اولاد کی تعلیم و تربیت والدین کی اولین ذمہ داری مفتی محمد عبد الحميد قاسمی

اولاد کی تعلیم و تربیت والدین کی اولین ذمہ داری مفتی محمد عبد الحميد قاسمی

تعلیم ہر ایک کی بنیادی ضرورت ہے تعلیم سے اللہ تعالیٰ کی معرفت حاصل ہوتی ہے تعلیم سے ہی اطاعت حق اور سنت رسول ﷺ کا علم حاصل ہوتا ہے تعلیم ہی انسان کی فضیلت اور شرف کا معیار ہے علم ہی انسان کے کمال و امتیاز کا سبب ہے یہی وجہ ہے کہ دین اسلام نے اپنی آمد کے پہلے دن سے علم حاصل کرنے پر زور دیا ہے پیغمبر اسلام حضرت محمد ﷺ جس سماج اور معاشرہ میں تشریف لائے تھے وہ زمانۂ جاہلیت اور ایک تاریک دور کہلاتا ہے جس کی نظیر نہ پہلے کھبی تھی اور نہ آگے ہو سکتی ہے آپ صلی اللہ علیہ وسلم کو نبوت ملنے کے بعد سب سے پہلا تقاضہ تو یہ تھا کہ کفر و شرک کو مٹانے، فحاشیت، زناکاری، شراب نوشی اور سماجی برائیوں کے خاتمہ یا عورتوں کے مقام و مرتبہ یا پوری انسانیت کو امن و امان کا پیغام سنانے کے لئے غار حرا میں سب سے پہلی وحی نازل ہوتی مگر ایسا نہیں ہوا بلکہ فرمایا گیا کہ آپ اپنے رب کے نام سے پڑھئے جو تمام کائنات کا خالق ہے (سورہ علق: ۱)یعنی سب سے پہلے نبی کریم ﷺ کے ذریعہ قیامت تک آنے والی انسانیت کو جس بات کی دعوت دی گئی وہ "تعلیم ' ہے کیونکہ علم ایسا سر چشمہ ہے جس سے تمام بھلائیاں پھوٹتی ہیں اور تمام برائیوں کا خاتمہ ہوتا ہے نیز نبی کریم ﷺ نے مکی زندگی میں ہزاروں مسائل اور مصائب کے باوجود "دار ارقم' کو تعلیم و تربیت کا مرکز بنایا اور اپنے ساتھیوں کی تعلیم و تربیت کے لئے پہلے دن سے کوشاں رہے، ہجرت کے بعد مدینہ میں گھر کی تعمیر اور دنیوی ضروری سامان سے زیادہ آپ صلی اللہ علیہ وسلم نے مسلمانوں کے لئے عبادت گاہ اور دینی مرکز کی حیثیت سے مسجد نبوی کی تعمیر فرمائی اور پہلی درسگاہ ایک چبوترے کی شکل میں قائم کی جسے صفہ کہا جاتا تھا، نبی کریم ﷺ کا یہ عمل ہمیں بتاتا ہے کہ دنیوی ضروری سامان اکٹھا کرنے سے زیادہ اپنے بچوں کی تعلیم پر توجہ مرکوز ہونی چاہئے، اس کے علاوہ آپ صلی اللہ علیہ وسلم علم نافع کے لئے دعا فرماتے تھے اور علم نافع کا مطلب یہی ہے کہ جو علم انسان کو دینی اور دنیوی اعتبار سے نفع پہنچائے، اس اصول سے معلوم ہوا کہ عصری علوم بھی کسی نہ کسی طریقہ سے انسان کیلئے نفع بخش ہیں، تعلیم بہرحال فائدہ سے خالی نہیں، تعلیم اگر کسی قوم کے لئے ریڈھ کی ہڈی ہے تو نصاب تعلیم اس کی وہ بنیاد ہے جس پر پوری قوم و ملت اور ملک کے مستقبل کا انحصار ہے جیسا نصاب پڑھایا جائے گا جیسا نظام تعلیم رائج کیا جائے گا ویسے ہی افراد تیار ہوں گے اس لئے تعلیمی نظام خواہ وہ دینی ہو یا دنیوی بالخصوص مالی اعتبار سے شفافیت کے ساتھ ہونا ضروری ہے ورنہ جیسا نظام ویسے افراد کا مصداق ہوگا،لھذا بچے کے مدرسہ اور اسکول کا انتخاب صحیح کریں، تعلیم کی اہمیت کا اندازہ اس سے بھی لگایا جاسکتا ہے کہ رسول اللہ ﷺ نے بدر کے قیدیوں میں پڑھے لکھے لوگوں کے لئے دس بچوں کو پڑھنا لکھنا سکھانے کو فدیہ قرار دیا تھا حالانکہ یہ وہ وقت تھا کہ مسلمان فاقہ کشی کے ساتھ زندگی گزار رہے تھے اور ان کو مالی وسائل کی زیادہ ضرورت تھی، لیکن آپ صلی اللہ علیہ وسلم نے معاشی ضرورت پر تعلیمی ضرورت کو مقدم رکھا، علم ایک بہت بڑی نعمت ہے جسے نظر انداز نہیں کیا جاسکتا قرآن نے اسی لئے کہا ہے علم رکھنے والے اور نہ رکھنے والے دونوں برابر نہیں ہوسکتے (الزمر : 9) بہرحال موجوہ حالات میں مسلمانوں کی اولین ذمہ داری ہے کہ وہ اپنے بچوں کو انہیں اچھی سی اچھی تعلیم دلائیں اور انھیں قابل بنائیں کہ وہ اپنے ملک اور قوم کے لئے فائدہ مند ثابت ہوں -

