آپسی اتحاد کے لیے امارت شرعیہ کے تمام ارکان شوری کی ۳۰ ستمبر کومیٹنگ ضروری : نائب امیر شریعت

آپسی اتحاد کے لیے امارت شرعیہ کے تمام ارکان شوری کی ۳۰ ستمبر کومیٹنگ ضروری : نائب امیر شریعت

پھلواری شریف (اردو دنیا نیوز۷۲):امارت شرعیہ بہار اڈیشہ و جھارکھنڈ مسلمانوں کا دینی ، شرعی کارگزارو فعال ادارہ ہے جس نے ملت کی سر بلندی و حفاظت کے لئے تاریخی رکارڈ قائم کیا ہے نیز ملت کی شیرازہ بندی اورمسلمانوں کی صفوں میں اتحاد واتفاق پیدا کرنا امارت شرعیہ کا مشن رہا ہے۔ امارت شرعیہ بہار،اڈیشہ وجھارکھنڈ کے لیے آٹھویں امیر شریعت کے انتخاب کامعاملہ درپیش ہے ،اس سلسلہ میں چند اراکین شوریٰ کی طر ف سے ۱۰؍اکتوبر ۲۰۲۱ء کو انتخاب امیر کا اجلاس طلب کرنے کا فیصلہ کیا گیا ہے ،جس کی تیاریاں بھی چل رہی ہیں، اسی درمیان دوسرے کچھ اراکین شوریٰ نے ۹؍اکتوبر ۲۰۲۱ء کو انتخاب امیر کا اجلاس بلانے کا اعلان کیا ہے، ایک اعلان جھارکھنڈ کی طرف سے ۷؍اکتوبر ۲۰۲۱ء کا بھی آیاہے۔امارت شرعیہ کیلئے تین الگ الگ تاریخوں میں انتخاب امیر کا اعلان بتاتا ہے کہ امت میں زبردست انتشار ہے اور خود شوریٰ کے اراکین کئی حصوں میں منقسم ہیں اور الگ الگ رائے رکھتے ہیں،اس طرح ملت کا شیرازہ بکھرتا جا رہا ہے اور خطرہ ہے کہ امارت شرعیہ کئی حصوں میں تقسیم نہ ہوجائے۔ اس دردناک صورت حال سے ملت میں بڑی بے چینی پائی جارہی تھی،علماء ودانشور ان اورعوام وخواص کے طبقے میں سے ہرکوئی بے چین نظر آرہا تھا،اور یہ صورت حال انہیں پریشان کئے ہوئی تھی ،آپس میں اتحاد کی کوشش کی کہ دونوں جانب سے پانچ پانچ لوگ بیٹھ کر اتحاد و اتفاق کی راہ نکال لیں مگر یہ کوشش بھی ناکام رہی ،اس خطرناک صورت حال کے پیش نظرنائب امیر شریعت مولانا شمشاد رحمانی نے یہ فیصلہ کیا ہے کہ ۳۰؍ستمبر کو تمام اراکین شوری کاہنگامی اجلاس طلب کیا جائے، تاکہ تمام اراکین شوری مل بیٹھ کر ایک ہی تاریخ پر متفق ہو جائیں، اورملت کے شیرازہ کو منتشر ہونے سے روک سکیں، ان کا کہنا ہے کہ اس اجلاس سے میرا مقصد اس کے علاوہ کچھ نہیں ہے کہ امارت شرعیہ کو اختلاف و انتشار سے محفوظ رکھا جائے،اور اپنی صف میں اتحاد کے لئے ہر ممکن تدبیر کی جائے تاکہ انتشار کے اس ماحول میں عنداللہ و عندالناس بری الذمہ رہوں۔ انھوں نے تمام ارکان شوری سے گزارش کی ہے کہ ۳۰؍ستمبر کو ۱۰؍بجے دن میں مرکزی دفتر امارت شرعیہ پھلواری شریف پٹنہ میں تشریف لائیں،اختلاف کو ختم کرنے میں تعاون کریںاور اتحاد کی اس کوشش کو کامیاب فرمائیں۔دعوت نامہ اراکین شوری کی خدمت میں بھیجاجارہاہے،فون سے بھی اس کی اطلاع دی جارہی ہے،اگر دعوت نامہ کسی وجہ سے نہ مل سکے، یا فون سے رابطہ نہ ہوسکے، توپہلے کے وائرل شدہ ویڈیو اور اس اخباری بیان کو ہی دعوت نامہ سمجھا جائےاور ۳۰؍ستمبر ۲۰۲۱ء کی میٹنگ میں شرکت کی زحمت کی جائے

