بڑی خبر : وزیراعظم مودی نےکیا اعلان ، تینوں زرعی قوانین ہوں گے واپس

بڑی خبر : وزیراعظم مودی نےکیا اعلان ، تینوں زرعی قوانین ہوں گے واپس

نئی دہلی: وزیر اعظم نریندر مودی (Prime Minister Narendra Modi) نے قوم کے نام خطاب کرتے ہوئے بڑا اعلان کیا ہے۔ انہوں نے تینوں زرعی قوانین (Three Farm Laws) کو واپس لے لیا ہے۔ وزیر اعظم مودی نے کہا کہ حکومت اس بار کے پارلیمنٹ سیشن میں (Parliament Session) تینوں زرعی قانون کو واپس لے لے گی اور آئندہ سیشن میں اس بارے میں ضروری عمل مکمل کیا جائے گا۔ انہوں نے کہا کہ ہماری حکومت لاکھ کوشش کے باوجود کسانوں کے گروپ (Farmers Protest) کو سمجھا نہیں پائی اور ملک کے باشندودں سے معافی مانگتا ہوں کہ ہماری ہی کوشش میں کوئی کمی رہی ہوگی۔ وزیر اعظم نے مظاہرین کسانوں سے کہا کہ گرو پرو کے موقع پر آپ اپنے گھر اور کھیت پر لوٹیں۔ وزیر اعظم مودی نے کہا- زرعی بجٹ کو 5 گنا بڑھا دیا وزیر اعظم نریندر مودی (Prime Minister Narendra Modi) نے کہا کہ مرکز کے زرعی بجٹ کو پانچ گنا بڑھا دیا گیا ہے۔ انہوں نے کہا، ہماری حکومت نے کسانوں کے کھاتے میں ایک کروڑ 62 لاکھ روپئے ڈالے ہیں۔ اس کے ساتھ ہی 22 کروڑ سوائل ہیلتھ کارڈ تقسیم کئے گئے ہیں۔ وزیر اعظم مودی نے کہا کہ ہماری حکومت کسانوں کے مفاد میں کام کر رہی ہے۔

وزیر اعظم مودی نے کہا 'ہماری حکومت خاص طور پر چھوٹے کسانوں کی فلاح کے لئے گاوں - غریب کے روشن مستقبل کے لئے پوری ایمانداری سے ہماری حکومت یہ قانون لے کرآئی ہے۔ ہم اپنی کوششوں کے باوجود کچھ کسانوں کو نہیں سمجھا پائے۔ بھلے ہی کسانوں کا ایک طبقہ ہی مخالفت کر رہا تھا۔ سائنسدانوں، زرعی قوانین ماہرین نے انہیں سمجھانے کی کوشش کی۔ ہم نے کسانوں کی باتوں اور ان کے ترکوں کو سمجھنے میں بھی کوئی کسر نہیں باقی رکھا۔ قانون کے جن التزامات پر انہیں اعتراض تھا، اس پر بھی بات کی۔ میں آج ملک کے باشندوں سے معافی مانگتے ہوئے کہنا چاہتا ہوں کہ ہم کچھ کسانوں کو سمجھا نہیں پائے'۔

وزیر اعظم مودی نے زرعی قوانین پر کہی یہ بڑی بات وزیر اعظم نریندر مودی نے کہا کہ 'کسانوں کی صورتحال کو سدھارنے کی بڑی مہم کے تحت تین زرعی قوانین لائے گئے تھے۔ مقصد یہ تھا کہ چھوٹے کسانوں کو مزید طاقت ملے اور انہیں پیداوار کی مناسب قیمت ملے۔ برسوں سے یہ مطالبہ، ملک کے زرعی ماہرین، تنظیم اور سائنسداں کر رہے تھے۔ پہلے بھی کئی حکومتوں نے غوروخوض کیا تھا۔ اس بار بھی پارلیمنٹ میں بحث ہوئی اور قانون لائے۔ ملک کے کونے کونے میں کسان تنظیموں نے استقبال کیا اور حمایت دی۔ میں آج سن سبھی کی حمایت کے لئے بہت بہت شکریہ ادا کرتا ہوں'۔

بہارپنچایت انتخابات کے عجب غضب نتائج ، پوتے کو ملی جیت اور دادا کو شکست مظفر پور، 18 نومبر(انڈیا نیرٹیو)

بہارپنچایت انتخابات کے عجب غضب نتائج ، پوتے کو ملی جیت اور دادا کو شکست مظفر پور، 18 نومبر(انڈیا نیرٹیو)

بہار میں پنچایت انتخابات کے دوران عجیب و غریب نتائج دیکھنے کو مل رہے ہیں، ایک ہی خاندان کے کئی افراد انتخابی میدان میں قسمت آزما رہے ہیں تو وہیں خاندان کے کسی ممبر کو جیت مل رہی ہے تو کوئی انتخاب ہار رہا ہے۔ بدھ کے روز یہاں ووٹوں کی گنتی کے دوران چترسی پنچایت سے ایسی ہی ایک خبر سامنے ا?ئی ہے جہاں پوتے نے مکھیا کا عہدہ جیت لیا، لیکن دادا الیکشن ہار گئے۔

جہاں اورائی میں ساس اوربہو اورمکھیا عہدہ کی لڑائی بھی دلچسپ رہی، وہیں مینا پور کے مکھیا عہدہ کے لئے میدان میں اترے دادا۔ پوتا کی لڑائی بھی کافی مز یدار رہی۔ بدھ کے روز ہوئی ووٹوں کی گنتی میں پوتے دیواکر کمار نے مکھیا کے عہدے پر کامیابی حاصل کی جب کہ دادا مہانند رائے انتخاب ہار گئے۔

