یہ الیکشن اب 80 ( ہندو ) بمقابلہ 20 ( مسلم ) فیصد کے درمیان : یوگی آدتیہ ناتھ

یہ الیکشن اب 80 ( ہندو ) بمقابلہ 20 ( مسلم ) فیصد کے درمیان : یوگی آدتیہ ناتھ

لکھنؤ : یوپی اسمبلی انتخابات سے پہلے اتر پردیش کے وزیر اعلی یوگی آدتیہ ناتھ نے کہا کہ یہ انتخاب 80 بمقابلہ 20 فیصدکا ہوگا۔ یوگی آدتیہ ناتھ کے ذریعہ بتائے گئے اعداد و شمار تقریباً اتر پردیش میں ہندوؤں اور مسلمانوں کے تناسب سے میل کھاتے ہیں، جہاں اگلے ماہ اسمبلی انتخابات ہونے والے ہیں۔راجدھانی لکھنؤ میں ایک پرائیویٹ نیوز چینل کے زیر اہتمام ایک پروگرام میں اتر پردیش کے سی ایم یوگی آدتیہ ناتھ سے برہمن ووٹوں سے متعلق سوال پوچھا گیا۔ اس کے جواب میں وزیر اعلیٰ نے کہا کہ ''الیکشن اس سے کہیں آگے بڑھ چکا ہے ، اب یہ الیکشن 80 بمقابلہ 20فیصد کا ہے''۔پروگرام کے میزبان نے پھر کہا کہ اویسی نے کہا ہے کہ وہ 19 فیصد ہیں۔ اسد الدین اویسی، اے آئی ایم آئی ایم کے سربراہ اورحیدرآباد کے ایم پی ہیںیوگی آدتیہ ناتھ نے میزبان کے سوال کا مختصر جواب دیا۔چیف منسٹر یوگی نے کہاکہ لڑائی اب 80 اور 20فیصد کی ہوچکی ہے، جو لوگ گڈ گورننس اور ترقی کی حمایت کرتے ہیں وہ 80 فیصد بی جے پی کے ساتھ ہیں اور جو کسان مخالف ہیں، ترقی مخالف ہیں، غنڈوں، مافیا کی حمایت کرتے ہیں۔ وہ 20 فی صد اپوزیشن کے ساتھ ہیں۔

الحاج غلام سرور: آئی جو ان کی یاد تو آتی چلی گئیمفتی محمد ثناء الہدیٰ قاسمی نائب ناظم امارت شرعیہ وناظم وفاق المدارس الاسلامیہ

الحاج غلام سرور: آئی جو ان کی یاد تو آتی چلی گئی

مفتی محمد ثناء الہدیٰ قاسمی نائب ناظم امارت شرعیہ وناظم وفاق المدارس الاسلامیہ

بات ان دنوں کی ہے ، جب میں مدرسہ احمدیہ ابا بکر پور ویشالی میں استاذ تھا ، جناب شاہ نواز احمد خان صاحب بہار اسٹیٹ مدرسہ ایجوکیشن بورڈ کے سکریٹری تھے اور مولانا شکیل احمد قاسمی جواہر نو ودیہ ودیالیہ چائی باسہ میں ٹیچر ہوا کرتے تھے ، تینوں میں ایک بات قدرِ مشترک تھی کہ تینوں مختلف اوقات میں طلبہ تحریک سے وابستہ رہ چکے تھے، اور تعلیم وتربیت کے نئے نئے منصوبوں کے وضع کرنے میں طبیعت خوب لگتی تھی اور ذہن خوب چلتا تھا ، ایک ملاقات میںہم تینوں اس بات پر متفق ہو گئے کہ بہار اسٹیٹ مدرسہ ایجوکیشن بورڈ کی تاریخ مرتب کی جائے تاکہ اس کے پردے میں بہار کی مذہبی تعلیم کی تاریخ بھی مرتب ہوجائے، چنانچہ اس کے لئے قرعہ مجھ دیوانے کے نام نکل آیا ، ابا بکر پور سے پٹنہ میری خدمت منتقل کر لی گئی ، اور میں اس کی صحرانوردی میں لگ گیا، کم وبیش چار سال کی محنت کے بعد جب تصنیف سے فراغت ہوئی تو اس وقت کے چیر مین پروفیسر محمد سہراب مرحوم ومغفور کا مشورہ ہو اکہ اسے نظر ثانی کے لئے جناب غلام سرور صاحب کی خدمت میں پیش کرنا چا ہئے، وہ دیکھ بھی لیں اور اس پر مقدمہ بھی لکھ دیں ، چنانچہ کتاب کے مسودہ کی فوٹو کاپی مجلد ان کی خدمت میں پیش کر دی گئی ،میں مطمئن ہو گیا ، اگلے ہفتہ حکم ہوا کہ آپ کو غلام سرور صاحب نے بلایا ہے ، مرتا ، کیا نہ کرتا۔

 ملاقاتیں دو  پہلے بھی تھیں ، ایک بار مولانا شکیل احمدقاسمی کے ساتھ ملا تھا، جب وہ افتخار اکبر کے ساتھ مل کر تجسس نکالنے کا ارادہ کر رہے تھے اور غلام سر ور صاحب کے پاس اس راستے کے پیچ وخم معلوم کرنے اور مشورہ لینے پہونچے تھے ، اس موقع سے غلام سرور صاحب نے انہیں مشورہ دیا تھا کہ اس کام میں مت لگو، مجھے دیکھو پوری زندگی لگا دیا ، نتیجہ کیا نکلا ؟ اس ملاقات میں مولانابیتاب صدیقی مرحوم بھی تھے ، انہوں نے اس موضوع پر کچھ کہنا چاہا ، تو مولانا شکیل احمدقاسمی نے انہیں روک دیا، ملاقات بہت اچھی نہیں رہی تھی ، وجہ یہ تھی کہ وہ جو کچھ صحافت کے حوالہ سے کہہ رہے تھے ، اس میں مایوسی کی جھلک تھی ، ہم لوگوں کے پاس تجربہ تو تھا نہیں ، تجربہ انہیں کے پاس تھا ، اور جب تجسس کے چند شمارے نکال کر افتخار اکبر نے اسے بند کر دیا تو یقین کرنا پڑا کہ قلندر ہر چہ گوید دیدہ گوید۔

دوسری ملاقات مدرسہ احمدیہ ابا بکر پور ویشالی کے ایک جلسہ میں ہوئی تھی، گرج دار پاٹ دار آواز ، آج بھی کانوں سے ٹکراتی محسوس ہوتی ہے، تقریر کی ابتدا میں ہی واضح کر دیا تھا کہ مجھے نہ نذرانہ چاہئے نہ محنتانہ ، نہ رخصتانہ اور نہ ہی ہرجانہ ، اس لئے جو کہوں گا ، صاف صاف کہوں کا اور حق کہوں گا، حق کے علاوہ کچھ نہیں کہوں گا، پھر انہوںنے مدرسہ بورڈ کی تشکیل میں اپنی جد وجہد کا ذکر کرتے ہوئے فرمایا تھا کہ میرے ذاتی گناہ تو اللہ معاف کر دے گا، ، یہ میرا اجتماعی گناہ ہے ، خدا معلوم یہ قابل معافی ہویا نہ ہو، وہ مدرسہ بورڈ سے ملحق مدارس کی کار کر دگی سے غیر مطمئن تھے اور جب وہ غیر مطمئن ہوتے تو ان کا لب ولہجہ خاصہ غضب ناک ہوجا تا تھا، وہ اس زمانہ میں اسپیکرتھے۔