*افسوس کہ* آج والدین اپنے بچوں کی تعلیم کے سلسلہ میں بے رغبتی اور لا پرواہی برتر ہے ہیں, والدین تعلیم پر پیسہ خرچ کرنے کے بجائے شادی بیاہ اور غیر ضروری تقریبات میں لاکھوں پیسہ فضول خرچی میں ضائع کررہے ہیں، اپنی آزادی اور سکون کے واسطے چھوٹے چھوٹے بچوں کو قیمتی اسمارٹ فون دلاکر ان کی جسمانی اور روحانی طاقت کو کمزور کرنے کا ذریعہ بنتے ہوئے ان کے مستقبل کو تاریک بنارہے ہیں، تھوڑی سی دولت کے خاطر کم عمر میں بچوں کو تجارت اور کاروبار میں لگا کر ان کے مستقبل کے ساتھ کھلواڑ کیا جارہا ہے، والدین اپنی مصروفیتوں میں رہ کر اولاد کے حقوق سے ناواقفیت یا جانتے بوجھتے غیر ذمہ داری والا رویہ اختیار کر کر ان کی تعلیم و تربیت کے سلسلہ میں بالکل بے فکر ہیں، جس کا نتیجہ یہ ہورہا ہے کہ بلوغت سے پہلے ہی بچوں کے مزاج میں بد اخلاقی پیدا ہورہی ہے اور منشیات، سگریٹ ، بیڑی، گھٹکا ، گانجہ اور ڈرگس کے عادی ہوتے جارہے ہیں ، دین کی بنیادی تعلیم نہ ہونے کے سبب مسلم لڑکیاں غیروں کے ساتھ فرار ہوکر نہ صرف والدین بلکہ اسلام کا نام بدنام کرتی نظر آ رہی ہیں، الامان و الحفیظ - ملک و ملت کی ترقی اور کامیابی تعلیم کے ذریعہ ہی ممکن ہے تعلیم کے ذریعہ ہی ایک پاکیزہ معاشرہ کو تیار کیا جاسکتا ہے، تعلیم کے ذریعہ ہی برائیوں کو ختم کرنا آسان ہوتا ہے تعلیم کے ذریعہ ہی عدل و انصاف اور امن و امان کو قائم کیا جاسکتا ہے-

*الغرض* والدین کی ذمہ دای ہے کہ وہ اپنی اولاد کے لئے دنیوی زندگی کے آرام و راحت کے سامان و اسباب جمع کرنے سے زیادہ اخروی زندگی کے لئے آرام و راحت کی فکر کریں کیونکہ دنیوی آرام و راحت عارضی اور فانی ہے اور اخروی آرام و راحت دیرپا اور دائمی ہے، والدین اپنی اولاد کی تعلیم وتربیت پر خوب توجہ دیں، اگر خود سے ممکن نہ ہوتو قرآن مجید کی سورہ نحل آیت 43 "اب اگر تمہیں اس بات کا علم نہیں ہے تو جو علم والے ہیں ان سے پوچھ لو' پر عمل کرتے ہوئے علماء سے ہر مسئلہ پوچھ کر ان کی تعلیم و تربیت کا خاص اہتمام کریں یا اپنی اولاد کو کسی مستند اور معتبر عالم دین سے تعلق قائم کرادیں تاکہ زندگی کے ہر شعبہ میں وہ علماء سے رہنمائی حاصل کرتے رہیں ، اہم بات یہ ہے کہ بچہ سب سے پہلے اپنے والدین کے اخلاق اور کردار سے متاثر ہوتا ہے اور والدین کی ہر نقل و حرکت کو اپنے دل و دماغ میں نقش کرتا رہتا ہے، نیز تربیت کا آسان اور سہل طریقہ یہی یے کہ بچہ جس وقت کوئی غلطی کرے اس وقت نرم لہجے اور اچھے انداز میں اس کی اصلاح کردیں، مزید یہ والدین بچوں کو جن چیزوں کا حکم دیر ہے ہیں پہلے وہ خود اس پر عمل پیرا ہوں ورنہ وہ حکم اور نصیحت بے سود اور بے فائدہ ہوگی-

دعا ہے کہ اللہ تعالٰی والدین کو اپنی اولاد کے حقوق ادا کرنے اور تعلیم و تربیت کا خاص خیال رکھنے کی توفیق عطا فرمائے آمین یا رب العالمین

ماہ ربیع الآخر کا چاند دیکھنے کا اہتمام کریں: امارت شرعیہ ہند

ماہ ربیع الآخر کا چاند دیکھنے کا اہتمام کریں: امارت شرعیہ ہند

• 
  

اردو دنیا نیوز ۷۲ دہلی

امارت شرعيه ہند(نئی دہلی) نے ماہ ربیع الآخر کا چاند دیکھنے کی اپیل کی ہے۔

خیال رہے کہ رؤیت ہلال کمیٹی امارت شرعیہ بند کی میٹنگ 29 ربیع الاول 1423ھ بمطابق 5 نومبر 2021 بروز جمعہ بعد نماز مغرب دفتر واقع مسجد عبدالنبی(1 ۔ بہادر شاہ ظفرمارگ، نئی دہلی) میں منعقد ہو گی۔

اس لیے امارت شرعیہ ہند کی  جانب سے تمام مسلمانوں سے اپیل کی گئی ہے کہ وہ کل یعنی 5نومبر2021 کو مغرب کی نماز کے بعد چاند دیکھنے کی پوری کوشش کر یں۔

امارت کا کہنا ہے کہ رؤیت اور عدم رؤیت دونوں صورتوں میں دفتر امارت شرعیہ بند کو فوری مطلع کریں۔ اگر رؤیت عام نہ ہو اور کچھ لوگ چاند دیکھیں تو چاند دیکھنے والے حضرات شہادت بہم پہونچائیں تاکہ آپ کے تعاون سے رویت ہلال کمیٹی کی تاریخ کا بر وقت اعلان کر سکے۔

رابطہ کے لئے درج ذیل موبائل نمبرنوٹ فرمالیں :