واضح ہو کہ سبکدوش ہونے والے مکھیا مہانند رائے سمیت کئی دوسرے امیدوار مکھیا کے عہدے کے لیے قسمت آزما رہے تھے۔ جہاں دیواکر کمار نے ببیتا دیوی کو شکست دے کر مکھیا کا عہدہ اپنے نام کر لیا۔ لیکن اس انتخابی میدان میں دادا پوتے کی لڑائی بھی دلچسپ رہی۔

26 پنچایتوں میں صرف ایک سبکدوش مکھیا سنگیتا دیوی ہرسر پنچایت سے دوبارہ مکھیا بننے میں کامیاب ہوئی۔ دیواکر کمار سمیت کئی امیدوار مکھیا بننے میں کامیاب رہے۔ 26 پنچایتوں میں سے 25 نئے انتخابی میدان میں مکھیا اپنی قسمت آزمانے میں کامیاب ہوئے۔ حالانکہ کئی مکھیا آمنے سامنے کی لڑائی میں بھی نظر نہیں آئے

آل انڈیاملی کونسل بہارکی ضلعی کمیٹیوں کی تشکیل نوکاعمل جاری

آل انڈیاملی کونسل بہارکی ضلعی کمیٹیوں کی تشکیل نوکاعمل جاری

ملک کی معروف ملی تنظیم آل انڈیاملی کونسل بہارکی ضلعی کمیٹیوں کی تشکیل نوکاعمل جاری ہے،ریاست بہارکی مختلف اضلاع کی کمیٹیاں تشکیل دینے کے بعدآج 18/نومبر2021کوسیوان ضلع کی ملی کونسل کی تشکیل کے لیے ایک انتخابی نشست منعقدہوئی،جس کی صدارت اسسٹنٹ جنرل سکریٹری آل انڈیاملی کونسل حضرت مولاناسیدمصطفی رفاعی قادری ندوی جیلانی نے کی،مولانارفاعی قادری اس موقع پربیان کرتے ہوئے کہاکہ تقویٰ انسانی زندگی کا سب سے قیمتی زیوراورسب سے زیادہ گراں قدر متاع ہے۔ اگر انسان بڑاہی دولت مند اور حیثیت ووقار کا مالک ہے لیکن وہ'لا إلہ إلا اللہ محمد رسول اللہ'کا اقرار نہیں کرتا تو جس طرح اس کی دولت مندی اس کی حیثیت، اس کا وقار، اس کا جاہ وجلال اور اس کی شان وشوکت کسی کام کی نہیں بالکل اسی طرح اگر کوئی'لا إلہ إلا اللہ محمد رسول اللہ'کا اقرار کرتا ہے لیکن اس کے دل میں تقوی کی جوت اور خوشبو نہیں، اس کے اندر تقویٰ کی روشنی نہیں جگمگاتی اور اس کے من میں خداترسی کا جذبہ نہیں تو وہ بھی اللہ کی نظر میں قابل احترام نہیں، حقیقت تویہ ہے کہ جس مسلمان کے اندر تقویٰ اور پرہیزگاری کی خوبی نہیں پائی جاتی، وہ صرف نام کا مسلمان ہے، کام کا نہیں۔ایسا کیوں؟ ایسا اس لیے کہ اگر مسلمان ایک جسم ہے تو تقویٰ اس کی روح ہے اور یہ ظاہر ہے کہ جس جسم کے اندر روح نہیں وہ جسم کسی کام کا نہیں۔ اس طرح اگر کہاجائے کہ مسلمان تقویٰ کے بغیر لاش بیجا ن ہے تو اس میں ذرابھی مبالغہ آرائی نہیں۔ جبکہ آل انڈیاملی کونسل کے قومی نائب صدر حضرت مولاناانیس الرحمن قاسمی نے نشست سے خطاب کرتے ہوئے کہاکہ ملک اس وقت بڑے نازک دورسے گزررہاہے،ایسے وقت میں ہمارامتحدرہنابہت ضروری ہے،آل انڈیاملی کونسل نے ہمیشہ ملک کی ملت کی صحیح رہنمائی کی ہے اوران شاء اللہ آئندہ بھی کرتارہے گا،تنظیم کومضبوط کرنے کے لیے علاقائی کمیٹیاں تشکیل دینابہت ضروری ہے، اس وقت پورے ملک میں ملی کونسل تشکیل نوعمل جاری ہے اوراسی کڑی کومضبوط کرنے کے لیے ہم نے بہار میں ضلعی کمیٹیوں کی تشکیل کاسلسلہ شروع کیاہے،اب تک الحمدللہ بہارکے اکثراضلاع کمیٹیاں تشکیل پاچکی ہیں،اسی سلسلے کوآگے بڑھاتے ہوئے آ ج ہم ضلع کی کمیٹی کی تشکیل کررہے ہیں۔اس موقع پر جناب نجم الحسن نجمی صاحب چیرمین نجم فاؤنڈیشن نے ملی کونسل کے مقاصداورطریقہ کار پرروشنی ڈالی اورتعلیم کی اہمیت بیان کی، اس نشست میں،صہیب رحمانی صاحب آرگنائزآل انڈیاملی کونسل بہار،رئیس الاعظم، فقیہ الدین،عطاء الصمد،نعمت اللہ خان،احسان اللہ،اظہاراحمد،تقی امام،عبدالرحمن،ضیاء الحق،محمدذبیح اللہ،مولانامطیع الرحمن،شاہداقبال،عمران حسین،عبدالستار،محمدظفرامام،محمدنوشادعالم،اظہرامام، محمدراشد،نسیم کوثر،عبدالقیوم،ابوالکلام، محمدامان اللہ، شاہ نورعالم،خورشیدانور،شکیل احمد اورشہرکے معززین حضرات شریک تھے۔