ان کے یہاں جانے سے پہلے دوستوں سے دریافت کیا تھا، جن کی آمد ورفت ان کے یہاں برابر رہتی تھی ، کہنے لگے کہ میرا ذکر نہیں کیجئے گا کہ آپ کا تعلق مجھ سے ہے ،میں نے ایسے دوستوں پر چار حرف پڑھے ،جو اتنا بھی ساتھ دینے کو تیار نہیں تھے، حکم حاکم مرگ مفاجات، ڈرتا ڈرتا پہونچا، مجھے ایک صاحب نے بتا دیا تھا کہ پہلی ڈانٹ ان کی سن لیجئے گا اور اس کے بعد جو کہیے گا وہ سنیں گے ، چنانچہ میںنے ایسا ہی کیا ، پہلے وہ خوب گرجے ، آپ کانگریسی ہیں ،بورڈ میں نے بنایا اور سارا کریڈٹ گورنر کو آپ نے دیدیا ، یہ بے انصافی کی بات ہے ، اسے صحیح کیجئے۔ خاموش ہوئے تو میں نے کہا آپ جو کچھ داخل کرنا چاہتے ہیں، وہ مجھے دیدیجئے ،میں شامل کر دوں گا، بالکل نرم پڑ گئے، ایک کتاب تھمائی اور کہا مواد اس میں سے لے لیجئے اور ایک ہفتہ بعد آئیے، چنانچہ میں واپس آگیا ، ایک ہفتہ بعد حاضری ہوئی ، پوچھا ، شامل کر دیا میں نے کہا ، نہیں ، فرمایا ، کیوں؟ میںنے کہا کہ یہ تاریخ ہے ، قصیدہ نہیں ، اس کتاب سے کچھ شامل کرنے کا مطلب قصیدہ خوانی ہے ، اور میں نہیں چاہتا کہ میری کتاب کی تاریخی حیثیت مجروح ہو ،پھر گرجنے لگے ، فرمایا ، جہاں جہاں آپ نے مجھ سے علمی اختلاف کیا ہے میںنے اسے برداشت کر لیا ، لیکن یہ تو تاریخی غلطی ہے ، میں نے کہا تاریخ وہ نہیں ہے جو آپ کہہ رہے ہیں تاریخ یہ ہے کہ آرڈی نینس کئی جاری ہوئے، سب پر گورنر کے دستخط ہیں ، اس حوالہ سے ان کا ذکر ہے ، وزیر تعلیم کی حیثیت سے آپ نے  بورڈ کی تشکیل میںجد وجہد کی ہے، اس کا ذکر بھی توپورے انصاف کے ساتھ کیا گیا ہے ۔ بات آگے بڑھی تو مدارس ملحقہ کی کار کر دگی پر آواز اٹھا نا شروع کر دیا ، میں بھی ان دنوں مدرسہ احمدیہ ابا بکر پور میں تھا ، اس لئے گویا ساری چوٹ مجھ پر پڑ رہی تھی ، میں نے عرض کیا کہ آپ اپنی رائے من وعن لکھ دیں اور وہ مقدمہ کی شکل میں اس کتاب کی زینت بن جائے ، اور ہمیشہ کے لئے محفوظ ہو جائے ، بات ا نہیں پسند آگئی، لکھا اور خوب لکھا ، مدرسہ بورڈ اور مدارس ملحقہ کے حوالہ سے جو شکایات انہیں تھیں بلا خوف لومۃ لائم اس کا اظہار اس مقدمہ میں انہوں نے کیا ہے۔

 واقعہ یہ ہے کہ انہوں نے اپنی اس تحریر میں سارا کرب الفاظ میں اڈیل دیا ہے، انہوں نے اس مسودہ پر جو نشانات لگائے اور جو تصحیح کی ہے ،وہ آج بھی نوراردو لائبریری حسن پور گنگھٹی ویشالی میں موجود ہے ، پہلی بار انہوں نے مجھے بتایا اور بتایا کیا کتاب میں نشان لگا دیاکہ’’ حضرت مولانا ‘‘کے ساتھ آخر میں ’’صاحب ‘‘نہیں لگے گا کہنے لگے نام کے آگے پیچھے دونوں طرف القاب وآداب لگانا قواعد کے خلاف ہے، اور یہ صرف مولویانہ اردو میں پایا جاتا ہے۔

 کتاب کا اجرا ڈاکٹر ظہیر الدین صاحب کی دورصدارت میں ہوا، ان دنوں وہ بیمار چل رہے تھے ، شاہ نواز احمدخان صاحب جن کی تحریک پر  یہ کام شروع ہوا تھا، مجھے لے کر ان کی سرکاری رہائش گاہ پر گئے ، بہت تپاک سے ملے، کتاب پیش کیا، خوش ہوئے ، ناشتہ وغیرہ کرایا، شاہ نوازخان کی جو شامت آئی تو انہوں نے پوچھ دیا کہ راعین کے کیا معنی ہیں ؟فرمایا : آپ نے شمس الہدیٰ سے پڑھا ہے بتائیے ، شاہ نواز صاحب نے معاملہ میری طرف محول کر دیا کہ یہ عربی کے اسکالر ہیں ، ، میری طرف گھور کر دیکھا ، میںنے کہا نگراں کے آتے ہیں ، بس بگڑنے لگے ، کیوں نہیں کہتے چرواہا کے آتے ہیں میں نے کہا: چرواہا کو بھی چرواہا اس لئے کہتے ہیں کہ وہ بکری کا نگراں ہوتا ہے ، میں نے کہا ، حدیث میں آیا ہے ’’کلکم راع  وکلکم مسئول عن رعیتہ‘‘ شاہنواز صاحب نے پوچھا کہ یہ لوگ کہاں سے آکر ہندوستان میں آباد ہوئے کہنے لگے ثابت کردوہم غیر ملکی ہیں ،تم سب اسی کام پر لگے ہوئے ہو ، ہم لوگ یہیں پلے بڑھے اور یہ نسل یہیں پروان چڑھی ، یہ خالص ہندی نسل ہے ، تیور اتنے سخت تھے کہ تھوڑی دیر بعد ہم لوگوں کو لوٹ جانے میں ہی عافیت محسوس ہوئی ۔یہ تھے غلام سر ور ، بے باک ، بے خوف ، جوبات بیٹھ گئی، بیٹھ گئی ، جہاں اڑ گئے، اڑ گئے،کلیم عاجز صاحب نے ایک جگہ لکھا ہے ’’ غلام سرور تو شیر تھا سیاست میں قید ہو کر رہ گیا‘‘ ۔

