبر اور اس کے بعد ہی اس کی طباعت ہو سکی ہوگی،ڈاکٹر ریحان غنی صاحب نے عرض ناشر میں لکھا ہے کہ ’’مولانامفتی سید شاہ محمد عثمان غنی ؒ نے آسان اور عام فہم زبان میں یہ کتاب لکھ کر وقت کی ایک اہم ضرورت کو پورا کیا ہے۔‘‘(ص: ۳) 

بشریٰ کے بارے میں شروع میں دو تأثرات اور آرا بھی درج کی گئی ہیں ان میں ایک اس وقت کے امیر جماعت اسلامی ہند بہار کے ڈاکٹر سید ضیاء الہدیٰ کے تأثرات ہیں جنہیں ان کی رائے سے تعبیر کیا گیا ہے ،ڈاکٹر صاحب کی رائے ہے کہ ’’بچوں کے لئے اتنا جامع رسالہ سیرت طیبہ پر میں نے نہیں دیکھا ہے ،انداز بیان بھی سیدھا سادہ ہے اور واقعات کو مختصر پیرا گرافوں میں اور آسان زبان میں بیان کر کے بچوں کے لئے بہت مفید بنا دیا گیا ہے ۔

پھر بیش تر واقعات کے بعد ہلکا پھلکا سبق آموز جملہ استعمال کر کے بچوں کی توجہ ادھر مبذول کرائی گئی ہے کہ وہ بھی اپنے اندر ان صفات کو پیدا کرنے کی کوشش کریں جو  فطری طور پر کسی واقعہ کو پڑھنے کے بعد بچوں میں خود بھی پیدا ہوتی ہے۔ ‘‘(ص: ۴)

مولانا سید شاہ عون احمد قادری ؒ اس وقت کے جمعیۃ علماء بہار کے صدر کی رائے مختصر سی درج ہے جس میں انہوں نے لکھا ہے کہ’’سیرت نبوی میں مختصر کتاب کی تصنیف کاچلن مولانا موصوف کی کتاب بشریٰ کے بعد شروع ہوا۔‘‘(ص:۵)

ڈاکٹر سید ضیاء الہدیٰ صاحب نے اس کتاب کے مندرجات میں ایک کمی اور تشنگی کا بھی ذکر کیا ہے ،لکھتے ہیں : ’’البتہ ایک تشنگی مجھے محسوس ہوتی ہے وہ یہ کہ بچیوں یا بالفاظ دیگر صنف اناث کے لئے مواد برائے نام ہی ہے ،ظاہر ہے ان کے لئے جو مخصوص نمونے ہو سکتے ہیں وہ صحابیات ہی کے اندر پائے جا سکتے ہیں ،جس کا ذکر سیرت نبوی ؐکے ضمن میں آنا چاہئے ،مثلاً غزوۂ احد میں ایک صحابیہ ام عمارہ ؓ کا واقعہ بیان کیا جا سکتا تھا ،جنہوں نے آنحضور ؐ کو بچانے کے لئے ستر تیر کھائے تھے اور رسول اللہ صلی اللہ علیہ وسلم نے فرمایا کہ میں جس طرف بھی دیکھتا تھا، ام عمارہؓ نظر آتی تھیں۔ ‘‘(ص:۴)

کتاب کا آغاز مصنف علیہ الرحمہ نے بسم اللہ الرحمن الرحیم کے بعد مختصر سے خطبہ الحمدللہ و سلام علی عبادہ الذین الصطفیٰ سے کیا ہے ،تمہید بھی مختصر سی تین سطر کی ہے ،جس میں اللہ کی بڑی رحمت اور نعمت میں سے ایک انسان کامل کی ولادت با سعادت کو قرار دیاہے۔اس کے بعد آقا صلی اللہ علیہ وسلم کی کی ولادت با سعادت ،بچپن ،جوانی ،کسب معاش ،نکاح ،ایفائے وعدہ ،اصلاحی کام ،دیانت پر اعتماد ،گوشہ نشینی ،نبوت اور نزول وحی ،تبلیغ اسلام ،اعلانیہ تبلیغ اسلام ،عزم و استقامت ،صحابہ کا صبر و ثبات ،حبشہ کی ہجرت ،لالچ اور دھمکی ،رسول اللہ صلی اللہ علیہ وسلم کا مقاطعہ ،صدمہ اور ظلم،مکہ سے باہر تبلیغ،معراج،نماز کا حکم ،مدینہ میں اسلام ،نقابت، رسول اللہ کی ہجرت ،مسجد نبوی کی تعمیر ،بھائی چارہ ،امن و اتحاد کی کوشش، مدینہ کے دشمن ،جہاد ،غزوۂ بدر ،اذان کی ابتداء ،غزوۂ احد ،صحابہ کی محبت،یہودیوں کی شرارتیں ،شراب کی حرمت ،غزوۂ خندق ،عہد شکنی کی سزا ،صلح حدیبیہ ،معاہدہ کی پابندی ،غزوۂ خیبر ،عمرہ کی ادائیگی،بادشاہوں کو دعوت اسلام ،فتح مکہ، دشمنوں سے سلوک ،غزوۂ حنین ،غزوۂ تبوک ،حج کی ادائیگی ،حجۃ الوداع ،مرض وفات ، آخری وصیت ،معجزہ ،اخلاق ، سادگی ،صفائی ،گھر کا کام ،سبق حاصل کرو جیسے اہم موضوعات پر مولانا محمد عثمان غنی ؒ نے انتہائی سادہ اور سہل انداز میں طلبہ و طالبات کی استعداد و صلاحیت کو سامنے رکھ کر لکھا ہے، واقعات وہی ہیں جو سیرت کی عام کتابوں میں بھی مذکور ہیں ،لیکن مولانا نے جگہ جگہ بچوں کو جو نصیحتیں کی ہیں اور جو نتائج اخذ کئے وہ ان کے اخاذ دہن کی پیداوار ہیں ،عموماً ان کی طرف نگاہ کم جاتی ہے ۔صحابہ کے صبر و ثبات پر گفتگو کرتے ہوئے انہوں نے جو کچھ ذ کر کیا ہے وہ آج کے موجودہ حالت میں ہمارے لئے نصیحت بھی ہے اور حوصلہ افزا پیغام بھی ،لکھتے ہیں :’’جب ظالموں اور جابروں کا غلبہ اور تسلط ہو اور مسلمانوں کے لئے کوئی خاص جائے پناہ نہ ہو اور حق کو ظلم و جور سے پامال کرنے کی کوشش کی جاتی ہو تو ان حالات میں ان ظالموں کے مقابلہ میں اعلان حق کرنا اور صداقت و حقانیت پر قائم رہتے ہوئے ہر قسم کے مصائب برداشت کرنا ،یہاں تک کہ اس راہ میں جان عزیز تک قربان کر دینا عین دین ہے ،اور اسی کو قر آن و حدیث میں صبر جمیل اور استقامت سے تعبیر کیا گیا ہے ۔‘‘(ص:۲۲) 