تریپوره فسادات : فساد کی وجہ جان کر ہوجائیں گے حیران ، جانئے کیا ہے سچائی ؟ انڈیا نیرٹیو

تریپوره فسادات : فساد کی وجہ جان کر ہوجائیں گے حیران ، جانئے کیا ہے سچائی ؟ انڈیا نیرٹیو

تریپورہ فسادات کی کہانی ایک داستان کی طرح ہے۔ مطلب جتنے لوگ، اتنی باتیں، کبھی آپ نے سوچا ہے کہ تریپورہ فساد کی اصل وجہ کیا ہے؟ تریپورہ فساد میں ملوث کون لوگ ہیں؟ تریپورہ کے اصل ساکن کون ہیں؟

ان سب کا جواب اگر ایک سطر میں بیان کیاجائے تو یہی ہے کہ تریپورہ کے اصل لوگ محض چند فیصد ہیں۔ باقی بنگلہ دیشی ، پریپورہ میں بھرے پڑے ہیں۔ آپ سب کو یاد ہوگا کہ بنگلہ دیش میں درگا پوجا پر کافی ہنگامہ ہوا تھا، اور چند متشدد اور جھوٹی شہرت کے بھوکے لوگوں نے ہندو مسلم کا بہانہ بنا کر فساد برپا کردیا تھا۔ اس فساد نے قرب و جوار میں ایک مذہبی آگ لگا دی تھی۔ تریپورہ میں بھی بہت بڑی تعداد میں لوگ بنگلہ دیش سے بھاگ کر آباد ہوئے ہیں۔ دونوں فسادات ایک ساتھ آگے چل کر ایک بھیانک شکل اختیار کیا اور تریپورہ کا حادثہ پیش آیا۔ اس میں ہندو مسلم کا کوئی زمینی مسئلہ نہیں ہے بلکہ دو ملکوں اور متشدد لوگوں کی گہری چال ہے تاکہ ملک میں ہندو مسلم بھائی چارگی میں کمی آئے اور باہر کی طاقت اس سے فائدہ اٹھا کر ہمارے خلاف باتیں کریں۔

دل چسپ بات یہ ہے کہ ہندوستان میں ہندو مسلم کی بھائی چارگی صدیوں پر محیط ہے۔ ہندو اور مسلم دونوں کو مل کر اس ملک کی گنگا جمنی تہذیب کی بحالی کے لیے کوشش کرنی چاہیے تاکہ ہندواور مسلم اتحاد اور اتفاق ، ایک ساتھ مل کر قوم و ملک کی ترقی میں معاون ہوسکے۔

اردو کسی مذہب کی زبان نہیں ہے۔ بہار میں اس کی بہار کو دیکھ کر پورے جوش و خروش سے یہ بات کہی جا سکتی ہے۔یہاں ان دنوں اردو زبان سیکھنے کا جذبہ بڑھ گیا ہے۔

بہارمیں اردو کی بہار: غیر اردوداں سیکھ رہے ہیں اردو

بہار میں اردو کی بہار: غیر اردوداں سیکھ رہے ہیں اردو

 

سراج انور/ پٹنہ

اردو کسی مذہب کی زبان نہیں ہے۔ بہار میں اس کی بہار کو دیکھ کر پورے جوش و خروش سے یہ بات کہی جا سکتی ہے۔یہاں ان دنوں اردو زبان سیکھنے کا جذبہ بڑھ گیا ہے۔

یہاں75سےزائد ان غیراُردو داں حضرات کو اُردو لرننگ سرٹیفکیٹ سے نوازا گیا ہے، جنہوں نے اردو ڈائریکٹوریٹ کے'اردو ٹریننگ سینٹر' سے اردو سیکھی ہے۔

قابل ذکر بات یہ ہے کہ جن لوگوں کو اُردو لرننگ سرٹیفکیٹ دیا گیا ان میں مختلف علاقوں اور مختلف عمروں کے لوگ شامل تھے۔اردو سیکھنے کے لیے عمر کی کوئی قید نہیں ہے، ہر عمر کے لوگ اردو سیکھ سکتے ہیں۔

ڈاکٹر اوپیندر ناتھ پانڈے نے کیا کہا؟

محکمہ کیبنٹ سیکرٹریٹ کے خصوصی سکریٹری ڈاکٹر اوپیندر نے تقریب تقسیم اسناد کے پروگرام سے خطاب کرتے ہوئے کہا کہ اردو سیکھنے کا کورس ڈائریکٹوریٹ آف اردو کی ایک اچھی پہل ہے۔اردو دل کی زبان ہے۔ دل اس کے بہت قریب ہے۔

انہوں نے غیر اردو بولنے والوں کو اردو زبان سکھانے اور امتحان میں کامیاب ہونے والوں کو سرٹیفکیٹ دینے کے لیے منعقدہ تقریب کی ستائش کی اور کہا کہ اس طرح کا پروگرام بڑے پیمانے پر کیا جانا چاہیے۔