پھر میں امارت شرعیہ آگیا، یہاں رہتے ہوئے کبھی ملاقات کی نوبت نہیں آئی۔ اپنی مخصوص افتاد طبع کی وجہ سے امارت شرعیہ اور اس کے اکابر بھی ان کی قلم کی زد میں آتے رہے ، بہت سارے مواقع پر انہوںنے امارت کی کار کر دگی پر سوالات اٹھائے ؛لیکن جب انہوں نے امارت شرعیہ کو قریب سے دیکھا اور ۱۲؍ جون ۱۹۶۳ئ؁ کو یہاں تشریف لائے تو انہیں بے پناہ مسرت ہوئی ، انہوں نے اپنی اس مسرت کا اظہار امارت شرعیہ کے معائنہ بک میں کیا اور لکھا کہ: 

’’ آج پہلی بار اس کا موقع ملا کہ امارت کے دفتر میں تھوڑی دیر بیٹھ کر اس کے مختلف شعبوں کی کار کر دگی سے واقفیت حاصل کی جائے، بیت المال ، دار القضاء ، نقیب ، دار الاشاعت وغیرہ کے شعبے مسلمانوں کے لئے جو کام کر رہے ہیں وہ صرف غنیمت ہی نہیں بلکہ بہت غنیمت ہے ، اس دور میں مسلمانوں کو ان کے دین کی طرف رجوع کرنا اور ان کی  واعانت کرنی ،نیز ان کے باہمی مقدمات کا از روئے شریعت فیصلہ کرنا اہم کام ہیں اور اس اعتبار سے آج بھی امارت مفید کام کر رہا ہے، اس کے کاموں کو آگے بڑھانے کی ضرورت ہے ، مسلمانوں کو لازم ہے کہ امارت کے کاموں میں نہ صرف دلچسپی لیں ، بلکہ عملاً اشتراک وتعاون کا ہاتھ بھی دراز کریں‘‘

جسے جینا ہو مرنے کے لئےتیار ہوجائے گزشتہ جمعہ مورخہ ۷/جنوری ۲۰۲۲ءکواپنے ملک میں ایک غیرمعمولی واقعہ رونما ہوا ہے،جسےنہ بھلایاجاسکتا ہےاور نہ ہی اس کی افادیت کاکسی کوانکار ہوسکتا ہے۔

جسے جینا ہو مرنے کے لئےتیار ہوجائے 

گزشتہ جمعہ مورخہ ۷/جنوری ۲۰۲۲ءکواپنے ملک میں ایک غیرمعمولی واقعہ رونما ہوا ہے،جسےنہ بھلایاجاسکتا ہےاور نہ ہی اس کی افادیت کاکسی کوانکار ہوسکتا ہے۔

ابھی کچھ دنوں پہلےاترا کھنڈ میں دھرم سنسد منعقد کرکے بیس ہزار مسلمانوں کے قتل عام کا اعلان ہوا، اس کے ردعمل میں بیس ہزاربریلی کےبیباک مسلمان مولانا توقیر رضا خان کی دعوت پر مرنے اور قتل ہونے کے تیار ہوگئے،یہ جواب اپنے آپ میں بڑا پیغام کاحامل ہے اور بے نظیر بھی ہے۔

۷/جنوری کوجمعہ کی نماز کے بعد بریلی کے میدان میں سبھی اکٹھا ہوئے،سرپر کفن باندھ لیا،مرنےکے لئے تیار ہوگئےاور یہ کہنے لگے کہ؛ ہم نے ملک کی آزادی کی خاطر اپنی جان کی قربانی دی ہےاور آج بھی ملک کے لئےشہادت کا جام پینے کوہم تیار ہیں، ہم اپنے مذہب اپنے ملک اور اپنے رسول کی عظمت کے لئے جان دینے یہاں آئے ہیں، ہمیں مارو ہم تمہارا ہاتھ نہیں پکڑیں گے۔

مولانا توقیر رضا خان صاحب کااس جمہوری ملک میں یہ انوکھااحتجاج بڑا کامیاب اوربامراد رہاہے، یہ نئی حکمت عملی رہی بڑی کارگر رہی ہے،اور کامیابی سے ہمکنار بھی ہوئی ہے ،اس سےپورے ملک میں ایک پیغام گیا ہے،اور اس کی گونج دور دور تک سنائی دینے لگی ہے۔اور یہ فرق نمایاں ہوگیا ہے کہ ایک طرف سے مارنے اور قتل کرنے کی بات ہوئی ہے تو دوسری طرف سے ملک کے لئے مرنے اور قتل ہونے کی عملی تیاری ہے۔

مولانا محمود مدنی صاحب کا سپریم کورٹ میں اس عنوان پر مقدمہ دائر کرنا۲۰۲۲ءکا کامیاب لائحہ عمل کےطورپردیکھاگیاہےتووہیں مولاناتوقیر رضاخان کی یہ کوشش کی بھی بڑی پذیرائی ہورہی ہے۔

اس کی کامیابی کے لئے اتنا کہدینا کافی ہے کہ جو مسلمانوں کومشتعل کرنے کے لئے کوشاں رہےہیں اور خوف میں مبتلا کرنا چاہتے ہیں وہ خود ہی مشتعل ہوگئے ہیں اور خوف میں مبتلا ہوگئےہیں۔اس کی ڈھیر ساری مثالیں نظر آنی شروع ہوگئ ہیں،مسلمانوں کے بائیکاٹ کی باتیں کرتے ہیں تو کہیں خود اپنی جان کی دہائی دیتے نظر آرہےہیں۔

اس کامیابی پر مولانا کےساتھ ساتھ وہاں کے بیدار مغز مسلمانوں کو بھی مبارک باد ہے۔جنہیں بڑی خوبصورتی کے ساتھ مولانا نے غازی کا نام دیا ہے،کہ آپ سبھی اب غازی ہیں، واقعی اپنے آپ میں یہ ایک یادگار دن ہے اور ملک کے لئے تاریخ میں یہ تاریخ ساز واقعہ بھی ہے، جسے بریلی کے مسلمانوں نےاپنےسروں پر کفن باندھ کر یادگار بنادیا ہے ۔

اس میں ہمارے لئے بڑا سبق ہے۔

ملک میں ہم اسی وقت انقلاب کی امید کرسکتے ہیں جب ہم خوف سے باہر آجائیں،یہ بتلانے کی شدید ضرورت ہے کہ ہم وہ لوگ ہیں جو موت سے نہیں ڈرتے ہیں۔ابھی کرونا وائرس کی وبا نے دکھادیا ہے کہ یہ نفرت کے پرچار کرنے والے اپنی کٹیا میں دم دبائے بیٹھے تھے، ارتھی کو اٹھانے والا کوئی نہیں رہا تو مسلمانوں نے آکر آخری رسومات انجام دی ہے۔اس سے بھی ملک میں ایک اہم پیغام گیا ہے۔نفرت کے پجاریوں کواور