مولانا امارت شرعیہ کے ناظم بھی تھے اور سیاسی قائد بھی ،اس لئے مختلف جگہوں پر سیرت کے واقعات کی روشنی میں ایک امیر کے ماتحت زندگی گزارنے اور بھائی بھائی بن کر رہنے پر زور دیا ہے ،یہ سیرت نبی کا پیغام بھی ہے اور اسلام کو مطلوب بھی ،لکھتے ہیں :’’حضرت رسول اللہ صلی اللہ علیہ وسلم نے مدینہ جانے سے پہلے وہاں کے مسلمانوں کا جماعتی نظم قائم کر دیا اور ہر قبیلہ کے لوگوں کو ایک سردار کے ماتحت کر دیا ،تا کہ تمام اسلامی و جماعتی کام خوش اسلوبی سے انجام پائے۔‘‘

مولانا کا اسلوب اس کتاب میں یہ ہے کہ وہ واقعات ذکر کر کے اس سے نتیجہ اخذ کرتے ہیں ،اور طلبہ کو اس طرف سبق کے انداز میں متوجہ کرتے ہیں اور اس پر عمل کی تلقین کرتے ہیں ۔

مولانا سید مسرور احمد مسرورجن کے جانے پہ آگئے آنسو

مولانا سید مسرور احمد مسرور

جن کے جانے پہ آگئے آنسو

اردو دنیا نیوز ٧٢

  ✍️ محمد سراج الہدی ندوی ازہری

دار العلوم سبیل الســـــــــلام، حیدرآباد

   21/اگست 2022ء مطابق 22/محرم الحرام 1444ھ بروز اتوار کی بات ہے، معمول کے مطابق فجر سے پہلے بیدار ہوا، ابھی بستر ہی پر تھا کہ موبائل کی گھنٹی بجی، دیکھا تو عزیزم مفتی محمد نعمت اللہ سبیلی، بانی و ناظم معھد القرآن، مریم کالونی، کتہ پیٹ، حیدرآباد کا فون تھا، بے وقت فون پر تعجب تو ہوا؛ تاہم مجھے اندازہ ہوچلا تھا، علیک سلیک کے فوراً بعد ہی کہہ پڑے کہ ابھی ابھی تہجد کے آخری وقت میں مولانا سید مسرور احمد مسرور صاحب نے حیدرآباد کے عثمانیہ ہاسپٹل میں آخری سانس لی، انا للہ و انا الیہ راجعون۔ فجر سے متصل ہی مولانا مرحوم کی لاش دار العلوم سبیل الســـــــــلام حیدرآباد سے قریب ان کی قیام گاہ پر لائی گئی، جوں جوں خبر عام ہوتی گئی، اہلِ تعلق اور محبین و مخلصین کے آنے کا سلسلہ شروع ہوگیا، نماز جنازہ دار العلوم سبیل الســـــــــلام حیدرآباد کے وسیع و عریض احاطے میں ظہر کی نماز کے بعد ان کے بڑے برادر نسبتی محترم سید احمد صاحب نے پڑھائی، جس میں اساتذہ و طلبہ کے علاوہ ایک جم غفیر نے شرکت کی اور تدفین بارکس کی مسجد "نور عين" سے متصل قبرستان میں عمل میں آئی۔

     مولانا سید مسرور احمد مسرور بن سید مشرف حسین کا تعلق سادات خاندان سے تھا۔ آپ کے آبا و اجداد اصلاً بہار کے ضلع "چھپرہ" کے رہنے والے تھے، جن میں ایک مشہور شخصیت سید ریاست حسین کی تھی، جو اپنے وقت میں پولیس محکمہ میں داروغہ کے عہدے پر فائز تھے، ان کا ٹرانسفر "چترا" ہوا، جو ابھی صوبہ جھارکھنڈ کا ایک ضلع ہے، تو افرادِ خاندان "چھپرہ" ضلع سے "چترا" ضلع منتقل ہو گئے، اس وقت کے راجہ مہاراجہ نے ان کی حسنِ کارکردگی پر "رَکْسی" گاؤں میں بڑی جاگیر دی تھی، زمانہ گزرتا رہا، پھر ایک وقت ایسا آیا کہ ایک راجہ، جسے آج بھی عوام کی زبان میں "نکٹا راجہ" کے نام سے یاد کیا جاتا ہے، اس کی نیت خراب ہوئی اور مولانا مرحوم کے جدِّ امجد کے باغ کو لینا چاہا؛ لیکن مولانا کے اجداد نے دینے سے انکار کردیا، پھر آپس میں مخاصمت ہوئی، کچھ زمین کی نیلامی ہوئی اور کچھ پر غیروں نے دھیرے دھیرے قبضہ کرنا شروع کردیا، تو مولانا مرحوم کے افرادِ خاندان نے نقلِ مکانی کرنا ہی بہتر سمجھا، اس طرح یہ خاندان مختلف جگہوں پر آباد ہوگیا۔ مولانا مرحوم کے والدِ محترم سید مشرف حسین کی شادی ضلع گیا کے "کوٹھی" گاؤں میں ہوئی، تو آپ وہیں آباد ہوگئے، اس طرح مولانا سید مسرور احمد مسرور کی ولادت، پرورش و پرداخت اور تعلیم و تربیت، سب کچھ نانیہال ہی میں ہوئی، جہاں والدین نے مستقل سکونت اختیار کر لی تھی۔