 اسعدالدین قاسمی:  9968445753

 مولا نا نجیب اللہ  قاسمی: 87000 16933

مدارس کی اسناد کے سلسلے میں کچھ ضروری باتیں -مولانا ڈاکٹر ابوالکلام قاسمی شمسی

مدارس کی اسناد کے سلسلے میں کچھ ضروری باتیں -مولانا ڈاکٹر ابوالکلام قاسمی شمسی

ملک میں دو طرح کے مدارس چل رھے ہیں: (1) مدارس ملحقہ یعنی وہ مدارس جو کسی بورڈ سے ملحق ہیں اور ان میں بورڈ کے نصاب کے مطابق تعلیم دی جاتی ہے، اس کے نصاب تعلیم میں دینی و اسلامی علوم کے ساتھ عصری علوم بھی شامل ہوتے ہیں ،ایسے مدارس میں تعلیم حاصل کرنے والے طلبہ و طالبات کے امتحانات بورڈ کے ذریعہ لیے جاتے ہیں ، بورڈ کی طرف سے جاری کردہ سرٹیفیکیٹ کو حکومت کی جانب سے منظوری حاصل ہے ،اس لیے اس کی بنیاد پر داخلہ اور ملازمت میں کوئی دقت نہیں ہے ،بورڈ کے سرٹیفیکیٹ کی بنیاد پر طلبہ و طالبات کہیں بھی آگے کی کلاس میں داخلہ لے سکتے ہیں اور ملازمت بھی حاصل کر سکتے ہیں ،چونکہ بورڈ کے نصاب تعلیم کو حکومت کی جانب سے منظوری حاصل ہوتی ہے ،اس لیے یہ مراعات حاصل ہوتی ہے۔ اس کے نصاب تعلیم کے اعتبار سے بورڈ سے جو سرٹیفیکیٹ دیا جاتا ہے وہ مڈل ،میٹرک اور آئی اے کے مساوی ہوتا ہے ،اس طرح کسی بھی بورڈ سے پاس امیدوار کے پاس میٹرک اور آئی اے کے مساوی سرٹیفیکیٹ ہوتا ہے ،جو سرکار سے منظورشدہ ہوتا ہے ،اس میٹرک اور آئی اے کے مساوی سرٹیفیکیٹ کی ضرورت مختلف مواقع پر پیش آتی ہے ،جیسے پاسپورٹ بنانے کے وقت ،تاریخ پیدائش کے ثبوت کے لیے ،شہریت کے ثبوت کے لیے وغیرہ ،پس اس سرٹیفیکیٹ کی بڑی اہمیت ہے۔ (2) مدارس نظامیہ یعنی وہ مدارس جو آزادانہ طور پر چلائے جاتے ہیں ، اس کا نصاب تعلیم دینی علوم پر مشتمل ہوتا ہے ، اس کے نصاب تعلیم کو حکومت سے منظوری حاصل نہیں ہے ،اس لئے اس کی سند کی بنیاد پر نہ کسی کالج میں داخلہ ہوتا ہے اور نہ اس کی بنیاد پر ملازمت مل سکتی ہے، ایسے مدارس کے فارغین جب عصری علوم کے ادارے یعنی اسکول،کالج وغیرہ میں داخلہ لینا چاہتے تھے تو انہیں دشواریاں پیش آتی تھیں ، اس طرح مسلم سماج کا ایک بڑا طبقہ عصری تعلیم کے بڑے اداروں میں تعلیم حاصل کرنے سے محروم رہ جاتا تھا ، جبکہ انہیں اس کی ضرورت تھی ، یونیورسیٹی کا نظام خود مختار ہے ،اسی دشواری کو دور کرنے کے لیے اس کی انتظامیہ نے برج کورس کا سلسلہ جاری کیا ،اس کا مطلب یہ ہے کہ مستند مدارس کے فارغین عصری علوم کے مضامین کو ایک سال پڑھیں ؛ تاکہ ان میں انگریزی ،حساب ،سائنس وغیرہ ضروری عصری مضامین کی واقفیت اور صلاحیت پیدا ہو جائے ،پھر وہ برج کورس کے امتحان کو پاس کرلیں تو ان کی نظامیہ کی فاضل اور برج کورس پاس سند دونوں کو ملا کر آئی اے کے مساوی مان لیا جائے گا اور ایسے امیدوار جو مدارس نظامیہ سے فاضل اور برج کورس پاس ہوں گے،ان کا داخلہ گریجویشن یعنی بی اے میں لیا جائے گا ،اس طرح وہ آگے کی تعلیم جاری رکھ سکیں گے ، مذکورہ تفصیل سے یہ واضح ہے کہ فاضل اور برج کورس دونوں مل کر آئی اے کے مساوی قرار دیا گیا ہے ، یہ صرف بی اے میں داخلہ کے لئے ہے ، برج کورس کو آئی اے تسلیم نہیں کیا گیا ہے ، اس برج کورس کے سرٹیفیکیٹ کو آئے اے کے مساوی قرار نہیں دیا گیا ہے ، اس سے یہ بھی واضح ہے کہ جس امیدوار نے فاضل اور برج کورس کی بنیاد پر اعلی تعلیم حاصل کی یا کر رہے ہیں ،ان کے پاس میٹرک اور آئی اے کے سرٹیفیکیٹ کی کمی ہے ، بہت سے مقابلہ جاتی امتحانات میں تعلیمی لیاقت پر نمبرات دیے جاتے ہیں ،اس موقع پر ایسے فارغین کے پوائنٹ کم ہو جاتے ہیں اور وہ بحالی سے محروم ہو جاتے ہیں ، ایسا صرف سرکاری یا یونیورسیٹی کے عہدوں پر بحالی میں ہوتا ہے ؛ اس لیے ایسے امیدوار کو جو سرکاری یا یونیورسٹی کے عہدوں پر بحالی کے پیش نظر اعلی ڈگری حاصل کر رہے ہوں ،ان کے لیے بہتر ہے کہ وہ میٹرک ،آئی اے کر کے بی اے میں داخلہ لیں ،اس کے لیے اوپن اسکول سسٹم سے میٹرک اور آئی اے امتحان پاس کرنا مناسب رہے گا ،ان دونوں امتحانات کو پاس کر لینے کے بعد اعلی تعلیم حاصل کریں ،تو ہر فیلڈ میں یکساں مواقع حاصل ہوں گے ،ویسے بھی میٹرک اور آئی اے یا اس کے مساوی سرٹیفیکیٹ کا ہونا ہر اعتبار سے مفید ہے ،جمعیت علماء ہند نے ایسا کورس شروع کیا ہے ،اس سے فائدہ حاصل کیا جا سکتا ہے۔ جہاں تک مدارس نظامیہ اور برج کورس کی بنیاد پر اعلی ڈگری حاصل کرنے کی بات ہے تو بہت سے حضرات اعلی ڈگری کے شوق میں تعلیمی لیاقت بڑھانے کے لیے اعلی تعلیم حاصل کرتے ہیں ،ایسے حضرات قابل مبارکباد ہیں ،کچھ حضرات معاش کے مسئلے کو حل کرنے کے لیے پرائیویٹ اداروں میں ملازمت حاصل کرنا چاہتے ہیں ،جیسے ٹرانسلیٹر وغیرہ کی جاب ،ایسے لوگوں کے لیے بھی یہ ڈگری مفید ہے ، بیت سے حضرات باہری ملکوں میں جانا چاہتے ہیں ،بڑی کمپنیوں میں ملازمت حاصل کرنا چاہتے ہیں ،ان کے لیے بھی یہ ڈگری مفید ہے ،خاص طور پر مختلف زبانوں پر قدرت رکھنے والے ماہرین کی بیرونی ممالک میں بڑی مانگ ہے ،ان کے لیے بھی یہ ڈگری مفید ہے ،خاص طور پر عربی ،انگریزی ، اور دیگر زبانوں کے ماہرین کی بڑی ضرورت ہے ، اس لیے ذہن میں یہ بات رہے کہ میٹرک اور آئی اے یا اس کے مساوی امتحانات پاس کیے بغیر اعلی ڈگری کی اہمیت اندرون ملک صرف سرکاری ملازمت مثلا اسکول کے ٹیچر اور کالج کے پروفیسر کےلیے ہے ،پرائیویٹ سیکٹر میں صلاحیت کی ضرورت ہے ،اعلی ڈگری کی بنیاد پر تقرری ہو سکتی ہے ، اس لئے اعلی ڈگری حاصل کرنے والے حضرات کو چاہئے کہ وہ میٹرک اور آئی اے یا کسی مدرسہ بورڈ سے مساوی امتحان پاس کر کے بی اے میں داخلہ لیں ،تو بہتر ہے ،ویسے اگر ایسا موقع نہ مل سکے تو برج کورس کے ذریعے ہی اعلی تعلیم حاصل کرلیں ،یہ بھی مفید ہے۔