مسلمان کی بائیکاٹ کرنے والوں کو منھ کی کھانی پڑی ہے۔

مجھ سے ایک صاحب نے یہ کہا ہیکہ مولوی صاحب! ایک بیٹا جو دہلی سے کورونا پوزیٹیو ہوکرمیرے گاؤں آیا اسےاپنے گھر میں داخلہ نہیں ملا،والدین دور ہوگئے، وہ سبھی اپنی اپنی جان کی فکر کرنے لگے،میں نے اس کی دوا کی اور وہ صحتیاب ہوگیا، اپنے والدین سے زیادہ مجھ سے وہ محبت کرنے لگا ہے جبکہ میں مسلمان ہوں اور وہ ہندو ہیں۔

آج پھر یہ کورونا مضبوط شکل میں اومیکرون بنکر آگیا ہے۔اب ہمیں اپنا فرض ادا کرنا یے، ہندو مسلمان نہیں دیکھنا ہےاور نہ مذہب اسلام میں ایک پڑوسی کے مذہب کو دیکھنے کی تعلیم ملتی ہے بلکہ ہم ایک انسان کی خدمت کا جذبہ اپنے اندر پیدا کریں اور انسانیت کی خدمت کا فریضہ انجام دیں۔پھر ملک کے بدلتے حالات کا کھلی آنکھوں سے مشاہدہ کریں۔

اور اس بات کو ہمیشہ یاد رکھیں کہ جب بھی ہم نے موت کا خوف کیا ہے، ہم مارے گئے ہیں اورمذہب اسلام کابھی ہم سے بڑا نقصان ہوا ہے، اسلام کی دعوت رک گئی ہے،اورہمیں مزید خوف میں مبتلا کرنے کی کوشش ہوئی ہے۔

جب ہم ملک کے لئے اور دوسروں کے لئےمرنے کے لئے آمادہ ہوئے ہیں تو اسلام کابھی بھلا ہوا ہے،اور ہمیں کامیابی بھی ملی ہے، محبت جیت گئی ہے اور نفرت کا منھ کالا ہوگیا ہے،

جگر مراد آبادی کا یہ شعر اس عنوان پر کیا خوب صادق ہے اور موجودہ وقت میں یہ مصرع ہمارے لئےمشعل راہ بھی ہے:

یہ مصرع کاش نقش ہر درودیوار ہوجائے 

جسے جینا ہو مرنے کے لئے تیار ہوجائے ۔

ہمایوں اقبال ندوی، ارریہ

رابطہ، 9973722710

Sent from my Galaxy

کہیں دیر نہ ہو جائے ✍️مفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ

کہیں دیر نہ ہو جائے 

✍️مفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ (9431003131)

ذاتی اور شخصی کمزوریوں میں ایک بڑی کمزوری کام میں تاخیر کی ہے، ٹال مٹول اور وقت پر کام کر گزرنے کا مزاج اصلا ختم ہوتا جا رہا ہے،دفاتر خواہ سرکاری ہو ں یا غیر سرکاری ان میں دیر سے حاضر ہونا ایک فیشن سا ہو گیا ہے ، سرکاری دفاتر میں یہ معاملہ کچھ زیادہ ہی ہے، پٹنہ میں بعض سرکاری دفاتر کے کارکنان کا نعرہ ہے، ’’بارہ بجے لیٹ نہیں اور تین بجے کے بعد بھینٹ نہیں‘‘ کم کارکنان ہیں جواس اصول سے اپنے کو الگ رکھتے ہیں، غیرسرکاری دفاتر میں چوںکہ داروگیر کا مزاج ہے اور سب کچھ دفتر کے سربراہ اور باس کے رحم وکرم پرہوتا ہے، اس لیے ہٹا دیے جانے اورتنخواہ کٹ جانے کے ڈر سے یہاں تاخیر کا تناسب کم ہوتا ہے، دفتر کے ذمہ داروں نے اس کاحل یہ نکالا کہ حاضری کے لیے مشین کا استعمال کرایا جائے، بھائیوں نے اس کا حل بھی ڈھونڈنکالا اور انگوٹھا لگا کر چلتے رہنے کا چلن عام سا ہو گیا، بات وہیں کی وہیں رہ گئی۔

 ذمہ داریوں کی ادائیگی میں تاخیر انتہائی غیر ذمہ دارانہ اور غیر شریفانہ عمل ہے، مہینے بھر میں ایک دو دن تاخیر ہو سکتی ہے، لیکن اس کو معمول بنا لینا غیر شرعی بھی ہے اور غیر اخلاقی بھی۔ اعذا ر بہت سارے بیان کیے جا سکتے ہیں، اور لوگ کرتے ہی رہتے ہیں، لیکن عذر کی پیشی تاخیر سے کام کو انجام دینے اور دفتر میں حاضری کا بدل کسی طور پر نہیں ہے۔اس لیے اس عادت کو جس قدر جلد ہو ترک کرنا چاہیے، تاخیر کیوں ہوتی ہے؟ اس کی خاص وجہ یہ ہے کہ ہم کام کے سلسلہ میں سنجیدہ نہیں ہوتے، ہر وقت ذہن ودماغ میں یہ بات گردش کرتی ہے کہ اچھا کرلیں گے نا، ابھی بہت وقت ہے، دفتر چلے جائیں گے نا، بعض لوگ پندرہ پندرہ منٹ پر یاد دہانی کے لیے الارم لگا کر رکھتے ہیں، وقت نکلتا جاتا ہے اور الارم کے بار بار یاد دہانی کاان پر کوئی اثر نہیں ہوتا، انہیں عین وقت پر کوئی کام یاد آجاتا ہے، بعض لوگ’’ گھورپیٹھ‘‘ کے عادی ہوتے ہیں، ایسے لوگوں کو دفتر سے نکلنے کے بعد گھر کا کوئی کام یاد آجاتا ہے اور تھوڑی دور چل کر وہ گھر کی طرف چل پڑتے ہیں، ظاہر ہے ایسے میںتاخیر ہونی ہی ہے، اب اگر پوچھیے کہ لیٹ کیوں آتے ہو تو مچل کر کہیں گے کہ ’’میں دیر کرتا نہیں دیر ہوجاتی ہے‘‘۔

کبھی ایسا بھی ہوتا ہے کہ جس پروجکٹ اور منصوبے پر ہم کام کر رہے ہوتے ہیں اور اسے وقت پر مکمل کرکے کمپنی یا ادارے کے حوالہ کرنا ہے، تاخیر کی عادت کی وجہ سے ہمارے اوپر یہ خوف طاری ہوتا ہے کہ شاید ہم اس کام کووقت پر مکمل نہیں کر سکیں گے، اس سوچ سے نفسیاتی طور پر ہمارے کام کرنے کی صلاحیت متاثر ہوتی ہے اور واقعۃً ہم اس کام کو وقت پر پورا نہیں کر پاتے ، اگر ہم پوری ایمانداری کے ساتھ اس منصوبہ پر وقت کی پابندی کے ساتھ کام کرتے تو کام وقت پر مکمل ہوجاتا اور ہمیں اپنے سے بڑے ذمہ دار کی جھڑکیاں نہیں سننی پڑتیں۔