     مولانا مرحوم کی صحیح تاریخِ پیدائش کا تو علم نہیں ہے؛ تاہم آدھار کارڈ کے مطابق 1950ء میں آپ کی ولادت ہوئی، ابتدائی تعلیم گھر ہی میں ہوئی، اس کے بعد اپنے ہی گاؤں "کوٹھی" کے مدرسہ عبیدیہ میں داخل ہوئے، جہاں آپ کے خاص استاذ مولانا کلیم اللہ طوروی رہے، اس کے بعد اپنے وقت کے مشہور و معروف ادارہ مدرسہ قاسمیہ، گیا میں داخلہ لیا، جہاں چند سالوں تک تعلیم حاصل کی، پھر سرزمینِ دیوبند کا سفر ہوا اور تعلیم و تعلم کی بجائے فنِ کتابت و خطاطی کی طرف توجہ دی، مولانا مرحوم کی گفتگو سے اندازہ ہوتا تھا کہ معاشی مسائل اور گھریلو ذمے داریوں کی وجہ سے یہ راہ اختیار کی گئی اور اسی کو ذریعۂ معاش بنایا، دیوبند میں قیام کے دوران حضرت مولانا ریاست علی بجنوری رحمہ اللہ اور مدنی خاندان سے کافی گہرا تعلق رہا، جسے وہاں سے آجانے کے بعد بھی نبھاتے رہے۔ دیوبند کے بعد اپنے وطن بہار کا رخ کیا اور ہندوستان کے مشہور و معروف ادارہ امارتِ شرعیہ، پٹنہ سے وابستہ ہوگئے، جہاں امارت شرعیہ کے ترجمان "ہفت روزہ نقیب" کی کتابت کے ساتھ ساتھ "روزنامہ قومی تنظیم" سے بھی منسلک رہے، امارتِ شرعیہ میں امیرِ شریعت رابع حضرت مولانا سید منت اللہ رحمانی، قاضی القضاۃ فقیہِ ملت حضرت مولانا مجاہد الاسلام قاسمی، حاجی شفیع صاحب تمنائی اور امیرِ شریعت سادس حضرت مولانا سید نظام الدین رحمہم اللہ سے کافی قربت رہی، آخر الذکر سے آپ کی رشتہ داری بھی تھی۔ 1986ء کے اوائل میں جنوبی ہند کے مشہور و معروف، تعلیمی و تربیتی ادارہ دار العلوم سبیل السلام حیدرآباد تشریف لائے، پھر دوبارہ کبھی بھی اپنے وطن جانا نہیں ہوا، آخری سانس تک اسی شہر میں رہے۔ بانی دار العلوم سبیل السلام حضرت مولانا محمد رضوان القاسمی رحمہ اللہ کی متعدد کتابوں، ادارے کے ترجمان "سہ ماہی صفا" اور بھی بعض دیگر لوگوں کی تصنیفات و تالیفات کی کتابت کی، یہاں کی لائبریری کے معاون مدیر بھی رہے، طلبۂ عزیز کی تحریر کی اصلاح بھی کی، اس طرح اپنی افادیت کو ثابت کرتے ہوئے ایک پہچان بنائی۔

    اللہ تعالیٰ نے مولانا مرحوم کو بہت ساری خوبیاں عنایت کی تھیں ، آپ خوبصورت چہرہ، گورا رنگ، کشادہ پیشانی، لمبا قد، چھریرا بدن، مسکراتا چہرہ، خوش مزاج، خوش مذاق، با اخلاق، باذوق، ملنسار، جود و سخا کے پیکر اور فقیری میں شاہی مزاج رکھنے والے تھے، ہمدردی و غم گساری، ایثار و قربانی، صفائی و ستھرائی، سلام میں پہل اور کم خوراک ہونے میں ایک مثال تھے، مزاج میں نستعلیقیت، رفتار میں تیزی، گفتار میں ٹھہراؤ اور کردار میں بلندی تھی، تنہائی پسند تھے، گوشہ نشینی سے محبت تھی، سفر سے گریزاں تھے، بازار تک جانے سے احتراز تھا، شور و شغب سے حد درجہ نفرت تھی، چھوٹے بچوں کو مفرّحُ القلوب کہتے؛ لیکن خود ان سے بہت دور رہتے، وہ ایک بے ضرر انسان تھے۔

     آپ کو نثر و نظم کا صاف ستھرا ذوق تھا، اچھے شاعر تھے، بعض نظمیں اخبارات و رسائل میں شایع ہوئیں، تو بہت پذیرایی ہوئی اور خوب دادِ تحسین ملی؛ لیکن اسے کبھی پیشہ نہیں بنایا، لوگوں کے جذبات کی رعایت میں جب کبھی موقع آتا، عمدہ اور اچھے اشعار کہتے؛ بلکہ اس کے لیے باضابطہ وقت نکالتے، توجہ دیتے اور منظرِ عام پر آنے سے پہلے عموماً ہم لوگوں کو سناتے، میں جب بھی کہتا کہ: آپ کے منظوم کلام کتابی شکل میں آنے چاہیئیں، تو مسکرا کر رہ جاتے اور کبھی اثبات میں بھی جواب دیتے۔ حکمت و طبابت اور شرعی رقیہ سے بھی کسی حد تک لگاؤ تھا، اپنے محدود دائرے میں رہتے ہوئے قرآنی آیات و احادیث کے ذریعہ بچے، بوڑھے اور دیگر مریضوں پر دم کیا کرتے تھے؛ لیکن یہ سب صرف اور صرف خدمتِ خلق کے جذبے سے بغیر کسی فیس اور نذرانے کے انجام دیتے۔

   آپ نے دار العلوم سبیل السلام حیدرآباد میں تقریباً 35/ سال کا عرصہ گزارا، ادھر دو ڈھائی سالوں سے پیرانہ سالی اور ضعف کی وجہ سے مدرسہ آنا جانا نہیں تھا، مدرسہ سے قریب کرائے کے مکان میں اہل و عیال کے ساتھ مقیم تھے؛ لیکن آپ کی طویل المیعاد خدمات کی وجہ سے ناظمِ مدرسہ نے ماہانہ وظیفہ مقرر کردیا تھا، جو آپ تک پہونچا دیا جاتا تھا۔ مدرسہ کے ذمہ داران اور اساتذہ و عملہ سے اچھے تعلقات تھے، بڑے چھوٹے سبھوں کا احترام کرتے، راقمِ سطور کو دار العلوم سبیل السلام کے اساتذہ و طلبہ "مولانا سراج صاحب" یا "مولانا ازہری صاحب" کہا کرتے ہیں، جہاں تک مجھے یاد آتا ہے کہ مولانا مرحوم نے ہمیشہ "مولانا ازہری صاحب" ہی کہہ کر یاد کیا، یہ ان کی خرد نوازی، محبت، اکرام اور اپنائیت کا اظہار تھا۔