ڈاکٹر اجیت پردھان(سکریٹری، اسکول آف پرفارمنگ آرٹس، پٹنہ)  نے اردو لرننگ کا کورس پورا کرنے والے تمام لوگوں کو مبارکباد دی اور کہا کہ یہ ملک کی گنگا جمنی تہذیب ہے۔  اسے محفوظ رکھنا اور آگے بڑھانا ہم سب کی ذمہ داری ہے۔

انہوں نے ہندی اور اردو دونوں زبانوں کو حقیقی بہنیں قرار دیتے ہوئے کہا کہ اردو زبان سے محبت کی ضرورت ہے اور اگر کوئی اردو سیکھنا چاہتا ہے تو اسے ضرور محبت کرنی چاہیے۔

کس کس نے سرٹیفکٹ حاصل کیا؟

 جیوتیندرا مشرا، شمبھو شنکر پرساد، ایس کے سنہا، دیا شنکر پرساد، برج کمار، ڈاکٹر وجے کمار ٹھاکر، امیتابھ پانڈے، دلیپ کمار اگروال، روی شنکر، منی شنکر پرساد سنہا، سنجے کمار سنگھ، راجیو کمار سنہا، ڈاکٹر مکیش کمار، ہرش وردھن پودار، جتیندر کمار سنگھ، آرادھنا پرساد، رادھا کرشنا راکیش، وشنو جی، روپیش کمار، سنگیتا سہائے، نیرج کمار سنگھ، منیش کمار، سید آفتاب عالم، ڈاکٹر برجیش کمار، وید پرکاش، ڈاکٹر آرتی کماری، رامانوج پنکج، پرینکا بھارتی، رخسانہ خاتون، ویر کمار راوت، ابھیجیت گوتم، رشمی کماری، ڈاکٹر منجو کماری، ڈاکٹر آر ایس ناگمانی، ڈاکٹر منیشا جھا، روی پرکاش سورج، جئے شنکر پرساد، ڈاکٹر، کرشنا کمار، ڈبلیو کمار شرما، ہریش کمار، ڈاکٹر رنجتا تیواری، کماری سنچنا، جہانگیر عالم، گلراج شبانہ، کماری چیتالی، رمیش کمار رائے، انیکیت سریواستو، دھرمیندر سنگھ یادو، شوبھوجیت، سنتوش کمار گپتا، سونو شنکر، سبھاش پاٹھک، رام پیاری کماری، مفرح ارم، ڈاکٹر کویندر کشور، ہما ناز، رقیہ جہاں، سوجیت کمار پانڈے، رفعت جہاں، نازیہ نسرین، محمد شمشاد عالم، ممتاز پروین، دھرو کمار، سدیکشا سگنیام، محمد شمشاد، کرشن کانت جھا، ابھیجیت رنجن، الانکار ملک، ام کلثوم، نیہا پروین، بھاویکا پریہ درشنی، رنجیت رام، کماری لتا پراشر، سونو کمار ساہ اور نیہا کماری کو سرٹیفکیٹ ساتھ ساتھ یادگاری تحائف سے نوازہ گیا۔

ڈائریکٹوریٹ آف اردو

اردو بہار کی دوسری سرکاری زبان ہے، ریاستی حکومت دوسری سرکاری زبان اردو کی ترقی کے لیے پرعزم ہے۔ اردو زبان کی ترویج و اشاعت کے لیے ڈائریکٹوریٹ آف اردو کا قیام عمل میں آیا، اس کے لیے حکومت ہر سطح پر کوششیں کر رہی ہے۔

اردو اداروں کو ضرورت کے مطابق فنڈز

ریاستی حکومت کی طرف سے جن مقاصد کے تحت اردو ڈائریکٹوریٹ بنایا گیا ہے، ان کی تکمیل کے لیے ہیڈکوارٹر سے لے کر ضلعی سطح تک اردو کی ترقی کے لیے پروگرام منعقد کیے جا رہے ہیں۔

تین سال قبل ریاستی حکومت کے غیر اردو داں افسران اور ملازمین کو اردو زبان سکھانے کے لیے یہ قدم اُٹھایا تھا۔ اس کے لیے کیبنٹ سیکریٹریٹ ڈپارٹمنٹ نے تمام محکموں کے پرنسپل سیکریٹریوں اور سیکریٹریوں کو خط لکھ کر ان کے نام طلب کیے تھے۔

حکومت کی طرف شروع کیا جانے والا یہ کورس محض  60 دنوں کا ہے۔ شروع میں لوگوں نےاس تعلق سے اتنی دلچسپی نہیں دکھائی تھی لیکن اب اردو سیکھنے والوں کا ہجوم بڑھتا جا رہا ہے۔

ریاست میں اردو زبان عروج پر ہے، اس کا سہرا امتیاز کریمی کو جاتا ہے، جو کہ اردو ڈائریکٹوریٹ سابق ڈائریکٹر ہیں۔ ان کی جانب سے مسلسل کوششیں کی جا رہی ہیں۔

اس کے موجودہ ڈائریکٹر احمد محمود کہتے ہیں کہ ملک کی مشترکہ ثقافت کی ترقی میں اس کی شراکت کو فراموش نہیں کیا جا سکتا۔

وہیں ادارےکے سابق ڈائریکٹر عبدالرحمٰن اردو سیکھانے کے پروگرام کی تعریف کرتے ہیں۔ان کا کہنا ہے کہ اردو سیکھنے اورسکھانے والے دونوں کو انعام ملنا چاہیے۔ موجودہ ماحول میں اس طرح کے پروگرام کا ہونا بہت ضروری ہے۔اس سے ایک مثبت ماحول بنتا ہے، اس سے سماجی ہم آہنگی پیدا ہوتی ہے۔