ٹالنا ایک عادت ہے، اس عادت کی وجہ سے ہی تاخیر ہوتی ہے، بڑوں نے کہا ہے کہ’’ آج کا کام کل پر نہ ڈال، جو کل کرنا ہے اسے آج کراور جو آج کرنا ہے اسے ابھی کر ڈال‘‘، جو لوگ ٹال مٹول کرتے ہیں ان کی قوت ارادی کمزور ہوتی ہے، وہ بعد میں کر لیں گے کا ورد تو کرتے رہتے ہیں، لیکن وہ ’’بعد‘‘ کبھی نہیں آپاتا، جس میں وہ اس کام کے کر گزرنے پر قادر ہوجائیں، کیوں کہ ایسے لوگوں کا ذہن آرام طلب ہوتا ہے وہ جسمانی آرام کو زیادہ اہمیت دیتے ہیں ، یہ آرام طلبی انہیں سست اور کاہل بنا دیتی ہے، اس سے وقتی آرام تو مل جاتا ہے، لیکن نتیجہ کے اعتبار سے بعد میں یہ تکلیف دہ ہوجاتا ہے اور اس کا نقصان کبھی تو اس شخص کو اور کبھی جس ادارے اور تنظیم سے وہ جُرا ہوا ہے اس کو اٹھانا پڑتا ہے۔

 نفسیات کے ماہرین کا کہنا ہے کہ ٹالنے اور تاخیر کا بنیادی سبب ہمارا دماغ ہے، ہم جب جذبات میں ہوتے ہیں تو دماغ کا وہ حصہ سر گرم عمل ہوتا ہے جسے طبی زبان میں ’’لِمبک سسٹم ‘‘ سے تعبیر کیا جاتا ہے، دماغ کا ایک دوسرا حصہ پری فنٹل کارٹکس کہلاتا ہے، یہ حصہ منصوبہ بنانے، مقاصد تک پہونچنے اور فیصلہ لینے میں ہماری مدد کرتا ہے، دماغ کے ان دونوں حصوں میں جب کھینچ تان اور کشمکش شروع ہوتی ہے اور پری منٹل کارٹکس اس کشاکش میں مغلوب ہوجاتا ہے اور ِلمبک سسٹم غالب آجاتا ہے تو ہمارے اندر لیٹ لطیفی آجاتی ہے اور ہم ٹال مٹول اور تاخیر کی گاڑی پر سوار ی کرنے لگتے ہیں،اس کی وجہ سے تاخیر تو ہوتی ہے، انسان ذہنی تناؤ کا بھی شکار ہوجاتا ہے۔

 مثل مشہور ہے کہ ’’گاڑی اسٹیشن کے قریب والے کی چھوٹتی ہے‘‘ کیوں کہ ذہنی طور پر آدمی سوچتا ہے کہ تو بغل میں اسٹیشن ہے دس منٹ بھی توجانے میں نہیں لگیں گے، پھر جب ٹرین ٹائم کو آدھا گھنٹہ رہتا ہے تو دماغ میں یہ بات گردش کرتی رہتی ہے کہ ابھی بہت وقت ہے، جب پندرہ منٹ بچ گئے تو بھی فکرنہیں ہوتی ہے جب پانچ منٹ بچ جاتے ہیں تو بھاگم بھاگ ٹرین پکڑنے کی فکر ہوتی ہے اور اب ذہن پر سوال ہوتا ہے کہ کس طرح جلد اسٹیشن پہونچیں اور پھر دماغ فیصلہ کر دیتا ہے کہ ٹرین آگئی اب تو پکڑا ہی نہیں سکتی اس طرح ٹرین تو چلی جاتی ہے اور وہ خود اپنی تاخیر کی وجہ سے منہ دیکھتا رہ جاتا ہے، اب جہاں جانا تھا اس کے لیے بہانے ڈھونڈنے میں ذہنی توانائی صرف ہوتی ہے، توانائی کام کو آگے بڑھانے میں لگنی تھی، وہ بہانے ڈھونڈھنے میں برباد ہوتی رہتی ہے۔

ٹالنے اور تاخیر کے کئی وجوہات ہوا کرتے ہیں، بعض لوگ کام کو اس لیے ٹالتے ہیں کہ وہ سمجھتے ہیں کہ ابھی اس کام کے کرنے کا وقت ہی نہیں آیا، بعد میں کر لیا جائے گا۔ بعض لوگوں کی نفسیات یہ ہوتی ہے کہ میرے ذمہ جو کام کیا گیا ہے وہ اتنا بڑا ہے کہ اس کے لیے کافی وقت چاہیے، ابھی میرے پاس اتنا وقت ہے ہی نہیں۔ بعضوں میں خوف کی نفسیات اس قدر غالب ہوتی ہے کہ اسے لگتا ہے کہ ہم اس میں کامیاب نہیں ہو سکتے اس لیے وہ کام کو کل پر ٹالتے رہنے میں عافیت محسوس کرتا ہے، بعضوں میں قوت فیصلہ کی کمی ہوتی ہے، وہ یہ فیصلہ نہیں کرپاتے کہ مجھے یہ کام کرنا چاہیے یا نہیں، بعض لوگ کام کو ٹال کر آخر وقت میں بھاگ دوڑ اور جلد بازی کا مزہ لینا چاہتے ہیں۔

ٹال مٹول اور تاخیر کا بڑا نقصان یہ ہوتا ہے کہ لوگوں کا اعتماد آپ کی صلاحیت سے ختم ہوجاتا ہے، وہ آپ کو کاہل ناکارہ اوراز کاررفتہ سمجھ کر آپ کے ذمہ کام دینا بند کر دیتے ہیں، ایسے میں آپ کا وقت برباد ہوتا ہے اور آپ بغیر کسی مطلب کے اپنے کو مشغول دکھنا چاہتے ہیں، انگریزی میں اس صورت حال کو بزی فار نتھنگ (Busy for nathing)سے تعبیر کرتے ہیں، اگر آپ کو وقت پر کام کرنے کی عادت نہیں ہے تو آپ ہمیشہ بھاگتے نظر آئیں گے، کام کا خیال آپ پرغالب آئے گا ، لیکن تاخیر کی وجہ سے خوف کی نفسیات آپ پر غالب آجائے گی اور آپ کسی کام کو اپنے ہاتھ میں لینے سے گھبرائیں گے اور ٹالنے کے لیے سینکڑوں بہانے خود سے تخلیق کر ڈالیں گے، طویل عرصہ تک اگر آپ ایسا کرتے رہے تو آپ کی ہمت پست ہوجائے گی اور دھیرے دھیرے آپ کی توانائی اور کام کرنے کی صلاحیت کا خاتمہ ہوجائے گا۔ تناؤ ، فکر ، اور قوت ارادی میں کمی آپ کی زندگی کا مقدر ہوجائے گی۔