پٹرول ، ڈیزل کی قیمتوں میں اضافہ بدستور جاری

پٹرول ، ڈیزل کی قیمتوں میں اضافہ بدستور جاری

نئی دہلی ،28؍ ستمبر (اردو دنیا نیوز۷۲ )
پٹرول اور ڈیزل کی قیمتوں نے ملک میں ایک بار پھر قہر برپا کر دیا ہے۔ منگل 28 ستمبر 2021 کو ملک میں آج ڈیزل کی قیمتوں میں ایک بار پھر اضافہ ہوا ہے ، جبکہ پٹرول کی قیمتوں میں بھی اضافہ ہوا ہے ،ڈیزل میںگزشتہ پانچ دنوں میں چوتھی بار اضافہ کیا گیا ہے ، آج ڈیزل کی قیمت میں25 سے 27 پیسے کا اضافہ کیا گیا ہے۔ نیز ملک بھر کے شہروں میں پٹرول 20 سے 22 پیسے مہنگا ہو گیا ہے۔ تقریبا دو ماہ بعد پٹرول کی قیمتوں میں اضافہ ہوا ہے۔ واضح رہے کہ اس سے پہلے آئل مارکیٹنگ کمپنیوں نے 24 ، 26 اور 27 ستمبر کو بھی ڈیزل کی قیمتوں میں اضافہ کیا تھا۔
مختلف شہروں میں پٹرول اور ڈیزل کی قیمتیں:
دہلی: پٹرول - .3 101.39 روپئے فی لیٹر ،ڈیزل - 89.57 روپئے فی لیٹر
ممبئی: پٹرول - 107.47 روپئے فی لیٹر ،ڈیزل - 97.21 روپئے فی لیٹر
کولکاتہ: پٹرول - .8 101.87 روپئے فی لیٹر، ڈیزل - 92.62 روپئے فی لیٹر
چنئی: پٹرول - 99.15 روپئے فی لیٹر، ڈیزل - 94.17 روپئے فی لیٹر
بنگلورو: پٹرول - 104.92 روپئے فی لیٹر، ڈیزل - 95.06 روپئے فی لیٹر
بھوپال : پٹرول - 109.85 روپئے فی لیٹر، ڈیزل - 98.45 روپئے فی لیٹر
لکھنؤ: پٹرول - 98.51 روپئے فی لیٹر ، ڈیزل - 89.98 روپئے فی لیٹر
پٹنہ: پٹرول - 104.04 روپئے فی لیٹر، ڈیزل - 95.70 روپئے فی لیٹر
چندی گڑھ: پٹرول - 97.61 روپئے فی لیٹر ،ڈیزل - 89.31 روپئے فی لیٹر

