یوپی میں 100 سیٹوں پر لڑنے کی تیاری ، مسلمانوں کو بنائیں گے با اختیار ، اسد الدین اویسی کا اعلان

یوپی میں 100 سیٹوں پر لڑنے کی تیاری ، مسلمانوں کو بنائیں گے با اختیار ، اسد الدین اویسی کا اعلان

نئی دہلی:ملک کی سب سے بڑی ریاست اتر پردیش میں اگلے سال اسمبلی انتخابات ہیں۔آل انڈیا مجلس اتحاد المسلمین کے سربراہ اسد الدین اویسی نے کہا کہ ہماری پارٹی اس بار 100 نشستوں پر الیکشن لڑنے کی تیاری کر رہی ہے۔ انہوں نے کہا کہ ہمارا مقصد ریاست کے مسلمانوں کو بااختیار بنانا ہے۔اسدالدین اویسی نے کہا کہ میں یوپی میں بی جے پی کو ہرانا چاہتا ہوں، ریاست میں مسلمانوں کے خلاف جو کچھ ہو رہا ہے اسے برداشت نہیں کیا جا سکتا، یوپی میں مسلمانوں پر مظالم ہورہے ہیں۔انہوں نے کہاکہ یوپی اور پورے ہندوستان کے مسلمانوں کو سمجھنا ہوگا کہ یہ مسائل کا الیکشن ہے۔سابق وزیراعلی اکھلیش یادو کو نشانہ بناتے ہوئے اویسی نے کہا کہ سی اے اے کے دوران 22 مسلمان ہلاک ہوئے لیکن یہ اکھلیش بھی نہیں بتائیں گے کہ کتنے لوگ مرے۔ انہوں نے کہاکہ بی جے پی کو روکنا مسلمانوں کا کام ہے۔ یادو اکھلیش کو ووٹ دیتے ہیں اور ہندو بی جے پی کو ووٹ دیتے ہیں۔ اکھلیش مسلمانوں کے بارے میں بات کرنے سے ڈرتے ہیں۔اتحاد کے سوال پر اویسی نے کہا کہ ہم اوم پرکاش راج بھر کے ساتھ بات چیت کر رہے ہیں اور چندر شیکھر آزاد سے بات کریں گے، ہم نے یوپی کی 100 نشستوں پر لڑنے کی تیاری کرلی ہے، ہمیں بی جے پی کی بی ٹیم کہا جاتا ہے۔میری لڑا ئی مسلمانوں کو سیاسی طورپر بااختیار بنانے کے لیے ہے۔اویسی نے کہاکہ یوپی میں تمام پارٹیاں مسلمانوں کے بارے میں بات کرنے سے ڈرتی ہیں۔ مایاوتی اور اکھلیش نے مل کر الیکشن لڑا لیکن ان کے اپنے ووٹر بھاگ گئے، ان کا ووٹ بینک کبھی مسلمان نہیں تھا۔