ازقلم:-حافظہ اقراء نصیر(ڈاہرانوالہ)جہیز عربی زبان کا لفظ ہے جس کا مطلب ہے "اسباب یا سامان' یہ اس سامان کو کہتے ہیں جو لڑکی کو نکاح میں اس کے ماں باپ کی طرف سے دیا جاتاہے

ازقلم:-حافظہ اقراء نصیر

(ڈاہرانوالہ)

جہیز عربی زبان کا لفظ ہے جس کا مطلب ہے "اسباب یا سامان' یہ اس سامان کو کہتے ہیں جو لڑکی کو نکاح میں اس کے ماں باپ کی طرف سے دیا جاتاہے

آج کے دور میں ایک لڑکی کا نکاح کرنا بہت ہی مشکل کام ہے.آخر ایساکیوں ہے؟کیونکہ ہم نے بےجا رسومات اپنے اوپر مسلط کر لی ہیں.ایسی رسومات جن کا ہمارے دین سے کوئی تعلق نہیں ہے بلکہ وہ ہندوانہ رسمیں ہیں.جو ہمیں فضول خرچی پر آمادہ کرتی ہیں.حالانکہ غیر اقوام سے مشابہت کی ممانعت بے شمار احادیث میں وارد ہوئی ہے حدیث مبارکہ میں ہے:

"سب سے بابرکت نکاح وہ ہے جس میں سب سے کم مشقت(کم خرچہ اور تکلف نہ)ہو'.

ہمارے ہاں بہت سی ایسی رسومات ہیں جو ہندو معاشرے ہی سے مسلمانوں میں آئی ہیں.ان میں سے ایک جہیزکی رسم بھی ہے.اسی لیے علامہ اقبال نے کہا تھا کہ

حقیت خرافات میں کھو گئی

یہ امت روایات میں کھو گئی

اگر اسلامی تعلیمات کو پرکھا جائے تو ہمارے نبی صلی اللہ علیہ والہ وسلم نے اپنی بیٹی کو جو سامان دیاوہ صرف ضروریات کی چیزیں تھیں.ان میں ایک چادر ایک مشکیزہ ایک تکیہ ایک چکی ایک جوڑا اور ایک پیالہ تھا. یہ بھی واضح ہےکہ حضرت علی رضہ اللہ عنہ حضرت فاطمہ کے ساتھ رشتہ ازدواج میں منسلک ہونے سے قبل حضور اکرم صلی اللہ علیہ والہ وسلم کے ساتھ ہی رہتے تھےاور ان کا اپنا کوئی گھر نہ تھا.شادی کے بعد جب انھوں نے گھر اپنا گھر بنایا تو اس میں گھریلو سامان کی ضرورت تھی.یہ بھی واضح ہے کہ جو چیزیں حضرت محمد صلی اللہ علیہ والہ وسلم نے اپنی بیٹی کو. دیں وہ ان کے حق مہر کی قیمت سے لی گئ تھیں.