30 ستمبر کومجلس شوری کی کوئی میٹنگ نہیں : رکن شوری شاہنواز احمد خان

30 ستمبر کومجلس شوری کی کوئی میٹنگ نہیں : رکن شوری شاہنواز احمد خان

رانچی:28؍ستمبر(اردو دنیا نیوز۷۲)
مجلس شوریٰ و عاملہ امارت شرعیہ کے معزز رکن اور امارت شرعیہ بہار، اڈیشہ و جھارکھنڈ ٹرسٹ کے ٹرسٹی جناب شاہنواز احمد خان صاحب نے اپنے ایک بیان میں کہا ہے کہ ارکان شوریٰ کی نصف سے زیادہ تعداد نے اپنی شرعی اور دستوری ذمہ داری کا احساس کرتے ہوئے 10اکتوبر 2021 کو المعہد العالی کیمپس پھلواری شریف، پٹنہ میں امیر شریعت کے انتخاب کا فیصلہ کر دیا ہے ، یہ فیصلہ بالکل دستوری ہے اور دستور کی دفعہ 17کی شق )و(اور ٹرسٹ ڈیڈ میں مذکور دستور امارت شرعیہ کی دفعہ 09کی شق (F) میں ارکان شوریٰ کو جو اختیارات دیے گئے ہیں ، اس کا استعمال کرتے ہوئے مجلس شوریٰ نے اس کا فیصلہ کیا۔ اس فیصلہ کے مطابق دفتر امارت شرعیہ نے کارروائی شروع کر دی ہے، مولانا شمشاد رحمانی صاحب نے بھی ارکان شوریٰ کے فیصلہ کی تائید و توثیق کرتے ہوئے دفتر کو 10 اکتوبر کے اجلاس کی تیاری کی ہدایت دے دی اور انہوں نے خود مشاہدین کے نام خطوط بھیجے۔
اب جبکہ صرف چند دن ارباب حل و عقد کے اجلاس میں باقی رہ گئے ہیں تو نائب امیر شریعت نے خاص منصوبہ بندی کے ساتھ شوریٰ کا اجلاس اپنی ویڈیو جاری کر کے بلانے کی بات شروع کر دی ہے ، جس کا واحد مقصد انتخاب امیر کی کارروائی میں رخنہ ڈالنا ہے ، اسے ہم سب ارکان شوریٰ مسترد کرتے ہیں ۔ دستور کے مطابق اب نائب امیر شریعت کو کوئی شوریٰ کا اجلاس بلانے یا کوئی بھی ایسی میٹنگ بلانے کا کوئی اختیار نہیں ہے جس سے ارباب حل و عقد کے اجلاس پر کوئی اثر پڑنے کا اندیشہ ہو اس لیے ہم اراکین شوریٰ 10اکتوبر 2021 کے اجلاس ارباب حل و عقد میں شرکت کی تمام ارباب حل وعقد سے گزارش کرتے ہیں۔اس اجلاس سے پہلے ہمیں کوئی اور دوسرا اجلاس منظور نہیں ہے۔

آئی پی ایل: کولکاتا نے دہلی کو 3 وکٹ سے شکست دے کر پلے آف کی امیدوں کو زندہ رکھا

آئی پی ایل: کولکاتا نے دہلی کو 3 وکٹ سے شکست دے کر پلے آف کی امیدوں کو زندہ رکھا

انڈین پریمیر لیگ (آئی پی ایل) کے 14ویں سیزن کے 41ویں مقابلے میں آج کولکاتا نائٹ رائڈرس (کے کے آر) نے دہلی کیپٹلز (ڈی سی) کو 3 وکٹ سے شکست دے دی۔ شارجہ میں کھیلے گئے اس مقابلے میں دہلی نے پہلے بلے بازی کرتے ہوئے 20 اوور میں 9 وکٹ کے نقصان پر 127 رن بنائے تھے۔ جواب میں کولکاتا نے 128 رن 7 وکٹ کے نقصان پر 18.2 اوور میں ہی بنا لیا۔ اس جیت کے ساتھ ہی کولکاتا کی پلے آف میں پہنچنے کی امیدیں بھی زندہ ہیں۔

کولکاتہ کا ٹاس جیت کر پہلے گیندبازی کرنے کا فیصلہ

شارجہ: کولکاتہ نائٹ رائیڈرز (کے کے آر) کے کپتان ایون مورگن نے منگل کو دہلی کیپیٹلز کے خلاف آئی پی ایل 14 کے 41 ویں میچ میں ٹاس جیت کر پہلے گیندبازی کرنے کا فیصلہ کیا، کولکاتہ نے ٹیم میں دو تبدیلیاں کی ہیں جبکہ دہلی نے بھی ایک تبدیلی کی ہے۔ کولکاتہ نے آندرے رسل اور پرسدھ کرشنا کی جگہ بالترتیب ٹم ساؤتھی اور سندیپ واریئر کو پلیئنگ الیون میں شامل کیا ہے۔ ساتھ ہی دہلی نے پرتھوی شا کی جگہ اسٹیون اسمتھ کو شامل کیا ہے، دونوں ٹیمیں اس طرح ہیں: کولکاتہ نائٹ رائیڈرز: ایون مورگن (کپتان)، شبھمن گل، وینکٹیش ایئر، راہل ترپاٹھی، نتیش رانا، دنیش کارتک (وکٹ کیپر)، سنیل نارائن، لاکی فرگوسن، ٹم ساؤتھی، ورون چکرورتی، سندیپ واریئر۔ دہلی کیپیٹلز: رشبھ پنت (کیپٹن اور وکٹ کیپر)، شکھر دھون، اسٹیون اسمتھ، شریس ایئر، شمرون ہیٹ مائر، للت یادو، اکشر پٹیل، روی چندرن اشون، کگیسو ربادا، اینریک نورتجے، آویش خان۔