              1987ء میں آپ کی اہلیۂ محترمہ کا انتقال ہوگیا، جن سے دو لڑکیاں اور ایک لڑکا تولد ہوا تھا، لڑکیوں کا انتقال تو بچپن ہی میں ہوگیا، لڑکے کا نام سید احمد رومی ہے، جو خوش الحان حافظ و قاری ہیں، اور تقریباً دو دہائیوں سے جدّہ میں مقیم ہیں۔ مولانا کی دوسری شادی حیدرآباد ہی میں ہوئی، جن سے ایک لڑکی اور ایک لڑکا تولد ہوا، لڑکے کا نام سید محمد غزالی ہے، دونوں حافظِ قرآن، شادی شدہ اور صاحبِ اولاد ہیں۔ مولانا دو بھائی اور دو بہن تھے، سب سے لمبی عمر آپ ہی نے پائی۔ وفات سے دو روز پہلے مولانا سے ملاقات ہوئی، بہت بیمار تھے، نقاہت تھی، لوگوں کو پہچاننا بھی مشکل ہورہا تھا، جوں ہی ان کے صاحب زادے حافظ سید محمد غزالی نے کہا کہ: آپ ازہری صاحب کو یاد کر رہے تھے، وہ آگئے۔ فوراً نظر اٹھائی، بہت دعائیں دی، شکریہ ادا کیا اور متعدد لوگوں کی محبتوں اور ان کے حسنِ تعاون کو نام لے لے کر یاد کیا اور اپنے حُسنِ خاتمہ کے لیے دعا کی درخواست کی۔ اللہ تعالیٰ غریقِ رحمت کرے، سیئات پر پردہ ڈال دے، جنت الفردوس میں جگہ دے اور پس ماندگان کو صبرِ جمیل عطا کرے، آمین یا رب العالمین۔

(مضمون نگار مشہور اسلامی اسکالر، اچھے مفتی، بہترین خطیب، مثبت صاحبِ قلم، دار العلوم سبیل السلام حیدرآباد کے سینئر استاذ اور متعدد تعلیمی و تربیتی اداروں کے سر پرست اور رکن ہیں۔

رابطہ نمبر: 9849085328)

نمونۂ عمل ___مفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ

نمونۂ عمل ___

اردو دنیا نیوز ٧٢

🖋️مفتی محمد ثناء الہدیٰ قاسمی

 نائب ناظم امارت شرعیہ پھلواری شریف پٹنہ

آپ صلی اللہ علیہ وسلم کی ذات اقدس اس قدرکامل اورمکمل ہے کہ انسانی زندگی کے ہر موقع کے لئے اس میں نمونۂ عمل موجود ہے، آقاصلی اللہ علیہ وسلم یتیم پیداہوئے  ماں بھی صغرسنی میں چلی گئیں ،د ادانے بھی رخت سفرباندھ لیا، ایسے میں یتیموں کیلئے بڑاسبق یہ ہے کہ جب اللہ ظاہری سہارے چھین لیتاہے تو حفاظت وتربیت سب کاسامان غیبی طور پر فراہم کردیتاہے، آقاصلی اللہ علیہ وسلم کے بکریاں چرانے، باغوں کی سینچائی کرنے اورتجارت کے لئے باہر کاسفر ہمیں بتاتاہے کہ رزق حلال کی طلب میں کسی کام کوچھوٹااورحقیر سمجھنے کاکوئی جواز نہیں ہے، کوہ صفاپر چڑ ھ کرقولوالاالہ اللہ تفلحوا کااعلان بتلاتاہے کہ پیغام رسانی کی جوشکلیں رائج ہوں ان کااستعمال کیاجاسکتاہے، چالیس سال کی عورت سے آپ صلی اللہ علیہ وسلم کانکاح کرنا،بیوہ سے شادی کرنے اورعمر کے تفاوت سے فرق نہ پر نے کاخیال ہمارے دل میں ڈالتاہے، غارحراء کاقیام ذکراللہ کے لئے وقت کوفارغ کرنے کی اہمیت کوبتاتاہے مشرکین کی طرف سے راستے میں کانٹابچھانے، جسم اطہر پر اوجھ ڈالنے ، گلے میں پھندالگانے اورطائف کی گلیوں میں اوباشوں کے پتھر کھاکھاکر لہولوہان ہونے کے باوجود دعوت حق کے لئے صبروتحمل سے کام لیناامت کومسائل ومشکلات کے وقت صبر وتحمل کاپیغام سناتاہے،سفر معراج عروج آدم خاکی کی داستاں اورمعجزات آپ کی حقانیت کی دلیل روشن ہے، ہجرت کی رات دشمنوں کے نرغے سے صحیح سلامت نکل جانا، بتاتا ہے کہ تدبیر اللہ کی کار گر ہوتی ہے اور وہ اچھی تدبیر کرنے والا ہے، راہ خدا میں آقا صلی اللہ علیہ وسلم کا خاندان اور محبوب زمین کو چھوڑ کر مدینہ چلے جانا اللہ کے حکم پر جان ومال قربان کرنے کے جذبہ کی عملی تصویر ہے۔ حلف الفضول میثاق مدینہ اورصلح حدیبیہ مختلف اوقات کے اعتبار سے بقاء باہم کی حکمت عملی ہے، غزوات وسرایاحق کی سربلندی کے لئے سب کچھ قربان کردینے کے شوق فراواں کامظہر اتم ہے، انتم الطلقاء کااعلان دشمنوں کے ساتھ حس سلوک کی میثال اور فتح مکہ کے بعد اسلامی حکومت کاقیام، اقامت دین کی واضح اور اصولی شکل وصورت ہے، خلفاء راشدین، صحابہ کرام رضوان اللہ اجمعین، ازواج مطہرات ، اہل بیت وغیرہ کی زندگیاں رجال سازی کاپیغام سناتی ہیں اور آپ کادنیاسے چلے جانابتاتاہے کہ ہر نفس کوموت کامزہ چکھناہے، چاہے وہ محبوب رب العالمین ہی کیوں نہ ہوں،انسان جس حالت میں بھی ہو اس کے لئے آپ کی زندگی میں نمونۂ عمل ہے، مسلمان اس بات کوسمجھ کر عمل کی راہ میں آگے بڑھنا شروع کرے گا تو وہ ذلت وپستی کے موجودہ دور سے نکل جائے گا۔