آج ہم نے جہیز دینااس قدرضرورى سمجھ لیا ہےکہ اگرایک باپ کو قرض بھی لینا پڑے تو وہ پیچھے نہیں ہٹتا جبکہ دین اسلام میں صرف ضروریات کی چیزیں دینا جائز ہےوہ بهى صرف پيارمحبت ميں جو والدین اپنی بیٹی کو خوشی سے دیتے ہیں نہ کہ کوئی قرض لے کر دیتے ہیں.آج جب کسی کے گھربیٹی پیدا ہوتی ہے تووہ رحمت کے ساتھ زحمت بن جا تی ہےباپ اپنی بیٹی کے جہیز کے با رے میں فکر مند ہو جاتا ہےاور جب وہ اپنی بیٹی کو رخصت کر تا ہے تو ایک غریب قرض کے بوجھ تلے دب جاتا ہے اور وہ اپنی ساری زندگی قرض چھکانے میں گزار دیتا ہے

ماں باپ کا گھر بِکا تو بیٹی کا گھر بسا

کتنی نا مراد ہے یہ رسم جہیزبھی

دوسری طرف دیکھا جا ئےتواکثر غریبوں کی بیٹیاں اپنے باپ کے گھر میں ہی بوڑھی ہو جاتی ہیں

اوراس کی وجہ صرف اور صرف جہیز ہے

بوڑھی ہوئی غریب کی بیٹی شباب میں

غربت نے رنگ روپ نکھرنے نہیں دیا

غریب باپ اگر اپنی بیٹی کی شادی کرتا ہے تو وہ قرضہ لے کر اپنی بیٹی کو جہیز جیسی لعنت سے نوازتا ہے اور اُسے اُس کے سسرال رخصت کرتا ہے اگر جہیز نہ دیا جائے تو سسرال والوں کےطعنے سننے پڑتے ہیں

دیکھی جو گھر کی غربت تو چپکے سے مر گئی

ایک بیٹی اپنے باپ پہ احسان کرگئی

اکثر لوگ محض دکھاوا کرنے کے لئےزیادہ سے زیادہ جہیز دیتے ہیں تاکہ خاندان میں ان کا نام ہو.اور ان کی بیٹی عزت کے ساتھ اپنے سسرال میں زندگی گزار سکے.اکثر لڑکے والےاپنے بیٹے کا رشتہ وہاں کرتے ہیں جہاں سے ان کو امید ہوں کہ اچھا خاصہ جہیز مل جائیں گا.غریب کے گھراپنے بیٹے کا رشتہ اسی وجہ سے نہیں کرتے کہ ان کی بیٹی ہمارےگھر کیا لائے گی.غریب لوگوں کی بیٹیوں کے رشتےصرف اورصرف جہیز نہ ہونے کی صورت میں نہیں ہوتے. آج کے دور میں لڑکےوالے لڑکی کے گھر والوں سے فر مائشیں کرتے ہیں کہ وہ اپنے داماد کو کار یا موٹر سائیکل یا پلاٹ دیں.لڑکے والوں نے یہ ایک کاروبار بنا لیا ہے.آج لڑکے والوں نے اپنی خواہشات لڑکی والوں کے اوپر تھوپنا شروع کر دی ہیں.

وراثت میں بیٹی کا حصہ ہوتا ہےآج لڑکی کواسکا وراثت میں حصہ نہیں دیا جاتا لیکن اسے جہیز جیسی لعنت سے ضرور نوازا جاتا ہےحالانکہ بیٹی کو اسکا حصہ دینے کے بارے میں قرآن پاک میں بھی ارشاد ہے.اس سے یہ ثابت ہوتا ہے کہ ہم نے دین اسلام کوچھوڑ کر بے جا رسومات کو اپنا لیا ہے..

ہم لوگ لیے پھرتے ہیں اب تک بھی دلوں میں

فرسودہ رسومات و خیالات کی تصویر

اب یہ والدین پر منحصر ہےکہ وہ اپنی بیٹی کا وراثت میں جو حق ہے وہ اسے شادی سے پہلے دیتے ہیں یا شادی کے موقع پر جہیز کر صورت میں دیتے ہیں یا شادی کے بعد دیتے ہیں اس سلسلے میں شریعت کے اعتبار سے اس پرکوئی قید نہیں ہے.حکومت نے جہیز کی لعنت کو ختم کرنے کے لئے قانون تو بنا دیا ہے لیکن قوانین کا فائدہ تب ہی ہو گا جب اس پر عمل درآمد ہو.

بنا فی مانہ ہے لعنت جہیز

غربیوں کو ہےوجہ زحمت جہیز

کرو سادگی اختیار اہل زر

نہ دوتم خلاف شریعت جہیز

فزوں حد سے ہرگزطلب مت کرو

کہ ہومو جب خیرو برکت جہیز

ہمیں چاہیے کہ اسلام کے سنہری اصولوں پر عمل کریں اور اس برائی سے چھٹکاراحاصل کرنے کے لئےپوری کو شش کریں.اگر نوجوان لڑکے بھی اس مسلئے کی نوعیت کو سمجھیں تو انہیں چاہیےکہ وہ جہیزلینے سے ہی انکار کر دیں.خواہ لڑکی والے کتنا ہی زور کیوں نہ دیں.اگر سب مل کر کوشش کریں تو جلد یا بدیراس رسم بد کا خاتمہ ہو جائے گا.انشاللّٰہ…