 ٹال مٹول اور کاہلی کو عام طور سے لوگ ایک ہی سمجھتے ہیں، حالاں کہ ایسا نہیں ہے، ٹال مٹول میں آپ ضروری کا م کو چھوڑ کرغیر ضروری کام میںمشغول ہوجاتے ہیں، جب کہ کاہلی اور سستی میں ایسا نہیں ہوتا، سستی میں آدمی کسی کام کے کرنے سے گھبراتا ہے، وہ کام کوٹالتا نہیں ، بلکہ اس میں کام کرنے کی خواہش ہی نہیں ہوتی، مقصد ٹالنا نہیں کام سے گریز کرنا ہوتا ہے۔ 

 ٹال مٹول کی بُری عادت کا خاتمہ ایک دن میں نہیں ہو سکتا، خصوصا اس شکل میں جب ٹال مٹول اور تاخیر اس لت میں مبتلا شخص کے نزدیک معیوب بھی نہ ہو، ایسے شخص کے لیے ضروری ہے کہ وہ پہلے مرحلہ میں اس بات کو مانے کہ اس کے اندر ٹال مٹول کی بُری عادت موجود ہے، اس اقرار کے بعد جب بھی تاخیر سے کام کرنے یا ٹالنے کا خیال آئے، فوراسر کو جھٹکے اور خود کلامی کے انداز میں کہے کہ مجھے اس کام کو ابھی کرلینا چاہیے کیوں کہ یہ کام بہت اہم ہے، پھر مضبوط قوت ارادی کے ساتھ اس کام کو شروع کر دے، وقت کا انتظار نہ کرے، اس لیے کہ گیا وقت پھر ہاتھ نہیں آتا، اگر آپ کادماغ کہے کہ اسے اچھے سے کرنا ہے، اعلیٰ درجہ پر لے جانا ہے تو سمجھئے کہ ابھی ٹالنے کی عادت آپ سے رخصت نہیں ہوئی ہے، ایسے موقع سے آپ سوچیے کہ کام نہ ہونے سے بہتر ہے کہ کچھ ہوجائے، آپ کی یہ سوچ آپ کو کام کے لیے تیار کرے گی اور ہو سکتا ہے کہ آپ اس کو اچھے انداز میں بھی کر گذریں۔

 ایک جائزہ کے مطابق دنیا کے تقریبا پنچانوے فی صد لوگ ٹال مٹول اور تاخیر والے رویہ کے شکار ہیں، یہ ایک ایسی عادت ہے جس نے مرض کی شکل اختیار کر لی ہے، ہمیں اس مرض سے ہر حال میں نجات پانا چاہیے، نجات پانے کے طریقوں پر اوپر روشنی ڈالی گئی ہے، اس کے علاوہ ایک طریقہ فرانسکو سیریلونے پیش کیا ہے، اس کا اصطلاحی نام پروفیشنل پوموڈ ور و ہے، پوموڈورو اطالوی زبان میں ٹماٹر کے معنی میں آتا ہے، چونکہ سیریلو نے پہلے اسے ٹماٹر سے ملتی جلتی گھڑی کے طو پر پیش کیا تھا، اس لیے اس کا نام پوموڈ ورو رکھا گیا، اس فارمولے کے مطابق تاخیر اور ٹال مٹول کی عادت کو چار مرحلوں میں دور کیا جا سکتاہے، پہلے ایک کام طے کیجئے، پچیس منٹ تک مسلسل اس کام کو کرتے رہیے۔ پچیس منٹ کے بعد پانچ منٹ آرام فرمائیے، اس طرح چار پوموڈور ومکمل کرکے تیس منٹ کا وقفہ لیجئے،لیکن ضروری ہے کہ پچیس ، پچیس منٹ کا جو وقت آپ نے طے کیا ہے اس میں کوئی دوسرا کام نہ کریں حتی کہ فون کا استعمال بھی نہ کریں، تب ٹال مٹول کی عادت آپ کی جاتی رہے گی ۔

جہاں تک مسلمانوں کا معاملہ ہے اسے وقت کی پابندی کے ساتھ نماز کا حکم دیا گیا ہے، ٹال مٹول کرنے والے اگر وقت کی پابندی کے ساتھ با جماعت نماز کا اہتما م کرنے لگیں اور اسے اپنی عملی زندگی میں داخل کر لیں تو کبھی نہ لیٹ ہوں گے اور نہ ہی ٹال مٹول کا مزاج بنے گا، نماز کی پابندی تکبیر اولیٰ اور جماعت کے ساتھ اس کی ادائیگی تاخیر کرنے والوں کے لیے اکسیر کا درجہ رکھتی ہے، نماز کی پابندی عبادت ہی نہیں ہمیں تاخیر اور ٹال مٹول نہ کرنے کا سبق بھی دیتی ہے، کاش میری قوم اسے سمجھ پاتی۔

دہلی میں اردو اساتذہ کی بھرتی کا مسئلہ؟

دہلی میں اردو اساتذہ کی بھرتی کا مسئلہ؟

 

 پروفیسر اخترالواسع

عام آعادمی پارٹی کی دہلی حکومت میں اردو والوں کی دیرینہ فرمائش پر ٹی جی ٹی (اردو) کی ۹۱۷؍اسامیاں مشتہر کرائیں اور ۸؍ستمبر۲۰۲۱ء کو اردو اساتذہ کی اسامیوں کے لئے امتحان میں ۱۵۲۲؍ امیدواروں نے آن لائن امتحان دیا لیکن جو نتائج آئے و ہ بہت مایوس کن اور تشویشناک رہے ہیں کیوں کہ۹۱۷؍اسامیوں میں سے مرد اور خواتین کو ملا کر کل ۱۷۷؍امیدوار ہی پاس ہو پائے۔ یعنی ۷۴۰؍ پوسٹیں پھر خالی رہ گئیں جو کہ بہت افسوسناک ہے-

اب ایک نئی بھاگ دوڑ شروع ہوئی ہے اور وہ یہ کہ اساتذہ کی اسامیوں کی بھرتی کے لئے جو دو پرچے ہوتے ہیں اس میں پہلے پیپر میں پاس ہونا لازمی ہوتا ہے جو کہ جنرل پیپر ہوتا ہے اور اس میں جنرل زمرے میں چالیس فیصد اور او بی سی زمرے میں ۳۵؍فیصد نمبر حاصل کرنا ضروری ہوتا ہے۔

افسوس کی بات یہ ہے کہ اردو والے اتنے نمبر بھی پہلے پرچے میں نہیں لا پائے اور اب یہ مطالبہ کیا جا رہا ہے کہ پہلے پرچے میں پاس ہونے کو ضروری قرار نہ دیا جائے اور پہلے پیپر میں اور اردو کا جو پیپر ہے انہیں دونوں کو ملا کر اردو والوں کے پاس ہونے کا تناسب نکالا جائے۔ غالباً اس مطالبے کے پیچھے مقصد یہ ہے کہ اگر ایسا کیا جائے تو پھر اردو کی ساری پوسٹیں بھر جائیں گی۔

سوال یہاں یہ پیدا ہوتا ہے کہ اس طرح کی رعایتوں کے سہارے کسی بھی مضمون کے اساتذہ کی بھرتی کو کس طرح جائز کہا جا سکتا ہے؟ استاد اگر خود رعایتوں یا سفارش کی بیساکھیوں سے کلاس روم میں جائیں گے تو وہ کس طرح اپنے کلاس کے بچوں کو دنیا سے مقابلہ کرنے کا اہل بنا پائیں گے؟