اللّٰہ کے نزدیک ناپسندیدہ لوگ __

اللّٰہ کے نزدیک ناپسندیدہ لوگ __

اردو دنیا نیوز ٧٢

🖋️مفتی محمد ثناء الہدیٰ قاسمی

 نائب ناظم امارت شرعیہ پھلواری شریف پٹنہ

اللہ رب العزت کے نزدیک جو بندے پسندیدہ ہیں ان کے اوصاف پر قرآن کریم کی روشنی میں باتیں کی جاچکی ہیں اب اس کا ایک دوسرا پہلو پیش کیا جاتا ہے تاکہ معلوم ہوسکے کہ کون کون سے کام اللہ کے نزدیک بندے کو ناپسند بنادیتے ہیں۔ سارے منفی اور سلبی اوصاف کا یہاں ذکر مقصود نہیں ہے بلکہ ان اوصاف کا ذکر کرنا ہے جن کے بارے میں اللہ نے اپنی کتاب میں’’ إنَّ اللّٰہَ لاَ  یُحِبُّ‘‘، ’’وَاللّٰہِ لاَ یُحِبُّ‘‘ اور  ’’لاَِ یُحِبُّ اللّٰہُ‘‘ (اللہ ناپسند کرتا ہے )  کے ذریعہ اپنی نا پسندیدگی کا اعلان کیا ہے ۔

ان اوصاف میں ایک یہ ہے کہ انسان کسی بھی معاملہ میں حد سے تجاوز نہ کرے اس لئے کہ اللہ حد سے تجاوز کرنے اور آگے بڑھ جانے والے کو بالکل پسند نہیں کرتے ، ارشاد ربانی ہے’’ اِنَّ اللّٰہَ لاَ یُحِبُّ الْمُعْتَدِیْنَ (سورۃ البقرۃ:19 ) یہ حد سے گزرنا کسی بھی موقع اور کسی بھی معاملہ میں ہوسکتا ہے ،ایک تو میدان جنگ ہے جہاں آدمی اپنے دشمنوں کے ساتھ نفرت و دشمنی کی وجہ سے حد سے تجاوز کرتاہے اور ان حدود کو پار کر جاتا ہے جو شریعت نے ایسے موقعوں کے لئے مقرر کیا ہے ، مثلاً جنگ کے میدان میں مرنے والوں کی اہانت، ان کا مُثلہ یعنی ناک کان کاٹ کر ان کی صورت بگاڑ دینا، یہ شریعت کے مقرر کردہ حدود سے تجاوز ہے ، اللہ تعالیٰ اس کو پسند نہیں کرتے ۔

بعض لوگ دعاؤں میں بھی حد سے گزر جاتے ہیں،اللہ رب العزت کا حکم ہے کہ ’’اپنے رب کو پکارو، گڑگڑاتے ہوئے اور چپکے چپکے ،یقیناً اللہ تعالیٰ حد سے گزرنے والوں کو پسند نہیں کرتا۔‘‘(الاعراف:55 )دعا میں لفظی تکلفات، قافیہ بندی، غیر ضروری شروط، اپنے علاوہ دوسروں کے لئے بد دعائ، بلا ضرورت چلّاکر دعا کرنا یہ سب حد سے تجاوز کرنے کے ذیل میں آتے ہیں (معارف القرآن:ج3ص57 )حد سے گزرنے کی ایک قسم یہ بھی ہے کہ بندہ ان چیزوں کو حلال سمجھنے لگے جن کو اللہ نے حرام قرار دیا ہے ۔ اللہ تعالیٰ فرماتا ہے ۔’’اے ایمان والو! اللہ نے تمہارے لئے جو پاکیزہ چیزیں حلال کی ہیں ان کو حرام قرار نہ دو اور حد سے آگے نہ نکلو، یقین جانو کہ اللہ تعالیٰ حد سے آگے نکلنے والوں کو پسند نہیں کرتا۔‘‘(المائدۃ:87 )

اللہ رب العزت نے اس بات سے بھی منع کیا ہے کہ لوگ اپنے طور پر حلال و حرام کی تعیین کرنے لگیں،اللہ رب العزت نے اسے  اپنی ذات پر بہتان اور گناہ قرار دیا ہے (النحل:116 )حد سے تجاوز کرنے کی ایک شکل چیخ چلِّاکر باتیں کرنا بھی ہے ،اللہ رب العزت کو یہ بھی پسند نہیں ہے کہ مظلوم کے علاوہ کوئی زور سے چلا کر بات کرے ، مظلوم کا آہ و بکا اور چیخ و پکار کرنا فطری ہے ، اس لئے اللہ رب العزت نے اس کا استثناء کردیا اور فرمایا: ’’اللہ رب العزت زور سے ایک دوسرے کو پکارنے کو پسند نہیں کرتے الا یہ کہ اس پر ظلم کیا گیا ہو(سورۃ النسائ:148)

اللہ کے ناپسندیدہ بندوں میں اللہ پر ایمان نہ لانے والے ، اس کے معبود ہونے کا انکار کرنے والے اور اس کو کائنات کا خالق و مالک نہ ماننے والے بھی ہیں، جنہیں کافر کہا جاتا ہے ، ایسے لوگوں کی اللہ تعالیٰ نے یہ نشانی بیان کی کہ وہ اللہ کی نشانیوں کو جھٹلاتے ہیں اور نبیوں اور عدل و انصاف کی بات کرنے والوں سے لڑتے ہیں ، ایسے لوگوں کے بارے میں دردناک عذاب کی وعید دی گئی ۔اللہ تعالیٰ کا ارشاد ہے:’’جو لوگ اللہ تعالٰی کی آیتوں کا انکار کرتے ہیں اور ناحق نبیوں کو قتل کر ڈالتے ہیں اور جو لوگ عدل و انصاف کی بات کہیں انہیں بھی قتل کر ڈالتے ہیں تو اے نبی! انہیں دردناک عذاب کی خبر دے دیجئے ۔یہ وہ لوگ ہیں جن کے اعمال دنیا اور آخرت دونوں میں ضائع ہوگئے ، اور ان کا کوئی مددگار نہیں ہے ۔‘‘(آل عمران:21-22)