اردو لرننگ کورس کے انچارج محمد نور عالم نے اسٹیج کی نظامت کی۔

اردو کی ترقی کے لیے سات نکات

• جہاں تک ممکن ہو اردو میں درخواستوں اور درخواستوں کی رسید اور جواب کا اہتمام کیا جائے۔

• رجسٹریشن دفاتر کی طرف سے اردو میں لکھے گئے دستاویزات کی قبولیت کو ممکن بنایا جائے۔

• اہم سرکاری قواعد، ضوابط اور نوٹیفیکیشن کی اردو میں بھی اشاعت عمل میں آئے۔

• اردو میں عوامی اہمیت کے سرکاری احکامات اور سرکلر کا اجراء بھی اردو میں ہو۔

• اردو میں بھی اہم سرکاری اشتہارات کی اشاعت اردو میں کی جائے۔

• ڈسٹرکٹ گزٹ کے اردو ورژن کی اشاعت عمل میں آئے۔ 

خیال رہے کہ اس ماہ یہ نوٹیفکیشن تمام محکموں کو کیبنٹ سیکرٹریٹ ڈیپارٹمنٹ کے ایڈیشنل چیف سکریٹری سنجے کمار کے دستخط سے جاری کیا گیا ہے۔

خود کو بَرَتنے کا ہُنَر______مفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہشخصیت کی تشکیل اور ارتقاء (پرسنالٹی ڈولپمنٹ) کے کام نے ان دنوں ایک فن کی شکل اختیار کر لی ہے

خود کو بَرَتنے کا ہُنَر___

مفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ(9431003131)

شخصیت کی تشکیل اور ارتقاء (پرسنالٹی ڈولپمنٹ) کے کام نے ان دنوں ایک فن کی شکل اختیار کر لی ہے ، باضابطہ اس کے لیے کیمپ لگائے جاتے ہیں ، محاضرات ہوتے ہیں، اور بڑی بڑی رقمیں اس پر خرچ کی جاتی ہیں، شرکاء کو بتایا جاتا ہے کہ اپنی شخصیت کی تشکیل ، ارتقاء اور مارکیٹنگ کے لیے کیا کچھ کرنا ضروری ہے ، بہت لوگ اس فن سے واقفیت کے بعد بڑے بڑے کام کرنے اور اپنی شخصیت منوانے میں کامیاب ہوجاتے ہیں۔

 اس سلسلے میں بنیادی بات یہ ہے کہ جب آپ کسی کے سامنے پیش ہوں ، موقع سمینار، سمپوزیم، جلسے جلوس یا انٹر ویو کا ہو تو اپنے خیالات مجتمع کرلیں، شخصیت کو سب سے زیادہ نقصان انتشار ذہنی ، عجلت پسندی اور بے سوچے سمجھے اپنی بات رکھنے سے پہونچتا ہے ، آپ کہیں انٹر ویو کے لیے جا رہے ہیں، کسی سمینار اور سمپوزیم میں آپ کی شرکت ہونی ہے ، تو وہاں کے حالات اور انٹر ویو لینے والے کی ذہنیت کا پتہ چلالینا کامیابی کا پہلا زینہ ہوتا ہے ، جس کمپنی یا ادارے میں آپ جا رہے ہیں وہاں کے مالکان اور ذمہ داران کی ذہنیت اور ماحول سے واقفیت بھی آپ کے لیے انتہائی ضروری ہے، ماحول کا مطلب یہ ہے کہ وہاں کا اندرونی ماحول مشرقی تہذیب سے متاثر ہے یا مغرب کی بے راہ روی کا بول بالا ہے ، جسے آج کی اصطلاح میں ’’کُھلا پن‘‘ سے تعبیر کیا جاتا ہے ، جو سوالات کیے جائیں اس کے جواب میں عجلت سے کام نہ لیں، سوال کرنے والے کی نفسیات کی تسکین کے لیے اسے بہتر سوال قرار دے کر سوچنے کا تھوڑا وقت آپ کو مل سکتا ہے ، آپ کسی ایسے جملے کا بھی استعمال کر سکتے ہیں جو ذو معنی اور مجمل ہوں، اس جملے کی تہہ تک انٹر ویو لینے والا جب تک پہونچے، آپ اس کو صحیح جواب دینے کی پوزیشن میں ہو جائیںگے ، آپ سوال کرنے والے سے تھوڑا وقت غور وفکر کے لیے بھی مانگ سکتے ہیں، لیکن کبھی اس کا اثر الٹا ہوجاتا ہے ، اس لیے بہت سوچ سمجھ کر اس جملے کا استعمال کریں۔