بڑھو آگےبڑھوآگے برائی کو مٹانے کو

صدائےعام دوا اس کام کی سارے زمانے کو

ایک ہی سببمفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ

ایک ہی سبب

مفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ

عبد الرحیم دربھنگہوی

کسی حکیم کے پاس ایک ضعیف ، کمزور وناتواں انسان مر ض کی تشخیص اور علاج کے لیے گیا ، اس نے حکیم صاحب سے عرض کیا کہ بدن میں  درد ہے، حکیم نے کہا ضعف کی وجہ سے ہے، مریض نے کہا سر چکراتا ہے، حکیم نے کہا ضعف کی وجہ سے ہے، مریض نے عرض کیا آنکھوں میں تارے ناچتے ہیں، اور پاؤں ڈگمگاتا ہے، حکیم نے کہا ضعف کی وجہ سے ہے، مریض کو سخت غصہ آیا ، اس نے کہا ، تم نے پڑھا کیا ہے، تم کو خالی ضعف ہی یاد رہ گیا ہے، حکیم صاحب نے انتہائی تحمل ، بردباری اور سنجیدگی سے کہا ، یہ جھنجھلاہٹ بھی ضعف کی وجہ سے ہے۔

 آج مسلم معاشرہ میں کم وبیش جو برائیاں پھیلی ہوئی ہیں، ان کے اسباب وعلل پر جتنا غور کیجئے، اور جتنا بھی تجزیہ کیجئے اس کا جواب اس حکیم کی طرح ایک ہی سمجھ میں آتا ہے اور وہ ہے مکمل دین سے دوری اور مذہبی بیزاری، سماج میں کہیں ظلم ہو رہا ہے، دین سے دوری کی وجہ سے ، رشوت ، سود خواری ، ناپ تول میں کمی بیشی، ملاوٹ کیا جارہاے، دین سے دوری کی وجہ سے ، جھوٹ ، وعدہ خلافی ، خیانت ، بد دیانتی ، غداری، دغا بازی ، بہتان ، چغل خوری اورآپسی جھگڑے عام ہیں ، جو اب ہے دین کی دوری کی وجہ سے ،دور خاپن بد گمانی، غیر ضروری مداحی، خوشامد، بخل، حرص وطمع بے ایمانی اور چوری نے سماج میں اپنی جگہ بنا لی ہے، اور لوگ تیزی سے اس طرف بھاگ رہے ہیں، دین سے دوری کی وجہ سے ، غیظ وغضب، بعض وکینہ، ظلم، فخر وغرور، ریا، خود پسندی ، خود نمائی، فضول خرچی حسد اور فحش گوئی انسانوںکا مزاج بن گیا ، جو اب ایک اور صرف ایک ہے، دین سے دوری کی وجہ ۔ آج زبان کی سچائی، دل کی سچائی، عمل کی سچائی کا وجود نظر نہیں آتا، عفت وپاکبازی، شرم وحیا، رحم ، عدل وانصاف، عہد کی پابندی دیکھنے کو نہیں ملتی ، احسان ، عفو ودر گذر ، حلم وبردباری ، انس ولطف ، تواضع وخاکساری، خوش کلامی ، ایثار، اعتدال ، اور میانہ روی ، خود داری یا عزت نفس، شجاعت اور بہادری ، استقامت اور حق گوئی کے واقعات کتابوں میں ملتے ہیں، اور قصہ پارینہ بن گئے ہیں، گویا مسلم معاشرہ میں مکارم اخلاق اور حقوق وفرائض کی ادائیگی کا دروازہ بند ہوتا جا رہا ہے اور یہ متاع بے بہا، نایاب نہیں تو کمیاب ضرور ہو گیا ہے، اور اس کی جگہ رذائل تیزی سے لیتے جا رہے ہیں ، جو لوگ آج بھی فضائل اخلاق کو پکڑے ہوئے ہیں، وہ سماج کی نظر میں دقیانوس، لکیر کے فقیر اور بیوقوف سمجھے جاتے ہیں، اس سوچ نے سماج کو راہ راست پر آنے سے دور کر رکھا ہے، اسلام جو مکارم اخلاق کی تکمیل کے لیے آیا تھا، اور جس کے نبی صلی اللہ علیہ وسلم نے خاص طور پر اعلان کیا تھا کہ ’’میں حسن اخلاق کی تکمیل کے لیے بھیجا گیا ہوں۔ حسن اخلاق کا آپ صلی اللہ علیہ وسلم کی زندگی میں اتنا غلبہ تھا کہ کوئی وارد وصادر بھی بادی النظر میں اسے دیکھ کر محسوس کر سکتا تھا،  یہی وجہ ہے کہ حضرت ابو ذرؓ نے اسلام لانے سے قبل جب اپنے بھائی کو پیغمبر صلی اللہ علیہ وسلم کی زندگی اور تعلیمات کی تحقیق اور دریافت حال کے لیے بھیجا تو ان کے بھائی نے آکر جو رپورٹ پیش کی اس کا ایک جملہ تھا ’’میں نے ان کو دیکھا کہ وہ لوگوں کو اخلاق حسنہ کی تعلیم دیتے ہیں‘‘ اور یہی وجہ ہے کہ اللہ کے رسول صلی اللہ علیہ وسلم نے ارشاد فرمایا : ’’مسلمانوں میں کامل ایمان اس کا ہے، جس کا اخلاق سب سے اچھا ہو‘‘۔ ایک دوسری حدیث میں ارشاد ہوا۔ ’’تم میںسب سے اچھا وہ ہے جس کے اخلاق سب سے اچھے ہوں‘‘۔ ایک اور حدیث میں ہے۔’’ جب نامۂ اعمال تولے جائیں گے تو ترازو میں حسن خلق سے زیادہ بھاری کوئی چیز نہیں ہوگی، اس لیے کہ حسن خلق والا اپنے حسن خلق کی بدولت ہمیشہ کے روزہ دار اور نمازی کا درجہ حاصل کر سکتا ہے۔