 اس کے مقابلہ میں اللہ تعالیٰ نے ایمان لانے والوں اور اچھے کام کرنے والوں کوخوش خبری سنائی ہے ۔ ’’کفر کرنے والوں پر ان کے کفر کا وبال ہوگا اور نیک کام کرنے والے اپنی ہی آرام گاہ سنوار رہے ہیں،تاکہ اللہ تعالٰی انہیں اپنے فضل سے بدلہ دے جو ایمان لائے اور نیک اعمال کئے ،بے شک وہ ناشکروں کو پسند نہیں کرتا ہے ۔(الروم:45)

کفر اور شرک دونوں نتائج کے اعتبار سے ایک ہیں، کفر انکار کو کہتے ہیں اور شرک اللہ رب العزت کی ذات و صفات میں کسی کو شریک کرلینے کو، چوں کہ اللہ کا کوئی ہم سر نہیں ہے اس لئے اس کے ساتھ کسی کو کسی بھی طرح شریک کرنا بڑا ظلم ہے ، اللہ رب العزت کا ارشاد ہے کہ’’شرک بڑا ظلم ہے۔‘‘ (سورۃ لقمان:13 )

اتنا بڑا ظلم کہ اللہ سارے گناہ کو معاف کر سکتا ہے ،لیکن شرک معافی والی فہرست سے باہر ہے ؛کیوں کہ اللہ کے ساتھ جو شریک ٹھہراتے ہیں، اللہ ان کی مغفرت نہیں فرماتا، اس لئے کہ جس نے اللہ کے ساتھ شریک ٹھہرایا اس نے اللہ پر بہتان باندھا۔(سورۃ النسائ:48) اللہ کو یہ افترا اور بہتان پسند نہیں ہے ، یہ ظلم کا کامل درجہ ہے ، اس میں دوسرے ادنیٰ درجہ کے ظالمین بھی شامل ہیں، اللہ کا اعلان ہے کہ اللہ ظلم کرنے والوں کو پسند نہیں کرتا ’’واللّٰہ لا یُحِبُّ الظّٰلمین۔‘‘(آل عمران:57) اللہ رب العزت نے مومنین کو تسلی دیتے ہوئے یہ بھی فرمایا کہ’’ہم لوگوں کے درمیان حالات کی ادلا بدلی کرتے رہتے ہیں، اور اللہ ظالموں کو دوست نہیں رکھتا۔‘‘(آل عمران:140)

 اس سلسلے میں اللہ رب العزت نے بندوں کے لئے یہ اصول بھی بیان فرمایا کہ’’ بُرائی کا بدلہ اسی قدر برائی سے دیا جاسکتاہے، تو جس نے معاف کردیا اور اصلاح کرلیا تو اس کا بدلہ اللہ رب العزت کے ذمہ ہے کیوں کہ اللہ ظالمین کو پسند نہیں فرماتا (الشوری:40)

اس قسم کے تمام لوگ جو حد سے گزرنے والے ہیں، وہ ظلم کرنے والے ہیں اور اللہ کی زمین میں فساد پھیلانے والے ہیں،حالانکہ وہ سمجھتے ہیں کہ وہ اصلاح کا کام کر رہے ہیں لیکن در حقیقت وہ لوگ فسادی ہیں۔ ان کا عمل تو یہ ہے کہ ’’وہ زمین میں فساد ڈالتے پھرتے ہیں، کھیتی اور جانوں کو تباہ کرتے ہیں، اللہ ایسے مفسدین کو پسند نہیں کرتا(البقرہ:205) اسی طرح آپس کی دشمنی اور لڑائی جھگڑے کو بھی اللہ تعالیٰ سخت ناپسند کرتا ہے ۔ یہود کے عمل کے بارے میں اللہ تعالیٰ نے بیان کیا کہ قیامت تک کے لیے ان کے برے اعمال اور کفر و سرکشی کی وجہ سے ان کے اندر آپسی دشمنی اور عداوت ڈال دی گئی۔’’ اور ہم نے ان کے درمیان قیامت تک عداوت اور دشمنی ڈال دی ہے ، جب کبھی لڑائی کے لیے آگ سلگاتے ہیں تو اللہ اس کو بجھا دیتا ہے ، اوریہ زمین میں فساد پھیلانے کی کوشش کرتے ہیں، اور اللہ فساد کرنے والوں کو پسند نہیں کرتا۔(المائدہ:64 )اللہ رب العزت کا یہ بھی فرمان ہے کہ’’ جو مال تمہیں دیا گیا ہے، اسے آخرت کی تیاری کے لئے خرچ کرو، دنیاوی ضرورتوں کو بھی نہ بھولو، احسان کیا کرو اور زمین میں فساد نہ پھیلاؤ، اللہ فسادیوں کو پسند نہیں کرتا ۔‘‘(القصص:77)

اللہ رب العزت نے بے جا خرچ کرنے کو منع کیا اور اللہ کے نیک بندوں کی صفت اعتدال سے خرچ کرنے کو قرار دیا،فرمایا کہ’’اور وہ جب خرچ کرتے ہیں تو نہ فضول خرچی کرتے ہیں اور نہ کنجوسی(بلکہ ) ان کا خرچ کرنا ان (دونوں) کے درمیان (حد اعتدال پر) ہوتا ہے ۔‘‘(الفرقان:67 )

اللہ کا حکم ہے کہ بے جا خرچ نہ کرو، اس لئے کہ ’’بے جا خرچ کرنے والے اللہ کو پسند نہیں ہیں ۔‘‘(الانعام:14 ) اللہ چاہتے ہیں کہ کھاؤ، پیو اور حد سے نہ بڑھو(یعنی فضول خرچی نہ کرو)، اس لئے کہ ’’حد سے بڑھنے والے اللہ کے محبوب نہیں ہوسکتے ۔‘‘(الاعراف:31)