ممکن ہے سوال کرنے والے نے جو بات پوچھی ہے وہ آپ کے نظریہ کے خلاف ہے، ایسے میں اگر سیدھے سیدھے آپ نے اپنا نظریہ بیان کرنا شروع کر دیا تو انٹر ویو لینے والے کی انا کو ٹھیس پہونچ سکتی ہے ، انا کو ٹھیس پہونچنے کا مطلب آپ کی ناکامی ہے، کیوں کہ ہر انٹر ویو لینے والا اپنے کو بڑا سمجھتا ہے ، بعض بعض میں بڑے پن کا یہ احساس اتنا شدید ہوتا ہے کہ وہ اپنے کو ’’عقل کل‘‘ کا مالک سمجھنے لگتا ہے ، ایسے میں ضروری ہے کہ آپ اپنا نظریہ اس انداز میں رکھیں کہ بلا واسطہ اس کی سوچ پر حملہ نہ ہو، آپ یہ کہہ سکتے ہیں کہ میں اس بات کو الگ انداز میں دیکھتا ہوں اور آپ اجازت دیں تو میں اپنے نظریات کو آپ سے شِیَر کر سکتا ہوں، گفتگو میں یہ بھی ملحوظ رہے کہ آپ ’’باتونی‘‘ بن کر سامنے نہ آئیں، بہت بولنا بھی آپ کی شخصیت کو کمزور کرتا ہے، بولنے میں سامنے والے کی عزت واحترام کا خیال بھی بہت ضروری ہے، بد زبانی بدکلامی، گالی گلوج کسی شریف آدمی کا کام نہیں ہے ، بولنے کے مقابل خاموشی زیادہ مناسب ہے، خاموشی بھی کبھی کبھی وجہ قتل بن جاتی ہے ، اس لیے اعتدال وتوازن ہی بہتر ہے، نہ زیادہ بولیے اور نہ بالکل چپ رہیے، حدیث میں ’’خیر الامور اوسطھا‘‘ کہا گیا ہے ۔

ایک بنیادی بات یہ بھی ہے کہ ناکامی کا خوف دل سے نکال دیجئے آپ کی کامیابی اسی وقت طے ہوجاتی ہے جب آپ کے ذہن ودماغ سے ناکامی کا خوف نکل جاتا ہے ، یہ خوف آپ کو پژمردہ ، بے حوصلہ اور جوش وجذبہ سے عاری کر کے چھوڑ دیتا ہے ، اسلئے نا کامی کے خوف کی نفسیات سے باہر آئیے اور خوب اچھی طرح جان لیجئے کہ ناکامی کا مطلب ہے کہ کامیابی کے لیے کوشش صحیح ڈھنگ سے نہیں کی گئی ، آپ کے اندر حوصلہ کی آگ ہونی چاہیے، کچھ کر گزر نے کا جنون ہونا چاہیے، یہ جنون آپ کو کامیابی تک پہونچا کر دم لے گا، ہو سکتا ہے اس میں کئی ماہ وسال لگ جائیں ، ذہن میں یہ بات بھی رکھنی چاہیے کہ خواہشوں کی تکمیل فورا ہوجائے ضروری نہیں ، جلد خواہشات پورے کرنے کی لگن بھی کبھی ناکامی اور ہزیمت کا سبب بن جاتی ہے ، ایک پودے کو تناور درخت بننے اور بیج سے انکوڑے نکلنے کے لیے جو وقت درکار ہے اس کو کسی اور طریقے سے آپ بدل نہیں سکتے، پرائمری سے ایم اے تک پہونچنے کے لیے آپ کی خواہش کے ساتھ ماہ وسال کو بھی دخل ہے، اس کو آپ روپے وغیرہ سے پارٹ نہیں سکتے، بہت سارے کام میں مال ودولت سے زیادہ وقت کی اہمیت ہوتی ہے ۔

 اپنا ہدف مقرر کرتے وقت اپنی پسند کا بھی خیال رکھیں، صرف گارجین کے کہنے سے کوئی ہدف مقرر نہ کریں، آپ اپنی دلچسپی اس کا پورا پورا خیال رکھیں، دوسروں کے مشورے اور گارجین کی رائے اگر آپ کی پسند اور دلچسپی کے خلاف ہے تو کامیابی میںرکاوٹ پیدا ہو سکتی ہے۔جب آپ اپنی پسند اور دلچسپی سے کسی کام یا مطالعہ کے لیے کسی موضوع کا انتخاب کریں گے تو آپ پُرجوش ہوں گے اور آپ کا پُر جوش ہونا ہدف تک پہونچنے میں معاون ہوگا، نپولین بونا پارٹ کا قول ہے کہ ناممکن کچھ نہیں ہے ، ہر کام ممکن ہے ،ایسا ہو سکتا ہے کامیابی تک پہونچتے پہونچتے بہت سارے خد وخال بدل چکے ہوں۔

 آپ جو کچھ کر رہے ہیں، یا کرنا چاہتے ہیں، اس سے تمام لوگ متفق ہوں ، عملی زندگی میں ایسا نہیں ہوتا، آپ سے جو بعض وعداوت رکھتا ہے یا آپ کے بارے میں اس کے دل میں نفرت بھری ہوئی ہے وہ آپ کی مخالفت کرے گا، یہ آپ کا کمال ہے کہ منطقی اور مثبت انداز میں آپ اپنی بات منوانے میں کامیاب ہوجائیں، مزاج کی نرمی ، دوستانہ روابط کے ذریعہ ایسا ہو سکتا ہے، ایسے موقع سے غصہ بھی بہت آتا ہے، اس پر قابو پانا انتہائی ضروری ہے کیوں کہ لوہا جتنا گرم ہوجائے ہتھوڑا کو ٹھنڈا ہی رہنا چاہیے، ورنہ لوہے کی طرح اس کے گلنے کا عمل شروع ہوجائے گا اور وہ اپنا وجود ہی کھو بیٹھے گا۔