ہم جب دین سے دور ہو گئے اور اللہ کے رسول صلی اللہ علیہ وسلم کی ان تعلیمات کو فراموش کر بیٹھے تو اس کے نتیجے میں سارا معاشرہ فساد وبگاڑ ، اخلاقی انارکی اور رذائل کی آماجگاہ بن گیا ، اس لیے مسلم معامشرہ میں پھیلی برائیوں کو اگر دور کرنا ہے تو اس کا ایک اور صرف ایک طریقہ ہے اور وہ ہے دین کے ہر ہر جز پر عمل کے لیے اپنے کو آمادہ اور تیار کرنا ، امارت شرعیہ بہار اڈیشہ وجھارکھنڈ جس کے بنیادی مقاصد میں تنفیذ شریعت  علی منہاج النبوۃ ، یعنی شریعت کا نفاذ نبوی طریقۂ کار کے مطابق ہے، وہ مسلسل اس میدان میں کام کر رہی ہے، تعلیم کے فروغ کے لیے مکاتب اور اسکول کے قیام پر زور دیا جارہا ہے، اس سے سماج میں اصلاح کے عمل کو فروغ ہوگا، فرقہ پرستوں کے پروپیگنڈے کا دفاع کیاجا سکے گا، اور خواتین کو انکے دائرہ کار سے واقف کراکر سرکاری سطح پر دین میں مداخلت کی کوشش کو نا کام بنایا جا سکے گا، ان مقاصد کے حصول کے لیے امارت شرعیہ چاہتی ہے کہ ہر طبقہ کے لوگ اس مہم کا حصہ بنیں، علامتی نہیں، حقیقی، ذمہ دارانہ طور پر ہر گاؤں اور ہر محلہ کے لوگ اس کے لیے تیار ہوجائیں تو معاشرہ کی اصلاح کا کام آسان ہوجائے گا، کیونکہ معاشرہ اور سماج فرد سے ہی بنتا ہے، صالح افراد کے مجموعہ کا نام صالح معاشرہ ہے، آئیے امارت شرعیہ کی اس مہم میں اپنی قوت واستطاعت کے مطابق شریک ہوں، یہ وقت کی ضرورت بھی ہے اور ایمان کا تقاضہ بھی۔

تری پورہ میں تشدد اور مسلم رد عمل _ جذباتیت نہیں ، اجتماعی فیصلے وقت کا تقاضا -

تری پورہ میں تشدد اور مسلم رد عمل _ جذباتیت نہیں ، اجتماعی فیصلے وقت کا تقاضا -

ڈاکٹر محمد رضی الاسلام ندوی

ہندوستان کے شمال مشرق میں واقع سرحدی ریاست تِری پورہ میں مسلمانوں کے خلاف فساد کا آغاز ہوئے ایک عشرہ ہوگیا ہے ، لیکن اب تک قصور واروں کو گرفتار نہیں کیا گیا ہے اور انھیں کوئی سزا نہیں دی گئی ہے ۔ میڈیا رپورٹوں کے مطابق یہ فساد پڑوسی ملک بنگلہ دیش میں 13 سے 16 اکتوبر کے درمیان دُرگا پوجا کے موقع پر برپا ہونے والے فرقہ وارانہ فساد کا ردِّ عمل ہے ۔ بتایا جا رہا ہے کہ بنگلہ دیش میں ایک شخص نے فیس بک پر ایک تصویر پوسٹ کی ، جس میں ہندوؤں کے ہنومان کی گود میں قرآن رکھا ہوا دکھایا گیا تھا ۔ یہ تصویر اگرچہ کئی برس پرانی اور جعلی تھی ، لیکن اسے دیکھ کر مسلمان پوجا کے پنڈال کے باہر جمع ہوئے اور انھوں نے پنڈال میں رکھے ہوئے دیوی دیوتاؤں کے مجسموں کو توڑ دیا ۔ بہرِ حال بنگلہ دیشی حکومت نے فوراً کارروائی کرکے اور بڑے پیمانے پر قصور واروں کو گرفتار کرکے فساد پر قابو پالیا ۔ لیکن اس کا ردِّ عمل ریاست تری پورہ میں ، جس کی سرحدیں بنگلہ دیش سے ملتی ہیں ، دیکھنے کو ملا ۔ یہاں وشو ہندو پریشد کی طرف سے ایک بڑا جلوس نکالا گیا ، جس میں خاتم النبیین حضرت محمد ﷺ کا نام لے کر آپؐ کی شان میں گستاخی کی گئی ، مسلمانوں کے خلاف زبردست نعرے بازی کی گئی ، ایک درجن سے زائد مساجد میں توڑ پھوڑ کی گئی ، ان میں بھگوا جھنڈے لگائے گئے اور انھیں نذرِ آتش کر دیا گیا ۔ اسی طرح مسلمانوں کے رہائشی مکانات ، دکانوں اور کارخانوں کو نشانہ بنایا گیا اور ان میں آتش زنی کی گئی ۔

تری پورہ ملک کی تیسری سب سے چھوٹی ریاست ہے ، جہاں کی کل آبادی بیالیس (42) لاکھ ہے ۔ اس میں ہندو 83.4 فی صد ہیں ، جب کہ مسلمانوں کا تناسب 8.6 فی صد ہے ، عیسائی 4.3 فی صد اور بودھ 3.4 فی صد ہیں ۔ زیادہ تر لوگ بنگالی بولنے والے ہیں ۔ ہندو ووٹوں کا پولرائزیشن کرنے کے مقصد سے ملک کے مختلف حصوں میں فرقہ وارانہ فسادات کروانے کی سازش رچی جا رہی ہے ۔ تری پورہ کے فساد کو اسی نقطۂ نظر سے دیکھنا چاہیے ۔ ایک عشرہ گزر جانے کے باوجود اب تک ریاست کی انتظامیہ اور پولیس حرکت میں نہیں آئی ہے اور کسی کی گرفتاری نہیں ہوئی ہے ، بلکہ اس کے برعکس ڈی جی پی نے اپنے بیان میں مساجد میں آگ زنی کے واقعات کو فرضی بتایا ہے ۔ ملک کی ایک ریاست میں اتنا بڑا واقعہ ہوجانے کے باوجود وزیر اعظم اور وزیر داخلہ خاموشی اختیار کیے ہوئے ہیں اور سیاسی پارٹیوں کا ردِّ عمل بہت مایوس کن ہے ۔ ایسا لگتا ہے کہ مسلمانوں کی حمایت میں کوئی بیان دینے سے انھیں ہندو ووٹ سے محروم ہونے کا خدشہ لگا ہوا ہے ۔ اس سے اندازہ لگایا جا سکتا ہے کہ ملک کی فضا کو کتنی تیزی سے مسموم کرنے کی کوشش کی جا رہی ہے اور اسے فرقہ وارانہ خطوط پر تقسیم کرنے کی سازش رچی جا رہی ہے ۔