پاکستان کرکٹ ٹیم کے سابق کپتان انضمام الحق کو دل کا دورہ مشہور کرکٹ کھلاڑی کا دل کا آپریشن کیا گیا

پاکستان کرکٹ ٹیم کے سابق کپتان انضمام الحق کو دل کا دورہ مشہور کرکٹ کھلاڑی کا دل کا آپریشن کیا گیا

لاہور،28ستمبر- پاکستان کے سابق کپتان اور مشہور بلے باز انضمام الحق کا آج دل کا آپریشن کیا گیا ۔ آپریشن کے بعد ان کی صحت میں بدستوربہتری آرہی ہے 51سالہ دنیا کے مشہور بلے باز کو کل سینے میں درد ہو ا اور انہیں اسی وقت لاہور کے ایک پرائیویٹ اسپتال میں داخل کیا گیا ۔ ابتدائی جانچ سے ان کے دل کے عارضہ کے بارے میں رپورٹ میں کوئی تشویشناک بات نظر نہیں آئی لیکن مزید ٹسٹوں کے بعد یہ پتہ چلا کہ انہیں دل کا دورہ پڑا ہے اور انہیں اسی وقت ان کا آپریشن کیا گیا ۔ ڈاکٹروں کی ٹیم ان کی برابر نگرانی کررہی ہے۔ دنیا کے مختلف کھلاڑیوں نے ان کی صحتیابی کے لئے دعا کی ۔درخواست کی ہے

سدھوکا پنجاب کانگریس صدرعہدہ سے اچانک استعفیٰ

نوجوت سنگھ سدھو کا پنجاب کانگریس صدرعہدہ سے اچانک استعفیٰ

• 
  
 
•   
 
• 
  
  

 

چنڈی گڑھ: سابق وزیراعلیٰ پنجاب کیپٹن امریندر سنگھ کے دہلی کے دورے کے بارے میں آج صبح سے ہی قیاس آرائیاں جاری تھیں۔

اس دوران اچانک سہ پہر کو پنجاب ریاستی کانگریس کے صدر نوجوت سنگھ سدھو نے استعفیٰ دے دیا۔واضح ہوکہ پنجاب کے چنی کابینہ میں وزراء میں قلمدان تقسیم کیے گئے ہیں۔ سکھجندر سنگھ رندھاوا کو محکمہ داخلہ جبکہ او پی سونی کو محکمہ صحت دیا گیا ہے۔

پنجاب کے وزیر اعلیٰ چرنجیت سنگھ چننی سے نوجوت سنگھ سدھو کے پنجاب کانگریس کے سربراہ کے طور پر استعفیٰ کے بارے میں پوچھے جانے پر کہا کہ میرے پاس کوئی معلومات نہیں

کانگریس صدر سونیا گاندھی کو لکھے گئے خط میں نوجوت سنگھ سدھو نے کہا ہے کہ میں پنجاب کے مستقبل اور پنجاب کی فلاح کے ایجنڈے کے ساتھ سمجھوتہ نہیں کر سکتا۔ ایسے میں میں پنجاب پردیش کانگریس کمیٹی کے صدر کے عہدے سے استعفیٰ دے رہا ہوں۔