ہمارے دوست منظر علی خاں نے، جو کہ ظرف ایجوکیشنل اینڈ ویلفئر سوسائٹی کے صدر ہیں اور اردو اساتذہ کی تقرری اور اردو کی تعلیم کو ممکن اور موثر بنانے کے لئے ہمیشہ جدوجہد کرتے رہتے ہیں، یہ ڈر بھی ظاہر کیا ہے کہ جو۱۷۷؍امیدوار کامیاب ہوئے ہیں ضروری نہیں کہ ان سب کا بھی تقرر ہو۔ ان کے بقول بہت سے امیدوار کہیں نہ کہیں خامی یا درازی عمر کی وجہ سے باہر کر دیے جائیں گے اور ان ۱۷۷؍میں سے بھی ۱۲۰؍لوگوں کا ہی تقرر ہو پائے گا۔

جناب منظر علی خاں کی طرح ہمیں بھی اس صورتحال پر تکلیف بھی ہے اور افسوس بھی، لیکن انہوں نے وزیر اعلیٰ اور نائب وزیراعلیٰ کو خط لکھ کر جویہ مطالبہ کیا ہے کہ اردو ٹیچر کی کمی کی وجہ سے ان امیدواروں کا میرٹ دونوں پیپر ملا کر نکالا جائے اور اگر ایسا کیا جائے تو پھر اردو کی ساری پوسٹ بھر جائیں گی۔

پہلی بات تو یہ کہ ایسا کرنے پر بھی ساری پوسٹیں نہ بھری گئیں تو کیا ہوگا؟ دوسرے جن مستقبل کے اردو اساتذہ کو اپنے زمانے کے دیگر بنیادی اور ضروری مضامین کا علم و ادراک ہی نہیں وہ آنے والی نسل کے اردو پڑھنے والے بچوں کے ساتھ کیا انصاف کر پائیں گے؟

کچھ ناکام امیدوار دہلی اردو اکیڈمی کے وائس چیئرمین جناب تاج محمد صاحب سے اسی بات کو لے کر ملے اور انہوں نے بھی انہیں اس بات کا یقین دلایا کہ وہ اس سلسلے میں نائب وزیراعلیٰ سے بات کریں گے۔

راقم الحروف کو اس بات کا بخوبی پتا ہے کہ اس کی ان باتوں سے وہ نوجوان جو کہ اس مقابلہ جاتی امتحان میں کامیاب نہیں ہو سکے، ناراض ہوں گے لیکن انہیں یہ نہیں بھولنا چاہیے کہ ایک اچھے استاد کی سچی پہچان محبت اور محنت سے عبارت ہوتی ہے اور اگر استاد مطلوبہ لیاقت اور مہارت سے عاری ہے تو وہ کلاس روم میں خود تماشہ بن کر رہ جاتا ہے اور اپنے طلبہ کے بیچ اپنی کوئی جگہ نہیں بنا پاتا۔ ویسے بھی اس دنیا میں جہاں سب کو خوب سے خوب تر کی تلاش رہتی ہے-

جہاں ایک استاد صرف کسی ایک مضمون تک محدود نہیں رہتا ہے اور خاص طور سے اسکول کی سطح پر تو اسے ہنگامی ضرورتوں کے تحت کوئی بھی مضمون پڑھانے کو دیا جا سکتا ہے- خاص طور سے سوشل سائنسیز اور ہیومنٹیز سے تعلق رکھنے والے مضامین۔ اب اگر آپ نے اپنے خصوصی مضمون کے علاوہ دیگر مضامین میں ضروری مہارت حاصل نہیں کی تو آپ اپنے لئے کوئی اچھی جگہ نہیں بنا سکتے۔

ایک ایسے وقت میں جب سیکنڈ دویژن لانے والے بھی اچھے کالجوں میں داخلہ نہیں لے پا رہے ہیں اور مقابلہ اب ۹۰؍فیصد سے صد فیصد کے بیچ میں ہے تو ایسے وقت میں اردو والوں کو نہ صرف اردو میں بلکہ جیسا کہ اوپر کہا گیا ہے سوشل سائنسیز اور ہیومنٹیز جیسے دوسرے میں مضامین میں بھی ملکہ حاصل کرنا ہوگا۔

میں یہ سمجھتا ہوں کہ ہمیں اس کے بجائے کہ رعایتیں مانگتے پھریں، اردو اکیڈمی کے وائس چیئرمین اور اردو سے متعلق اداروں کے دیگر ذمہ داروں سے مجھے یہ عرض کرنا ہے کہ وہ نائب وزیر اعلیٰ، جو وزیرتعلیم بھی ہیں اور اردو اکیڈمی بھی ان کے دائرہ اختیار میں آتی ہے، سے یہ گزارش کریں کہ اردو میں جو ۷۴۰؍ سیٹیں نہیں بھری جا سکی ہیں ان کا دوبارہ امتحان کرایا جائے اور ہر وہ امیدوار جو اس میں کامیابی حاصل کرے، اگر اس کی عمر یہ مقابلہ جاتی امتحان دوبارہ پاس کرتے وقت زیادہ ہو جاتی ہے تو اس کی عمر اس وقت سے دیکھی اور مانی جائے جب اس نے ان اسامیوں کی مشتہری کے وقت فارم بھرا تھا۔

اس کے ساتھ دہلی اردو اکیڈمی کو اس مجوزہ مقابلہ جاتی امتحان میں بیٹھنے والوں کی کوچنگ کا مستحکم اور منصوبہ بند طریقے کا انتظام کرے۔ اور اس طرح سے اس بات کو یقینی بنائے کہ ہمارے بچے اور بچیاں دوسرے پرچے میں ہی نہیں پہلے پرچے میں بھی شاندار کامیابیاں حاصل کریں۔

یہاں دہلی اردو اکیڈمی کے وائس چیئرمین اور دیگر ذمہ داروں کو مجھے صرف یہ یاد دلانا ہے کہ جب اردو اساتذہ کی بھرتی کے لئے سرکار نے سی ٹی ای ٹی کو لازمی قرار دیا تھا تو اردو اکیڈمی نے بہت اہتمام کے ساتھ ان بچوں کی کوچنگ کا انتظام کیا تھا اور یہ بات ہمیشہ باعث اطمینان رہے گی کہ اردو اکیڈمی کی اس کوچنگ کے اس نتیجے میں اس کے کوچنگ سینٹر سے تربیت یافتہ لڑکے اور لڑکیاں سی ٹی ای ٹی کے امتحان میں نمایاں طور پر کامیاب ہوئے۔