 کبھی ایسا بھی ہو سکتاہے کہ سامنے والے نے آپ کی عزت نفس کا خیال نہیں رکھا، ایسے میں آپ کی قوت بر داشت اس قدر ہونی چاہیے کہ آپ اسے جھیل سکیں، یہ بات بھی یاد رکھیے کہ عزت واحترام کسی کے دینے سے نہیں ملتی، اللہ جسے چاہتا ہے ، عزت دیتا ہے اور جسے چاہتا ہے ذلت دیتاہے، اسباب کے درجہ میں غور کریں تو آپ کی قابلیت ، صلاحیت ، کام کرنے کی لگن ، کچھ کر گزرنے کے جذبے سے عزت ملا کرتی ہے ، جس نے آپ کو بُرا بھلا کہا اس نے اپنی ذہنیت آپ کے سامنے رکھ دی، اس سے آپ کا کچھ نہیں بگڑا، آپ نے بر داشت کیا، اس سے لوگوں پر آپ کے جو ہر کھُلے۔

 ہدف کو پانے اور مقاصد کے حصول میں سستی اور کاہلی بڑی رکاوٹ ہے، نیند جسم کی کار کر دگی کو بڑھا تا ہے ، لیکن بڑا وقت سو کر گزار دینا آپ کے کام کرنے کی صلاحیت اور وقت دونوں کو بر باد کر تا ہے، آپ کا جو خواب ہے اسے پورا کرنے کے لیے آپ کا جاگنا انتہائی ضروری ہے ، اے پی جے عبد الکلام نے کہا تھا کہ خواب وہ نہیں ہیں، جو آپ سوئے میں دیکھتے ہیں، خواب وہ ہیں جن کو شرمندہ تعبیر کرنے کے لیے آپ راتوں کو جاگ کر گذارتے ہیں۔

 ہدف کو پانے کے لیے یک سو ہو کر توجہ مرکوز کرنے کی ضرورت ہوتی ہے ، یک سوئی کو نقصان پہونچانے میں تناؤ اور ٹینشن کا اہم رول ہوتا ہے ، اس لیے تناؤ سے ہر حال میں بچنا ضروری ہے ، کیوں کہ وہ دماغ کے اس حصہ کو متاثر کرتا ہے جسے ہم ’’ورکنگ میموری‘‘ کہا کرتے ہیں، ورکنگ میموری کی حیثیت سادے بورڈ کی ہوتی ہے ، جب یہ تناؤ ، فکر مندی ، جذبات اور اس سے متعلق تصویروں سے بھر جاتا ہے تو دماغ کام کرنا بند کر دیتا ہے ، آپ نے بار ہا لوگوں کو کہتے سنا ہوگا کہ ’’میرا دماغ کام نہیں کر رہا ہے‘‘ تناؤ کی وجہ سے ہمارا ذہن سوچنے کی صلاحیت سے محروم ہوجاتا ہے ، مزاج میں چڑچڑا پن جھنجھلاہٹ اور بلاوجہ غصہ آنے لگتا ہے ۔ ایسے میں آپ کا یکسو ہونا انتہائی ضروری ہوگا، یکسوئی سے آپ کے اندر صوفیاء کی اصطلاح میں ’’خلوت در انجمن‘‘ کی کیفیت پیدا ہوگی اور مجمع میں بیٹھ کر بھی آپ اپنے ہدف، منصوبے اور منزل تک پہونچنے کے اسباب وعلل پر غور کر سکتے ہیں، اس کے لیے صوفیاء کے یہاں مختلف قسم کے مراقبے اور سائنسدانوں کے یہاں کسرت اور ریاضت کے آسان طریقے بتائے گئے ہیں، اس کے کرنے سے انسان تناؤ سے پاک زندگی گزارنے پر قادر ہوجاتا ہے اور اسے خیالات مجتمع کرنے کا ہنر آجاتا ہے۔

 خوش رہنا بھی آپ کی ذہنی صلاحیت کو بڑھاتا ہے، یقینا زندگی میں اتار چڑھاؤ آتے رہتے ہیں،پریشانیاں دکھ اور مصیبتیں زندگی کے ساتھ لگی ہوتی ہیں، لیکن جب آپ راضی برضاء الٰہی رہتے ہیں تو خوش رہنا آپ کے لیے مشکل نہیں ہوتا، بے اطمینانی ، بے چینی اور پریشانی سے ہم اسی وقت متاثر ہوتے ہیں، جب مرضی الٰہی اور مشیت خدا وندی پر آپ کا اعتماد کمزور ہوتا ہے ۔

 عام طور پر ایک منزل پر پہونچ کر آدمی مطمئن ہوجاتا ہے کہ ہم نے ہدف کو پالیا، یہ اطمینان انسان کو آگے بڑھنے سے روکتا ہے ، ایک ہدف کے بعد دوسرا طے کیجئے اور مسلسل آگے بڑھتے رہیے، ہدف تک پہونچنے سے قبل آپ کی زندگی مکمل ہو گئی تو بھی اس کا فائدہ آنے والی نسل کو یقینا پہونچے گا اور آپ جہاں پر کام چھوڑ کر گیے ہیں،آنے والے کو اس کے آگے کرنا ہوگا، یہ خود اپنے میں بڑی بات ہے ۔

 دنیا امید پر قائم ہے ، اس لیے ہمیشہ پُر امید رہیے، ہماری زندگی برف کی سل کی طرح پگھلتی رہتی ہے ، لیکن اللہ رب العزت نے ہمارے ذہن ودماغ کو امید سے بھر دیا ہے ، یہ امید ہمیں جینے کا حوصلہ دیتی ہے، امید ختم ہوجائے تو زندگی گزارنا دو بھر ہوجاتا ہے، اس لیے خود کو برتنے میں امید کی بڑی اہمیت ہے۔ پر سکون، کامیاب ، پر امید زندگی گذاریے اور اپنی صلاحیتوں کو استعمال کیجئے، منزل ، ہدف اور نشانے آپ کے قدم چومیں گے، اور آپ کامیابی سے ہم کنار ہوں گے۔