تری پورہ کے اس فساد ، مسلمانوں پر یک طرفہ مظالم اور دہشت گردی کے خلاف مسلمانوں کی دینی و ملّی تنظیموں نے اپنے ردِّ عمل کا اظہار کیا ہے ۔ انھوں نے مطالبہ کیا ہے کہ جن لوگوں نے جلوس میں پیغمبر اسلام کی مبینہ توہین کی ہے ، مسجدوں کو نذرِ آتش کیا ہے اور مسلمانوں کے مکانوں ، دکانوں اور کارخانوں میں توڑ پھوڑ کی ہے اور آگ لگائی ہے ، انھیں قانون کی گرفت میں لایا جائے اور قرارِ واقعی سزا دی جائے ۔ پریس میں بیانات دینے کے علاوہ ملک کے مختلف حصوں میں مسلمانوں کی طرف سے احتجاجی مظاہرے ہوئے ہیں اور میمورنڈم دیے گئے ہیں ۔ چند روز قبل ملک کے دار الحکومت دہلی میں تری پورہ بھون کے سامنے مختلف تنظیموں نے زبردست مظاہرہ کیا تھا ۔ جماعت اسلامی ہند ،جمعیۃ علمائے ہند ، آل انڈیا مسلم مجلس مشاورت ، اور جمعیت اہلِ حدیث کے وفود نے تری پورہ کا دورہ کیا ہے ۔ مولانا محمود مدنی نے اعلان کیا ہے کہ جن مسجدوں ، دکانوں اور مکانوں کو نقصان پہنچا یا گیا ہے ، جمعیت کی طرف سے ان کی تعمیر نو کی جائے گی ۔ آل انڈیا مسلم پرسنل لابورڈ کی طرف سے بھی مذمتی بیان آچکا ہے ۔
اس موقع پر بعض پُر جوش نوجوانوں کی طرف سے مسلم قیادت کے بارے میں ناشائستہ انداز میں غم و غصہ کا اظہار کیا گیا ہے ۔ ان کا کہنا ہے کہ قیادت بوڑھی اور ناکارہ ہوچکی ہے ، وہ ہندوستانی مسلمانوں کے مسائل حل کرنے سے قاصر ہے ، اس لیے اسے ہٹا کر نوجوان قیادت کو سامنے لانا چاہیے ۔ میری نظر میں یہ محض جذباتی باتیں ہیں ۔ ہندوستان میں مسلم امّت کے مسائل بہت گمبھیر ہیں ۔ ان کی شدّت میں دن بہ دن اضافہ ہوتا جا رہا ہے۔ ہندوتوا کی عَلَم بردار قوّتیں روز بہ روز طاقت وَر ہوتی جا رہی ہیں اور مسلمانوں کے خلاف ان کی سازشیں بڑھتی جا رہی ہیں ۔ اس صورتِ حال میں مسلمانوں کی رہی سہی قیادت کو کم زور کرنے کے بجائے اسے حمایت دینی چاہیے ۔ موجودہ حالات تقاضا کرتے ہیں کہ ایک دوسرے پرتنقید کرنے اور الزامات لگانے کے بجائے اجتماعی فیصلے کیے جائیں اور مل جل کر انہیں نافذ کرنے کی کوشش کی جائے ۔

[ شائع شدہ : ہفت روزہ دعوت نئی دہلی ، شمارہ 7 نومبر تا 13 نومبر 2021 ]

آج سےپٹرول 5 روپے ، ڈیزل 10 روپے تک ہوسکتاہے سستا ، حکومت نے ایکسائزڈیوٹی کم کرنے کاکیا اعلان

آج سےپٹرول 5 روپے ، ڈیزل 10 روپے تک ہوسکتاہے سستا ، حکومت نے ایکسائزڈیوٹی کم کرنے کاکیا اعلان

نئی دہلی(ایجنسی)
دیوالی سے قبل کی شام مرکزی حکومت نے پٹرول اور ڈیزل پر ایکسائز ڈیوٹی کم کرنے کا اعلان کیا ہے، اس فیصلے کے بعد پٹرول پر 5 روپے اور ڈیزل پر 10 روپے کی کمی ہوگی۔
پٹرول اور ڈیزل کی بے تحاشہ بڑھتی قیمتوں کے ساتھ لوگوں کے بڑھتے غصے اور حال کے ضمنی انتخابات میں ملی شکست کے بعد بی جے پی کی قیادت والی مرکزی حکومت نے تیل پر ایکسائز ڈیوٹی کم کرنے کا اعلان کیا ہے۔ حکومت نے کہا ہے کہ کل یعنی جمعرات سے پٹرول پر 5 روپے اور ڈیزل پر 10 روپے فی لیٹر کی شرح سے ایکسائز ڈیوٹی میں تخفیف کی جائے گی۔
سرکاری ذرائع نے بتایا کہ ڈیزل پر ایکسائز ڈیوٹی میں پٹرول کے مقابلے دوگنی کمی کی گئی ہے اور اس کا فائدہ آنے والی ربیع فصل کے سیزن میں کسانوں کو ہوگا۔ حکومت نے اس کے ساتھ ہی ریاستوں سے پٹرول و ڈیزل پر ویٹ کم کرنے کی بھی اپیل کی ہے تاکہ صارفین کو فائدہ مل سکے