اگر کل یہ ہو سکتا ہے تو آج کیوں نہیں؟

اگر اردو اکیڈمی کے پاس جگہ کی کمی کا مسئلہ ہو یا دہلی جس طرح پھیلتی جا رہی ہے اس سے امیدواروں کو کسی ایک جگہ پہنچنا آسان نہ ہو تو دہلی اردو اکیڈمی اس میں ایک مرکزی اور محوری ادارے کے طور پر جامعہ ملیہ اسلامیہ کی فیکلٹی آف ایجوکیشن، انجمن ترقی اردو (ہند)، غالب اکیڈمی، ایوان غالب، جمنا پار میں ذاکر حسین اسکول، کریسنٹ پبلک اسکول، نظام الدین میں نیوہورائیزن اسکول اور ہمدرد پبلک اسکول جیسے اداروں سے اشتراکِ عمل کے ذریعے اسے ممکن بنا سکتی ہے۔ اگر دو سے تین مہینے کی باقاعدہ، باضابطہ، منظم اور منصوبہ بند کوچنگ کا انتظام ہو جائے ان سارے اداروں میں تو ۷۴۰؍سیٹوں پر نمایاں کامیابی حاصل کرنے والے طالب علموں کی تعداد دیکھتے بنے گی۔

(مضمون نگار جامعہ ملیہ اسلامیہ کے پروفیسر ایمریٹس (اسلامک اسٹڈیز) ہیں۔)

مضمون نگاہکرپٹو کرنسی مفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ

مضمون نگاہ

کرپٹو کرنسی 

مفتی محمد ثناء الہدیٰ قاسمی نائب ناظم امارت شرعیہ پھلواری شریف پٹنہ

معاشیات کا اصول ہے کہ ضرورت ایجاد کی ماں ہوتی ہے، بینکوں کے سخت ہوتے نظام اور مالیات کی رازداری کے محفوظ نہ ہونے کی وجہ سے ۲۰۰۸ء میں ایک نئی کرنسی وجود میں آئی، اسے عالمی کساد بازاری کے زمانہ میں ڈیولپرستوشی ناکاموٹو اور ان کے دوستوں نے کیا تھا تاکہ صارفین بینکوں کی غیر ضروری پابندی سے بچ سکیں، لطف کی بات یہ ہے کہ اس کرنسی کوآپ روپے ، ڈالر، پونڈ، درہم، دینار اور یورو کی طرح جیب میں نہیں رکھ سکتے، لیکن اس کی مقبولیت کا یہ عالم ہے کہ ۱۷؍ دسمبر ۲۰۲۱ء کو ۱ء ۲ کھرب ڈالر کی کرپٹو کرنسی عالمی بازار میں موجود تھی، یہ کرنسی کسی ایک نام سے نہیں جانی پہچانی جاتی ہے، بلکہ اس کے کئی نام ہیں، یہ کرنسی جو بٹ کوائن ، اتھیریم ، بنانس کوائن ، ٹیتھر، سولانہ، کار ڈانو، ایولانش کے نام سے مختلف ملکوں میں اپنی شناخت رکھتی ہے، صرف کمپیوٹر میں موجود ہوتی ہے ،لوگوں کی توجہ اس کرنسی کی طرف اس لیے بڑھ رہی ہے کہ بینک کے بغیر، سہولت کے ساتھ کاروبار کو فروغ دینے میں یہ معاون ہے۔

 اس کرنسی کی خامیاں بھی کم نہیں ہیں، اس حوالہ سے اندیشے اور خدشات بھی بہت ہیں، اسی وجہ سے ہندوستانی حکومت نے شروع میں اس کی مخالفت کی تھی ، رزرو بینک آف انڈیا نے بھی اس کے خلاف بات کہی تھی ، لیکن اب حکومت اس کی بڑھتی ہوئی مقبولیت کے پیش نظر اسے قبول کرنے کے لیے ذہناً تیار ہوگئی ہے اور دیر سویر پارلیامنٹ میں بل کے ذریعہ اسے منظور کرسکتی، ایسا اس لیے ضروری ہے کہ اگر بھارت سرکار نے منظوری نہیں دی تو اس کے دولت مند رفیق اور حلیف اس سے خفا جائیں گے، نقصانات چاہے جوہو ، مرکزی حکومت کا نظریہ یہ ہے کہ مالداروں کو نا خوش کرنا ملک کے مفاد میں نہیں ہے۔

یوگی کو ٹکٹ تک نہیں دے رہی ہے بی جے پی : اکھیلیش

یوگی کو ٹکٹ تک نہیں دے رہی ہے بی جے پی : اکھیلیش

سماجوادی پارٹی (ایس پی) کے صدر اکھیلیش یادو نے جمعہ کے روز اترپردیش کے وزیراعلیٰ یوگی آدتیہ ناتھ پر ہدف تنقید بناتے ہوئے کہا کہ بھارتیہ جنتا پارٹی (بی جے پی) کے بڑے رہنما خود وزیراعلیٰ سے پریشان ہیں، اسی لیے انھیں اسمبلی کا ٹکٹ تک نہیں مل رہا ہے۔

انہوں نے یہ بات ایک پروگرام میں کہی جس میں وہ حصہ لینے آئے تھے ، انہوں نے صحافیوں سے ایک سوال کے جواب میں دعویٰ کیا کہ وزیراعلیٰ یوگی بی جے پی کے رکن ہی نہیں ہیں۔

پنجاب میں وزیراعظم نریندر مودی کی سکیورٹی میں لاپرواہی کے معاملے میں رد عمل ظاہر کرتے ہوئے اکھیلیش نے کہا کہ پنجاب حکومت کو مودی کو جائے ریلی تک جانے دینا چاہیے تھا۔ جس سے انھیں خالی کرسیوں کو دیکھ کر پنجاب میں بی جے پی کی صحیح صورتحال کا پتہ چل جاتا۔

مسٹر یادو نے بی جے پی پر جھوٹے اشتہارات سے عوام کو ورغلانے کا الزام عائد کیا۔ اکھیلیش نے کہا کہ ایس پی حکومت کے منصوبوں کو اپنے منصوبے قرار دے کر بی جے پی عوام کو گمراہ کر رہی ہے ۔ انہوں نے کہا کہ سڑکوں پر چُھٹّہ جانور سے کسان اور راہگیر پریشان ہیں۔ انہوں نے کہا کہ یوگی حکومت میں پریشان کسانوں، نوجوانوں، غریب اور محروم خاندانوں سے بی جے پی کو 'جن معافی یاترا' نکال کر معافی مانگنی چاہیے۔

اترپردیش سے غنڈہ راج ختم کرنے کے بی جے پی کے دعوے پر اکھیلیش نے کہا کہ یوگی حکومت ضلع کے مافیاؤں کی فہرست جاری کیوں نہیں کر رہی ہے۔ انہوں نےکہا کہ ہٹلر کی حکومت میں 'پروگینڈہ منسٹر' ہوتا تھا لیکن یہاں تو پوری بی جےپی ہی 'پروپیگنڈہ پھیلا رہی ہے۔

ایس پی کے صدر نے قبول کیا کہ اپنی حکومت کی ترقیاتی کاموں کو عوام تک پہنچا پانے میں ناکام رہنے کے سبب ایس پی 2017 میں حکومت بنانے میں ناکام رہی۔ انہوں نے کہا کہ بی جے پی حکومت سے بے حال عوام اس بار 2022 میں اکثریت سے حکومت بنائے گی۔