شاہی انداز میں ہوا شہاب الدین کی ڈاکٹر بیٹی کا نکاح ، دیکھیں شادی کی خوبصورت تصاویر

شاہی انداز میں ہوا شہاب الدین کی ڈاکٹر بیٹی کا نکاح ، دیکھیں شادی کی خوبصورت تصاویر

بہار کے مافیا رہے سابق رکن پارلیمنٹ مرحوم محمد شہاب الدین (Mohammad Shahabuddin) کی بیٹی حرا شہاب (Hera Shahab Marriage) پیر کے روز رشتہ ازدواج میں منسلک ہوگئیں۔ پیر کی رات ان کی شادی پورے دھوم دھام سے ہوئی۔ پیر کو ہی شہاب الدین کے بیٹے اسامہ کا ولیمہ بھی تھا۔ سیوان میں یہ شادی بالکل شاہی انداز میں ہوئی، جس میں کئی وی وی آئی پی اور وی آئی پی لوگوں نے بھی شرکت کی۔ دلہن کے سرخ لال جوڑے میں سجی دھجی حرا شہاب کی شادی مشرقی چمپارن ضلع کی موتیہاری کے رانی کوٹھی سے مشہور کسان سید افتخار خان کے ڈاکٹر بیٹے شادمان سے ہوئی۔ (تمام تصاویر مرتنجے کمار سنگھ)

پیر کے روز سیوان واقع پرتاپ پور گاوں میں شادمان تقریباً دو سو گاڑیوں میں اپنی بارات لے کر سیوان محمد شہاب الدین کے گھر پہنچے۔ یہاں ان کا والہانہ استقبال کیا گیا اور دولہا- دلہن کا شاہی انداز میں نکاح ختم ہوا۔ اس دوران گاوں سمیت آس پاس کے علاقے کو دلہن کی طرح سجایا گیا تھا۔

اس خاص انعقاد کے لئے محمد شہاب الدین کے گھر اور شادی کے مقام کو کافی جاذب نظر طریقے سے سجایا گیا تھا۔ اسامہ کی موجودگی میں ہی نکاح کا پروگرام ہوا۔ شادی کو لے کر کافی دور تک پھیلے ہوئے علاقے میں ٹینٹ لگایا گیا تھا۔ اس کے سجاوٹ کی تیاری کئی دنوں سے چل رہی تھی۔ حرا شہاب کے نکاح کے علاوہ پیر کے روز ہی محمد شہاب الدین کے بیٹے اسامہ کا ولیمہ بھی ہوا۔ یہاں اسامہ پوری طرح سے میزبان کے کردار میں تھے۔ دونوں پروگرام شاہی انداز میں ہی ختم ہوئے۔

حرا شہاب کی شادی میں تیجسوی یادو، عبدالباری صدیقی، پپو یادو سمیت کئی خاص مہمان شریک ہوئے۔ تیجسوی یادو کے پہنچتے ہی وہاں کافی بھیڑ جمع ہوگئی۔ آر جے ڈی کے کارکنان اور تیجسوی کے حامی ان کے ساتھ سیلفی لینے کے لئے بے قرار نظر آئے۔

شادی میں شامل ہونے پہنچے پپو یادو نے اسامہ کو گلے لگاکر مبارکباد پیش کی۔ اس دوران انہوں نے تیجسوی یادو اور عبدالباری صدیقی سے کافی دیر تک بات چیت کی۔ اسامہ سبھی آنے والے مہمانوں کے استقبال میں مصروف رہے۔

باراتیوں اور شادی میں آئے مہمانوں کو تمام طرح کے لذیذ پکوان پیش کئے گئے۔ اترپردیش کی راجدھانی لکھنو اور مغربی بنگال سمیت دیگر مقامات سے بلائے گئے باورچی اور کاریگروں نے 500 چولہوں پر لذیذ کھانا بنایا تھا۔

شہاب الدین کی بیٹی حرا شہاب کی شادی موتیہاری کے مشہور کسان افتخار خان کے بیٹے محمد شادنام کے ساتھ ہوئی ہے۔ دونوں نے ایم بی بی ایس کی پڑھائی کی ہے۔

اس سال یہ دوسرا موقع ہے جب شہاب الدین کے گھر شہنائی بجی ہو۔ اس سے پہلے اسی سال شہاب الدین کے بیٹے اسامہ کا بھی نکاح ہوا تھا، لیکن اسامہ کا ولیمہ یعنی ریسپشن باقی تھا۔ شہاب الدین کے بیٹے اسامہ کی شادی ایک ماہ پہلے ہی ہوئی تھی، جس میں لالو پرساد یادو کے دونوں بیٹے یعنی تیجسوی یادو اور تیج پرتاپ یادو بھی شامل ہوئے تھے۔

شادی میں شامل ہونے کے لئے جہاں باراتی 200 سے زیادہ لگزری گاڑیوں سے آئے تھے وہیں شہاب الدین کے داماد بھی شاہی بگھی کی سواری کرکے بارات کے ساتھ دروازے پر پہنچے۔ اس دوران انہوں نے صافا اور شیروانی پہن رکھی تھی۔