اللہ کے نزدیک مبغوض اور ناپسندیدہ بنانے والی ایک صفت خیانت ہے یہ خیانت مال میں بھی ہوتی ہے ، امانت میں بھی اور رازدارانہ گفتگو کے افشاء کے ذریعہ بھی، یہ منافق کی علامتوں میں سے ایک علامت ہے ، بھلا جس میں منافق کی علامت ہو اسے اللہ کس طرح پسند کرسکتے ہیں، اللہ نے اعلان فرمادیا کہ’’ اللہ خائنین کو پسند نہیں کرتا(الانفال:58)اسی طرح اللہ رب العزت کو تکبر بھی پسند نہیں ہے ، اس لیے کہ کبر اللہ کی چادر ہے جو اس میں داخل ہوگا، ذلیل ہوجائے گا، ا یک حدیث قدسی میں اللہ کے نبی صلی اللہ علیہ وسلم نے فرمایا کہ اللہ تعالیٰ فرماتا ہے : ”عزت میری ازار اور کبریائی (بڑائی) میری چادر ہے چنانچہ جو شخص ان دونوں میں سے کوئی شے مجھ سے کھینچے گا میں اسے عذاب دوںگا‘‘(صحیح مسلم)

اس کا حکم ہے کہ’’اللہ رب العزت نے جو تمہیں ہدایت کی دولت سے مالا مال کیا ہے اس پر اللہ کی بڑائی بیان کرو۔‘‘(سورۃ البقرۃ:185) 

اذان، اقامت، تکبیر تشریق، جانور کو ذبح کرتے وقت بسم اللہ، اللہ اکبر کہنا، نماز میں اٹھتے بیٹھتے اللہ اکبر کہلانے کی مصلحت یہی ہے کہ اللہ کی بڑائی بیان کی جائے ، ولادت کے وقت دائیں کان میں اذان کے الفاظ اور بائیں کان میں اقامت کے کلمات کہنے کا بھی یہی مقصد ہے کہ پہلے دن سے اللہ اکبر بچے کے ذہن میں محفوظ ہوجائے ۔ اللہ کے علم میں ہے جو بندہ کرتاہے چاہے وہ چھپا کر کرے یا اعلانیہ، تکبر اور غرور کرنے والے اللہ کے نزدیک مبغوض ہیں۔ اللہ رب العزت نے ان طریقوں کو بھی پسند نہیں کیا جو کبر کی علامت ہیں، فرمایا’’زمین پر اکڑ کر نہ چلو، کیوں کہ تم زمین کو پھاڑ نہیں سکتے اور پہاڑ کی اونچائیوں تک پہونچ نہیں سکتے ۔‘‘(الاسرائ:37)اِترانا بھی تکبر کی ہی ایک قسم ہے ، مال و دولت، جاہ و حشمت، پاکر اترانا مؤمن کی شان نہیں ہے اس لیے کہ’’ اللہ شیخی بگھارنے اور تکبر کرنے والے کو پسند نہیں کرتے (سورہ لقمان:31)

 بندہ کی شان یہ ہے کہ وہ مال و دولت، جاہ و حشمت کو، خدا کی عطا اور پھر اس عطا پر شکریہ ادا کرے ، اس سے نعمت خداوندی میں اضافہ ہوتا ہے ۔ اور اگر شکرگزاری کے بجائے تکبر کیا تو اللہ رب العزت کا عذاب انتہائی سخت ہے ، مومن کو کامل مومن بننے کے’’ ایجابی‘‘ یعنی اللہ کے محبوب بننے کے جو اوصاف ہیں اور’’سلبی‘‘ یعنی جو اللہ کے نزدیک ناپسندیدہ ہیں، دونوں کا خیال رکھنا چاہیے ، یوں تو اللہ غفور رحیم ہے ، اعمال میں کوتاہی نہ ہو اور اللہ سے اچھی امید رکھی جائے ، یہی ایمان و اسلام کا خلاصہ ہے ، ’’الاِیْمَانُ بَیْنَ الْخَوْفِ وَ الْرِّجَائِ۔‘‘ کہا گیا ہے یعنی ایمان خوف اور امید کے درمیان کی چیز ہے ۔

*خاک کے پتلے میں آگ* ہمایوں اقبال ندوی، ارریہ

*خاک کے پتلے میں آگ* 

ہمایوں اقبال ندوی، ارریہ

اردو دنیا نیوز ٧٢

شہر ارریہ سے قریب ہی بیلوا گاؤں کا رہنے والاایک نوجوان اپنی بیوی کوگھر میں موجود نہیں پاکر مشتعل ہوجاتا ہے، اپنے ہاتھوں اپنے ہی نوزائیدہ بچے کا گلا گھونٹ کر قتل کردیا ہے۔

 ایک خبرمذکورہ ضلع کے ہی ایک گاؤں سے ملی ہے کہ ایک ماں نے غصہ کی انتہا میں آکراپنے ڈھائی ماہ کے شیر خوار بچے کو پٹک پٹک کرہلاک کردیا ہے، یہ دونوں خبریں اتنی درد ناک ہیں کہ سنتے ہی رونگٹے کھڑے ہو جاتے ہیں، کوئی جانور بھی اپنے بچوں کے ساتھ یہ سلوک نہیں کرتاہے ،مگرایک  انسان نے درندگی کی حد کو بھی غصہ میں آکر پار کر لیا ہےاور اپنی نسل کی تباہی کا سامان کرلیا ہے۔

اکثر وبیشتر طلاق کے واقعات غصہ کی وجہ کر رونما ہوتے ہیں،چھوٹی چھوٹی باتوں سے جھگڑا شروع ہوتا ہے اور خاندان کی بربادی پر جا کر تمام ہوتا ہے، شوہر نے بیوی سے کھانا مانگا، اور وہ کہ رہی ہے کہ؛میں ابھی آرہی ہوں، ذرا سی دیر ہوئی،میاں جی غضبناک ہوگئے، اپنے کو قابو میں نہ رکھ سکے،  فائرنگ شروع کردی،طلاق، طلاق، طلاق، بیچاری اب کبھی بھی اپنے شوہر کے پاس آنے کےلائق نہیں رہی ہے،ادھر میاں جی بھی نادم ہیں، مگر معاملہ اب توہاتھ سے نکل چکا ہے۔

آج سماج میں جو شخص سمجھدار سمجھا جاتا ہے وہ بھی بات بات پر غصہ میں آجاتا ہے۔بازار، سڑک، گاؤں،گلی، مسجد، مکتب، مدرسہ کوئی جگہ اس سے پاک نہیں ہے، ہر جگہ غصہ کی کھیتی ہورہی ہے، بروقت اس پر روک نہیں لگائی گئی تو اس کی فصل جب کٹتی ہے تو نہایت تکلیف دہ ہوتی ہے، سب سے بڑی بات یہ کہ ایک مسلم سماج میں اگر یہ سب کچھ ہورہا ہے،یہ ڈوب مرنے کی بات ہے،اس سےاسلام کی غلط تصویر ملک میں جارہی ہے، اور ہم اسلام کی تبلیغ میں رکاوٹ کا سامان بنتے جارہے ہیں، افسوس اس بات پر بھی ہے کہ ہمیں اس کا احساس بھی نہیں ہے۔  