سدھو نے اپنے عہدے سے استعفیٰ دے دیا ہے۔ تاہم انہوں نے پارٹی میں رہنے کی بات کہی ہے۔ سدھو نہیں سونیا گاندھی کو خط کے ذریعہ استعفیٰ کے بارے میں مطلع کیاہے۔ سونیا گاندھی کو لکھے گئے ایک خط میں انہوں نے کہا ، 'کسی کے کردار کا زوال سمجھوتے سے شروع ہوتا ہے۔

میں پنجاب کے مستقبل اور پنجاب کی فلاح کے ایجنڈے پر کبھی سمجھوتہ نہیں کر سکتا۔ اس لیے میں پنجاب کانگریس کمیٹی کے صدر کے عہدے سے استعفیٰ دیتا ہوں۔ میں کانگریس کی خدمت جاری رکھوں گا۔

ہم آپ کو بتاتے چلیں کہ پچھلے کچھ مہینوں سے ان کا سابق وزیراعلیٰ پنجاب کیپٹن امریندر سنگھ سے جھگڑا چل رہا تھا۔ بعد میں کپٹین نے وزیر اعلیٰ کے عہدے سے استعفیٰ دے دیا۔

اس کے بعد کانگریس نے چرنجیت سنگھ چنی کو پنجاب کا سی ایم بنا دیا۔ اس کے بعد یہ خیال کیا گیا کہ کانگریس نے پنجاب میں سب کچھ ٹھیک کیا ہے۔ تاہم اب سدھو نے استعفیٰ دے کر سب کو حیران کر دیا ہے۔

کانپور کے دیہی علاقوں میں ڈینگی کے مریضوں میں تیزی سے اضافہ

کانپور کے دیہی علاقوں میں ڈینگی کے مریضوں میں تیزی سے اضافہ

کانپور ، 28 ستمبر ۔ اترپردیش کے ضلع کانپور میں خاص طور پر دیہی علاقوں میں موسم میں تبدیلی کی وجہ سے ڈینگی بڑھ رہا ہے۔ ضلع کے کرسولی گاؤں میں اب تک 13 مریض فوت ہوچکے ہیں۔ اگرچہ محکمہ صحت ڈینگی لاروا کو باقاعدگی سے اسپرے کرکے اور بہتر علاج کے ذریعے ختم کررہا ہے ، صحت یابی کی شرح میں بھی تیزی سے اضافہ ہورہا ہے۔ ستمبر کے مہینے میں 10 برس بعد جنوب مغربی مانسون بھی اتنا ہی فعال ہوا ہے ، کبھی تیز بارش اور کبھی تیز دھوپ کی وجہ سے موسم بدل گیا ہے۔ اس کی وجہ سے ڈینگی کا اثرمسلسل بڑھ رہا ہے۔ خاص طور پر دیہی علاقے سب سے زیادہ متاثر ہو رہے ہیں۔ اب تک ضلع میں 201 مریضوں میں ڈینگی کی تصدیق ہوچکی ہے جن میں سے 164 مریض دیہی علاقوں اور 37 مریض شہری علاقوں کے ہیں۔ صرف کلیان پور کے کرسولی گاؤں میں ، 13 افراد ہلاک ہوچکے ہیں ، میڈیکل ٹیمیں دیہات میں چوبیس گھنٹے ڈیرے ڈال ہوے ہیں۔ یہ الگ بات ہے کہ سرکاری اعداد و شمار میں ڈینگی سے ایک بھی موت کی اطلاع نہیں ملی ہے۔ چیف میڈیکل آفیسر ڈاکٹر نیپال سنگھ نے بتایا کہ ڈینگی لاروا کو تباہ کرنے کے لیے دیہی علاقوں سے شہری علاقوں تک ادویات کا چھڑکاؤ کیا جا رہا ہے۔ اب تک ضلع میں 169 مریض علاج کے بعد صحت مند ہو چکے ہیں۔ ضلع میں ڈینگی کے 32 فعال کیسز ہیں ، ان کا علاج جاری ہے۔ سی ایم او نے بتایا کہ کرسولی گاؤں کے 47 گھروں میں ڈینگی لاروا پایا گیا ہے۔ اسے ہیلتھ ورکرز نے تباہ کر دیا۔ اینٹی لاروا ادویات کا گھروں میں سپرے بھی کیا گیا ہے۔