حدیث شریف میں یہ بات لکھی ہوئی ہے کہ غصہ شیطان سے ہےاور شیطان آگ سے پیدا ہوا ہے،جب ایک انسان میں غصہ داخل ہوجاتا ہے تواس کا صاف مطلب یہی ہے کہ اس خاک کے پتلے میں شیطانی آگ داخل ہوگئی ہے،یہی وجہ ہےکہ جب غصہ تیز ہوتا ہے تو ایک انسان کی آنکھیں سرخ ہوجاتی ہیں اور چہرہ لال ہوجاتا ہے، اور کہتے بھی ہیں کہ وہ آگ بگولا ہوگیاہے،جہاں کہیں آگ نظر آتی ہے آج کے اس گئے گزرے زمانے میں بھی پورا گاؤں اس جانب دوڑ آتا ہے،اور اس کو بجھانے کی فکر کرتا ہے، اوراس وقت تک چین سے کوئی نہیں بیٹھتا جب تک کہ آگ پر قابو نہ پالیا جائے، یہی عمل غصہ کی آگ پر قابو پانے کے لیےاس وقت عمل میں لانے کی ضرورت ہے ۔

نبی کریم صلی اللہ علیہ وسلم کے زمانے میں دولوگوں میں کچھ باتیں ہورہی تھیں، انمیں ایک صاحب کو اتنا غصہ آیا کہ چہرہ لال ہوگیا اور رگیں پھول گئیں، تو آپ صلی اللہ علیہ وسلم نے بار بار ان کی طرف دیکھا اور یہ کہا کہ؛مجھےایک ایسا کلمہ معلوم ہے،اگر وہ اس کو کہ لے تو یہ غصہ جاتا رہے،اور وہ یہ ہے،اعوذ باللہ من الشيطان الرجيم۔(بخاری )

مذکورہ حدیث سے یہ تعلیم دی گئی ہے کہ جب کبھی یہ موقع آئے اور کسی کواس آگ میں جلتامحسوس کرے تو اس کو بجھانے کی فکر کرناسنت نبوی صلی اللہ علیہ وسلم پر عمل کرنا ہے،موجودہ وقت میں یہ سنت ہماری زندگی میں نہیں ہے،اسے زندہ کرنا سو شہیدوں کے اجر کا حامل ہوناہے،اور یہ بات بھی اس حدیث سے معلوم ہوئی کہ اس آگ پرقابو پانے کے لیے سب سے پہلے اللہ کی پناہ ضروری ہے۔

 بغیر قرآن وحدیث کی رہنمائی لیےاسے کنٹرول نہیں کیا جاسکتا ہے، یہ کوئی عام آگ نہیں ہے ،یہ انسان کے اندر لگی ہوتی ہے، رسول اللہ صلی اللہ علیہ وسلم نے اس آدمی کو طاقتور کہا ہے جو اپنے غصہ پر قابو پالیتا ہے،اس کا مطلب واضح ہے کہ غصہ پر قابو پانے والا درحقیقت شیطان کے مقابلے میں فتح پانے والا ہے۔

غصہ سے بچنے کی دوسری تدبیر وضو ہے، غصہ شیطان سے ہے،اور وہ آگ سے پیدا ہوا ہے،شیطان انسان کی رگوں میں گھس جاتا ہے،اوراندر اندر ہی آگ لگاتا ہے،آگ کو پانی بجھادیتا ہے،اس لیے حدیث شریف میں اس موقع پر وضو کی تعلیم دی گئی ہے۔یہ اس کا علاج ہے،وضو انسانی مزاج میں برودت اور ٹھنڈک پیدا کردیتا ہے، اور اس سے غصہ کافور ہوجاتا ہے۔

تیسری تدبیر ہیئت کی تبدیلی ہے،غصہ ور انسان کھڑا ہے تواسے بیٹھ جانا چاہئے، اور اگربیٹھا ہے تو لیٹ جانا چاہیے، ایک روایت میں زمین سے لگ جانے کا بھی حکم ہے۔یہ ایک انسان کو عملی طور پر اپنی پیدائشی چیز مٹی سے قریب کردینا یے۔

آج اس شیطانی آگ میں جلتے ہوئے انسان کو بچانے کی تحریک شدید ترین ضرورت ہے، ایک مسلمان کی ذمہ داری  اس تعلیم پر عمل کرنے کی اور اس کو عام کرنے کی بھی ہے،ایک آدمی نے آکر رسول اللہ صلی اللہ علیہ وسلم سے یہ درخواست کی کہ؛مجھے کوئی نصیحت فرمائیے،آپ صلی اللہ علیہ وسلم نے فرمایا کہ؛غصہ مت کرو، اس کو یہ نصیحت معمولی لگی تو دوبارہ اس نے یہ عرض کیا کہ نصیحت کیجئے، آپ صلی اللہ علیہ وسلم نے پھر یہی فرمایا کہ غصہ مت کرو، سہ بارہ گزارش کی تو تیسری بار بھی آپ صلی علیہ وسلم کا یہی جواب رہا کہ غصہ مت کرو (بخاری )

حدیث شریف کی دوسری کتابوں میں یہ اضافہ بھی ہے کہ ان صاحب نے اپنی زندگی میں غور کیا تو انہیں معلوم ہوا کہ ساری برائیوں کی جڑغصہ ہی ہے، 

آج سماج اور معاشرہ کا یہی حال ہے، اور اس سے بڑی نصیحت موجودہ وقت کے لیے اور کیا ہوسکتی ہے کہ؛غصہ مت کیجئے۔

   ع۰۰خون کا شربت پی کے پیاس بجھاتا ہے

             غصہ علم ودانش کو کھا جاتا ہے 

              طاقت ور ہے وہ انسان زمانے میں 

               اپنے غصہ پر جو قابو پاتا ہے

ہمایوں اقبال ندوی، ارریہ 

۲۳/ربیع الاول ۱۴۴۴ھ